Маттэ 4
4
ЯПЛӀЭНЭРЭШЪХЬ
Исус псэкӀод ригъэшӀэным шэйтаныр ыуж зэритыгъэр
(Марк 1:12-13; Лука 4:1-13)
1Джащыгъум Тхьэм ы Псэ ЛъапӀэ Исус шъоф нэкӀым ыщагъ. Тхьэм ы Псэ ЛъапӀэ Исус ащ зыкӀищагъэр шэйтаныр Исус псэкӀод ригъэшӀэным ыуж итыныр ары. 2Исус мэфэ тӀокӀитӀурэ чэщ тӀокӀитӀурэ зенэкӀ ужым, лъэшэу къэмэлэкӀагъ. 3Шэйтанэу цӀыфхэм псэкӀод язгъэшӀэным хэтыр Исус къыбгъодахьи къыриӀуагъ:
– О Тхьэм ури Къомэ, мы мыжъохэр хьалыгъу хъунхэу унашъо шӀы.
4– Тхьэм игущыӀэ тхыгъэхэм арыт#4:4 Тхьэм игущыӀэ тхыгъэхэм арыт – еплъ Пегъымбар Мусэ ятфэнэрэ тхылъэу ытхыгъэм 8:3., – къыӀожьыгъ Исус,
– «Хьалыгъу закъор арэп цӀыфыр зэрэпсэущтыр, сыдрэ гущыӀэу Тхьэм ыжэ къыдэкӀырэри ары нахь».
5Ащ нэужым шэйтаным Исус къэлэ лъапӀэм зыдищи, Тхьэм иунэшхо нахь лъэгапӀэу иӀэм тыригъэуцуи, 6къыриӀуагъ:
– О Тхьэм ури Къомэ, мыщ дэжьым зыщедзых; сыда пӀомэ, Тхьэм игущыӀэ тхыгъэхэм арыт#4:6 Тхьэм игущыӀэ тхыгъэхэм арыт – яплъ Орэд ЛъапӀэхэм 90:11-12.: «Тхьэм имэлэӀичхэм о къыохьылӀагъэу унашъо къафишӀыщт, о плъакъокӀэ мыжъом уемыутэкӀыным пае, аӀэхэмкӀэ уаӀэтыщт».
7– Моущтэуи Тхьэм игущыӀэ тхыгъэхэм арыт#4:7 Тхьэм игущыӀэ тхыгъэхэм арыт – еплъ Пегъымбар Мусэ ятфэнэрэ тхылъэу ытхыгъэм 6:16., – риӀожьыгъ Исус,
– «Зиусхьанэу уи Тхьэ умыушэты».
8ЕтӀани шэйтаным Исус Ӏошъхьэ лъэгэ дэдэ горэм дищаий, дунаим тет пачъыхьагъу пстэури, ахэмэ щытхъушхоу яӀэри къыригъэлъэгъуи, 9къыриӀуагъ:
– ЧӀыгум зытеудзэзэ сыбгъэлъапӀэмэ, ахэр зэкӀэ къыостыщт.
10– Сауж икӀ, шэйтан! – риӀожьыгъ Исус. – Сыда пӀомэ, Тхьэм игущыӀэ тхыгъэхэм арыт#4:10 Тхьэм игущыӀэ тхыгъэхэм арыт – еплъ Пегъымбар Мусэ ятфэнэрэ тхылъэу ытхыгъэм 6:13.: «Зиусхьанэу уи Тхьэ бгъэлъапӀэзэ, ащ изакъоу уфэлэжьэн фае».
11Исус ар зыреӀом, шэйтаныр ыуж икӀыжьыгъ, мэлэӀичхэри къыфехыхи, Исус фэӀофтабгэхэу аублагъ.
Исус иӀоф Галилей хэкум зэрэщиублагъэр
(Марк 1:14-15; Лука 4:14-15)
12Иуан хьапсым чӀадзагъэу#4:12 Иуан хьапсым чӀадзагъэу – Ирод Антипэу Галилей хэкумрэ Перей хэкумрэ япщ иунашъокӀэ умэхъэкӀо Иуан хьапсым чӀадзагъ. Еплъ Маттэ 14:3-4. Исус къэбар зызэхехым, Галилей хэкум кӀожьыгъэ. 13Назарет дэкӀыжьи, хэкухэу Забулонрэ Нафталыйрэ#4:13 хэкухэу Забулонрэ Нафталыйрэ – Забулонрэ Нафталыйрэ Израиль лъэпкъым щыщ лӀэкъуитӀугъ. Ахэмэ яхэкухэр Галилей псыхъураем итыгъэ къохьэпӀэ лъэныкъомкӀи итемыр лъэныкъомкӀи итыгъэх. зыцӀэхэм ащыщэу псыӀушъом Ӏут къалэу Капернаум кӀуи, ащ дэтӀысхьагъ. 14Исус аущтэу зыкӀишӀыгъэр пегъымбар Ешайа мы гущыӀэхэу къыӀуагъэхэр#4:14-16 пегъымбар Ешайа мы гущыӀэхэу къыӀуагъэхэр… – еплъ Пегъымбар Ещайа тхылъэу ытхыгъэм 9:1-2. къэшъыпкъэжьынхэр ары:
15«Забулон хэкур, Нафталый хэкур, псы Ӏушъом Ӏут хэкур, Иордан псыхъом иадрабгъу щыӀэ хэкур, хымэ лъэпкъхэм яхэкоу Галилей!» (Ахэмэ атегущыӀэу пегъымбарым моущтэу къыӀуагъ:)
16«ЦӀыфхэу шӀункӀэм хэтхэм нэфынэшхо алъэгъугъ; лӀэныгъэм ищынэгъо хэку шӀункӀым ис цӀыфхэми нэфынэ къатыридзагъ».
17А лъэхъаным къыщегъэжьагъэу Исус Тхьэм игущыӀэхэр цӀыфхэм аригъэӀухэу къыублагъ:
– ШъуипсэкӀодшӀагъэхэм шъуафыкӀэгъожь, сыда пӀомэ, Тхьэу уашъом щыӀэм и Тетыгъошхо къэблэгъагъ.
Исус игъогу рыкӀонхэу пцэжъыешэ нэбгыриплӀым къызэряджагъэр
(Марк 1:16-20; Лука 5:1-11)
18Исус Галилей псыхъураем#4:18 Галилей псыхъураер – Галилей хэкум ит псыхъурай. ИкӀыхьагъэ километрэ 21-рэ мэхъу, инахь шъомбгъуапӀэр километрэ 13 мэхъу. иӀушъо рекӀокӀызэ, зэкъошитӀу ылъэгъугъ. Ахэр Симонэу ПетрэкӀэ заджэхэрэмрэ ащ ыш Индрысрэ арыгъэх. Ахэмэ хъытыур псыхъураем хадзэщтыгъэ, сыда пӀомэ, пцэжъыешэхэти ары. 19Исус ахэмэ ариӀуагъ:
– Сауж шъукъырыкӀу. Пцэжъые къэшъуубытыным ыуж шъузэритыгъэм фэдэу, цӀыфхэр сигъогу къытежъугъэхьанхэм шъузэрэхэтыщтыр шъозгъэшӀэщт.
20Ахэмэ а гущыӀэхэр зэрэзэхахэу, яхъытыухэр къагъанэхи, Исус ыуж ихьагъэх.
21Исус нахь чыжьэу кӀозэ, ахэмэ анэмыкӀэу зэкъошитӀоу Зебедей ыкъохэу Якъубэрэ Иуанрэ ылъэгъугъ. Ахэмэ ятэ Зебедей ягъусэу, къуашъом исхэу яхъытыухэр агъэхьазырыщтыгъэх. Исус ахэми яджагъ. 22Ахэмэ зэряджэу, къуашъори яти къабгынэхи, Исус ыуж ихьагъэх.
Галилей хэкум Тхьэм игущыӀэхэр Исус зэрэщаригъашӀэщтыгъэр, зэрэщигъэхъужьыщтыгъэхэр
(Лука 6:17-19)
23Исус зэкӀэ Галилей хэкур къыкӀухьэзэ, синэгогухэм#4:23 синэгогу – джуртмэ ятхьэлъэӀупӀ ары. цӀыфхэм Тхьэм игущыӀэхэр щаригъашӀэщтыгъ, Тхьэм и Тетыгъошхо ехьылӀэгъэ къэбарышӀури аригъэӀущтыгъ, цӀыфхэм ащыщэуи хэтрэ сымаджи, гъойщаий ыгъэхъужьыщтыгъ. 24Арышъ, Исус икъэбар Сирие хэкум#4:24 Сирие хэкур – Рим къэралыгъошхом щыщ хэкугъ. Израиль хэгъэгур Сирие хэкум щыщыгъ. тыдэкӀи щыӀугъ. Сымэджэ зэфэшъхьафи уз зэфэшъхьафи зиӀэ пстэури Исус къыфащэщтыгъэх; джынапцӀэ зыхэсхэри, къытефэхэри, зыӀэпкъ-лъэпкъ узым зэкӀиубытагъэхэри ыгъэхъужьыщтыгъ. 25Галилей хэкуми, КъэлипшӀ#4:25 КъэлипшӀ – ахэр хымэ къэлагъэх. Ахэмэ анахьыбэхэр Галилей псыхъураем икъыблэ тыгъэ къокӀыпӀэ лъэныкъомкӀэ итыгъэх. зыцӀэ хэкуми, Ерусалими, Иудей хэкуми, Иордан псыхъом иадрабгъуи ащыщхэр купышхохэу Исус ыуж ихьэщтыгъэх.
Айни замон обунашуда:
Маттэ 4: AdgNT14
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм