Лукара йибкьыд Шадды Хабар 8
8
ГьӀасахьван диъид хьылешикляа
1Гьадыыла хъуъ са арыдыыла ГьӀаса руъура шегьерма на мукъӀма, Йинчид ПагьӀчаалыгъаклаа хабар ваъара. Гьанийхьван диъий джуды цӀыкьӀваӀр мутагьӀлим, 2са ки хьур-рыхьыр хьыдылды, Джу ядлымыклаа на шийтӀамашдаа азад дыъыд: Мария, «Магдалина» хьур лакьаб гъад, йывды шийтӀандиклаа Гьание гехъеэрид, 3Иоанна, Хузад – Иродды управляющийед къари Сусанна, са ки маддыбыр. Гьабише джухьды джибяа куьмег гьаъарай ГьӀасас на Гьанийды мутагьӀлимешис.
Сук виед ладжбаракляа ихтилат
4Са хылис, кьухьды кӀабал ягъмиш вишийне кал, – илсанар Гьанийхда гьӀар шегьердаа диъина ай, – ГьӀасара гьабишис са ихтилат гьаъара:
5– АӀгъӀаӀбчӀура са кенчи ладжбар сук виес,
виед гедеэне са-сад сукбыр рыкъӀыде саъ сибхьура,
мыкӀмыхьде гибхьура, шуркумаше улере.
6Маддыбыр сибхьура къат кид накъудыы,
лилкьара, амма хьед джишир, къуру руъура.
7Тимбыйдыбыр сибхьура зазалма –
Лилкьара, амма зазалмыра лидхьус вылцӀаардиш.
8Сабыйдыбыр силхьвара йыхды накьудыы,
лидхьур, бытӀрад еш вылцӀара.
Гьааса гьухьур, ГьӀасара лал ваъара:
– Убрабыр кинийис ун йиший!
9МутагьӀлимеше хулкара ГьӀасадаа, шыв рухьуд ихтилат иди гьа.
10– ВаӀдаа йикиси Аллагьад ПагьӀчаалыгъад сирмыхьде гедкьас, – рухьура ГьӀасара, – маддыбишис Изды чӀелбыр хал-гийинбырна адгаси,
гадкъара, гьаджагун бадаана,
къадабцура, геджедкьын бадаана.
11Ихтилатара хьуйне, мисе рухьура; сук – Йинчид чӀел виъи. 12РыкъӀыде сидхьуд сукбыр – илсанар диъи ун ад, амма хьели Иблис йибкьыр, хъихире чӀелбыр гьабишды йикӀяа, гьабыр инаамиш джидшир, азад джидшин бадаана. 13Къат кид накьудыы сидхьуд сукбыр – илсанар диъи, ун йишир, шадна хывылкьад чӀел, амма гъваб гидиш гьабишихьде, гьадыыла цӀамды гедеэне гьабыр инаамиш дуруъура, четинваӀле ыдхӀыр мадана хъуъ суьхъдуьбкуьре, 14Зазалма идхьуд сукбыр – илсанар диъи, чӀилды ун йишир ад, амма гьӀумирдире, гвалахмыра, шигьимыра, пешемыра хьуъ гаджаадгъур ад, гьадыыла гьабишды гытӀ хъилкьаардиш. 15Йыхды накьуди идхьуд сукбыр – илсанар диъи, ун йишир, джухьды йыхды, темизды йикӀе увухӀуд, – гьадыыла гъыд вихинире еш вылцӀара.
16Гьална ки, пӀинтӀий луьвкӀва выъыр,
гьадыы уу дыкӀый лихьисдиш,
я чарпыехьде гивхьисдиш.
Ваъ, гьа лаъ киидхьуд джигиди ливилхьере,
йидкьыдбишис йаӀкв гьагун бадаана!
17Гьис хьуйне, адиш гьаасад сир,
эхир ашгара джикисды,
Адиш гьаасад дагулды,
эхир, гьацӀара йишир, гъаъ игъджидхьусды.
18Иди хьваам гьаъ ваӀ выхьды, ваӀ шууна хъадабцурди.
Гьис хьуйне, анийис маа выси,
гьалыхда адишди, джус ад калабгуд ки хӀаашуси.
19Сада дуруъура Гьанийхда нин не шубаӀ, амма кӀабалаклаа бегеде дуруъус руъурдиш. 20ГьӀасада рухьура:
– Выды нин не шубаӀ ги гъара, вы гьагус йигара.
21Амма Гьание рухьура тимбишде:
– Изды нин не шубаӀ – Йинчид чӀилыхда хъадабцуд на гьадид хьаӀле ана дирхьадбыр диъи.
ГьӀасара тӀурхьван либхьудид хьед луза хъаъара
22Сада ГьӀаса джуды мутагьӀлимер ки хъуна гемиди сукьур, рухьура гьабишде:
– Дыкьа йаӀ-ваӀ ти суруу агъӀачӀус.
23Силгара геми къирхыдаа тиниъ. Хьидыыла тиниъ диъид джигиди ГьӀаса некьик кибхьура. Садахьурка либхьур тӀурхьван, геми араа саъ килъэре каӀбчӀура, гьабыр сиене четинваӀле ыдырхӀаӀре. 24МутагьӀлимер ГьӀасад бегеде дыхьыр, кеэйере Гьа.
– МагьӀалим, магьӀалим, дыкьыркьара а е! – рухьура мибише.
Гьание, киирхьур, гиивхье хъаваъара хьыбыл, луза хъаъара лепебыр. Гьабыр секин хъишир, гъӀыдилды гьаваа хъӀувгъӀуре.
25– Выхьды инаамишвалды гьили а? – рухьура ГьӀасара мутагьӀлимешде.
ГичӀере йишир, гьӀаламат йишир ад мутагьӀлимеше рухьура са-сынийде:
– Вышдихь Гьа, хьыблис не хьидис ки кине бииругъбыр вьлцӀара, тимбыр ки хъацва гьаъад?
ГьӀасара «Кьиямат» хьур дур гъад шийтӀан йивиргара
26Гьабыр ледыркьара Галилеядид къаншара ад Гергесийшды накьудид къирхыда. 27ГьӀаса къирхыы аӀгъӀачӀуйне, Гьанийды улихьде гырхӀаре – шегьердаады шийтӀамашде хад эдеми. Гьа мыс идаа хъуъ валыг гъадишне гъургъара ай. Хала ешемиш джишир, ешемиш руъурай сырымыы. 28ГьӀаса гьагуйне, гьа лал хъиибхьур, гьанийды гъилаба ибхьура, рухьура;
– Вас закляа шиви йигад, гьай ГьӀаса, Йинчид Дух? Вахьде миннет виъи, заа йыгъ гымарыг!
29Гьанийе гилий ваъара ай, ГьӀасара гьанийды джанде ад шийтӀамашде «гъаъ ихъийиъ» рухьура. Шума иди иблисере гьа эдеми халкьара ай, гьа гедеэне зинджирмыхьван йиртӀе гьыъыр ки, къаривыл гьыъыр ки, гьа зинджирбыр тике-тике гьыъыр, хъахарай, иблисере хьура лийир, кеэйид джигима.
30– Выши выды дур? – хулкара ГьӀасара.
– Кьиямат, – джываб хъывылцӀара тиние, джуды джанде балад шийтӀамар адыыла. 31Гьабыр ГьӀасахьде джвер «ракьатди сихъмелыг» хьур, миннитдис гибхьура.
32Ай гьа джигиди банаа йыхьара ад вакмыд кьухьды нехир. ШийтӀамар гибхьура ГьӀасахьде, джвершиде вакмыд джанде аӀчӀус вияъ хьур. ГьӀасара ихтияр вылцӀара. 33ШийтӀамар, эдемиед джандаа гъаъ хъидкьыр, аӀбчӀура вакашде, вакбыр ки дели йишир, хъутӀанаала саъ хьидыы лийчир, араа саъ килъэре. 34ХӀабаӀхъӀанер, йишидбыйды гьагуйне, хъадахыри шегьерди, гьади ки, аа-уу гид мукъӀма ки ихтилат гьаъара йишир ад кардыклаа. 35Илсанар дуруъура гадкъас, шыв гьыъыр ади, йидкьыр гадкъыд, – гъабгура шийтӀамар гъаъ ихъийир ад эдеми, валыг ки гъана, бытӀрана ихтилатбыр ки гьаъара ГьӀасад гъилабада сукьур ад. Гьабишис гичӀ вырыхӀыре. 36Шийидеше ихтилат гьаъара гьабишис, шууна ГьӀасара делид хъыъырди. 37Сиене Гергесийед илсанашис гьасса гичӀ вырыхӀыре, гьабыр гидибхьура ГьӀасахьде джухьды «еримыылы хъырых» хьур. Гьа ки, гемиди аӀхъӀачӀур, хъургъара. 38ГьӀасара шийтӀамар гъаъ ихъийид эдемиес Минийихьван йыкьас йигара ай. Амма ГьӀасара рухьура:
39– Хъырых выды хала, ихтилат гьаъ, Йинчире вы бадаана шыв гьыъырди.
Ти ки гьаархӀыри, сиене шегьердис ихтилат гьаъара, ГьӀасара джус шыв куьмег гьыъырди.
Иаирды рыш
40ГьӀаса хъургъур хъиркьыйне, Гьанийис шадна салам выри, гьис хьуйне Гьа илсанашды гьӀараасатдире рыкъӀа гуьзет гьаъара ай. 41Гьа гедеэне руъура Иаир хьур эдеми – гьа синагогадид кьухьды йиъий, – ирхьури ми ГьӀасад гъилаба, «джуды хала йыкьа хьур» гирхьур, 42гьанийды ад са цӀыкьӀваӀд сен йишид рыш рикьире ай. ГьӀаса руъура гьанийихьван, илсанашды кӀабалмыд арыди ана.
43Са хьыдылды цӀыкьӀвад сен ий эбираа сирхьир ад. Гьание джухда адухъунды танга джерахӀашыы кувгъур ай, амма гьалдаана гьа хъараъас йиширдиш. 44ЙыкьӀахълаабый йиркьыр, гьа керыркьара ГьӀасад чухуйед этегек. Гьади мадана эбир хъабтӀури.
45– Выши зак кийкьыд? – хулкара ГьӀасара. Сиенебише джвер кедкьыд диш рухьура. Гьа гедеэне Петрара рухьура:
– МагьӀалим, выды аа-уу илсанар ги, сиене суруумыла эчӀидхьыр а.
46– Ваъ, вышди зак кийкьыри, – рази руъурдиш ГьӀаса. – Зас изды джандаа гъаъ кьуувет гьаабхӀыд хабар вишири.
47Гьа гедеэне, гиркӀа гьаъас джикисды геркьыр, руръура хьуъ са хьыдылды, лакьалкьара,
Минийды гъилябырма ирхьур, халкьдид улихьде ихтилат гьаъара, шыв себеб вишир ридж керкьырди Гьанийик, шууна ридж гьади мадана хъирширди.
48– Рыш, вы выды инаамишваӀлире хъырыъыд риъи. Хъырырых архыйинне, – рухьура минийде ГьӀасара.
49ГьӀасара гьааса гьухьур мадана, синагогадид кьухьнийды халаады эдеми йиркьыр, рухьура:
– Рикьири выды рыш. Маа МагьӀалимяа йыгъ гымарыг.
50Амма ГӀасара, гьа чӀилмыд ун йишир, рухьура Иаирде:
– ГимийичӀ, инаамиш йиш – гьа рикьисдиш.
51Хала аӀчӀур, Гьание джухьван адубгъура са Петр, Янан, Якьуб, са рышед дид не нин. 52Хала ад сиенебыр, риин гивхьир, мыхыр ветере, дешере ай рышахда.
Амма ГьӀасара рухьура:
– Медеш. Гьа рикьир адиш, сархыр а.
53Тимбыр Гьанийыы яхъӀбыр гьаъара каӀчӀури, рыш рикьид гьацӀара. 54Амма Гьание, хакьыр рышед хыл, рухьура:
– Рыш, лухъурза!
55– Тинийде ил ахъабгъура, рыш гьади мадана, лухърубзура, ГьӀасара гьанийис улесды кывыс вылцӀара. 56Дид не нин дакьалкьара дишир ай.
ГьӀасара хьуйне гьалысна джвершис гьагудид ихтилат маъ рухьура.
Айни замон обунашуда:
Лукара йибкьыд Шадды Хабар 8: RUT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Библие мадды чӀилмыы хъывгад Институтара, 2004