Génesis 3
3
Adanwan Evawan Diosta mana kasunkuchu
1Katareqa#Ap 12.9; 20.2. Tata Dios tukuy imaymana k'ita animalkunata ruwasqanmanta may jina yuyaysapa karqa. Chantá uj kuti payqa warmita taporqa: Huertapi kaj tukuy sach'aj poqoyninta ama mikhunkichejchu, nispachu Dios nisorqachej? nispa.
2Warmitaj kuticherqa: Mana. Huertapi kaj tukuy sach'aj poqoyninmanta mikhuyta atiyku. 3Huerta chawpipi kaj sach'aj poqoynillanmanta Dios niwarqayku: Ama mikhunkichejchu, ni llankharillankichejpischu. Chaymantachus mikhunkichej chayqa, wañunkichej, nispa.
4Kataritajrí warmita nerqa: Chayqa mana jinachu, mana wañunkichejchu. 5Dios allinta yachan kay sach'aj poqoyninta mikhojtiykichej, ñawiykichej kicharikunanta. Chantá yachallantaj allin kajta, jinataj mana allin kajta yachaspa, Dios jina kanaykichejta, nispa.
6Chantá warmeqa chay sach'aj poqoynin mikhunapaj sumaj kasqanta qhawarqa, jinaqa maytapuni mikhuyta munarerqa. Qhawallarqataj yachayniyoj kanapaj jina sumajllataj kasqanta. Jinaqa pay ujnin poqoyta p'itispa, mikhuykorqa. Qosanmanpis jaywarqa, paypis mikhullarqataj.#Sab 2.24; Ro 5.12. 7Paykuna mikhusqankutawankamataj, sut'ita qhawarqanku, reparakorqankutaj q'alalla kashasqankuta. Chayrayku higo laqhemanta qhatanata sirakuspa, chaywan mayt'uykukorqanku.
8Chantá inti yaykuyta jina wayrarishajtin, qhari warmi huertapi Tata Diospa purishasqanta uyarerqanku. Paykunatajrí usqhay usqhayta huertapi sach'a ukhuman pakaykukorqanku. 9Jinapi Tata Diosqa qharita wajyarqa: Maypitaj kashankiri? nispa.
10Qharitaj kuticherqa: Huerta ukhupi purishasqaykita uyarerqayki, manchachikorqanitaj q'alalla kasqayrayku. Chayrayku pakaykukorqani, nispa.
11Chantá Tata Dios taporqa: Q'alalla kasqaykita, pitaj nerqasunkiri? Mana mikhunaykita nerqayki, chay sach'aj poqoynintachu mikhorqanki? nispa.
12Qharitaj kuticherqa: Yanapanawanpaj qowasqayki warmi chay sach'aj poqoyninmanta qowarqa, noqataj mikhorqani, nispa.
13Chantá Tata Diosqa warmita taporqa: Imatataj ruwarqankiri? nispa. Paytaj kuticherqa: Katari q'otiyawarqa, chayrayku mikhorqani, nispa.#2 Co 11.3; 1 Ti 2.14.
14Chantá Tata Diosqa katarita nerqa: Chayta ruwasqaykirayku tukuy uywakuna ukhupi, tukuy k'ita animalkuna ukhupipis maldicisqa kanki. Kunanmanta jaqayman kawsanayki p'unchaykama wijsamanta suchuspa purinki, jallp'atataj mikhunki. 15Noqataj qantawan, warmitawan jap'inachisqaykichej. Jinallataj mirayniykiwan, mirayninwanpis chejninakonqanku. Warmej mirayninmanta kajqa umaykita sarusonqa, qantaj chaki talonninmanta khaninki, nispa. Ajinata Diosqa katarita nerqa.#3.15 Tata Dios warmita, chantá katarita imatachus nisqanqa Jesús kay pachaman jamunanmanta parlan. Jesús kay pachapi kashajtin, paywan, chantá Supaywan ima jap'inakupi karqanku. Chantá Jesucristo cruzpi wañuspa, Supayta atipasqata atiparqa. Ro 16.20; Ap 12.17.
16Chantá Tata Diosqa warmita nerqa: Onqoj kashaspa, sinch'i nanayta ñak'arinki, may jina nanaywantaj wawaykikunata paqarichikunki. Chaywanpis sonqoykeqa qosaykiman aysasonqa, paytajrí qanta kamachisonqa, nispa.
17Chantá Tata Dios qharitañataj nerqa: Warmiykita kasuspa, mana mikhunaykita nerqayki chay sach'aj poqoyninmanta mikhusqaykirayku, kunanqa jallp'a maldicisqa kanqa. Chayrayku kawsanaykikama sayk'uy sayk'uyta llank'aspa mikhunki.
18Jallp'aqa khishkallata, qhorallata wiñachipusonqa, qantaj campopi wiñaj qhorata mikhunki.#Ro 8.20; Heb 6.8. 19Mikhunaykipaj jump'i suruyta llank'anayki kanqa, wañupunayki p'unchaykamataj ajina kanqa. Qanqa jallp'amanta ruwasqa kanki, chayrayku jallp'allamantaj kutinki, nispa.
20Chaymanta qhareqa warminta “Eva” sutiwan suticharqa, imaraykuchus payqa tukuy runaj maman kanan karqa. 21Tata Diostaj qharipaj warmipajwan uywakunaj qaranmanta p'achata ruwaporqa, jinaspataj, paykunata p'achallicherqa.
22Chantá Tata Dios nerqa: Runaqa allin kajta mana allin kajta yachaspa, noqanchej jinaman tukun. Sichus kawsachej sach'aj poqoyninmanta mikhullanmantaj chayqa, wiñaypaj kawsayta atinman, nispa.#Ap 22.14. 23Chayrayku Tata Diosqa runata Edén huertamanta qharqorqa, churarqataj jallp'ata llank'ananpaj, jallp'amanta ruwasqa kasqanrayku. 24Chantá runata qharqospa, Tata Diosqa Edén huertaj inti llojsimuynejman querubinkunata#3.24 Querubín: Uj rijch'ay angelkuna karqanku. Unay yuyaj kanku querubinkunaqa yupaychana cheqakunata qhawaj kasqankuta. Ex 25.18. churarqa. Jinallataj uj lawrashaj espadatawan churallarqataj, muyuyninta muyuspa jark'ananpaj amapuni pipis kawsachej sach'aman qayllaykunanpaj.
Айни замон обунашуда:
Génesis 3: DQDC
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.