Yohanis 4
4
Yesus ianamana runa ia pina Samaria
1Sio onata arihon akama Yahudi oatinu ata sio wason oeuso noi Yesus na isohuso na mansiau oanei ata oarihoni no rosau nea, sio panesi onesi sio wasoni oeuso noi Yohanis. 2Aikee Yesus sahoro isohuso tewa. Ne ne mampusua sahoro osohuso. 3Upuri Yesus iatinu ata sio onata arihoni akama Yahudi oaneiki nea oyo ikata ne mampusua na oeuso arihoni otoe Yudea na onunso pan otoe Galilea.
4Onunso poe otoe Galilea mo, kahurae oniku pusu otoe Samaria. 5Oeu rotu-tu ohokaso pan kota isa. Kota reimo haineke runa tuamane wan naone upuri Yakup iruiki osi anai Yusup.#Aikune 33:19 Kota rei nanae Sikar.
6Pan tuamane rei mo, parike isa wamo. Parike reimo naone Yakup ne parike. Yesus resuniki nai osa tau oeu hainau. Tau rei, ranie katopu. Yesus resuniki, reiso iruei haineke parike rei 7-8oo, ne mampusua oeuso poe kota na ohane muaine. Sira tau ia pina Samaria isa ihokai nanie iripa tihu poe parike rei. Yesus iasau osiki. Iahata, “Ano pina onate, rui we tihu mkane na uninu ee.”
9Ne ia pina onate rei iasau. Iahata, “Ama, Ano reini mo, Ano Yahudi. Au mo, au Samaria. Sapani na ainisi tihu arihoni au Samaria reini?”
(Ia pina rei iasau san rei tau sio Yahudiu mo, openeso tau onusu hoka tau sio Samaria.)
10Oyo Yesus iahata, “Ina, sani ano anei Anahatana nanie irui sae osia na anei Ia sia sahoro wain iainisi tihu arihonia reini mo, mka ano ruam ainisi tihu arihoniku. Ainisi tihu oyo mka urui tihu wan reunaya amahaia.”
11Oyo iahata, “Upu, me titipate tewa. Samatoro parike reini mo, naue wapo hainau. Reiso mka asupu tihu wan reunaku uamahaiku rei sui supa? 12Mani upu Yakup iarihoni parike reini osima. Ia ruai runa ne upu momou oninu arihoni parike reini. Ne une-uneu, koropou iae raninu arihoniki oi. Ano ata kani Ano mo, Ano mainae anesi ami ma upu Yakup tu-tu arui tihu wan reunama amahaima rei si?”
13Yesus iahata, “Ia seia wain ininu tihu arihoni parike reini mka anoi kasae honu. 14Ne ia seia wain ininu tihu wan Au uruiki osiki, ia mo, mka anoi kasae tewa rotu-tu ria supan. Erenesi honu, tihu wan uruiki osiki rei mo, nooi sani waene hunae wan renia sui osa on pan anoi. Waene hunae rei reunai iamahaiki ikata Anahatana rotu-tu ria supan.”
15Ne ia pina rei ianei sae wan Yesus iasau runai rei tewa. Reiso iasau ata, “Upu, munata san rei mo, rui tihu rei osiku mai nea, na pene anoku kasae nea. Na pene ueuku mai uripa tihu sui osa nea.”
16Oyo Yesus iahata, “Eua na aoi saham mai, samatoro eu akatai mai rei.”
17Iahata, “Ne au mo, uausahaku tewasi.”
Yesus iahata, “Sae wamo asaui rei mo, titue. Ano mo, ausahaya tewasi. 18Ano mo, ausahaya nai nima nea. Ne ia waipo iruei ikataya poe me numa rei mo, saham tewa oi. Tea mo, uamo oaisenemo tewasi. Reiso sae wan inaku asaui rei mo, titue.”
19Iahata, “Upu. Wan mato uanei ata Ano mo, Ia mamsima runa Anahatana ne maunauna. 20Ne nanie uasei tanua ee. Ami ma upu momou oainisi oainaa na Anahatana mai tinetae reini. Ne, omi Yahudiu oasau ata ita mo, kahurae iainisi ainaa na Anahatana roe kota Yerusalem. Reiso sae sahoro wan manisate?”
21Oyo Yesus iasau ata, “Ano pina onate, parisaa sae wan nanie uasau nnai reini. Mka omi oainisi oainaa na Anahatana sui supan man. Oainisi oainaa nnai mai tinetae reini tewa nea. Oeu roe kota Yerusalem iae, tewa nea. 22Omi Samariau mo, oainisi oainaa na Anahatana ne oationai tewa. Ne ami Yahudiu mo, ainisi ainaa nnai mo, ationai nea. Tea mo, Anahatana itotoe nea ata mka Ia Yahudi isa ihokai na iapuheu mansia na pene Anahatana iapasanaso. 23Ne sani pannuhu nene umetene nea, sio wason titue-tue oainisi oainaa runa Anahatana, mka oainisi oainaa nnai runa kawasa arihoni Anahatana ne Inaha. Sio iae mka oainisi oainaa na Anahatana pusu Anahatana ne maunauna waron titue. Umetene rei mo, repan nea rei. Amaku inina na ita iainisi iainaa nnai san rei. 24Anahatana mo, Inaha. Reiso sio wason nanie oainisi oainaa nnai mo, kahurae oainisi oainaa nnai runa kawasa arihon ne Inaha. Sio iae kahurae oainisi oainaa runai pusu ne maunauna waron titue.”
25Oyo ia pina ona Samaria rei iasau osi Yesus. Iahata, “Ama! Au uanei ata Ia Aia wain Anahatana Ihitiki na Iapuheu Mansiau mo, mka ihokai. Sani ihokai nea, mka isima na rai pusire osita.” (Ia Aia wain Anahatana Ihitiki na Iapuheu Mansiau mo, oaoiki tau Kristus.)
26Yesus iahata, “Ano pina onate. Ia wain ano asau ata Aia rei mo, Au. Au wan uanamana runaya rein, tea!”
27Sira tau ami, Yesus ne mampusua, ahokama on poe kota. Asira tau Yesus waimo iruni runa ia pina wain isupui sinasi rei. Ne ia sia man iasei tewa arihoni ia pina rei ata, “Nanie anina sae?” Ia sia man iasei tewa tau Yesus ata, “Nanie anamana na ia pina rei tau sae?”
28Pusi oyo, ia pina rei ieui iarihon ne tihu naniae rei sirinia, oyo ieu na poe kota na isima osi mansiau. Iahata, 29“Mai na ieuta pan, inoo ia onate isa repan. Iasau runa sae man waron au unare rei. Pene tu-tu Ia sahoro Ia Aia wain Anahatana Ihitiki na Iapuheu Mansiau rei te sae rei?”
30Oatinu san rei oyo, oeuso rei sirinia. Oeuso, ohokaso arihoni kota, na oeuso pan osupu Yesus.
31Oo ia pina sinasi rei ieui iarihonima, ami ne mampusua atentene tau Yesus na iaiki mkane. Asau ata, “Ano Ona Matuhetene, mai na aia mkane ee!”
32Ne Yesus iasau osima. Iahata, “Au mo, we muaina waron tau uaiku. Ne omi oaneiki tewasi.”
33Reiso ami asei tau umau oahata, “Pene tu-tu sio umau orori muaina osiki nea te sae rei?”
34Oyo Yesus iasau osiso, “Amaku Anahatana iaisosiku na upusu ne maue na una sae waron inina na Au unare. Uamahaiku na una san rei, areimo sani Au we muaina. 35Mansiau saka oasau ata, ‘Nesie hunana ate oyo iapahia nisi tea!’ Ne Au uasau osimo onoo sio Samaria wason sio Yahudiu tewa. Sio nanie oparisaa we maunaune. Sio mo, nooso sani atuhu isia noi nisi waron nanie mtuaya nea, reiso nanie oapahia nisi nea.
36Ia seia wain isima runa Au osi mansiau, ia mo, nooi sani ia wain irahu nisi. Oyo ia sia sahoro iakahai sio mansiau rei na oparisaa tau Au, ia rei mo, nooi sani ia wain iapahia nisi. Iapahiai na isupu atuhu isia tau rekati ne kausa wanaya. Ia wain iapahia nisi rei mo, noo sani ia wain iaunau sio wason oatinu rerihoni Au oyo oparisaa. Oparisaa oyo oamahaiso okata Anahatana rotu-tu ria supan. Mka ia wain iaunauso isupu ne pahalaa sani ia wain iapahia nisi isupu nene atuhu isia. Reiso anoi mirike noo sani ia wain iapahia nisi anoi mirike. 37Reiso sani sou nanae reini mo, manisate. Sou nanae wan reasau, ‘Sio umau orahu nisi, oo sio umau honu oapahia nisi.’ 38Au uaisosimo na oeu oaunau sio wason mka oparisaa mo maunaune rei. Ne rotu-tu oparisaa mo, noso sio umau honu oeu oaunauso oanaonemo. Areimo sani oapahia nisi wan omi ruamo orahui tewa. Sio umau orahu nisi rei naone. Omi mo, hasae oeumo pan oapahia atuhu isia pan nisi wani sio umau orahui rei.”
Sio Samaria panesi oparisaa ata Yesus wain Ia Aia wain Anahatana Ihitiki na Iapuheu Mansiau
39Ia pina onate wain Yesus ianamana runai iruni osi sio pan kota rei oyo sio Samariau panesi oparisaa tau Yesus. Oparisaa noso ia pina onate rei iasau osiso ata, “Ia onate reini iasau osiku runa sae man waron unai.”
40Reiso sio Samariau rei ohokaso mai Yesus. Hoka mai, oapamanui na iruei ikataso pan no kota rei. Reiso iruei ikataso onona ua pan rei. 41Sio panesi honu oparisaa tau Yesus tau ruao oatinu ne maunauna.
42Sio oasau osi ia pina ona Samaria rei ata, “Ano pina onate, naone ami aparisaa tau Ia onate reini mo, repusu sae wani ano asaui osima rei. Ne muie reini ami aparisaa pusu ami ruama atinu ne maunauna nea oi. Ami anei ia-ia nea ata Ia reini mo, titue-tue iapuheu mansia na pene Anahatana iapasanaso.”
Yesus isuisene ia iki hanaie isa
43Yesus iruei pan kota Sikar onona ua pusi oyo, ieui pani otoe Galilea. 44Naone ruai iasau nea ata, “Sio mansiau oamuira ia mamsima runa Anahatana ne maunauna noi ruai ne niane tewa.”
45Ne tau ihokai pan otoe Galilea, mansiau oapusaai ia-ia. Tea mo, ruao onoo pusire waron Yesus iunare roe kota Yerusalem tau karisaa anori rapeka runa Anahatana ihoka rea upu arihoni otoe Mesir.
46Yesus ieu honu pan nia Kana wapan otoe Galilea. Naone Yesus iuna tihu reneniki tau tihu anggur pan niane rei. Niane rei mo, hainau arihoni kota Kapernaum tewa. Pan kota Kapernaum mo, ia onate isa iruei pan rei. Ia onate rei reimo, ia aia hanai wanane isa. Anai hanaie waipo ikupui mtinte. 47Reiso iatinu ata Yesus wain ihokai on pani otoe Yudea na waipo otoe Galilea, oyo ieui poe Yesus na iapamanui. Iahata, “Upu, uainisi arihonia na aeu akataku poe Kapernaum. Tea mo, anaku waipo ikupui mtinte. Nanie imatai nea. Uainisi arihonia na asuisenei ee.”
48Oyo Yesus iasau ata, “Waniku sin, kakaku sin! Omi openemo oparisaa tau Au sani onoo sima-simana waron ratuhete ata no kawasa arihon Anahatana runa sima-simana waron raasiraso tewasi. Onoo sima-simana samatoro oparisaa tanuku.”
49Oyo ia rei iahata, “Upu, uainisi arihonia na mai aeu akataku nea. Pene tu-tu anaku hanaie imatai.”
50Ne Yesus iasau ata, “Amaku, pene anom reuponu. Anunia nea. Anam hanaie waipo iake nea.”
Ia onate rei iparisaa tau sae wan Yesus iasau rei oyo inuniki na poe ne numa.
51Wain arena tihue asi, sira tau ne sio makahaia ohoka osima osiki. Oahata, “Upu! Upu! Anam hanaie iake nea.”
52Reiso iasei tanso ata, “Ne kupue iake tau yam ina?”
Oasau osiki ata, “Potusi! Yam osa ranie katopu ne patane titie tewa nea.”
53Oyo amai anoi repeka rei sirinia. Anoi repeka runa potusi yam osa ranie katopu mo, Yesus iasau osiki ata, “Anam hanaie iake nea.”
Reiso ia onate runa sio pusiso wason orueso okatai noi ne numa rei pusiso oparisaa tau Yesus.
54Areimo Yesus iuna sima-simane wan retuhete ata ne kawasa arihon Anahatana nai ua nea on ihokai mai Galilea on poe otoe Yudea.
Айни замон обунашуда:
Yohanis 4: ANA
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© (Active), Wycliffe Bible Translators, Inc., All rights reserved.