Hanana Enjil 3
3
Bag. 3.
1Id wer dasum Farisichirton, tenn erigon Nikudimus esan. Yahudichina saml esum. 2In ugu wekki Yesunai targi wetirsum: „Wo rabi, ar iyirrun er artinaiton tasingi fegiran. Mine zol wer eske in ayachi er aawinigi awmunum, arti on tekkodon damenkin.“ 3Yesu rude wide wetirsum: „Aleged, aleged ekki wetirrin, zol on erkir uskitakkimenkin, eske artina mulkigi nalmunum.“ 4Nikudimus wetirsum: „Won mine zol dulanossinn aharro buskitakkin? Aba owittiged tinenna tur torgi wide buskitakkina?“ 5Yesu rudetirsum: „Aleged, aleged ekki wetirrin, zol on essirton wide newertirton uskitakkimenkin, eske artina mulkir tomnum. 6Jitarton uskibul, ter jitama. Ama newertirton uskitakkibul, ter newertima. 7Ajibemen, ekki wetirkirin: Ekki lezmebun erkir uskitakkar. 8Turug aüfin ter abirgin agarkir. Ekkon tenna hisigi agijrin. Ama sayerton tasingi iyirmunum, wala saïgir ajungi. Ikke teran bun newertiged uskitakkibul male.“ 9Nikudimus rude wetirsum: „Mine in esketakkin?“ 10Yesu rude wetirsum: „Er Israelna arif dul teran, wala ingi er afehmemnu? 11Aleged, aleged ekki wetirrin, arg ankin, ar aïyirrungi abaindun, wide ar nalsunged ashehederun. Won irgon annā shahadagi ageblemnun. 12Ai on irgi ardir dalgi wetidirkirin, aamnemnun. Won mine bamnerun, ai on irgi simer dalgi wetidirkirin? 13Wala wekkon simegir kujkomnum, simerton shugur tarelg anmenkin. Tekkon zolna tod teran.“
14„Wide Muse āyagi halar sokesin nawite, ikkegon hajebun zolna tod soketakkingi, 15mine tekked amnel male helkemeninna joro. Ama ayar dimendi tendum. 16Ikkegon arti alamgi dolsum, tenna tod habitodti tidirsinged. Mine tekked amnel male, wekkon tiddeton helkemeningi. Ama ayar dimendi tindanin. 17Mine arti tenna todti alamir ishinkomnum, alamgi diner an, ama alam tekked halsengir. 18Tekked amnel bidinetakkimnum. Ama amnemenil elekenton dinetakkossum, mine artina habitodn eriged amnemeningad. 19Ingon dinad teran: Nur alamir tasum. Zoligon dulumagi gengirsan nurdogor, tinna awdi usiy erangad. 20Uski awil male nurki atisin, wala nurkir atamnum, tenna awdi binemendanna joro. 21Ama alegi awil nurki ageblen, tenna awdigi binew an, artiged awburangad.“
22Terin aharro Yesu tasum tenna hiraniged Yahudiyena ardir. Teddo tirgodon kewdos akidirsum. 23Hanagon teddo akidirsum, Ainunir, Salimna igitir, essi teddo digri esinged. 24Teddogon taka akidirtakkisan. Mani wattigi Hana elgon habsir tokomnum.
25Jadlad wekkon dasum Hanana hiranigon Yahudichi werigodongon, taharana joro. 26Ingu targi Hanagi wetirsan: „Wo rabi, ahan ekkodon darel Urdunina jerked, er tekki shehedetirsin, ter akidirin. Malegon tennai ajuran.“
27Hana rude wide wesum: „Zol wer eske haja wekki armunum, ter on in haja tekki tirtakkimenkin simerton. 28Iri innewertir aigi shehededendun ai anna kidir wesingi: Ai komisbul terminim an, ama tenn owollo ishinbul terrim an. 29Erkenekolgi kol, ter erkenekol teran. Ama erkenekolna tiwri, tenn awtir tebil wide tekki gijril, aguretirin, tenna hisigi gijrinna wattigi. Elekengon anna guratti tenna kelgi tirsum. 30Lezmebul teran man kujingi wide aigon mirringi.“
31„Zol dogorton tal, ter malen dogoru. Zol ariddigon, ter ardirtonum, wide aridna bainidti abainin. 32Won simerton tal, ter nalsingon wide gijirsingon, tekked asheheden. 33Ama tenna shahadagi wekkon ageblemnum. Ama tenna shahadagi geblerna zol hatmossum arti sadig engi. 34Mine arti ishinsinna zol artina weregi abainin. Minergi arti newertigi asediged atirmunum. 35Timbab todti adolin, widegon haja malegi tenna ir undursum. 36Todted amnel ayar dimendi tendum. Ama todted amnemenil kidir ayarki binalmunum. Ama artina gadab tendogor bikujtakkin.“
Айни замон обунашуда:
Hanana Enjil 3: XNZ1912
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Published by the British and Foreign Bible Society in 1912.