創世記 18
18
應許亞伯拉罕𫱔子
1上主在幔利佢个橡樹該位對亞伯拉罕顯現。該時係當晝最熱个時，亞伯拉罕坐在帳篷門口。 2佢昂頭一看，看到三個人企在對面，就走過去迎接佢等，伏在地上， 3講：「𠊎主啊，你若係認為𠊎堪得，請落來歇睏一下，俾若僕人招待正走。 4𠊎拿水給你等洗腳，請在樹下坐涼。 5𠊎拿一些東西給你等食，你等食飽正有氣力繼續行路。你等既然到𠊎屋下來，當然愛俾若僕人招待。」
佢等應講：「好啊，照你講个去做。」
6 亞伯拉罕就趕緊走入帳篷，對莎拉講：「遽遽拿二十公升最好个麵粉出來，做兜餅仔。」 7佢又走到牛群中，擇一隻又嫩又肥个細牛仔，交給僕人，吩咐佢遽遽準備。 8然後，佢將乳油、牛乳㧯牛肉拿來，擺在佢等面前，親身在樹下招待佢等；佢等就食。
9佢等問亞伯拉罕：「若𡜵娘莎拉在㖠位？」
佢應講：「在帳篷肚。」
10其中一儕講：「明年這時節，𠊎愛倒轉來；若𡜵娘莎拉會𫱔一個孻仔。」
莎拉在帳篷門口，在該人後背聽到。 11該時，亞伯拉罕㧯莎拉已經盡多歲，莎拉个月經也早就停掉。 12所以莎拉心肚偷偷仔笑講：「𠊎已經恁老，吾老公也恁老，𠊎敢還會有該種興趣？」
13上主問亞伯拉罕講：「莎拉做麼介偷笑，講：『𠊎恁老了，敢還會𫱔呢？』 14上主敢有做毋到个事？明年這時節，𠊎愛倒轉來；莎拉會𫱔一個孻仔。」
15 莎拉著驚到毋敢承認，講：「𠊎㖠有笑！」
上主講：「有，你確實有笑！」
亞伯拉罕為所多瑪懇求
16後來，該三儕離開該位，上到看得到所多瑪个地方。亞伯拉罕也跈等行，送佢等一站路。 17上主講：「𠊎所愛做个事，敢好囥等毋㧯亞伯拉罕講。 18亞伯拉罕个後代會成做強大个國家；地上个萬國愛因為佢得福氣。 19𠊎揀選佢，係愛佢指示佢个孻仔㧯後代聽從𠊎，主持公道，伸張正義。恁樣，𠊎正做得實現𠊎對亞伯拉罕个應許。」
20上主講：「𠊎聽到當多指責所多瑪㧯蛾摩拉个話；佢等个罪惡滿滿。 21𠊎一定愛下去，看所聽到个指責係毋係確實。」
22其中兩儕就轉身離開該位，去所多瑪；只有亞伯拉罕企在上主面前。 23亞伯拉罕進前，對上主講：「你斷真愛將好人㧯壞人共下滅掉係麼？ 24若係城肚有五十個好人，你還愛消滅全城嗎？做毋得為到這五十個好人饒這城麼？ 25你一定毋會將好人㧯壞人共下滅掉！俾好人㧯壞人共下受刑罰，你一定毋會恁樣做！世界个審判者行事敢毋係應該當公正。」
26上主應講：「若係𠊎在所多瑪尋得到五十個好人，𠊎就為到佢等饒全城。」
27 亞伯拉罕又講：「主啊！雖然𠊎係泥做个，總係𠊎愛大膽問加一擺， 28若係城肚只有四十五個好人，你會因為少五儕，就滅掉全城麼？」
上主應講：「若係尋得到四十五個好人，𠊎也無愛滅掉這城。」
29 亞伯拉罕又對主講：「若係只有四十個人呢？」
佢講：「若係尋得到四十個，𠊎也毋滅掉這城。」
30 亞伯拉罕講：「主啊！求你毋好受氣，𠊎愛繼續求你。若係只有三十儕呢？」
佢應講：「若係尋得到三十個，𠊎也毋滅這城。」
31 亞伯拉罕講：「主啊！請你原諒𠊎，𠊎較好膽求你。若係有二十個呢？」
佢應講：「若係尋得到二十個，𠊎乜毋滅這城。」
32最後亞伯拉罕講：「主啊！求你毋好受氣，准𠊎再求一擺。若係只有尋到十個呢？」
佢應講：「為到這十儕个緣故，𠊎也毋滅這城。」
33上主㧯亞伯拉罕講煞，就離開；亞伯拉罕也轉屋下去。
Айни замон обунашуда:
創世記 18: THV12Hdb
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012