WƖAA DƖ-SUOMUŊ 8
8
1Ama Wɩa fa bɩ Nowa arɩ bagɩlaa arɩ pʋsʋ-la sɩ to Nowa harɩŋ jʋʋ lɩɩŋ daboro-la wɩaa yʋa. Ŋɩɩ nɛ ʋ leŋ peliŋ lu dʋnɩa lɛ. Lɩɩ-la suomo hʋhʋ. 2Lɩɩ-bul-sɩaa sɩ hɛ tinteeŋ lɛ kala tɔ, lɩɩ-la bɩra bɩ pʋŋaa pɛ, wɩa-nyuŋ viisiŋ kala tɔ. 3Lɩɩ-la hʋhʋ mʋa mʋa a mʋ yi tapʋlaa zɔlɔ arɩ mahɩŋ balɩa arɩ fii, dɩ ʋ tuu yʋgɛ. 4Ʋ chɛŋ-pɛmɩŋ tapʋlaa fii arɩ balɩpɛ sɩ kiele, lɩɩŋ daboro-la tuu sagɛ peel-la ba sɩɩ yɩrɛ Ararat nyuŋ. 5Lɩɩ-la tuu mʋa mʋa a mʋ yi chɛŋ-fii tʋɔŋ tapʋl-bumbuŋ dɩ peelee nyusuŋ nyɩɩsa.
6Ʋ tapʋlaa mahɩŋ balɩa chɛɛŋ nɛ Nowa kɛŋ lɩɩŋ daboro-la ʋ sɩ kpaasa tokoro suri 7aŋ lɩɩsɛ zaarɩ-kokobie ta ʋ fil a mʋ aŋ kʋkɔ ŋɩɩ halɩɩ lɩɩ-la kala hʋ dɛrɛ. 8Ŋɩɩ nɛ Nowa bɩra chɩchɛ dɩ ʋ na lɩɩ-la hʋa nɛɛ, ʋ ta kokomo dɩ ʋ lɩɩ na. 9Kokomo-la sɩ lɩa, ʋ bɩ wuo tuu tinteeŋ, bɛɛ wɩaa lɩɩŋ ha hɛ tinteeŋ kala lɛ nɛ. Ŋɩɩ nɛ kokomo-la mɩɩra kɔ lɩɩŋ daboro-la leriŋ. Nowa yɩa kɛŋ kokomo-la arɩ nɩsɩŋ a kaa jʋʋ lɩɩŋ daboro-la. 10Ŋɩɩ nɛ Nowa gbɛrɛ tapʋlaa balɩpɛ aŋ bɩra lɩɩsɛ kokomo-la ta ʋ lɩɩ. 11Kokomo-la mɩɩra chɛbɛ olif pɩpaa-laaŋ ʋ niiŋ lɛ a kɔ dɩdaanɩŋ. Ŋɩɩ nɛ Nowa jɩŋ arɩ lɩɩ-la ka mʋa nɛ. 12Ŋɩɩ nɛ Nowa bɩra gbɛrɛ tapʋlaa balɩpɛ, aŋ bɩra ta kokomo-la ʋ lɩɩ. Bʋa deeŋ-na lɛ kokomo-la bɩra bɩ mɩɩra jʋʋ ʋ teeŋ.
13Bʋa-la lɛ Nowa sɩ yi jɩsɩŋ zɔɔ-balɩdʋ arɩ kʋbala, ʋ chɛŋ-bumbuŋ tapʋl-bumbuŋ chɛɛŋ, dɩ lɩɩ-la kala hʋa. Nowa kɛŋ lɩɩŋ daboro-la viise-la suri a na arɩ tinteeŋ hɩla nɛ. 14Chɛŋ-lɩamɩŋ tapʋlaa mara arɩ balɩpɛ chɛɛŋ dɩ tinteeŋ hɩla dɛrɛ.
15Ŋɩɩ nɛ Wɩa bʋla pɩ Nowa, 16“Ŋ dɩ ŋ haala, arɩ ŋ biiriŋ arɩ ba haalaa kala, má kʋ lɩɩ daboro-la tʋɔŋ. 17Kɛŋ kʋŋkala sɩ kɛŋ mɩɩsɩŋ a hɛ ŋ teeŋ kʋ lɩɩ: Fillee, bagɩlaa, pʋsʋŋ arɩ tinteeŋ tuuroo a kʋ lɩɩ dɩ ba pʋŋa yʋgɛ.”
18Ŋɩɩ nɛ Nowa arɩ ʋ haala arɩ ʋ biiriŋ arɩ ba haalaa kʋ lɩɩ. 19Bagɩlaa, pʋsʋŋ, zaaraa, arɩ tinteeŋ tuuroo kala ma kʋ lɩɩ aa vɛŋ doho doho.
20Ŋɩɩ nɛ Nowa saa Wɩɩsʋllɩ koruŋ a pɩ La TƖƖNA a kɛsɛ kɩalɩŋ ba sɩ bɩ kɩsɛ: Pʋsʋŋ doho kala dɔnsʋŋ arɩ zaaraa doho kala dɔnsʋŋ, a kpʋ a ŋaa kʋnyɩgaa Wɩɩsʋlʋŋ a pɩ Wɩa Wɩɩsʋlʋŋ koru-la nyuŋ. 21Ŋɩɩ nɛ Wɩa nɩɩ kɩalɩŋ Nowa sɩ nyɩga sʋɔra dɩ ba sɩma. Ʋ tʋɔŋ tɔrɛ, ʋ bʋl ʋ tʋɔŋ lɛ, “Mɩ bɩra bɩ jaŋ tɩŋ nuhuobiine wɩaa a ŋmɩɛsa hɛ tinteeŋ lɛ. Nuhuobiine tʋɔbɩɩnaa kala ŋaa kʋbɔmɔ nɛ a lɩɩ ʋ hambiiriŋ kala lɛ. Mɩ bɩra bɩ jaŋ kɔ dɩ mɩ kpʋ kʋŋkala sɩ weye arɩ mɩ sɩ ŋaa ŋɩɩ bʋa-la lɛ.
22Dʋnɩa sɩ hɛ nɩmɛ a kaa mʋmʋ,
kɩaa duunuŋ arɩ kʋmʋŋ,
waarɩŋ arɩ wulumuŋ,
yibiiniŋ arɩ lɩmbaŋa,
wɩɩhɛyɛ arɩ tɩtaŋɩŋ kala jaŋ hɛ nɩmɛ a kaa mʋ wuu.”
Айни замон обунашуда:
WƖAA DƖ-SUOMUŊ 8: SIS
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014