KEYUM KERO 6
6
Tanike Deemang-amoe
1Edílo tanie parlentodí bulu ome kídíem oto. 2Delo Shédíke oo kídíe ome kídíem kampope kaala bulu agí mííbangsupe mimepe laato. 3Delo Ruutum bí poto, “Ngok aidde agínpe tanilo duuyarmín yimayé; kapeila tanibí adíne delokke tanike dítage língko kolang takying annyipe iyé.” 4Delo longe kídídelo Nephilim kídíe yédo delokke méélam loote edílo Shédíke oo kídíe ome kídílo yébosutodí, bulu ome-uem obosuto. De ome-oo kídarde konnyi-mennyingke amín kana miram ami kídíe.
5Tani amosokke ami kídíke atímange yagorupe bottela buluke aapí míídu-míítok kídíete atímape iyar teteng dope Shédíbí kaato. 6Delo Shédíbí amoso taniem pímemto emla aapílo ankíla bursuto. 7Delo Ruutum bí poto, “Ngo ngokke pílensutonam tanime nyokmoyéku, taniem lang taroem, eggoona ato kídíemlang yopgoona pettang kídíem, ngo pímemsuto emla bursudung.” 8Idola Noahbí Shédíke keralo kaabape yéto.
Noah
9Sikesi Noahke opín-odonge: Noahbí deenampe yéna amikuai delokke paab kamanakuai. Noahbí Shédíkíng yébosuto. 10Noahbí oo angumko kato, Shem, Ham delokke Japheth. 11Delo tani amongsi Shédíke kangkolo deemang alooto delokke tani amongsim midu-mimage bííbomto. 12Shédíbí kaatoname, tani amongso amíl-amo gena tabunge deemang aloope yéyinto. 13Shédíbí Noahme poto, “Ngo amíl-amo gena tabungem nyokyinmope emla míngkai; kapeila bulu kelok tani amosi midu-mimakpe bííbomkai, tani amoso lekope bulum ngo nyokmoyé. 14No Gopar esinglok etkungko omlangka; etkung delo pírtek kídíem pírlík geyéla arangemla luyuem mutkyonlok yolkap líktoka. 15Sikepe no motopíam: etkung delokke bodonge 133 mitarko, ape 22 mitarko delokke kedone 13 mitarko ipe aido. 16Etkung delok legape ekapko ila 44 sentimitarpe pénsam emla abe em medola kirki ilík langka. Etkung abedelo eyabem ilíkla, kumbang kísana adong angumko replíkla ilangka. 17Ngo turna takamem nyokyinmodope tani amoso puumuem melíkyé. Amoso yéna takame nyokyé. 18Idola nokkíng ngo daapongko ibosuyé. Etkung delo nolang nok mime, nok oo kídíelang nyameng kídíe aatoka. 19Delokke amíl amo kana, turna takamlok milo-mime pumsupe, nokkíng turmín gedope bomalangka. 20Atí-atína pettanglok pumsupe, bulum turmonam legape no aabolangka. 21Delokke atí-atína donam-tíínamem bomala, dekede nokkelang buluke donam-tíínampe ibidope mekum langka.” 22Shédíke pokampe Noah tabungem iruuto.
Айни замон обунашуда:
KEYUM KERO 6: adiBSI
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.