ᒉᓂᓯᐢ 18

1ᑳ ᑎᐯᔨᐦᒋᑫᔨᐟ ᒫᑲ ᑭ ᓄᑯᐦᐃᓱᐢᑖᐟ ᒋᑭ ᐊᓂᑕ ᒫᒼᕒᐃ ᒪᐢᑲᐋᐧᑎᑯᕽ, ᐁ ᐊᐱᐟ ᐃᐢᑳᐧᑌᒥᕽ ᐃᐧᑭᕽ ᒣᑳᐧᐨ ᐁ ᑭᓵᐢᑌᔨᐠ. 2#ᐦᐃᐸᕒᐅᐊᐧ 13:2ᑭ ᐃᑖᐱᐤ ᒫᑲ ᐁᑯᓯ ᐳᑎ ᓂᐢᑐ ᓈᐯᐊᐧ ᑎᐱᐢᑯᐨ ᑭ ᓂᐸᐃᐧᔨᐊᐧ; ᐃᐢᐱ ᒫᑲ ᐃᐧᔮᐸᒫᐟ ᑭ ᐃᐢᐸᑖᐤ ᐁ ᓇᑕᐃᐧ ᓇᑭᐢᑲᐋᐧᐟ ᐃᐢᑳᐧᑌᒥᕽ ᒥᑭᐋᐧᐱᕽ ᐅᐦᒋ ᐁᑯᓯ ᐁ ᑭ ᓈᒥᐢᑫᐧᔨᐟ ᒧᒋᕽ ᐃᓯ. 3ᐁᑯᓯ ᑭ ᐃᑌᐧᐤ, ᓄᑭᒫᒼ ᑭᐢᐱᐣ ᐁᓯ ᐊᔮᐋᐧᓀ ᑭᑕ ᒥᔪ ᑲᓇᐋᐧᐸᒥᔭᐣ ᐁᑳᐃᐧᔭ ᓵᐳ ᒥᔮᐢᑲᐤ ᑭ ᐸᑯᓭᔨᒥᑎᐣ ᑭᐟ ᐊᑐᐢᑫᔮᑲᐣ. 4ᑭᔮᒼ ᐊᐱᓯᐢ ᓂᐱ ᑭᑕ ᓈᒋᑳᑌᐤ ᐁᑯᓯ ᑭᑕ ᑭᓯᐯᑭᓇᒣᐠ ᑭᓯᑎᐋᐧᐊᐧ ᒥᓇ ᑭᑕ ᐊᔦᐧᐱᔦᐠ ᓯᐹᔮᑎᐠ. 5ᓂ ᑲ ᓈᑖᐤ ᒫᑲ ᐊᐱᓯᐢ ᐸᐦᑫᐧᓯᑲᐣ ᑭᑕ ᒪᒥᔪᑌᐦᐁᔦᐠ ᐁᑲᐧ ᒫᑲ ᒣᐧᐢᑕᐢ ᑫ ᓯᐯᐧᑌᔦᐠ, ᐃᐧᔭ ᒥᓴᐋᐧᐨ ᐁ ᐅᑎᑖᔦᐠ ᑭᐟ ᐊᑐᐢᑫᔮᑲᓂᐋᐧᐤ. ᑭ ᐃᑌᐧᐊᐧᐠ ᒫᑲ, ᐁᑯᓯ ᐃᑐᑕ ᒣᐧᐦᒋ ᑳ ᑭ ᐃᑌᐧᔭᐣ. 6ᐁᑊᕒᐁᐋᒼ ᒫᑲ ᑭᔨᐸ ᑭ ᓈᑌᐤ ᓭᕒᐊᐦᐊᐧ ᒥᑭᐋᐧᐱᕽ, ᐅᒥᓯ ᐁ ᑭ ᐃᑖᐟ, ᑭᔨᐸ ᑲᐧᔮᒋᐦ ᓂᐢᑐ ᑳᐧᐸᐃᑲᐣ ᐁ ᒥᔪᓯᐟ ᐸᑫᓯᑲᐣ, ᒫᒫᑯᓂᑫ, ᒥᓇ ᐊᔭᑯᓈᑫ ᐃᐢᑯᑌᑳᓂᕽ. 7ᐁᑊᕒᐁᐋᒼ ᒫᑲ ᑭ ᐃᐢᐸᑖᐤ ᐃᑕ ᐁ ᐊᔮᔨᐟ ᐊᐊᐧᑳᓇ ᐁ ᑭ ᓈᑖᐟ ᒧᐢᑐᓱᓯᓴ ᐁ ᐱᑭᐢᑭᓯᓯᔨᐟ ᒥᓇ ᐁ ᒥᔪᓯᔨᐟ ᐁᑯᓯ ᐁ ᑭ ᒥᔮᐟ ᐊᑐᐢᑫᔮᑲᓇ, ᑭ ᑲᑫᐧᔮᐅ ᒫᑲ ᐁ ᐅᓯᐦᐋᐟ. 8ᐁᑯᓯ ᑭ ᐅᑎᓇᒼ ᑐᑐᓵᐳᐃᐧᐱᒥ ᒥᓇ ᑐᑐᓵᐳ ᐊᓯᒋ ᐊᓂᐦᐃ ᒧᐢᑐᓱᓯᓴ ᑳ ᑭ ᑭᓯᓵᐧᐟ, ᐁᑯᓯ ᑭ ᐅᔭᐢᑐᐁᐧᐤ; ᑭ ᐃᐧᒋᑳᐸᐃᐧᐢᑕᐁᐧᐤ ᒫᑲ ᓯᐹᔮᑎᑯᕽ ᐁᑯᓯ ᑭ ᒥᒋᓱᔨᐊᐧ.

9ᐅᒥᓯ ᒫᑲ ᑭ ᐃᑎᐠ, ᑖᓂᐋᐧ ᓭᕒᐊᐦ ᑭᐊᐧ? ᑭ ᐃᑌᐤ ᒫᑲ, ᒋᐢᐟ, ᒥᑭᐋᐧᐱᕽ ᐊᔮᐤ. 10#ᕒᐅᒪᓇ 9:9ᐁᑯᓯ ᑭ ᐃᑎᐠ, ᑫᒋᓈ ᑳᐃᐧ ᑭ ᑲ ᐯ ᐅᑎᐦᑎᑎᐣ ᐃᐢᐱᓯᐸᔨᑭ ᐃᔨᑯᕽ, ᐁᑯᓯ ᒫᑎᑲ ᓭᕒᐊᐦ ᑭᐊᐧ ᑭᑕ ᐅᑯᓯᓯᐤ. ᓭᕒᐊᐦ ᒫᑲ ᑭ ᐯᐦᑕᒼ ᐱᑕᐃᐧᐢᑳᐧᐦᐟ ᒥᑭᐋᐧᐱᕽ ᐅᐢᐱᐢᑲᐧᓂᔨᕽ ᐁ ᐊᔮᔨᐠ. 11ᐁᑊᕒᐁᐋᒼ ᒫᑲ ᒥᓇ ᓭᕒᐊᐦ ᓵᓴᐩ ᑭ ᑭᓭᔨᓂᐃᐧᐊᐧᐠ ᒥᓇ ᓵᓴᐩ ᑭ ᐳᓂᐸᔨᐤ ᑭᑕ ᐃᓯ ᐊᔮᐟ ᓭᕒᐊᐦ ᑳ ᐃᓯ ᐊᔮᒋᐠ ᐃᐢᑫᐧᐊᐧᐠ. 12#1 ᐱᑕᕒ 3:6ᓭᕒᐊᐦ ᒫᑲ ᑭ ᑭᒧᒋᐸᐱᐤ ᐁ ᐃᑌᐧᐟ, ᓈᓇᐸᐃᐧ ᒋ ᐁ ᑭᓭᔨᓂᐁᐧᔮᐣ ᓂ ᑲ ᐊᔮᐣ ᒥᔦᐧᔨᑕᒧᐃᐧᐣ, ᓄᑭᒫᒼ ᒥᓇ ᐁ ᑭᓭᔨᓂᐃᐧᐟ? 13ᑳ ᑎᐯᔨᐦᒋᑫᐟ ᒫᑲ ᑭ ᐃᑌᐤ ᐁᑊᕒᐁᐋᒪ, ᑖᓀᐦᑭ ᓭᕒᐊᐦ ᑳ ᐸᐦᐱᐟ? ᐁ ᐃᑌᐧᐟ, ᑫᐦᒋᓈ ᒋ ᓂ ᑲ ᑭ ᐊᔮᐋᐧᐤ ᐊᐋᐧᓯᐢ ᓵᓴᐩ ᐁ ᑭᓭᔨᓂᐃᐧᔮᐣ? 14#ᓬᐅᐠ 1:37ᑫᑲᐧᐩ ᒋ ᑭᑕ ᑭ ᐹᐧᑕᐃᐧᑖᐤ ᑳ ᑎᐯᔨᐦᒋᑫᐟ? ᐃᑕ ᑳ ᐊᓱᑕᒫᑖᐣ ᒥᓇ ᑭ ᑲ ᐅᑎᐦᑎᑎᐣ, ᐃᐢᐱᓯᐸᔨᑭ ᐃᔨᑯᕽ, ᐁᑯᓯ ᓭᕒᐊᐦ ᑭᑕ ᐅᑯᓯᓯᐤ. 15ᓭᕒᐊᐦ ᒫᑲ ᑭ ᐋᓀᐧᑕᒼ ᐁ ᐃᑌᐧᐟ, ᓇᒪᐃᐧᔭ ᓂ ᐹᐦᐱᐣ, ᒋᑫᒫ ᑭ ᓭᑭᓯᐤ, ᑭ ᐃᑖᐤ ᒫᑲ, ᓵᓴᐩ ᐊᓂ ᑭ ᑭ ᐸᐦᐱᐣ.

16ᐊᓂᑭ ᒫᑲ ᐊᔨᓯᔨᓂᐊᐧᐠ ᐁᑯᑕ ᑭ ᐅᐦᒋ ᐸᓯᑯᐊᐧᐠ, ᐁ ᑭ ᐃᑖᐱᒋᐠ ᓵᑕᒥᕽ ᐃᓯ; ᐁᑊᕒᐁᐋᒼ ᒫᑲ ᑭ ᐊᑎ ᐃᐧᒉᐁᐧᐤ ᐁ ᓄᒪᑫ ᐊᑎ ᓄᓴᐋᐧᐸᒫᐟ. 17ᑳ ᑎᐯᔨᐦᒋᑫᐟ ᒫᑲ ᑭ ᐃᑌᐧᐤ, ᓂ ᑲ ᑳᑕᒪᐋᐧᐤ ᒋ ᐁᑊᕒᐁᐋᒼ ᑳ ᐃᐧ ᐊᔨᓯᒋᑫᔮᐣ; 18ᐃᐧᔭ ᐁᑊᕒᐁᐋᒼ ᑫᐦᒋᓈ ᑭᑕ ᐊᑎ ᑭᐦᒑᔨᐃᐧᐟ ᒥᓇ ᑭᑕ ᓱᑫᔨᑖᑯᓯᐟ ᐁ ᐱᐢᑭᑕᐢᑳᓀᓯᐟ, ᒥᓇ ᑲᐦᑭᔭᐤ ᑳ ᑕᐦᑐᐢᑳᓀᓯᒋᐠ ᐊᔨᓯᔨᓂᐊᐧᐠ ᐊᐢᑭᕽ ᑭᑕ ᓴᐁᐧᔨᑖᑯᓯᒋᐠ ᐃᐧᔭ ᐅᐦᒋ? 19ᒋᑫᒫ ᓂ ᑭᐢᑫᔨᒫᐤ ᑭᑕ ᑲᑫᐢᑭᒫᐟ ᐅᐟ ᐊᐋᐧᓯᒥᓴ ᒥᓇ ᑳ ᑕᐦᑐᑫᐟ, ᑭᑕ ᑲᓇᐁᐧᔨᑕᒪᐧᐠ ᒫᑲ ᐅᐟ ᐃᓯᑖᐧᐃᐧᓂᔨᐤ ᑳ ᑎᐯᔨᐦᒋᑫᔨᐟ, ᑭᑕ ᑐᑕᐦᑭᐠ ᑲᐧᔭᐢᑭᑖᑎᓯᐃᐧᐣ ᒥᓇ ᐅᔭᓱᐋᐧᓯᐁᐧᐃᐧᐣ; ᑳ ᑎᐯᔨᐦᒋᑫᐟ ᑭᑕ ᐃᑐᑕᒪᐋᐧᐟ ᐁᑊᕒᐁᐋᒪ ᐊᓂᒪ ᑳ ᑭ ᐃᑖᐟ. 20ᑳ ᑎᐯᔨᐦᒋᑫᐟ ᒫᑲ ᑭ ᐃᑌᐧᐤ, ᒋᑫᒫ ᒥᐢᑕᐦᐃ ᐯᐦᑖᑲᐧᐣ ᓵᑕᒼ ᒥᓇ ᑲᒫᕒᐊ, ᒥᓇ ᒋᑫᒫ ᐅ ᒪᒋᑎᐃᐧᓂᐋᐧᐤ ᐊᔨᐋᐧᑫᔨᑖᑲᐧᓂᔨᐤ; 21ᓂ ᑲ ᐃᑐᐦᑖᐣ ᐁᑲᐧ ᑭᑕ ᓇᑕᐋᐧᐯᓂᑫᔮᐣ ᑭᐢᐱᐣ ᑖᐯᐧ ᑳ ᐃᓯᐦᒋᑫᐋᐧᑫᐧ ᐊᓂᒪ ᑳ ᐃᑎᑖᑲᐧᕽ ᑳ ᐅᑎᐦᑎᑯᔮᐣ; ᑭᐢᐱᐣ ᒫᑲ ᓇᒪᐃᐧᔭ ᓂ ᑲ ᑭᐢᑫᔨᑌᐣ. 22ᐊᓂᑭ ᒫᑲ ᐊᔨᓯᔨᓂᐊᐧᐠ ᐁᑯᑕ ᑭ ᐅᐦᒋ ᑫᐧᐢᑭᐊᐧᐠ ᓵᑕᒥᕽ ᐃᑌᐦᑫ ᐃᓯ ᐁ ᐊᑎ ᐃᑐᐦᑌᒋᐠ, ᒫᑲ ᐁᑊᕒᐁᐋᒼ ᑫᔮᐱᐨ ᑭ ᐅᑎᐢᑲᐃᐧᑳᐸᐃᐧᐢᑕᐁᐧᐤ ᑳ ᑎᐯᔨᐦᒋᑫᔨᐟ.

23ᐁᑊᕒᐁᐋᒼ ᒫᑲ ᑭᓯᐋᐧᐠ ᑭ ᐃᑐᐦᑌᐤ ᐅᒥᓯ ᐁ ᑭ ᐃᑌᐧᐟ, ᑭ ᑲ ᓂᓯᐊᐧᓈᒋᐦᐋᐊᐧᐠ ᒋ ᐅᑲᐧᔭᐢᑭᑖᑎᓯᐊᐧᐠ ᑭᑭ ᐅᒪᒑᑎᓯᐊᐧ? 24ᑭᐢᐱᐣ ᓂᑯᑖᐧ ᓂᔮᓇᓄᒥᑕᓇᐤ ᐅᑲᐧᔭᐢᑭᑖᑎᓯᐊᐧᐠ ᐁᔮᐋᐧᑫᐧ ᐱᐦᒋ ᐁᐊᐧᑯ ᐅᑌᓇᐤ; ᑭ ᑲ ᓂᓯᐊᐧᓈᒋᐦᑖᐣ ᒋ ᐁᑯᓯ ᐁᑳ ᑭᑕ ᒪᓈᒋᐦᑖᔭᐣ ᐊᓂᑭ ᐅᐦᒋ ᓂᔮᓇᓄᒥᑕᓇᐤ ᐅᑲᐧᔭᐢᑭᑖᑎᓯᐊᐧᐠ ᐁᑯᑕ ᑳ ᐊᔮᒋᐠ? 25ᓇᒪᐃᐧᔭ ᐁᑐᑫ ᐁᑯᓯ ᑭ ᑲ ᐃᑐᑌᐣ, ᑭᑕ ᓂᐸᐊᒋᐠ ᐅᑲᐧᔭᐢᑭᑖᑎᓯᐊᐧᐠ ᑭᑭ ᐅᒪᒑᑎᓯᐊᐧᐠ, ᐁᑯᓯ ᐅᑲᐧᔭᐢᑭᑖᑎᓯᐊᐧᐠ ᑭᑕ ᐃᓯᓈᑯᒋᑫᒋᐠ ᑖᐱᐢᑯᐨ ᐅᒪᒑᑎᓯᐊᐧᐠ; ᓇᒪᐃᐧᔭ ᐁᑐᑫ ᐁᑯᓯ ᑭ ᑲ ᐃᐦᑐᑌᐣ; ᓇᒪ ᒋ ᑳ ᐅᔭᓱᐋᐧᑕᕽ ᒥᓯᐁᐧ ᐊᐢᑭ ᑲᐧᔭᐢᐠ ᑭᑕ ᐃᐦᑐᑕᒼ? 26ᑳ ᑎᐯᔨᐦᒋᑫᐟ ᒫᑲ ᑭ ᐃᑌᐧᐤ, ᑭᐢᐱᐣ ᒥᐢᑲᐊᐧᑳᐧᐃᐧ ᓵᑕᒥᕽ ᓂᔮᓇᓄᒥᑕᓇᐤ ᑲᐧᔭᐢᐠ ᐅᑎᑖᑎᓯᐊᐧᐠ ᐱᐦᒋ ᐅᑌᓈᕽ, ᓂ ᑲ ᒪᓈ ᓂᓯᐊᐧᓈᒋᐦᑖᐣ ᒥᓯᐁᐧ, ᐁᐊᐧᑯᓂᐠ ᐅᐦᒋ. 27ᐁᑊᕒᐁᐋᒼ ᒫᑲ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᒫᑎᑲ ᐁᑲᐧ, ᓂ ᑭ ᐅᑎᓇᒫᓱᐣ ᑭᑕ ᑭᑐᑕᐠ ᑳ ᑎᐯᔨᐦᒋᑫᐟ ᐱᓯᓯᐠ ᐁ ᐊᓯᐢᑭᐃᐧᔮᐣ ᒥᓇ ᐁ ᐱᐦᑯᑌᐃᐧᔮᐣ; 28ᑭᐢᐱᐣ ᓂᑯᑖᐧ ᓂᔮᓇᐣ ᓄᐦᑕᐤ ᐃᐦᑕᓯᒋᐠ ᐊᓂᑭ ᓂᔭᓇᓄᒥᑕᓇᐤ ᐅᑲᐧᔭᐢᑭᑖᑎᓯᐊᐧᐠ, ᑭ ᑲ ᓂᓯᐊᐧᓈᒋᐦᑖᐣ ᒋ ᒥᓯᐁᐧ ᐅᑌᓇᐤ ᐱᑯ ᓂᔮᓇᐣ ᓄᐦᑕᐤ ᐁ ᐃᑕᓯᒋᐠ? ᑭ ᐃᑌᐧᐤ ᒫᑲ, ᑭᐢᐱᐣ ᐁᑯᑕ ᒥᐢᑲᐊᐧᑳᐧᐃᐧ ᓀᒥᑕᓇᐤ ᓂᔮᓇᓄᓵᑊ, ᓇᒪᐃᐧᔭ ᓂ ᑲ ᓂᓯᐊᐧᓈᒋᐦᑖᐣ. 29ᑫᔮᐱᐨ ᒫᑲ ᑭ ᐊᔭᒥᐦᐁᐤ, ᐅᒥᓯ ᐁ ᑭ ᐃᑌᐧᐟ, ᑭᐢᐱᐣ ᑲᓇᑫ ᓀᒥᑕᓇᐤ ᒥᐢᑲᐊᐧᑖᐧᐃᐧ. ᑭ ᐃᑌᐧᐤ ᒫᑲ, ᓇᒪᐃᐧᔭ ᐁᑯᓯ ᓂ ᑲ ᑐᑌᐣ ᓀᒥᑕᓇᐤ, ᑭᐢᐱᐣ ᐃᐦᑖᑖᐧᐃᐧ. 30ᐅᒥᓯ ᒫᑲ ᑭ ᐃᑌᐧᐤ, ᑭᔮᒼ ᐁᑳᐃᐧᔭ ᑳ ᑎᐯᔨᐦᒋᑫᐟ ᑲᑕ ᑭᓯᐋᐧᓯᐤ, ᓂ ᑲ ᐱᑭᐢᑳᐧᐣ ᒫᑲ; ᑭᐢᐱᐣ ᑲᓇᑫ ᓂᐢᑐᒥᑕᓇᐤ ᒥᐢᑲᐋᐧᑖᐧᐃᐧ ᐁᑯᑕ. ᑭ ᐃᑌᐧᐤ ᒫᑲ, ᓇᒪᐃᐧᔭ ᐁᑯᓯ ᓂᑲ ᑑᑌᐣ, ᑭᐢᐱᐣ ᓂᐢᑐᒥᑕᓇᐤ ᒥᐢᑲᐋᐧᑳᐧᐃᐧ ᐁᑯᑕ. 31ᑭ ᐃᑌᐧᐤ ᒫᑲ, ᒫᑎᑲ ᐁᑲᐧ, ᓂ ᑭ ᐅᑎᓇᒫᓱᐣ ᑭᑕ ᐊᔭᒥᐦᐊᐠ ᑳ ᑎᐯᔨᐦᒋᑫᐟ: ᑭᐢᐱᐣ ᑲᓇᑫ ᓂᓯᑕᓇᐤ ᒥᐢᑲᐊᐧᑖᐧᐃᐧ ᐁᑯᑕ. ᑭ ᐃᑌᐧᐤ ᒫᑲ, ᓇᒪᐃᐧᔭ ᓂ ᑲ ᓂᓯᐋᐧᓈᒋᐦᑖᐣ ᓂᓯᑕᓇᐤ ᑭᐢᐱᐣ ᐃᐦᑖᑖᐧᐃᐧ. 32ᑭ ᐃᑌᐧᐤ ᒫᑲ, ᑭᔮᒼ ᐁᑳᐃᐧᔭ ᑳ ᑎᐯᔨᐦᒋᑫᐟ ᑲᑕ ᑭᓯᐋᐧᓯᐤ ᓂ ᑲ ᐱᑭᐢᑳᐧᐣ ᑫᔮᐱᐨ ᐯᔮᑳᐧᐤ; ᑭᐢᐱᐣ ᑲᓇᑫ ᒥᑖᑕᐦᐟ ᒥᐢᑲᐋᐧᑖᐧᐃᐧ ᐁᑯᑕ. ᑭ ᐃᑎᐠ ᒫᑲ, ᓇᒪᐃᐧᔭ ᓂ ᑲ ᓂᓯᐊᐧᓈᒋᐦᑖᐣ ᒥᑖᑕᐦᐟ ᑭᐢᐱᐣ ᐃᐦᑖᑖᐧᐃᐧ. 33ᑳ ᑎᐯᔨᐦᒋᑫᐟ ᒫᑲ ᑭ ᐊᑎ ᓯᐯᐧᑌᐤ, ᐃᐢᐱ ᑳ ᐳᓂ ᐊᔭᒥᐦᐋᐟ ᐁᑊᕒᐁᐋᒪ: ᐁᑊᕒᐁᐋᒼ ᒫᑲ ᑭ ᑭᐁᐧᐤ.

Айни замон обунашуда:

ᒉᓂᓯᐢ 18: KKMs

Лаҳзаҳои махсус

Паҳн кунед

Нусха