Génesis 13
13
Abram ko Lot dachrjendeꞌe choo
1Abram bachrjexin Egipto ko sakjui nuntheꞌe Neguev, jeꞌe ko chriꞌi ko kain thi bechunda, ko kai Lot sakjui ngain chrinii. 2Ko Abram anto tsjé bechunda; bechunda tsjé kuxiigo, chia plata ko chia oro. 3Ko ngain nunthe Neguev bachrjexin na̱ ko yao ko yao sakjui na̱ bijija na̱ ngain nuntheꞌe rajna Bet-el, thi beꞌe nchia ndasiꞌin na̱ are saꞌo, ngayee rajna Bet-el ko Hai. 4Ko nthiꞌa Abram udinchechjian naa giꞌi jitangi, ko nthiꞌa binchesayexin Ndo Dio.
5Lot, thi kai bagakji ngain Abram, kai bechunda tsjé kuleko, tsjé kuxinthaa ko nchia ndaasin. 6Ko thi nunthe binthe na̱ ibagiraꞌa thi bane na̱ jeꞌe na̱ ko kuxigue na̱, ko ichroꞌa ruginthe na̱ xrajeꞌo nunthe. 7Mexinxin bintheketo ni bakingaria kuxigue Abram ko ni bakingaria kuxigue Lot. Ko ni cananeo ko ni ferezeo binthe na̱ ngain nunthe yaa kai. 8Kuthimejan Abram ndache Lot: «Jaꞌa ko jaꞌan rugundaꞌa tseto ná ixin xra choo ná, ko kai chroꞌa tseto ni thingaria kuxigua na̱. 9Yaa jii nguii nunthe, jaꞌa thinchieꞌe thinoo satsji. Ja̱ satsji nu rajngon, jaꞌan satsji nu rajianxin; ko ja̱ satsji jaꞌa nu rajianxin, jaꞌan satsji nu rajngunxin. ¡Aro rugunda ruchjeeya ná!»
10Ko Lot tsjeꞌe ko bikon chjagee jinda thinga diꞌin Jordán ko kai bikon nu rajnanchjan diꞌin Zoar, ko ngaa chjaaga yaa anto yee jinda jii. Ko chrjuin beꞌe xraa jngiꞌi ntha thuchjuin binchechjian Nchaa ná o xraa jngiꞌi ni egipcio ixin are mee Nchaa na̱ xra kunxantheꞌa Sodoma ko Gomorra. 11Mexinxin Lot kuinchieꞌe nguii chjagee nda Jordán ko sakjui nu thi chrinxin nchaꞌon. Ko jañaa chjeeya na̱. 12Ko Abram tabithuꞌe ngain nuntheꞌe Canaán, ko Lot sabigeꞌe ngain rajna binthe ngaa chjaaga, chrikee rajna Sodoma. 13Aro chujni Sodoma anto jianꞌa binthe na̱ ko anto tsjé thi jianꞌa bancheꞌe na̱ ngathexin kon Ndo Dio.
14Kuthimejan, are Lot bachrjendeꞌe Abram, Ndo Dio ndachro ngain Abram: «Tsjeꞌe nu kuꞌe, nu nunthe, nu thi chrinxin nchaꞌon ko nu thi diataunxin nchaꞌon. 15Nguixin nunthe dikon, jaꞌa ruchjaꞌa nunthe ko kain ni sachrjeninxin jaꞌa, jeꞌe na̱ ruchunda na̱ nunthe jiꞌi kainxin nchaon. 16Ko jaꞌan sinthaꞌa ixin chujnia tsutsjé na̱ xraa jinche ngataꞌa nunthe. Ja̱ chrujan chujni nchao tsekin jinche jii ngataꞌa nunthe, kai nchao tsekin chujni sachrjeninxin jaꞌa. 17Dingathjen, ko dingandeꞌe nguixin nunthe ruchjaꞌa, thi jininxin ko thi tunxin nunthe.»
18Kuthimejan Abram batsiin nchia ndasiꞌin ko sakjui sabigeꞌe ngain nthajie̱ nthathjao diꞌin Mamre, thi jii nunthe Hebrón. Ko nthiꞌa binchechjian naa giꞌi jitangi ixin runchesayeꞌe Ndo Dio.
Айни замон обунашуда:
Génesis 13: plsNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.