LUKA 18
18
Hmeithai le rorêltu tekhithu
1Chun, beidawng loin an ṭawngṭai rawp ding a nih ti, inhriettirna dingin an kuomah tekhithu a hril a;
2“Khaw ienga manih rorêltu pakhat a um a; ama chun Pathien a ṭi nawh a, mihriem hlak a ngaisak bawk nawh.
3Chun, chu khuoa chun hmeithai pakhat a um a; ama chun, ‘Ka khingpui chungah ka phuba mi lapêk rawh,’ tiin a kuomah a fê rawp a.
4Chun, ama chu sâwt rei chu a nuom nawh a; nisienlakhawm, nakie chun a lungrilin, ‘Pathien ṭi loin mihriem ngaisak naw lang khawm,
5hi hmeithai hin a mi sukbuoi leiin a phuba chu lapêk el ka tih; chuong naw chun, a hung rawp hin mi la suksâwl zêk rawi a tih,’ a tih a,” a ta.
6Chun, Lalpa bawkin, “Rorêltu fel naw thu hril chu hre ro.
7An chungah zai la daw hri sien khawm, a mi thlang, asûn azâna ama kotuhai phuba chu Pathienin a lâkpêk naw ding am a nih?
8Ka hril cheu hi, an phuba chu lapêk vak a tih. Nisienlakhawm, Mihriem Naupa hi a hung pha chun khawvêlah ringna a hung hmu ding am a nih?” a ta.
Pharisai le Siedawltu tekhithu
9Chun, mi feltak ni inringa, mi dang po po hmusit hlak, tuhai amani kuoma khawm chun hi tekhithu hi a hril a:
10“Mi pahni Pathien biekinah ṭawngṭai dingin an hang feh a; pakhat chu Pharisai a na, pakhat chu siedâwltu a nih.
11Pharisai chu a ngîr a, ama khât chauin hieng ang hin a ṭawngṭai a, ‘Pathien, mi dang hlêpruhai, fel nawhai, uirehai ang ka ni naw lei le, hi siedâwltu ang khawm hi ka ni naw leiin i chungah ka lâwm ie.
12Châwlkâr khatah vawi hni bu ka nghei hlak a; ka nei taphawt sâwmah pakhat ka pêk hlak,’ a ta.
13Siedâwltu ruok chu hlatakah a ngîr a, vân tieng khawm a dâk ngam nawh a, ‘Pathien, kei mi suol hi mi lunginsiet rawh,’ tiin a âwm ân chum ân chum ta lem a.
14 #
Mt 23.12; Lk 14.11 Ka hril cheu hi, a hmasa nêkin ama lem chu thiem changin a inah a fe thla ta lem a. Inngaihlu taphawt tlâwm an ta, inngaitlâwm taphawt chu chawimawiin um an tih,” a ta.
Isûn naupangtêhai mal a sâwm
(Mt 19.13-15; Mk 10.13-16)
15Chun, a them dingin a kuomah an nautêhai an hung ṭhuoi a; inchûktirhai ruok chun chu chu an hmu phingleh an lo hal a.
16Nisienlakhawm, Isu chun a ko a, “Naupangtêhai ka kuomah inhung- tir unla, khap naw ro; Pathien ram chu hieng ang mihai ta a ni sih a.
17Titakzetin ka hril cheu hi, tûkhawm Pathien ram chu nau- pangtêin a lâwm anga lâwm naw phawt chu a sûngah lût naw tawp an tih,” a ta.
Rorêltu mi hausa
(Mt 19.16-30; Mk 10.17-31)
18Chun, hotu tûin amanih a kuomah, “Inchûktirtu ṭha, chatuona hringna ka nei theina dingin ieng am thâwng ka ta?” a ta.
19Chun, Isûn a kuomah, “Ieng- dinga ṭha i mi ti? mi pakhat chau naw chu tûkhawm ṭha an um nawh, chu chu Pathien a nih.
20 #
Ex 20.14; 20.15-16; 20.12; Dt 5.18; 5.16-17,19,20 Thupêkhai chu i hriet an- nâwm ‘Uire naw, tuol that naw, inru naw, hrietpuina inkhêl pe naw, i nu le pa chawimawi rawh,’ tihai hi,” a ta.
21Chun, ama chun, “Chuong thu po po chu naupangte ka ni laia inthawkin ka zâwm pei hlak,” a ta.
22Chun, Isûn chu chu a hrietin a kuomah, “Tu khawm hin kawng khat i la bâk ie; i nei po po zawr la, pasiehai kuomah sem rawh, chuongchun, vânah ro nei i tih; chun, hung la, mi hung zui rawh,” a ta.
23Ama ruok chu chuong thu chu a hrietin a lungngai bêk bêk a, a hausak bêk leiin.
24Chuongchun, Isûn ama chu a en a, “Sum hauhai chu Pathien rama lût a vân tak âwm deh aw!
25Mi hausa Pathien rama lût nêkin sanghâwngsei ṭhimnaah lût thleng a awl lem a nih,” a ta.
26Chun, chu thu hrehai chun, “Anleh, tu am sandam ni thei a ta?” an ta.
27Ama ruok chun, “Mihriem thaw ruollo hi Pathien thaw thei a nih,” a ta.
28Chun, Peterin, “Ngai ta, keinîn kan in le lo mâksanin kan zui cheh a!” a ta.
29Chun, ama chun an kuomah, “Titakzetin ka hril cheu hi, tûkhawm Pathien ram leia in amanih, nuhmei amanih, unauhai amanih, nu le pa amanih, nauhai amanih mâksan taphawt chu,
30hi dam sûng ngei khawm hin a nêka tam lem hmu naw ding tûkhawm an um nawh, hun la hung tlung dinga chatuona hringna leh,” a ta.
Isûn a thi ding thu a hrillâwk vawi thumna
(Mt 20.17-19; Mk 10.32-34)
31Chun, sâwm le pahnihai chu a kuomah a tumin a ṭhuoi a, an kuomah, “ngai ta u, Jerusalemah ei hang fe ding a ni hi; zâwlneihai thu ziek po po kha Mihriem Naupa chunga hin tlung a tih.
32Jentailhai kuomah pêng an ta, nuiza siemna dingin hmang an tih, inzakumtakin siem an ta, chil sâkkhum an ta,
33chun, vuong an ta, sukhlum an tih; chun, ni thum niin tho nâwk a tih,” a ta.
34Chun, chuong thu hrim hrim chu a ngaina an hriet nawh a; thu hril chu anni ta dingin thupin a um a, ieng hril am a ni khawm an hriet nawh.
Mitdel kutdaw sukdam thu
(Mt 20.29-34; Mk 10.46-52)
35Chun, Jeriko a tlung tâwmin mitdel tu amanih lampui sîrah kut dawin a lo ṭhung a;
36ama chun mipui fe ri chu a hriet a, iengtizie am a ni taa ti ân dawn a.
37Chun, anni chun Nazareth Isu a fe a nih ti an hril a.
38Chuongchun, ama chu, “Isu David naupa, mi lunginsiet rawh,” tiin a khêk a.
39Chun, a hmasahai chun to dingin an hal a; nisienlakhawm, ama chu, “David Naupa, mi lunginsiet rawh,” tiin a khêk zuol det a.
40Chuongchun, Isu a ngir a, a kuoma hung ṭhuoi dingin thu a pêk a;
41chun, a kâwl a hung tlung chun, “I chungah ieng ang am ka thaw i nuom a?” a ta, a lo indawn a. Chun, ama chun, “Lalpa, hmu thei ka nuom,” a ta.
42Chun, Isûn a kuomah, “Hmu thei ta raw khai, i ringna hi i dampui a nih,” a ta.
43Chun, kârloin a hmu thei nghâl tah a, Pathien inpâk pum peiin ama chu a zui tah a; chun, mi po po chun, chu chu an hmu chun Pathien an inpâk a.
Айни замон обунашуда:
LUKA 18: HMARCLBSI
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.