JOHONIN 4
4
Isua Samari Nupang khat le achong
1Johon aneka Isuan keng atam ual zolai ei man chang ani zei hanuk baptismam apek atia Pharisi ngaiin chu ei riat u. 2Adik taka chu Isua aninga tute baptisma ei pek om mak, a zolai ngai rong keng apek u, 3Hantin han chong ei hong suak Isuan ariat le chu Judai ram a maka Galili rama a kir reta asena. 4Hava han Samari ram apal nget anang pe na.
5Hankeng Samari rama Sukar khopui chu ahonga suaka, havan ata Jakob han a naipasal Joseph ranga mun ei pek lehan ankar rei nimak. #Anp 33.19; Jos 24.32 6Hava taka han Jakob a tikhur um a oma, hatuka Isua chu a kal hong choina ei pong sika tikhur kola ansuta, hava han sun chimrip tang ani zeia.
7Samari nupang khat ti luak ranga ahonga, hatuka Isuan akoma, “Ti nek rang na pe ro ba,” ati na. 8Hava han a zolai ngai chu sak nek anchok ranga khopuia aleia se sua ani u na.
9Hankeng Samari nupang han akoma, “Nang Juda mi, koi Samari mi, hontinmo ka koma ti nek rang nei na zong?” atina a masanga. Asik chu Juda mi le Samari mi chu anton ngai maka. #Ezr 4.1-5; Neh 4.1-2
10Isuan, “Pathian neinun pek le ti nek rang a na zongpu ha riat tan la chu nangin akoma zongin na ti ba, hatuka aman damna ti na pek inti,” ati na a masanga.
11Hatuka nupang han akoma, “Ka pu, ti luak na ite don mak chena, hava panga tikhur um alan thuk sana, hanle hovan ata mo hava damna ti nei man? 12Hiva tikhur hi koini na pu ruala mi Jakob in ei na pek, ama, a sanai ngai le a kel rualin hiva hi ei nek u,” ati na a masanga.
13Isuan, “Hiva ti anek tak chu ati anral ret inti. 14Tenchu, ka koma kei pek ti nek tak chu ati anral pial lai no nia, ka koma ti kei pek asunga taituan tenpeia damna ti nar put inti,” ati na a masanga.
15Hatuka nupangin, “Ka pu, hano hava ti ha na pe ro ba! Ka ti ei anral lai nokna ranga hanuk chu hiva tenpeia ti luak kei hong lai nokna ranga,” ati na.
16Isuan, “Na ruathar va kui tan hiva hin hong kir ro,” ati pe na.
17Nupangin, “Ruathar don makung,” ati na a masanga. Isuan, “Ruathar don makung nei ti ha adik. 18Tenchu ruathar ranga pei nei hong don sua keng ani zei, hatuka atun nei ompui him na ruathar tak ni mak, hiva chong nei na ril hi Isuan adik keng,” ati pe na.
19Nupangin, “Ka pu, ka na riat zei, nang hi deari khat ke na ni. 20Koini na pu ruala Samari nu ngaiin chu hiva muala Pathian ei biak u chachak tenchu nangni Juda mi ngaiin Pathian biakna chu Jerusalema keng nei ti u,” ati na.
21Isuan, Nupang, “Ka chong hi iam ro, mipuiin, Pa chu hiva mualam ni no ni, Jerusalemam biak no ni hava ang hun chu la hong inti. 22Nangni Samari ngaiin nei riat u nok ha keng nei biak u chachak, koini Juda ngai chu nei riat ha keng nei biak asik chu Juda ngai ata keng zokna ei la ni rang. 23Tenchu hun khat la hong inti, haneka atun ahonga suak keng ani zei, hava tika chu Pathian Ratha sintho theina ranak le ataka Pa la biak tatak unti. Asik chu Pa han hiva anga abiak ngai keng eia rok ngalum. 24Pathian chu Ratha ani, hatuka ama abiak ten Ratha sinthotheina ranak le biak rase,” ati na.
25Hatuka, “Nupangin, Messia, Krista ei ti u ha ei la hong rang ka riat, ama ahong tik chu aloma na la manriat kiar inti,” ati na.
26Isuan, “Hatuka koi ana chong pui hi ama ha ka ni zei,” ati na.
27Hatuka havalai tak han a zolai ngai chu ahonga kir u na, nupang khat mai le ei lei chong ahong mu u na aboi amandong u na. Hanum nisela, tuten nupang rang ha, “Imo nei zong?” Hanuk, “Ichangamo hiva nupang le nei lei chong,” ati na ankel ngam om lem maka.
28Hatuka nupang chu a tikola a maka khuana ase na, mipui koma, 29“Hong u tan hong en uta, kei tho kei sin ngai dora anariat pe zit mi khat a om, ama so Messia ni no ni mo?” ava ti na. 30Hatuka khua mi ngai chu Isua kom ahong u na.
31Hava tak han a zolai ngaiin, “Rabbi, hong nek ta ro,” atia Isua chu akui u na.
32Isuan amani rang, “Ka koma anek rua a om chu nangnin nei riat u nok zat keng,” ati na.
33Havasik han, a zolai ngai amani le amani ankel u na, “Anek rang alei honga choi pe mo om,” anti u na.
34Isuan, “A na honga tirpu ei zot atho le asin azui hi keng koi ka bu. 35Nangnin chu, ‘Sang atna rang tha manli alansam ti u mak che mo,’ lui tiang anhoi tan en u ta; atun len a at rang amin sua keng ani zei. 36A at pu han ei lona chu amana, hatuka taituan damna ranga sang a ata, sang a tu le sang a atpa mun ruala arai ei san theina ranga. 37‘A tu angkhat, a at mi tei’ ti chong ha hiva hin ahonga dika. 38Sin nei tho u nokna muna sang a at ranga keina tir u, mi ei lei pong suana muna nei van chuan u ani na.” ati na.
39“Ka sin tho ngai dora ana riat pe zit,” atia nupangnu chong ril ata Samari khuana mi tam riaiin Isua chu ahong iam u na. 40Hasik han Samari mi ngai chu ama koma ahong u na abil u na a omsa rang amathem u le chu, Isua ninni ten ala oma.
41Hanuk chu ama chong ril ata mi tampan ala hong iamsa u na. 42Havasua le chu amani han nupangnu koma, “Atuna koini nei hong iamna hi chu nang na chong ril ata ni lai mak me, asik chu koini ngetin achong nei riat ata le ama hi ramual sandampu tatak ani ti nei hong riat ani zei,” ati u na.
Isuan Ana khat Amandam
43Ninni suale chu Isua havan ata Galilina asena. 44Isuan aning lena, “Deari hi ei omna khua lena chu lalchi ruai mak,” ti chong arila. #Mt 13.57; Mk 6.4; Lk 4.24 45Galili ahonga suak le chu mipuiin alei pham u na, asik chu amani ham Zokna Panta lai han Jerusalema ase u anina hatuka hava panta laia asin tho ngai dora ham amu zit ani u na. #Jn 2.23
46Hava suale chu Isua Galili rama ti ha gerep zu ei man changna Kana khuana ahong reta. Hava han ram aruai bila milian khat a oma, ama a naipasal ana ha Kapernauma khuana a oma. #Jn 2.1-11 47Isua Judai ram ata Galili rama ahonga tung zei ti ei riat le akom asena, Kapernauma a naipasal ana avan dam pe ranga ava mathema, asik chu athi rang toto ani zeia. 48Hatuka Isuan, “Sinsiana le boidong khap sin na mu u nok ten iam u ret no ta ni,” ati pe na.
49Hava ati suale milianpa han, “Ka pu, ka naipasal athi man na hong pe ro ba,” ati na.
50Isuan, “Se pei ta ro, na naipasal aleia dam zei,” ati pe na. Hatuka hava mi han Isua chong ril ha a iama, ase na. 51Hatuka ase lai tak han asuak ngai ha akoma aleia hong antong pui u na, “Na naipasal aleia dam zei,” ahong ti u na.
52Hatuka, aman akom u na, “Hova hun taka mo ei lei dam?” ati na arakela. Amani han, “Mizan khului tiang chang dar khata ei na a mathana,” ati u na. 53Havan tin han, Isuan a pa koma, “Na naipasal adam zei,” ati lai taka hun ha ariata. Hasik han ama le a in sungkua aloma a iam u na. 54Judai ram ata Galili rama ahong suana hiva hi Isuan boidong khap sin ei tho voi annina ani na.
Айни замон обунашуда:
JOHONIN 4: RANGBSI
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.