LUKA 23
23
Isu Pilat hmaa a ngîr
(Mt 27.1-2,11-14; Mk 15.1-5; Jn 18.28-38)
1Chun, a pung khâwmhai po po chu an tho a, Isu chu Pilat kuomah an ṭhuoi tah a.
2Chun, “Hi mipa hin kan chihai a sukkhawhlo a, Kaisar kuomah sie chawi a khap bawk a, Krista, lal ân ti khawm kan hriet,” tiin an hêk a.
3Chun, Pilatin a kuomah, “Judahai lal i ni maw?” tiin ân dawn a. Ama chun a kuomah, “I hril angin ka nih,” a ta, a dawn a.
4Chun, Pilatin thiempu lalhai le mipuihai kuoma chun, “Hi mipa chunga hin iengkhawm suol ka hmu nawh ie,” a ta.
5Nisienlakhawm, anni chun, “Galili ramah a phut a, hi hmun chen hin, Judai ram khaw tina inchûk- tirin, mi po po a chawk- buoi hlak a nih,” tîn an thaw nâwk zuol a.
Isu Herod hmaa a ngîr thu
6Chun, Pilatin chu chu a hrietin, ama chu Galili rama mi a ni le ni naw ân dawn a.
7Chun, Herod biela mi a nih ti a hriet phingleh, Herod kuomah a tir tah a; chuong lai chun ama khawm Jerusalemah a um bawk a.
8Chun, Herodin Isu a hmu chun a lâwm bêk bêk a; a chanchin a hriet leiin inhmaa inthawkin hmu a nuom a.
9Chun, thu tamtak ân dawn a, iengkhawmin a dawn si nawh a.
10Chun, thiempu lalhai le Dân inchûktirtuhai chun ngîrin nasatakin an hêk an hêk a.
11Chun, Herod le a sipaihai chun Isu an suknawmna a, an nuisaw a; chun, puon ropuitak insiltirin Pilat kuomah a tir nâwk tah a.
12Chu ni tak chun Herod le Pilat chu an inngei tah a; chu hma po chu an intai hlak a.
Isu thi dinga an rêlna
(Mt 27.15-26; Mk 15.6-15; Jn 18.39—19.16)
13Chun, Pilatin thiempu lalhai, hotuhai, mi po pohai a ko khâwm a,
14an kuomah, “ ‘Mihai a suk- khawhlo,’ tiin hi mipa hi ka kuomah in hung ṭhuoi kha a na; chun, ngai ro, in hma ngeiah ka suosal a, in hêkna thua khan hi mipa chunga hin iengkhawm suol ka hmu naw a nih;
15Herod khawmin a hmu bawk nawh; ei kuomah a hung tir nâwk el a ni hi; ngai ro, thina khawp meuin iengkhawm a thaw nawh ie.
16Vuong ka ta, kân suo nâwk el ding a nih,” a ta.
17[Chun ruoiṭhe ni chun mi intâng pakhat ân suopêk ngei dân a na.]#Ziekna ṭhenah Ch.17na hi a um nawh
18Nisienlakhawm, inruoltakin an khêk a, “Hi mipa hi chu sukbohmang la, Barabba kha mîn suopêk lem rawh,” an ta.
19(Chu mipa chu khawpuia helna ieng amanih lei le tuol a that leiin intângna ina intâng a nih).
20Pilat ruok chun Isu insuoktir a nuom a, an kuomah thu a hril nâwk a;
21nisienlakhawm, an khêk a, “Krawsah hemde rawh, krawsah hemde rawh,” an ta.
22Chun, ama chun a vawi thumnaah an kuomah, “Ieng dingin am ie? Hi mipa hin ieng am a suksuol a? Thina khawp meu, a chungah iengkhawm ka hmu nawh; vuong ka ta, kân suo el ding a nih,” a ta.
23Anni ruok chun inringtakin krawsa hemde dingin an ngên ṭal a. Chun, an râwl chun a vau dei tah a.
24Chun, Pilat chun an ngên anga thaw dingin thu a sukthlûk tah a.
25Helna le tuolthat leia intângna ina intâng an ihni kha ân suoh a, Isu ruok chu an nuom nuoma an thaw dingin a pêk tah a.
Isu hemdea a um thu
(Mt 27.32-44; Mk 15.21-32; Jn 19.17-27)
26Chun, an ṭhuoi hmang laiin Simon, Kurinia mi, rama inthawka hung an man a. Isu hnung tienga put dingin a chungah kraws chu an innghat a.
27Chun, mipui le nuhmei âwm inchum inchuma ṭap ṭaphai, mipui nasatakin an zui a.
28Isu ruok chun anni tieng a ngha a, “Jerusalem naunuhai, mi ṭa naw ro, nangni le in nauhai ta dingin ṭap lem ro.
29Ngai ta u, a ni la hung tlung a tih, chuong nia chun, ‘Nuhmei chinghai, nau vawn ngai nawna phînghai, nau nêk ngai naw nênehai chu an hamṭha ie,’ la tîng an tih.
30 #
Hos 10.8; Tp 6.16 Chu pha chun mihaiin tlâng kâwla dâm, ‘Mi del rawh,’ la tîng an ta; muol kâwla dâm, ‘Mîn khum rawh,’ la tîng an tih.
31Thing hringa hman hieng ang an thaw chun, a ṭâwla chun iengtin takin am an thaw ding chu?” a ta.
32Chun, a kuomah mi dang pahni, mi suol, sukhlum dingin an ṭhuoi veh a.
33Chun, “Luru” an ti hmun chu an tlungin, chutaka chun krawsah an hemdeh a, mi suolhai leh, a chang- tieng pakhat, a vawitieng pakhat.
34 #
Sm 22.18
Chun, Isûn, “Pa, anni hi ngaidam rawh, an thilthaw hi an hriet naw a ni hi,” a ta. Chun, a silfênhai chu an insemin ai an sân a.
35 #
Sm 22.7
Chun, mipuihai chun ngîrin an thlîr a. Chun, hotuhai khawmin, “Mi dang hman a sukdam hlak annâwm; Pathien ithlang Krista a ni zet chun ama le ama insukdam ta sienla,” tiin an ti-el a.
36 #
Sm 69.21
Chun, sipaihai khawmin ama chu an nuisaw a, a kuomah an hung a, zu thûr an pêk a,
37“Judahai lal i ni tak zet chun insukdam rawh,” an ta.
38Chun, a chung tienga chun, “HI MIPA HI JUDAHAI LAL A NIH” ti lekha ziek#Ziekna ṭhenah, ‘Grik ṭawng dâm, Latina dâm, Hebrai ṭawng dâma ziek a nih,” ti an bel a um a.
39Chun, an mi suol khai pakhat chun Isu a hal a, “Krista chu i ni naw am a nih? Insukdam la, keini khawm mi sukdam ta la,” a ta.
40Nisienlakhawm, pakhat chun dawn malamin a kâwk a, “Pathien meu khawm i ṭi naw maw? thuhmun zingin an hrem che hi.
41Eini chu ei tuor âwm tak hrim tuor ei nih, ei thilthaw ra indiktak hmu ei ni chau lem a; ama ruok hin chu iengkhawm a suksuol si nawh,” a ta.
42Chun, “Isu, i ramah lala i hung phaleh, mi hre zing rawh aw,” a ta.
43Chun, ama chun a kuomah, “Titakzetin ka hril che hi, vawisûn hin ka kuomah Paradisah um vêng i tih,” a ta.
Isu thi thu
(Mt 27.45-56; Mk 15.33-41; Jn 19.28-30)
44Chun, nisa inding lai a hung na, chu chena inthawk zânbu suong pha chenin khawvêl a hung inthim ta vawng a, nisa var a hung bo tah a;
45 #
Ex 26.31-33
Chun, Pathien biekina puonzâr chu a laiah a lo tlêr tah a.
46 #
Sm 31.5
Chun, Isu râwl inringtakin a khêk a, “Pa, i kutah ka thlarau kân kawltir,” a ta. Chu chu a ti zo chun a thlarau ân thla tah a.
47Chun, sipai za hotu chun thil umzie chu a hmu chun, “Hi mipa hi matheiloin mi feltak a ni phawt el,” a ta. Pathien ân pâk tah a.
48Chun, chu ennuom chu thlîr dinga mipui hung inkhâwmhai po po chun thil umziehai chu an hmu chun, an âwmhai inchum inchumin in tieng an fe tah a.
49 #
Lk 8.2-3
Chun, a hmêlhriethai po po le, nuhmei Galili rama inthawka hung zuihai chu, chuong thil chu thlîrin hlatakah an ngîr a.
Isu phûma a um thu
(Mt 27.57-61; Mk 15.42-47; Jn 19.38-42)
50Chun, ngai ta, mi pakhat a hming Josef, rorêltu mi ṭhatak, feltak a um a,
51(an rorêl le an thilthaw khawm kha a remti naw hrim a nih), Judai khuo Arimathai mi a na, Pathien ram a beisei hlak a.
52Ama chu Pilat kuomah a feh a, Isu ruong a hnih a.
53Chun, a lâk thlâk a, puon zai inhmiin a tuom a, thlân lung ver kuok, tukhawm lân zâlna ngai nawnaah ân zâl tah a.
54Chun, chu ni chu Inringlâwk ni a na, Châwlni a ni vâng ta sih a.
55Chun, nuhmei Galili rama inthawka ama le hunghai khan an zui pei a, thlân le a ruong inzâlzie chu an hmuh a.
56 #
Ex 20.10; Dt 5.14 Chun, in tieng an fe nâwk a, thil rim inhnik le hriek rim inhnikhai an buotsai a. Chun, Châwlni chun thupêk angin an châwl tah a.
Айни замон обунашуда:
LUKA 23: HMARCLBSI
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.