Эхин 11
11
Вавилооной самхаг
1Арадуудай болон гүрэн түрэ бүхэнэй өөһэдын өөрсэ хэлэтэй болохын урда тээ дэлхэйн бүхы зон нэгэ түрэлхи хэлэтэй, нэгэн адляар хөөрэлдэдэг һэн. 2Олон зон Зүүн зүг руу нүүжэ, Вавилоон гэдэг тала газар руу ерэжэ һуурижаба.
3Тиигээд өөһэд хоорондоо тэдэ иигэжэ хөөрэлдэбэ:
— Һууринай барилга ябуулха хэрэгтэй. Шабараар хирпиисэнүүдые хээд, бүхэ шанартай байхынь тула тэдэнээ галда шатаая.
Тиигээд тэдэ барилгада шулуунай орондо хирпиисэ, хирпиисэнүүдые барисалдуулхын тула сагаан шохойн орондо дабирхай хэрэглэдэг болобо.
4Хоорондоо тэдэ дахин хэлсэбэ:
— Газар дэлхэйгээр таража бутархагүйн тула бидэ асари хүсэтэй, алдар солотой, һүр ехэтэй улас түрэ болохо ёһотойбди. Тиимэһээ тэнгэри тулама үндэр самхаг, бата найдамтай хэрэмтэй хото бария.
5Эзэн хүн түрэлтэнэй хэжэ байһан ажал хэрэгүүдые хараад, 6иимэ зарлиг буулгаба:
— Харыт, эдэ зон иишэ-тиишээ зөөжэ ябахын орондо нэгэ газарта обооржо, нэгэ хэлэтэй нэгэ арад болохоёо һэдэнэл. Иигэжэ суг хамта барилга эхилбэл, саашадаа тэдэ юушье хэжэ магад. 7Тиимэһээ бэе бэеэ ойлгохоо болиторнь хэлыень худхан холиё! 8Иигэжэ зон барилгаа дүүргэнгүй орхижо, орон дайдаар зайгуултаба.
9Тэрэ хотын зоной нэгэн хэлые бэе бэеэ ойлгохоёо болиторнь Эзэнэй худхаһан ушарһаа хото «худхаха» гэһэн удхатай, еврей хэлээр «Вавилоон» гэдэг нэрэтэй болоһон байна. Тэндэһээ Эзэн зониие бүхы түби дэлхэйгээр тараан сасаа.
Элинсэг хулинсагууд
Абраһаамай урда үенүүд
10Шеэмэй угай бэшэг эндэһээ эхилнэ.
Үерэй һүүлээр хоёр жэл үнгэрөөд байхада, Шеэм зуу наһатайдаа Арпахшаад гэжэ хүбүүтэй болобо. 11Арпахшаадай гараһанай һүүлээр хэдэн хүбүүд, басагадтай болоод, Шеэм үшөө табан зуун жэл ажаһуугаад, наһа бараа бэлэй.
12Арпахшаад гушан табатай байхадаа, Шээлах гэжэ хүбүүтэй болобо. 13Шээлахэй түрэһэнэй һүүлээр Арпахшаад үшөө дүрбэн зуун гурбан жэл ажаһуугаад, хэдэн хүбүүд, басагадтай болоод, гээгдээ бэлэй.
14Шээлах гушатай байхадаа, Ээбэр гэжэ хүбүүтэй болобо. 15Ээбэрэй түрэһэнэй һүүлээр Шээлах үшөө хэдэн хүүгэдтэй болоод, дүрбэн зуун гурбан жэл ажаһууһанай удаа наһа бараа һэн.
16Ээбэр гушан дүрбэтэй байхадаа, Пээлэг гэжэ нэрэтэй хүбүүтэй болобо. 17Ээбэр энээнһээ гадна хэдэн хүүгэдтэй болоод, Пээлэгэй түрэһэнэй һүүлээр үшөө дүрбэн зуун гушан жэл ажаһуугаад, наһа бараа бэлэй.
18Пээлэг гуша наһатай байхадаа, Рэһүү гэжэ хүбүүтэй болобо. 19Энээнэй һүүлээр тэрэ хоёр зуун юһэн жэл ажаһуугаад, хэдэн хүүгэдтэй болоод, гээгдээ бэлэй.
20Рэһүү гушан хоёртойдоо Сэрүүг гэжэ хүбүүтэй болобо. 21Сэрүүг хүбүүнэй түрэһэнэй хойно Рэһүү хоёр зуун долоон жэл ажаһуужа, хэдэн хүбүүд, басагадтай болоод, наһа бараа һэн.
22Сэрүүг гушатай байхадаа, Нахоор гэжэ хүбүүтэй болобо. 23Энээнэй удаа Сэрүүг үшөө хэдэн хүбүүд, басагадтай болоод, үшөө хоёр зуун жэл ажаһуугаад, гээгдээ бэлэй.
24Нахоор хорин юһэтэй байхадаа, Тээраа гэжэ хүбүүтэй болобо. 25Тэрэ сагһаа хойшо Нахоор зуун арба юһэн жэл ажаһуугаад, үшөө хэдэн хүбүүд, басагадтай болоод, нүгшэбэ.
26Тээраа далатай байхадаа, Абрам, Нахоор ба Һараан гэдэг гурбан хүбүүтэй болобо.
27-28Энэ болбол Тээраагай угай бэшэг юм. Абрам, Нахоор, Һараан гэгшэд Тээраагай гурбан хүбүүд болоно. Тэдэ Вавилооной дэргэдэ оршодог Үүр гэжэ хотодо амидардаг байгаа. Һараан Лоот гэдэг хүбүүтэй, Милкаа, Иска гэдэг хоёр басагадтай болоод, наһа бараа бэлэй. Тэрэ үедэ Тээраа эсэгэнь амиды мэндэ ябаа.
29Нахоор түрэһэн дүү Һараанайнгаа Милкаа басагые, Абрам Сара гэдэг басагые һамга болгон абабад.
30Сара үхибүү түрэдэггүй, хээлитэй боложо шададаггүй байгаа.
31Тээраа Абрам хүбүүгээ, аша хүбүүгээ — Һараанай Лоот гэжэ хүбүүе, бэриеэ — Абрамай һамган Сарые абаад, Ханаһаан орон руу нүүжэ ошохоёо Вавилооной дэргэдэхи Үүр хотоһоо гараба. Гэбэшье тэдэнэр замдаа тогтожо, Месопотамиин Һараан хотодо хүрөөд, тэндээ байрлаа һэн. 32Тээраа тэндэ ажаһуужа, хоёр зуун табан наһатайдаа нүгшэһэн юм.
Айни замон обунашуда:
Эхин 11: BurOTp
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Bible Society in Russia, 2002-2007, 2011, 2013, 2018.