Jọn 4
4
Jizọs Ḅe Na Sameria Eremeniḅọ Ma Na
1Farisiapụma naamẹ, na Jizọs Ḅe tomoni nyana pịkị mengi se nweni saratẹịn Jọn ḅe nẹngịaḅẹ. 2(Kọkọmaye-ẹ, Jizọs Ḅe ḅara na mengi se sara gbọrịḅọ sọnị ofori-ẹ; ọkụma oria ọḅụḍukoapụma re-ẹ.) 3Jizọs Ḅe ini ḍukoarịye mị nwọ naa sịkị, ò Judia koroma so se vinpịkị Galili mun mẹ, 4ori anịnyọ mun-arị sịkị ọ̀ Sameria ama mị ḅie ḅọrọmẹ.
5Sameria ḅie Saịka nwọ chịn gbọrị ama ò ḅo nwọ lamẹ, anị Jekọb ḅe se yayo Josẹf ḅe pịrị ele mị na kpekimẹ. 6Jekọb tiḅe mị anịnyọ omi-ẹ, se Jizọs Ḅe ọ̀ kọnsa nwẹngị mị ḅe ịnyọfa ḅụ, tiḅe mị anga ḅụ kpọnjị simemẹ. Anị pa eneogboin ḅiri lasam.
7Sameria gbọrị eremeniḅọ ḅo anịanga mengi ḍu-eḅomẹ, se Jizọs Ḅe nwọse á ḅẹmẹ, “Mengi se ị̀ pịrị à ḅu.” 8(Oria ọḅụḍukoapụma so ama ḅie mun fịye fẹ-ẹ munsam.)
9Eremeniḅọ ma pẹkẹrẹmẹ, “Ị́rị́ Juḅọ-ẹ, ị̀rị̀ pịkị Sameria ḅọ-ẹ—anịọkụma nde ị́rị́ ineda ị̀ ḅara mengi ḅiḅịa ọkụ?” (Juapụ ḅereni se Sameriaḅọ se mengi ḅu ọmọngọ anịkanịka yefị ẹfẹrẹ nwọse yefị ḍụkụ ẹkẹ.)
10Jizọs Ḅe pẹkẹrẹmẹ, “Tamụnọ Ḅe ḍiepịrịye mị ị́ pa nwọ nemi ọkụma, pịkị ị́ ḅara mengi ḅiarịḅọ ḅe nwọ nemimẹ ḅẹ ọkụma, mgbọkụ ị́ ọ̀ ḅara ḅi se ò ḍumo pịrị mengi se ị́ pịrịḅịa.” 11Eremeniḅọ ma nwọse ọ̀ ḅẹmẹ, “Sẹnịḅọ, ị́ mengi wakị panị nyanakẹ, tiḅe mị pịkị gbunmẹ. Nde nyọ ḅụ Ị́ anị ḍumo pịrị mengi mị nwọ nyanaḅo ḅe? 12Mịna opu ḍaḅọ Jekọb ḅe mị tiḅe mị se wa pịrịmẹ ori na oria owuapụ awọma na, oria namama na, anịa ḅie pakaḅo mengi nwọ ḅuḅumẹ. Ị́ nwọ ḅẹ-ao na, ị́rị́ opusọtẹịn Jekọb ḅe nẹngịmẹ?”
13Jizọs Ḅe á pẹkẹrẹmẹ, “Mị mengi mị ḅu ḅọ goyegoye mengi pịkị iniḅọ tarịḅịa, 14ọkụma à seni iniḅọ pịrịḅịa mengi ḅu ḅọ goyegoye mengi ḅarị ngịsị iniḅọ tarị ẹkẹ. À seni iniḅọ pịrịḅịa mengi mị iniḅọ ḅie ideri mengi nwọ sọḅịa, anị ḍumo pịrị mengi nwọ sọ iniḅọ pịrịḅịa pịkị simegbaso ḍumo seni iniḅọ pịrịḅịa.”
15Eremeniḅọ ma nwọse ọ̀ ḅẹmẹ, “Sẹnịḅọ, anị mengi mị nwọse ị̀ pịrị! Anịsịkị jịn mengi ḅarị ị̀ tarị ẹkẹ, à ḅarị pịkị mịanga ḅo mengi ḍu ẹka ḅara.”
16Jizọs Ḅe nwọse á ḅẹmẹ, “Mun ị́ de ḅe chịn, se ori na ḅo.”
17Eremeniḅọ ma nwọ ḅẹmẹ, “À deḅọ nyanakẹ.” Jizọs Ḅe nwọse á ḅẹmẹ, “Karakaraye ị́ nwọ ḍukomẹ, ị́ de ofori-ẹ, ị́ nwọ ḅẹye mị. 18Sọnọ-a owuapụ ị́ nwọ sime ḅọrọsam, se mịọkụ ị́rị́na anga ḅọ ḅe kọkọma ị́ dekẹ. Ị́ kọkọmaye ḍuko ị̀ pịrịmẹ.”
19Eremeniḅọ ma nwọ ḅẹmẹ, “Àrị ọrịmẹ, Sẹnịḅọ, ị́rị́ ịkịankoroḅọ-ẹ.” 20“Ị̀ya Sameria opu-a ḍapụma mị tụndụ ọgọnọ mị ini Tamụnọ Ḅe tẹkẹtẹkẹye-ẹ, ọkụma ómine Juapụma nwọ ḅẹmẹ, na Jerusalẹm ḅie mị wa Tamụnọ tẹkẹ gbẹịnye-ẹ.”
21Jizọs Ḅe nwọse á ḅẹmẹ, “Eremeniḅọ ị̀ ḅereni, sịkị mị anị ḅoḅịa tomoni ḅarị mị tụndụ mị ọgọnọ na pịkị Jerusalẹm ḅie na kpẹrẹkị Ḍaḅọ Ḅe tẹkẹ ẹkẹ. 22Ómine Sameriapụma kọkọma ḅara nwọse ọ́ tẹkẹarị ḅọ ḅe nemikẹ; ọkụma mine Juapụma wa tẹkẹarị ḅọ ḅe wa ò nemimẹ, anịatịḅị ḍụaḅọrọma mị Juapụma ḅụ anị wẹrị ḅomẹ. 23Ọkụma sịkị mị anị ḅoaḅẹ, anị pịkị ḅolasam, anị Tamụnọ Tẹmẹ Ḅe kụrọ ḅụ tomoni ḅọrọ Ḍaḅọ Ḅe jokoma sime ḅara seni ọ̀ tẹkẹ pịkị ò ḅiarị kọkọma tẹkẹ ḅara mị se ọ̀ pịrịḅịa sịkị. 24Tamụnọ Ḅe Tẹmẹ-ẹ, anịsịkị ọ̀ Tẹmẹ mị ḅe kụrọ ḅụ ngẹrị mị tomoni ineda ọ̀ jokoma simeọkụ se ọ̀ tẹkẹḅịaye-ẹ.”
25Eremeniḅọ ma nwọse ọ̀ ḅẹmẹ, “À nemimẹ na Mẹsaya Ḅe ò ḅoḅịa, ò ḅo sịkị ò ye mamgba ḍuko wa pịrịḅịa.”
26Jizọs Ḅe pẹkẹrẹmẹ, “Ị̀rị̀ ori-ẹ, nwọ ị́rị́ na ọkwẹịn àrị ḅọ ḅe.”
27Anị gbọrị sịkị mị ḅụ Jizọs Ḅe oria ọḅụḍukoapụma vinpịkị ḅomẹ, anị opuma inia ḅụgbiripumamẹ, ḍọkịḅo ọrị na ori eremeniḅọ ma na ọkwẹịn aḅẹ. Ọkụma inia ḅụ gbọrịḅọ sọnị á gbelakẹ na, “Ị́ che ḅi-ao?” Anịkanịka ò gbela, “Cheye gose ị́ árị na ọkwẹịn-ao?”
28Anịsịkị eremeniḅọ ma árịa mengi kuku mị nwọ wẹrịso vinpịkị ama mị ḅie mun, se nwọse anịnyọ sime apụma ḅẹmẹ, 29“Ó ḅo tomoniḅọ ḅe ḍiki, à mịẹ ḅọrọsaye mamgba ḍuko ị̀ pịrịḅọ ḅe. Mẹsaya Ḅe orika so ḅe?” 30Anị ini ama mị koromaso Jizọs Ḅe damamunye-ẹ.
31Mịn sịkị mị ḅụ ọḅụḍukoapụma Jizọs Ḅe tẹkẹaḅẹ, “Yeḍieḅọ, ye ọkị fị!”
32Ọkụma ọ̀ pẹkẹrẹmẹ, “À fịḅịa fịye à nwọ nyanamẹ, ómine anị nemikẹ.”
33Anị ọḅụḍukoapụma sakị inia ogboku gbelaye-ẹ, se ḅịpị se inia ḅụ fiemaye nwọḅẹ na, “Nweni ḅọrọ fịye ọkịḅo ọ̀ pịrị mụnọ?”
34Jizọs Ḅe nwọse ini ḅẹmẹ, “Ị̀ya fịye anị ị̀ se fịrịmaḅọ ḅe ḅereniye mị nwọ mịẹ, pịkị ò seni ị̀ pịrị fịrịma na nwọ nwẹngị karama-ẹ. 35Gbọrị ḍukoye ọ́ nwọ nyanamẹ, ‘Inein-a akalụ kọnmẹ, anịḅo fịye soku sịkị mị la.’ À ḍuko ọ́ pịrịaḅẹ, ómine iḅiọkụ seni ozuma ḍiki chịnmgbọlụma àrị kpọsam, pịkị soku sịkị mị lasam! 36Soku ayema nwọ sokuarị tomoniḅọ ḅe ini ọ̀ gbẹịn aḅẹ, seni ọ̀ fịayema nwọ koḅirima simegbaso ḍumo ḅie chụaḅẹ mịẹse ḍipi ḅọ ḅe na sokuarị ḅọ ḅe na gboloma se ḅieḅẹlẹḅịa ḅara. 37Ḍukoye mị kọkọmaye-ẹ, na ‘Gbọrịḅọ ḍipimẹ, jịnḅọ sokumẹ.’ 38Àrị ọ́ fịrịma mun ómine ḍipika ozu ḅie fịaye sokumẹ; jịn apụ mị anịa ḅie fịrịnwẹngịye-ẹ, ọkụma ómine anịa sọye mị fịmẹ.”
39Anị ama mị ḅie sime tọn-a Sameriapụ Jizọs Ḅe ḅerenimẹ, anịatịḅị eremeniḅọ ma nwọ ḅẹmẹ, “À mịẹ ḅọrọsaye mamgba ò ḍuko ị̀ pịrịmẹ.” 40Sameriapụma Ọ̀ damaḅo sịkị, ini Ọ̀ tẹkẹmẹ na Ori ini na sime, se Jizọs Ḅe mama ḍin se ini na simemẹ.
41Tọn-apụ ò ḅerenimẹ oria ọkwẹịn mị gose, 42se ini nwọse eremeniḅọ ma ḅẹmẹ, “Mịọkụ wa ḅerenisam, ị́ ḍukoye mị gosekẹ, ọkụma mine sọ ḅarana Oria ọkwẹịn naasam, se pịkị nemisam na Ori anị tomonikiri mị ḅe Ḍụaḅọrọmaḅọ Ḅe-ẹ.”
Jizọs Ḅe Gbọrị Fịrịtịḅịdaḅọ Yayo Gwọmẹ
43Ori anị nyọ mama ḍin nwọ sime se Ò so Galili mun mẹ. 44Anịatịḅị Jizọs Ḅe ḅarana nwọ ḅẹsam, “Ịkịankoroḅọ ḅe ori oria ama ḅie osi nyanakẹ.” 45Ò ḅo Galili mị ḅie lasịkị, anịanga sime apụma iḅi ḅara nwọse ori ọkịmẹ, anịatịḅị ini Jerusalẹm ḅie Saḅaḅọrọ Alalị mị mun se Ori anịanga mịẹye mamgba ọrịmẹ alalị sịkị mị ḅụ.
46Anị Jizọs Ḅe vinpịkị so Kana mun ye-ẹ Galili ḅie, Ò mengi mị pịkị irumịẹ nyọ mị. Anịanga sẹkẹnị ogbo mị ḅe gbọrị fịrịtịḅịdaḅọ yayo Kapanịọm ḅie sime se obiaḅẹ. 47Ḅe ḅọ ḅe naa sịkị, na Jizọs Ḅe Judia ḅụ, ò so Galili munsam nwọ ḅẹ sịkị ori Ọ̀ damamun se nwọse Ọ̀ ḅẹmẹ, na Ò mun kele yayo fịfị ḅara simeḅọ ḅe gwọ ọ̀ pịrị Kapanịọm ḅie. 48Jizọs Ḅe nwọse ọ̀ ḅẹmẹ, “Elekima na ḅụgbiripumaye na ọ́ nwọ ọrịka simeogbo ó ḅereni ẹkẹ.”
49Fịrịtịḅịdaḅọ ḅe nwọse Ọ̀ ḅẹmẹ, “Sẹnịḅọ, ị̀ ḍuko ḅo, ị̀ya tọkụ ḅe ma fịka simeogbo.”
50Jizọs Ḅe nwọse ọ̀ ḅẹmẹ, “Mun ị́ya tọkụ ḅe ò ḍumoḅịa!”
Nweniḅọ ḅe Jizọs Ḅe kọn ọ̀ pịrị ọkwẹịnma ḅereni se mun mẹ. 51Ò so warị mun-arị sịkị oria fịrịnwẹngịapụma ori na ịrịa se ḍuko ọ̀ pịrịmẹ, “Ị́ya tọkụ ḅe ò ḍumosam!”
52Nde sịkị tọkụ ḅe ḅụ sakị kụrọma ọ̀ nwọse ini gbelamẹ, se ini nwọ ḅẹmẹ, “Ḅịa eneogboin, gbọrị so ḅiri ḅụ anị ọfịrị mị ọ̀ ḅụ kansoye-ẹ.” 53Ḍawu ḅe, anịsịkị se ḅiekoromamẹ, anịsịkị mị ḅụ mị Jizọs Ḅe nwọse ọ̀ ḅẹye-ẹ na, “Ị́ya tọkụ ḅe ò ḍumosam.” Anị ori na ò furo na ḅereniye-ẹ.
54Mịn mị anị Jizọs Ḅe maịn karama nwẹngị ḅụgbiripuma fịrị-ẹ Ò Judia so ḅo Galili mị lasịkị.
Айни замон обунашуда:
Jọn 4: OBTP
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
The Bible Society of Nigeria