1. Mose 3
3
De Sindenfaul un de Foljen
1Un de Schlang wia lestja aus aule Tieren oppem Flekj, daut Gott, de Har jemoakt haud; un see räd to de Fru: Haft Gott werkjlich jesajcht: Jie sellen nich von janem Boom em Goaden äten? 2Un de Fru säd to de Schlang: Vonne Frucht de Beem em Goaden ät wie; 3oba von de Frucht vom Boom, dee enne Medd vom Goaden es, haft Gott jesajcht, doavon sell jie nich äten un dee nich aunrieren, om daut jie nich stoawen. 4Un de Schlang säd to de Fru: Jie woaren derchut nich stoawen! 5Sonda Gott weet, daut, aun däm Dach doa jie doavon äten, woaren june Uagen opjedonen un jie woaren aus Gott sennen, erkjanen Goodet un Beeset. 6Un de Fru sach, daut de Boom goot toom Äten un daut hee eene Lost fa de Uagen un daut de Boom scheen [jankrich] wia, om Ensecht to jäwen, un see naum von siene Frucht un aut, un see gauf uk äarem Maun, bie ar, un hee aut. 7Doa worden äare beid Uagen opjedonen, un see erkjanen, daut see noaktich wieren, un see bungen Fiejebläda toop un muaken sikj Schaldieekja.
8Un see hieeden de Stemm Gottes, dee em Goaden waundeld aus de Dach kjeela wort. Un de Mensch un siene Fru vestuaken sikj ver däm Aunjesecht Gottes det Harn - medden unjre Beem em Goaden. 9Un Gott, de Har roopt däm Mensch un säd to am: Wua best du? 10Un hee säd: Ekj hieed diene Stemm em Goaden, un ekj enjst mie. Dan ekj sie noaktich, un ekj vestuak mie. 11Un hee säd: Wäa säd die daut du noaktich best? Hast du von däm Boom jejäten, von däm ekj die befoolen haud, doavon nich to äten? 12Un de Mensch säd: Dee Fru, dee du mie jejäft hast, see gauf mie von däm Boom, un ekj aut. 13Un Gott, de Har säd to de Fru: Waut hast du doa jedonen! Un de Fru säd: De Schlang haft mie vefieet, un ekj aut. 14Un Gott, de Har säd to de Schlang: Wiels du dit jedonen hast, saust du veflucht sennen ver aulem Vee un ver aule Tieren oppem Flekj! Opp dienem Buck saust du krupen un Stoff fräten aule Doag en dienem Läwen. 15Un ekj woa Fientschoft saten tweschen die un de Fru un tweschen dienem Somen un äarem Somen; hee woat die däm Kopp veklunjen, un du, du woascht am enne Hak stäakjen. 16To de Fru säd hee: Ekj woa diene Mieej sea vemieren en dienem Schwanga sennen, met Weedoag saust du Kjinja jebäaren; un no dienem Maun woat dien Velangen sennen, oba hee woat äwa die harschen. 17Un too Adam säd hee: Wiels du opp diene Fru äare Stemm jehieet un von däm Boom jejäten hast, von däm ekj die befoolen un jesajcht ha: Du saust nich doavon äten, soo es de Ieedboddem veflucht om dient haulwen: Met Mieej saust du doavon aule Doag em Läwen äten; 18un Hachels un Diestle woat hee die waussen loten, un du woascht daut Krut vom Flekj äten. 19Met Schweet en dienem Aunjesecht woascht du dien Broot äten, bat daut du trigjjeist enne Ieed, dan von äa best du jenomen. Dan Stoff best du, un nom Stoff woascht du trigjgonen!
20Un de Mensch jeef siene Fru däm Nomen Eva, dan see wia de Mutta von aule Läwendje.
21Un Gott, de Har muak Adam un siene Fru Rakj von Fal un bekjleed an.
22Un Gott, de Har säd: Kjikj, de Mensch es aus onsa eena jeworden, too erkjanen daut Goode un Beese; un nu, daut hee siene Haunt nich utstrakjt un nemt von däm Läwensboom un at un eewich läft! 23Un Gott, de Har schekjt am ut däm Goaden Eden rut, om däm Ieedboddem too bebuen, doavon hee jenomen wia; 24un hee juach däm Mensch rut un leet oostlich von Goaden Eden de Cherubim loagren un de Flaum vom jetrocknem Schwieet, om däm Wajch nom Läwensboom too bewoaren (bewoaken).
Айни замон обунашуда:
1. Mose 3: PBJHF
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© SW-Radio e.V.