Yohanis 21
21
Yesus iatuhete ruai osi ne mampusua sio itu
1Yesus iatuhete ruai osi ami ne mampusua suka, oyo iatuhete ruai nai osa honu osi ami umau haineke nakane wan nanae Tiberias. Areimo sani nanie uasau reini. 2Au na kakaku Yakopis#21:2 Yohanis ikanu “Sebedeus ne hehuka”., Simon Petrus, Tomas wain sio oiki tau Didimus, Natanael arihon kota Kana wapan otoe Galilea, runa sio mampusua ua oi. 3Oyo Simon Petrus iasau osi ami ata, “Nanie ueu upesi uete ee!”
Oyo ami asau osiki ata, “Munata san rei mo, ami aeu akataya oi.”
Reiso aeuma nau nakane na asaa arupae na aeu anina ikae. Ne asupu sae isa tewa nene onone hatae sepe-sepe.
4Nene omnanoe ranie on pan resaa nea, Yesus iooi haineke nakane. Ne ami ne mampusua ationai tewa. 5Yesus iakapona ioima ata, “We netau, osupu ikae te tewa?”
Asau ata, “Tewa!”
6Oyo Yesus iahata, “Pesi mo uete rei hae arupae wanane! Mka osupu ikae.”
Reiso, apesi ma uete rei hae wanane oyo asupu ikaya panesi nai osa rotu-tu anesa kua ma uete rei pan arupae anoe tewa.
7Ne au uationai reiso uasau osi Petrus ata, “Ia rei mo, Upuri Yesus!”
Sinasi Petrus waimo ipakarian reiso inosu ne papi naue wan mui. Ne iatinu au uasau, “Ia rei mo, Upuri Yesus!”. Oyo iausahu ne papi naue honu, oyo isoman na poe waene, oyo ione na ria kaimenne. 8Ami mampusua tamena asaa arupae na ria kaimenne anesa uete wan taue na ikaya rai. Ami hainau arihon kaimenne tewa. Kani meter utun san rei. 9Ahokama ria kaimenne, anoo usa akena. Anoo ata ia isa wain ikotu ikaya poe usa akena rai. Anoo poroti wamo nea oi. 10Oyo Yesus iahata, “Orori ikaya waron mato osupure rei use uasa te tonsa mai.”
11Reiso Petrus isaa nau arupae oyo inesa uete rei na ria kaimenne. Uete rei mo, taue tau ika maina-mainaya. Pusire use 153. Ne masike asupu ikaya panesi san rei iae, ma uete rei wakiha tewa. 12Oyo Yesus iahata, “Mai, na iaita!”
Ia sia man ne hanaya na iasei tewa ata ia mo, ia seia. Areimo tau pusima anei ata ia rei mo, ma Upu Yesus. 13Yesus ihoka inana poroti oyo irui osima ai. Inana ikae oi oyo irui osima ai oi.
14Areimo, Yesus iatuhete ruai osi ami ne mampusua nai tonu nea tau iamahaiki honu nea rei.
Yesus iaisosi Petrus na isaka sio wason oparisaa tanui
15Yesus runa ami ne mampusua aima pusi, oyo Yesus iasei tau Simon Petrus ata, “Simon, Yohanis anai. Ano mo, anom runa Au te tewa renesi me netau reini anoo nnaku?”
Petrus iasau ata, “E-e, Upu! Ano anei ata au mo, anoku runaya.”
Oyo Yesus iahata, “Munata san rei mo, apiara sio wason oparisaa tau Au rei ia-ia, nooi sani ia mamsaka rompau iapiara ne rompau.”
16Ita Yesus iasei honu ata, “Simon, Yohanis anai. Ano mo, anom runa Au ia-ia te tewa?”
Petrus iasau ata, “E-e, Upu! Ano anei ata au mo, anoku runaya.”
Ita Yesus iahata, “Munata san rei mo, apiara sio wason oparisaa tau Au rei ia-ia, nooi sani ia mamsaka rompau iapiara ne rompau.”
17Ita Yesus iasei tau Petrus nai osa honu. “Simon, Yohanis anai. Ano mo, anom runa Au te tewa?”
Iatinu san rei oyo anoi rekahate pusiki. Tea mo, Yesus iasei tanui nai tonu nea ata anoi runai te tewa. Oyo iasau osi Yesus ata, “Upu, Ano anei pusire. Anei ata au mo, anoku runaya.”
Ita Yesus iasau osiki honu ata, “Munata san rei mo, apiara we mansiau wason oparisaa tanuku ia-ia, noo sani ia mamsaka rompau iapiara ne rompau.
18Atinu mai ia-ia, nanie uasau osia. Oni ano honue mo, ruam ausahu me apia. Oyo aeua sui supan man pusu ruam me maue. Ne tau akore-korea nea mo, mka arata kihem na sio okanihoo hanam oyo ororia roe naniake wan apenea eu roe tanui rei.”
19Yesus iasau san rei mo, tau nanie iatuhete ata Petrus, mka sio ohunui sapan, na sapani na Petrus iamuira Anahatana. Iasau san rei suka, oyo iasau osi Petrus ata, “Mai, na pusu Au.”
Yesus ianamana rerihoni au, Yohanis
20Petrus iuni inoo mo, au wan upususo. Au sahoro urue haineke Yesus tau naone arue ai karisaa ami Yahudiu anoma rapeka na ma upu momou oeu arihon otoe Mesir rei. Oyo uasei tau Yesus ata, “Upu, ia seia wain mka iahenia?”
21Petrus inooku oyo iasei tau Yesus rerihoni au ata, “Upu, oyo mka sapan na ia rei?”
22Ne Yesus iasau ata, “Ano pene unum reina na ia rei. Sani we maue mo, Yohanis ruai iamahaiki rotu-tu uhokaku honu te, tewa te, areimo ano mo, pene unum reina tau rei. Ne nene iake mo, ano apusu Au ia-ia man.”
23Noso Yesus iasau san rei, oyo sio kaka wani wason oparisaa tau Yesus oeu oruni inamatane ria nau rotu-tu Yesus ne mampusua umau rei oatinu ata au mo, mka upanokoku tewa. Ne Yesus iasau tewa ata au mo, mka upanokoku tewa. Ia mo, hasae iasau ata, “Sani we maue na iamahaiki rotu-tu uhokaku honu te, tewa te, areimo, pene unum reina tau rei.”
24Au rein mo, Yohanis, Yesus ne mampusue wain uruni rerihon sae man waron Yesus iunare nea rei. Au iae sahoro ukanu rai pusire tau surate reini. Au na we netau anei ata sae waron urunre reini mo, pusire manisata.
25Yesus iuna panesi asi. Ne sani ukanu pusire mo, surata panesi nai osa. Mka tuniai reini reaiinu pusire tewa.
Айни замон обунашуда:
Yohanis 21: ANA
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© (Active), Wycliffe Bible Translators, Inc., All rights reserved.