Luka Enjil 22
22
Bag. 22.
1Kalfitina kore awtanossum, basay an aweran. 2Wide fegirina samli duligon wide abajiligon akasshan mine tekki arrigi berosrangi. Mine gebilagi asarkisan.
3Shetan Yahudana ar torossum, Isharyutiy ān awerander. Tekkon diminde owingarirtonum. 4Ter jurgi fegirina samli duligodon wide askarigi akiyeligodongon bain amintidirsum, mine ter tekki tirgi bikiyetidiringi. 5Tir wide guros tekki wadesan dugu wekki bitirran an. 6Tekkon wadosir, watti ter tekki tirgi bitidiringi akasshum, jemarton warigir.
7Kalfitina ugros bidasum, tedder basana gojir agojtakkin. 8Yesu wide Hanagon Butruskongi ishin wetidirsum: „Jurgi basana kalegi alledecchirwe, kallunna joro.“ 9Tir wetirsan: „Sayer allerungi awersin?“ 10Tirgi wetidirsum: „Ir mediner torunna wattigi zol wer irgi babidin, kube essindi wekki kagingon. Tenn agabir juwe ter bitonna kar. 11Wide kana tirtigi wetirwe: ‚Arif ekki awetirin: Aigon anna hiranigon basana kalgi bikallunn agar se?“ 12Ter irgi bamintidirin gurfa awidibul dul wekki. Teddo allewe!“ 13Tir wide jurgi ter wesin nawre elsan. Wide basana kalgi allesan.
14Watti tangad tegsum, wide ishinbuligon tekkodon. 15Ter wide wetidirsum: „Ai shehwaged shehwesim, in basana kalgi irgodon kalli an, wejiatakkimendinn owollo. 16Minergi ai irgi wetidirrin, owittiged ai teddoton bikalminim artina mulkir timenbokon.
17Wide dibite wekki injirgi shukros wesum: „Arwe. Ingi inna barer bagijwe. 18Minergi ai irgi wetidirrin, ai enebna oliserton binimnim artin mulki tanbokon.“ 19Widegon kal wekki injirgi shukros birtos wide sokossidir wesum: „In anna jita teran, inna jiradilo bitogijtakkil. Ingi awwe aigi jilerunna jiradilo.“ 20Dibitegon ashan agabir arrigi wesum: „In dibite ter ahad ēr teran anna gewir, inna joro bibogtakkillo.“
21„Ama aigi biselimelna i aigodonum kaldogor. 22Zolna todton nogbun tekked bajbun nawite. Ama urmud man zol tekki biselimeldum.“ 23Tir wide tinna barer isigarki ugudisan: „Ni terre aba addeton ingi awarki newyebun?“
24Tinna barergon lagaj wer dasum, ni terre tiddeton dul ter engi. 25Ter tirgi wetidirsum: „Umachi origi koran, tindogochir dulanbuligi, wide hukumgi tindogochir koligon saaday an aweran. 26Ama iri ikke biturubmunun. Ama idder dul inna kina galgan agad. Owolanbulgon inna nugdan agad. 27Edi saï dul terre? Agilo wala kute tebos ajelil? Agil terregmunum? 28Ama ai inna barer ajelil galg erin. Ir anna jeribadir kewdeli teran. 29Aigon irgi mulkigi biwerriteirrin, abo aigi werritesin nawre, 30aigodon kallun nirunna joro anna mulkin tur. Wide kursichin dogor tegos Israelna bagdi diminde owingarigi bihukmeran.“
31„Siman, Siman, ahan shetan irgi iw nawre garbirri an werissum. 32Ama ai enna joro salisim, enna imangi bajmen an. Ekkon widen kello imbesigi kogorkirir.“ 33Butrus tekki wetirsum: „Wo tir, ai hadreburin ekkodon habsir juwarki widegon diarro junbokon. 34Ter wetirsum: „Ai ekki wetirrin, wo Butrus, olongu darbad kililemeningon er aigi gir toskigi bigubin, aigi aïyirmunum an.“
35Terin agabir wetidirsum: „Ai irgi busugkiyir wide awinkiyir wala taragakiyir ishinirringad irgi urtikiri mirma?“ Tir wesan: „Ilah an.“ 36Wide wetidirsum: „Ama eleken busugki kol inj agad wide awingon. Wide komenigon tenna kadegi janos siwid wekki jan agad. 37Mine ai irgi wetidirrin, adder in bajbul timadti kon: ‚Milichigodon idir tosum.’ Mine andogor webul kel wekki kon.“ 38Tiri wide wesan: „Wo arti, ahan indo siwid owi daran.“ Tirgi wetidirsum: „Kefen“.
39Wide ter awsin nawre zetunna gunagir belsum. Hiranigon tekki tebaesan.
40Agarki duredirgi wetidirsum: „Saliwe, jeribadir tomendunna joro. 41Wide tinnaiton kulu werna lufadir wariyanos tenna kurtichin dogor ungos salisum: 42„Wo abo, er on weriskin, in dibitegi annaiton warianos an. Ama ai awerisrin nawremunum. Er awersin nawre.“ 43Malaika wer simerton tekki ta beltir kogorkirsum. 44Wide karsiger dabungon asalisum desen digrigir. Tenna tilattigon gewna nakariyan shugurbusum ariddogor. 45Salarton imbolos wide tasum tenna hiraninai. Teddo muslarked nerburangon eledirsum.
46Tirgi wetidirsum: „Ir ma nerburun? Imbel saliwe jeribadir tomendunna joro.“
47Tirgodon abainingon jema wer tasum! Wide Yahuday an awerangon, diminde owingarirton wer, tinn owolgi arbusum. Ter awtansum, Yesugi dogiry an. 48Yesu tekki wetirsum: „Wo Yahuda, er dogar wekked zolna todti biselimena?“ 49Tekkodon dali uru nalos wesan: „Wo arti, siwidted jomirwa?“ 50Tiddeton wer fegirina samil dulna nugudti jom, tenna ulug iyindigi merossum. 51Yesu widegir wesum: „Welesewe“. Wide tenna ulugki kumirgi gengirossirsum. 52Wide Yesu fegirin samli duligon wide askarigi akiyeligon wide samli tekk abidi tareligongi wetidirsum: „Kaenu magas werdogor bel tasure siwdiged wide wichiriged? 53Ahan ai irgodon nahan nutin jamar dasim. Igi andogor sokekomnun. Amagon in inna watti teran wide dulumana gudrandigon.“
54Tir wide tekki arrigi sugejjusan fegirina samil dulna kan tugir. Butruskon warirton tenn agabki aredasum. 55Kana seler ig wekki ulos wide teddogon ittiwrigodon agrangon Butrus tinna barer targi tegossum.
56Nogo wer tekki nalossum ignai agingon. Tekki ururgi wesum: „Ingon teran tekkodon dasum.“ 57Ter gub wesum: „Ai tekki aïyirminim, wo en.“ 58Kinnenn agabir owitti wer nalos wesum: „Er tiddetonum?“ Butrus wide wesum: „Wo zol, ai ter terminim.“ 59Shob wer nogsinn agabir echel wer alegir nalos wesum: „Aleged, ingon teran tekkodon dasum, mine ter Jelilloton engad.“ 60Butrus wesum: „Wo zol, ai aïyirminim er mingi awengi.“ Tenna wattir, ter abainingon, darbad kililesum. 61Tirti wide dire Butruski urusum. Butruskon tirtina weregi jilesum, tekki mine wetirsingi: „Darbad elgon kililemeningon gir toskigi aigi bigubn an.“ 62Butrus wide bochigir belligi oyar nadi wekki oisum.
63Ogji Yesugi morogredagiligon tekked aüsusan wide tekki ajomdigsan. 64Widegon tekki tagros koidogor jomoska aïsigsan: „Nebyer an ni ekk ajomingi.“ 65Wide urti digrichi werigi tendogor weka ajedifesan.
66Ugros wide belingad gebilana samli ta jamesan, fegirina samli duligon abajiligon. Wide tekki tinna jemattir atta ebros 67wide wetirsan: „Er on komisbul ter ekin, argi wedecchir.“ Tirgi wetidirsum: „Ai on irgi wetidirkiri, iri bamnemnun. 68Ai on irgi isigirkiringon, biwidegirdenmunun, wala aigi biwakemnun. 69Elekenton zolna tod artina gudran iyinneged bitegin.“ 70Male wide wesan: „Er wide artina tod terre?“ Tirgi wetidirsum: „Iri awerun aigi ter term an.“ 71Tir wide wesan: „Ar wide mingir elgon shahada wekki akashrun? Ar tenn agilloton gijressun!“
Айни замон обунашуда:
Luka Enjil 22: XNZ1912
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Published by the British and Foreign Bible Society in 1912.