Matayi 2
2
Abayeni abakubufumilo bwizuba
1U Yesu akapapiwa mukaya aka Betelehemu muchigaba icha Yudeya, pakabalilo aka Mwene u Helodi. Bo pachilapo akabalilo panandi, kukiza abamanya ntondwa abakubufumilo bwizuba ubwa kaya akakulu nkani aka Yelusalemu. 2Bakalalusya bakati, “Ali ko kwiyi umwana yuyo apapiwa pakuba we mwene uwa ba Yuda? Tukennya ulutondwa lwache kubufumilo bwizuba. Po twiza pakumwiputa.” 3Bo u Mwene u Helodi, poka na bantu bosi aba mu Yelusalemu bivwa zinizi, bakavulala mumoyo. 4U Helodi akabitizya abaputi abasongo na bamanyisi ba Ndaghilo nukubalalusya ukuti, “Nkimba ko kwiyi kuko u Kilisitu akwiza pakupapiwa?”
5Bakamula bakati, “Mukaya aka Betelehemu muchigaba icha Yudeya. Pakuti ivi vyo vivyo umulaghuzi akasimba ukuti,
6 #
Mik. 5.2
‘Wee Betelehemu, muchigaba icha Yudeya
ute we munandi uwabumalilo pakasi patwaya tosi utwa mu Yudeya.
Mumwako mukwiza pakufumamo umulongozi,
yuyo akwiza pakubalongozya abantu bane aba Izilayeli.’ ”
7U Helodi akabitizizya kubusyefu abayeni abakubufumilo bwizuba ukuti amanye akabalilo akenecho kako ulutondwa lukaboneka. 8Akabatuma ku Betelehemu na mazyu aghakuti, “Bukagha mumulondelezye nkani umwana yunuyu, nanti mwamwagha mwize mumbuzye ukuti nane imbuke pakumwiputa.”
9Bo bivwa kwa mwene bakabuka, po ulutondwa lulo bakalwennya kubufumilo bwizuba lukalongolela nukwima pamwanya pabuzilo bubo umwana akabapo. 10Bo balwennya ulutondwa lula, bakahoboka nkani. 11Bakinjila munyumba nukwennya umwana poka nu nyina u Maliya, bakafughama nukumwiputa. Bakafumya ivyabupi vyabo ivya golide, ni vyakununkila ivya lubani, sona na mafuta agha mila nukumupa umwana.
12Po bakanyokela kuchisu chabo pakwendela izila iyinji, pakuti u Chala akabasoka muchilota ukuti batakanyokele kwa Helodi.
Ukuchimbilila kuchisu icha Ijiputi
13Bo babuka, uwantumi uwa Mwene akamubonekela u Yosefu muchilota nukumubuzya ukuti, “U Helodi akwiza pakulonda ukuti amughoghe umwana. Nyamuka musende umwana nu nyina nukuchimbilila kuchisu icha Ijiputi. Wikale kunuko mupaka nkubuzye ukuti wepeko.” 14Po u Yosefu akanyamuka pabusiku, akasenda umwana nu nyina nukubuka nabo kuchisu icha Ijiputi, 15#Hos. 11.1kuko akikala mupaka u Helodi akafwa. Izi zikabombiwa pakukwanilisya zizyo u Mwene akanenela mu mulaghuzi ukuti, “Nkamwitizya Umwana wane umulumendo ukuti epemo mu Ijiputi.”
Ukughoghiwa ukwa bana
16Bo u Helodi azyaghannya ukuti abayeni abakubufumilo bwizuba bala bamuzimbula, akakalala nkani. Akalamula ukuti utwana tosi utulumendo mu Betelehemu na mutwaya utupalamani tosi, tuto tukaba na maka mabili nukwika pasi tughoghiwe. U Helodi akabomba zinizi ukuyana namumo akamanyilila ku bayeni abakubufumilo bwizuba nizya kabalilo kako ulutondwa lula lukaboneka. 17Zizyo umulaghuzi u Yelemiya akalaghula zikakwanilisiwa ukuti,
18 #
Yel. 31.15
“Izyu likwivwika mu Lama,
ukulila nukufwifwitila ukukulu.
U Lakelo akubalila abana bache
sona akukana pakusangalusiwa
pachifukwa ichakuti abana bache bate ku bumi sona.”
Ukunyokela ku Nazaleti
19Bo u Helodi afwa bulo, uwantumi uwa Mwene akamubonekela u Yosefu muchilota mu Ijiputi. 20Akati, “Nyamuka, senda umwana nu nyina nyokela kuchisu icha Izilayeli, pakuti babo bakalondagha pakumughogha umwana bafuye.” 21Po u Yosefu akanyamuka, akasenda umwana nu nyina nukunyokela ku Izilayeli.
22Loli bo u Yosefu ivwa ukuti u Alikelabu amupyanite uwise u Mwene u Helodi muchigaba icha Yudeya, akanyila pakubukako. Akasokiwa muchilota, po akabuka muchigaba icha Galileya 23#Mlko. 1.24; Luk. 2.39; Yoh. 1.45nukwikala mukaya aka Nazaleti. Po zizyo abalaghuzi bakalaghula zikakwanilisiwa ukuti, “Uyu akwiza pakwitiziwanga mu Nazalini.”
Айни замон обунашуда:
Matayi 2: LMBNT2016
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Маълумоти бештар дар бораи Ulufingo Ulupya