Génesis 10
10
Noéj miraynin
(1 Cr 1.5-23)
1Kaykuna Noéj churinkuna karqanku: Sem, Cam chantá Jafet ima. Jatun musphay para qhepata paykunaj wawankukunapis kallarqankutaj.
2Jafetpata churinkuna karqanku Gomer, Magog, Maday, Javán, Tubal, Mesec, Tiras ima. 3Gomerpa churinkunataj karqanku Askenaz, Rifat, Togarmá ima. 4Javanpa churinkuna karqanku Elisa, Tarsis, Quitín, Rodanín ima. 5Paykuna mama qocha kantupi sapa uj ayllunkuwan, parlayninkuwan ima jap'iyninkupi tiyakorqanku.
6Campa churinkuna karqanku Cus, Misrayin, Fut, Canaán ima. 7Cuspa churinkunataj karqanku Sebá, Javilá, Sabta, Ragama, Sabteca ima. Ragamaj churinkunataj karqanku Sebá, Dedán ima. 8Cusqa Nimrodpa tatan karqa. Nimrodtaj kay pachapi ñawpaj kaj may atiyniyoj runa karqa. 9Nimrodqa Tata Dios munasqanrayku k'ita animalkunata jap'inapaj manchay wapu karqa. Chayrayku runakuna ajinata niyta yachaj kanku: Kay runaqa Nimrod jina wapu, pichus Tata Dios munasqanrayku k'ita animalkunata jap'inapaj wapu karqa, chay jina nispa. 10Nimrodqa Sinarpi kay llajtakunapi kamacherqa: Babel, Erec, Acad, Calne ima. 11Chaynejmantapacha Nimrodqa Asiriaman llojserqa, chaypitaj kay llajtakunata sayaricherqa: Niniveta, Rejobotta, Calajta, 12Resén jatun llajtatawan ima. Chay llajtaqa Ninivewan Calajwan chawpipi kashan.
13Misrayinpa mirayninmanta karqanku ludimkuna, anameokuna, lehabitakuna, naftuhitakuna, 14patruseokuna, casluhitakuna, caftoreokuna ima. Filisteokunaqa Caftorimmanta rikhurejkuna kanku.
15Canaanpa kuraj kaj churin Sidón karqa, qhepan kajtaj Jet karqa. 16Canaanmanta mirajkunataj karqanku jebuseokuna, amorreokuna, gergeseokuna, 17heveokuna, araceokuna, sineokuna, 18arvadeokuna, semareokuna, jamateokuna ima. Chay qhepata Canaanpa ayllunkuna tukuynejman ch'eqerarqanku. 19Cananeokunaj jap'iyninku Sidonmantapacha Gerarpi Gaza llajtakama karqa, chaymantataj Sodoma, Gomorra llajtanejmanta, Adma, Zeboyinnejmanta Lasa llajtakama. 20Chaykuna Campa miraynin karqanku, sapa ayllu kikin jallp'ankuwan, kikin parlayninkuwan ima.
21Jafetpa kurajnin Sempata churinkunapis kallarqankutaj. Semqa Eberpa churinkunaj jatun tatanku karqa. 22Sempa churinkuna karqanku Elam, Asur, Arfaxad, Lud, chantá Aram ima. 23Arampa churinkunataj karqanku Uz, Jul, Geter, chantá Mas ima. 24Arfaxadqa Selajpa tatan karqa, Selataj Eberpa tatan karqa. 25Eberpatapis iskay churinkuna kallarqataj. Ujninpata sutin Peleg karqa, imaraykuchus chaypacha runakuna t'aqanakorqanku. Pelegpa sullk'antaj Joctán karqa.
26Chantá Joctán Almodadpa tatan karqa, chantá Selefpata, Jasar Mavetpata, Yerajpata, 27Hadoranpata, Uzalpata, Diclajta ima. 28Jinallataj Obalpata, Abimaelpata, Sebajta, 29Ofirpata, Javilajta, Jobabpatawan ima tatanku kallarqataj. Chay tukuynin Joctanpa churinkuna karqanku. 30Maypichus tiyakorqanku, chay jallp'aqa Mesamanta Sefarkama karqa, chaytaj inti llojsimuynej orqorara cheqanejpi karqa. 31Paykuna Sempata churinkuna karqanku, sapa llajta, sapa ayllu kikin jallp'ankupi, kikin parlayninkuwan ima.
32Paykunaqa sapa mirayninkuman jina chantá jap'iyninkuman jina Noéj churinkunamanta mirajkuna karqanku. Paykunataj jatun musphay para qhepaman tukuynejman ch'eqeraspa, suyukunata jataricherqanku.
Айни замон обунашуда:
Génesis 10: DQDC
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.