Luka Enjil 11
11
Bag. 11.
1Agar werro salessinn agabir tenna hiranirton wer wesum: „Wo tir, salagi argi kurkidir, Hana tenna hiranigi kurkidirsin nawite.“
2Ter wetirsum: „Salirunna kello ikke wewe: Wo abo, simechir dal, enna er on gadistakkel. Enna mulk on tarel. Er awersingon simer abbun nawite ikkegon ariddogor awtakkel. 3Kalloton argi kikelgi ugros nutin decchiru. 4Wide anna miligidigi wakedecchiru. Mine argon andogochir miligidti aawil malegi awaketidirrun nawre. Wala argi jeribadir undurirmen, milirton argi osarna masir.“
5Wide tirgi wetidirsum: „Ni wer iddeton tiwri wekki kongon ugun selegi tennai talin jurgi wide tekki wetirkin: ‚Wo awri, aigi tube toskigi ewirtiged denu! 6Mine ambes safar werroton tasum, wala annai tenn owollo uskurrin damnum’ — 7nina tiwri arerton biwidegirtirin?: ‚Aigi mariskidimen. Babkon eleken kobbun. Affichigon aigodon ogirro nibdir nerburan. Ai eske imbelligi ekki bitirminim.’ 8Ai irgi wetidirrin, ter on imbelligi bitirmenkingon tenna tiwri engad, tenna beddena digrikaneged imbelligi bitirin ter awersingi.“
9„Aigon irgi wetidirrin: Isigwe, bitirtakkirun. Kashwe, bellun. Kokiwe, irgi bikussidirran. Mine isigil male barin. 10Wide kashilgon belin. Wide kokilgon bikustakkitirin.
11Ni iddeton, timbab engon, tenna tod kal wekki tekki isigkin, kulu wekki bitirin? Wala kare wekki isigkin, āya wekki bitirin karen agarro? 12Wala gaskatti wekki isigkin, ichin wekki bitirin? 13Won iri ikke usi erungon tirar seregi iyirka inn affichigi atidirrun. Won saï kottekked inin dogor digrigir abo simer dal newerti gadisebuli tekki isigiligi bitidirmen?“
14Newerti mili wekki aossum. Man newertigon mumud esum. Newerti miligi ososingad mumud wide bainsum.
15Jemagon wide tin ajibesum. Ama tiddeton weri wesan: „Balazabul, newertichi milichina samilged teran newertichi milichigi aosin.“ 16Wide echeli weri tennaiton aya wekki simerton werissan, tin jeriberu an.
17Tinna erigki iyiros tirgi wetidirsum: „Mulki tennewertin dogor bagbul male biborshugrin. Wide kachi wer wenn dogor biborshugurran. 18Shetan on tekkon tennewertin dogor bagbukin, won mine tenna mulki bikewdin? Ir awerun, ai Balazabulged shetanigi aosirri an. 19Ai on Balazabulged shetanigi aoskirin, won inna toni niged aosran? Inin jiradilo tiri irgi bigadyekandan. 20Ama ai on artina subaged shetanigi aoskirin, artina mulki irg abidi bidasum. 21Zol gudrakol wer silahked tenna kagi harsekin, tenna dugu dullan bikewdin. 22Ama tendogor kogor wer tekki eskiroskin, wide silah ter tendogor ejekebusingi duked wide tenna sheigi biganimedin.“
23„Aigodonmenil aig abidum. Wide aigodon jamegirmenil ter agulin.“
24„Newerti nijis boloskin zol werroton, agari sowodiged nog taka weleserarki akashin. Won ter on misirkin, tennewertir awen: ‚Ai anna kagir biwiderin, teddoton belsingir.’ 25Ter wide wide targi kalibungon neybungon eled, 26ter wide lefte jurgi newerti kolod tendogor milichi werigi aredir bitan. Wide teddo biweleseran. Man zolna agabkon tenna owoldin dogor bimiliyanin.“
27Ter inged abainingon en wer jemana turton tenna hisigi soke tekki wetirsum: „Barkebun tu ekki injel, wide ertichi ekki igideli.“ 28Ama ter wesum: „Ila, barkeburan artina were gijirka ahafadeli.“
29Jemachi adetijamerangon ter ugudi wesum: „In jil mili aya wekki awersin. Aya wekkon tekki bitirtakkimnum, Yunan nebin ayag anmenkin. 30Mine Yunan Niniwan idinai ayay esin nawre, ikkegon teran zolna todted bawtakkin in jilna jiradilo. 31Dinadna gugi ungona en or bimbelkanin in jilna ogj ig abidi. Wide bidineirkanin. Mine in en or tenna kidir aridna kochirton tasum, Solumna erigki gijirri an. Won ahan inna misichin togor Solumdogor dulgi. 32Dinadn ugugi Niniwana ogji bimbelkandan in jilg abidi. Wide bidinekandan. Mine tiri tubekosan Yunanna beshiradted. Won ahan inna misichin togor Yunan dogor dul wekki.“
33„Wala zol wer komsedi wekki ulos abokkirmunum. Wala fuke werna togor aündurmunum. Ama tudun dogor aüskurin, tobuligi dawigi nalw an.“
34„Enna jitana dawi misi teran. Enna mis on serey ekin, enna jita male dawirum. Won enna mis on us ekin, enna jita male dulumanbun. 35Uru nal, ter on dawi edder dal dulumanmeningi. 36Won enna jita maley on dawir ekin, tedder bagid wer dulumanmunum. Ama male dawirum, komsedi endogor adawen nawite.“
37Ter abainingon Farisi wer tekki tennai gadtakk an werissum. Ter wide targi tegossum. 38Farisi uru nal ajibesum ichigi ewmen kaler tegsingi. 39Yesu tekki wetirsum: „Eleken, wo Farisichi, ir dibitegon koskonna bochigi aewrun. Ama inn are kabkarkon wide habiskanegonged eyebun. 40Wo gabichi, bochigi awel aregi awkomnu? 41Dadichin tur dabulgi sadagagir sokewe. Ikkegon dadichi male irgi bibartebtidirran.“
42„Ama urmud indum, wo Farisichi, dimniregi aarili nanaïrton, shedabirton, wide jakud malerton. Wide iri awakerun sewagidton wide artina dolegon. Ingi awar serey esum mangi wakimentag.“
43„Urmud indum, wo Farisichi! Mine tegari koyaldichigi adollungad jamachir, wide salamigi sugin tur.“
44„Urmud indum, wo abajili, wide Farisichi habisi! Mine iri techi bokibuli galgim. Wide tindogochir ataleli iyirbumnan.“
45Sherian idirton wer widegir wetirsum: „Wo arif, er ingi wenna wattigi er argoji teran adidirin.“ 46Ter wide wesum: „Urmud indum, wo sherian idi! Mine ir zoligi dulo injitakkimenilgi asoketidirrun, won iri wala suba wekked akumimendungon.“
47„Urmud indum! Mine nebichina techigi agoirungad. Wide imbabigon tirgi beirsan. 48Ikkegon ir ashehederun, wide imbabin awdigi aseregirrun. Imbabi tirgi beirrangad irgon tinna techigi agoirun. 49Ahangon mine artina hekma awengi: ‚Ai tirgi bishintidirrin nebichigon ishinbuligongi. Tiddeton werigi bibeirran, echeligon biturirran, 50in jilnaiton tinna gew dunyan kelloton weristakkinna jiradilo: 51Habilna gewirton Zakariyana gewir junbokon, man gojirna kulugon kagonna barer dabel.’ Eyo, ai irgi wetidirrin, in jilnaiton teran biweristakkin.“
52„Urmud indum, wo sherian idi. Mine iri ilimna kusedigi ared agili. Wala iri tokomnun. Wala atoligi tow ankomnun.“
53Yesu wide bochir mandoton bel bidangad tekk abidi desenkiyr uri torgi tekki beddisan, owittiged hajachi digrichi weriged baintidir an, sherek wekki uskurtirw an, 54tekked were wekki tenn agilloton kabkirw an.
Айни замон обунашуда:
Luka Enjil 11: XNZ1912
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Published by the British and Foreign Bible Society in 1912.