MWANDUSO 9
9
Mulungu Kokwika Lagano na Nuhu
1Mulungu kawamoteza Nuhu na wanage, mkuwalongela, “Leleni mkongezeke, mkaimemeze isi. 2Wang'onyo wose, ndege wose, somba wose, na kila kilumbigwe kitembela muisi wowadumba mweye. Wose wekigwa mmakono genu. 3Kila kinhu kili na ugima kitembela muisi chowa mandia genu. Kamba viniwagwelele mboga, sambi nowagwelela kila kinhu. 4Nyama ili na mulopa mgati yake hamulondigwa kuija, kwavija ugima wa mmulopa. 5Nomkoma munhu yoyose yomkoma munhu iyagwe. Kamba mng'onyo yahamkoma munhu, na heyo kolondigwa yakomigwe, na munhu yoyose yomkoma miyage, na heyo kolondigwa yakomigwe. 6Munhu kalumbigwa muiningo ya Mulungu, avo munhu yoyose yomkoma munhu, na heyo kokomigwa na wanhu.
7“Leleni mkongezeke, mwenele muisi.”
8Abaho Mulungu kawalongela Nuhu na wanage, 9“Sambi nokwika lagano jangu na gweye na lukolo lwako, 10na vinhu vose vili na ugima vikalile hamoja na gweye, ndege wose, wang'onyo wose wofugigwa, wang'onyo wose wa kumuhulo, na kila kinhu chuulawilenacho muisafina, kila kinhu kili na ugima kilumbigwe muisi. 11Nokwika lagano jangu na gweye, kamba vinhu vose vili na ugima havibanangigwa kabili na ummemelo wa mazi. Na ummemelo wa mazi hauubananga kabili iisi.” 12Abaho Mulungu kalonga, “Kino kicho kilaguso cha lagano dinitenda na gweye na kila kilumbigwe kili na ugima, lagano sama ya milelo yose ikwiza, 13nokwika pindamulungu jangu muna gamawingu. Dowa kilaguso cha lagano jangu na ulumwengu. 14Kipigiti nihaugubika ulanga na mawingu, pindamulungu dolawila mmawingu, 15donitenda nikikumbukile kilagano changu kinitendile na gweye na vinhu vose vilumbigwe vili na ugima va namna zose. Mmemelo wa mazi hauvibananga kabili vinhu vose vili na ugima. 16Kipigiti pindamulungu dihakoneka muna gamawingu, nojona na kukumbukila lagano jangu da digunge hagatigati yangu na vinhu vose vili na ugima vili muisi. 17Kino kicho kilaguso cha lagano dinitendile hagatigati yangu na vinhu vose vili na ugima.”
Nuhu na Wanage
18Wanage Nuhu walawile hanze ya isafina wakala Shemu, Hamu, na Yafeti. Hamu kakala tata wa Kanaani. 19Wana wano wadatu wa Nuhu wakala wahenga wa wanhu wose wali muisi.
20Nuhu, ayo yakalile mulimi, kakala munhu wa ichanduso kuhanda mizabibu. 21Nuhu kang'wa ugimbi, kakoligwa, kawasa mwazi mdihema jake. 22Hamu, tata wa Kanaani, viyonile kamba tataake kakala mwazi, kalawa hanze kawalongela wakulu zake. 23Abaho Shemu na Yafeti wasola kivalo na kukibasika mmaega gao. Abaho wabwela kisengelenyuma na kumgubika tataao. Wakala wavihinduse vihanga vao giladi sambiwone mwazi wa tataao. 24Ugimbi vuumsegele, Nuhu kalamuka na kukitanga kija mwanage mdodo kiyamtendele, 25kalonga,
“Yadukumizwe Kanaani!
Kowa nyakadala wa nyakadala ha ndugu zake.
26Yatogolwe MNDEWA, Mulungu wa Shemu!
Kanaani yawe nyakadala wa Shemu.
27Mulungu yautanule undewa wa Yafeti!
Yafeti yakale mdihema da Shemu!
Kanaani yawe nyakadala wa Yafeti.”
28Vuwishile ummemelo wa igamazi, Nuhu kakala milao mia ndatu na malongo matano 29abaho kadanganhika kuno yali na milao mia tisa na malongo matano.
Айни замон обунашуда:
MWANDUSO 9: Kizalamo
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators