SAN LUCAS 7
7
Jesús aptamilquisquiyam apquilancam capitán co Roma
(Mt 8.5-13)
1Natamin apsovjam apquiltimnaycam alhta nipyesicsa enlhit, apmiyaclho mocjam tingma Capernaum. 2Apnec alhta maa lhama capitán co Roma. Ningmasquem alhta incajac apquilancam. Quitlhincasquic alhta ingyitsapoc. Apcasicjavoc alhta Jesús. 3Lhama alhta aplinga capitán apvisay Jesús. Apquilapajasa alhta napocja apquilvanyam co Judea. Aptomjac alhta apquilanya: Eliltimnasquiclha sat Jesús. Ingyilhyemoc sat etamilquiscomoc sat selancam —alhta aptomjac. 4Apquilyoclhec alhta Jesús. Apquilinlhanacmec alhta apquilinmalhnaycam:
—Aptasi nac capitán maa. Intasi nac epasmoc lhip. 5Ingasicjavoc nincoo co Judea. Ingillanescasquic alhta tingma ninganeyquiclhilha —alhta apquiltomjac.
6Apyiplaclhec alhta Jesús enlhitaoc. Lhama alhta apquilvocmo ayamquitilha tingma pac. Yejemoc alhta apquilapajasa capitán aptimem apnaymacoc. Apquililtimnasquic alhta Jesús:
—Visqui, nopecjicsojo nasa. Acyaponcanalhquic omoc tacja evac lhip tingma ajac. 7Invanalhquic evalhoc olamyilhic lhip. Ingyapajas sat acvamlha appayvam. Etamalvomoc sat selancam. 8Alyajaclhoc mataa coo lha seyanya. Singilpilhtetemo ajac coo lha apnac. Actomjac coo mataa siyanya: Ilhing, aplhinquic mataa. Actomjac coo mataa siyanya poc: Ingyilhyim, apquilhyicmec mataa. Actomjac coo mataa siyanya selancam: Illana sat asi, apquillanac mataa —alhta aptomjac.
9Pilapcasquic alhta Jesús aplinga appayvam. Yejemoc alhta appaycacpo. Apquilpamejitsa alhta apquillhalhmaa: Actomjac coo siyanya quellhip:
—Avanjec anco meyasquiyam as enlhit. Am otaac mocjam nipyesicsa co Israel actema nac lha —alhta aptomjac.
10Apquiltajavoc alhta mocjam apquilapajasomap. Apquilvitangvoclhec alhta aptamilaclho apquilancam.
Jesús aplhaticjasquiyam tampeyi ayitca
11Lhama alhta apmiyaclho Jesús tingma apvisay Naín. Apquillhalhmaa alhta apquiltamsoycaoc najan aplhamoclhojo enlhit. 12Lhama alhta apcamquitvocmo apatong tingma. Aptajanyavo alhta apquilpatmeyam enlhit apquitsepma, yoyam elatongnic. Tampeyi alhta ayitca. Lhama apanco alhta ayitca. Allhalhmaa alhta aplhamoclhojo enlhit. 13Lhama alhta apvita Visqui ingac. Apyovsec alhta apquilano. Aptomjac alhta apcanya:
—Noncovin nasa —alhta aptomjac.
14Yejemoc alhta apyipitcangvocmo yamit aysicsic, appatningvocmo alhta. Yejemoc alhta apcanvocmo aptomja apquilpatmeyam. Aptomjac alhta apcanya Jesús:
—Enlhit apquitcoc, actomjac coo siyanya lhip: Ilhaticja —alhta aptomjac.
15Yejemoc alhta aplhaticja apquitsepma. Apnaclhec alhta netin. Inyiplacmoc alhta appayvam. Aptomjac alhta apcanya inquin: Coyantemiclha sat ayitca —alhta aptomjac Jesús. 16Apquilacac aplhamoclhojo enlhit. Apquilacoc alhta Dios Ingyapam. Apquilpamejitsa alhta:
—Ingilpalhavac nincoo profeta apvanyam Dios aplingascama.
Apquilpamejitsa mocjam:
—Apvaac Dios Ingyapam, yoyam epasmoc enlhitaoc —alhta apquiltomjac.
17Inlingalhquic alhta apvisay Jesús yoclhilhma Judea najan lhalhma anco.
Enlhit apquilinyema Juan yapasquiscama yingmin inyap
(Mt 11.2-19)
18Aplingangvocmec alhta amyaa Juan. Apquiltamsoycaoc alhta apquililtimnascama. Apquilevam alhta apcanit apquiltamsoycaoc. 19Apquilapajasa alhta apnaclha Visqui ingac. Eltime sat elanic quellhip:
—¿Lhip ya aplhenacpo alhta, yoyam eva, inlhoyqui laa ongilaylhic sat poc? —alhta aptomjac Juan.
20Apquilvocmec alhta apnaclha Jesús. Apquililtimnasa alhta:
—Juan yapasquiscama yingmin inyap lhac jingilapajasac singilanya ongilmalhnam lhip: ¿Lhip ya aplhenacpo alhta, yoyam eva, inlhoyqui laa ongilaylhic sat poc? —alhta apquiltomjac.
21Naysicsa apquilvoy alhta apquiltamilquiscacmo Jesús aplhamoclhojo enlhit melyimnatem. Apquiltamilquiscacmec alhta ningmasquemataoc najan acnatovascama somquic quilyicjamo. Apquiltamilquiscacmec alhta aplhamoclhojo mepqui apataoc. 22Aptomjac alhta apquilanya Jesús:
—Eliltimnasquiclha sat Juan asoc apquilvitay najan apquillingay quellhip. apquilvitaclhe ilhma mepqui apataoc. Inquiltamilaclho apquillhingam enlhit apquilyateyaycam. Inquiltamilaclhec apyimpeoc actomjaycaoc lepra ningmasquem ningilyitapaycam. Apquillingaclhec amyaa mepqui apaycaoc.#Is 35.5-6. Apnalhaticjangvocmec apquilmasquingvaycmo alhta. Apquililtimnasacpec enlhit mepqui apquilnatam tasic amyaa.#Is 61.1.
23Apquilinyejemoc anco enlhit aptomja mejeyasquiyam —alhta aptomjac.
24Apquilvonquipquic alhta Juan apquilapajascama. Apquiltimnasam alhta amyaa Jesús enlhit aplhamoclhojo. Juan alhta aplhenacpoc:
—¿Soc alhta apquililtamjoc quellhip elvitangvomoc yoclhilhma actamopeycaoc? ¿Apquililtamjo ya elvitangvomoc yammamoc acyovjascama alhcajayam? —Jave. 25¿Soc asoc alhta apquililtamjoc elvitac mocjam quellhip? ¿Apquililtamjo ya elvitangvomoc enlhit acma aptalhnama apyelcomap? Apquilyasamcoc quellhip enlhit acma apquilantalhnama apquilyelcomap najan enlhit acma apquilnatam. Apnaycam mataa as enlhitaoc apquilviscaa tingma pac. 26¿Soc asoc alhta apquililtamjoc elvitac mocjam quellhip? ¿Apquililtamjo ya elvita profeta Dios aplingascama? Nasoc anco aptomja apyimtalhnamo, melhno profeta Dios aplingascama. 27Juan alhta aplhenacpoc maa. Eycaso actomja ilhnic nat aclhanma vaycajac:
Ongvapajacsic sat soycam amyaa apmamyi lhip,
yoyam elanecsic amay, yoyam eyacsic lhip#Mal 3.1.
—nic nat intomjac.
28Actomjac coo siyanya quellhip: Paj lhama enlhit lhalhma anco apyimtalhnamo apno Juan yapasquiscama yingmin inyap. Naso, enlhit meyimtalhnamo Dios apquilnancascama, eyca as aptomja apyimtalhnamo melhno Juan —alhta aptomjac Jesús.
29Lhama alhta apquillinga amyaa aplhamoclhojo enlhit najan apquilmam solyayem. Apquiltomja apquilyapascaseycaoc alhta yingmin Juan. Am alhta coyeycajalhcac apquilpayvam apquillhena Dios aptomja appeyvomo. 30Apquiltanovquic alhta fariseos najan apquilyascamco apquiltemaclha. Intanovalhquic alhta Dios apmayjayoclha. Am alhta colyavocmoc elyapasacpoc yingmin.#Mt 21.32; Lc 3.12. 31Aptomjac alhta apcanya Jesús:
—¿Soc sat oyitsic enlhitaoc as ningvamlha nac jay? ¿Soc lha apno yi? —alhta aptomjac. 32Apquilno inyicje quilyimnanic apnaycam napocja tingma. Apquilvineycam mataa apnaymacoc: “Ninpayvascasqui inyicje yammamoc. Am alhta colyavocmoc eltam. Ningilinlhacme inyicje, yoyam elyipcalhic quellhip. Am alhta colyavocmoc elyipcalhic” —inyicje intomjac amyaa apquilanyacpo. 33Apvoctac alhta Juan yapasquiscama yingmin inyap. Am alhta etavac quilpasmongam. Am alhta eynac moyayit uva yingmenic. Apquiltomjac alhta apquilanya quellhip: Somquic quilyicjamo innac. 34Acvaac alhta coo sicvisay Sictiyam Sictomja Enlhit. Actovquic coo, acyinquic najan. Apquiltomja inyicje quellhip sellhena: Quip elanojo, enlhit mengyascama etovc aptom najan mengyascama eynic moyayit uva yingmenic. Aptomja apnaymacoc apquilmam solyayem najan enlhit melyascalhma. 35Inpeyvoc anco acyascamcolhma ayinyema Dios Ingyapam. Inlhicmosalhquic naysicsa apquiltemaclha enlhit aptomja apquilvajaneycamco —alhta aptomjac.
Apma Jesús tingma pac fariseo apvisay Simón
36Lhama alhta apcanyacpoc Jesús etasomoc fariseo tingma pac. Yejemoc alhta aptalhningvocmo tingma pac. Apnacmec alhta yoyam etovc. 37Innec alhta maa tingma lhama quilvana coyascalhma. Inlingangvocmec alhta amyaa apvisay Jesús aptasacmo fariseo tingma pac. Yejemoc alhta acsantamo memonganyi asoc masis ayingmenic. 38Inquiningvaac alhta acpayjo apmancoc Jesús. Invinec alhta. Insipquinantac alhta ateyingmenic apmancoc. Inlicasquic alhta ava ateyingmenic apmancoc. Inpitsisquic alhta apmancoc. Incatsiscasquic alhta apmancoc asoc masis.#Mt 26.7; Mr 14.3; Jn 12.3. 39Lhama alhta apvita fariseo actomjaclha quilvana. Yejemoc alhta alquitama apvalhoc fariseo apcanem etasomoc: “Jave nac profeta Dios aplingascama as enlhit. Aptomjac ancoc profeta, eyicpilcojoc as quilvana acmangvavo nac. Quilvana coyascalhma nac lha” —alhta intomjac apvalhoc. 40Yejemoc alhta aptomjac apcanya Jesús:
—Simón, yitnec coo amyaa, yoyam oltimnacsic lhip —alhta aptomjac.
Apcatingmavoc alhta fariseo:
—Visqui, jeltimnas —alhta aptomjac.
41Apquiltimnasquic alhta Jesús:
—Apquilmaycaoc nic nat solyayem apcanit enlhit. Lhama enlhit apmec nic nat quinientos solyayem. Poc eyca apmam cincuenta. 42Am nic nat coyitnac solyayem apcanit enlhit, yoyam elmascocsic apmaycaoc nasa. Yejemoc nic nat apmascosa apvisqui apmaycaoc nasa apcanit enlhit. Jeltimnas siclho: ¿Soc lha enlhit aptomja apcasicjayo melhno poc?
43Apcatingmavoc alhta Simón:
—Ayanayc coo apcasicjayo aptomja apmascoscama acyiviy apmaycaoc nasa, melhno poc. Ayinyemaclha inmascosalhquic nic nat apmaycaoc nasa acyiviy.
—Inpayjoc aplhanma —alhta aptomjac Jesús.
44Natamin apquilano Jesús quilvana. Aptomjac alhta Jesús apcanya Simón:
—¿Apvita ya lhquip as quilvana? Actalhningvaa lhac lhip tingma pac. Am jimcasac yingmin ninliclama ingmancoc. Ateyingmenic acsipquinayquinta intomjac as quilvana aclica emancoc. Ava intomjac aclica emancoc. 45Am lhac epitsisac coo emalhimpenic. Intalhningvaac lhac as quilvana. Inquilinlhanacmoc lhac acpitsisma emancoc. 46Am jeyatsiscasac epatic asoc ningiltilhnamalhca. Incatsiscasquic lhac asoc masis emancoc as quilvana. 47Actomjac coo siyanya lhip: —Avanjec anco ayasicjayo, ayinyemaclha acmascosalhco aclhamoclhojo coyascalhma as quilvana. Inmascosalhquic sat ancoc quitsic mongilyascalhma, coyavejec sat najan ningasicjayo.
48Aptomjac alhta apcanya Jesús:
—Inmascosalhquic quilhvo coyascalhma lhiya —alhta aptomjac.
49Yejemoc alhta apquilpamejitsacpo enlhit aptoycamco lhama:
—¿Soc enlhit lha apmopvan emascocsic mongilyascalhma? —alhta apquiltomjac.
50Aptomjac alhta apcanya quilvana:
—Coyasquiyam invomcasac tap lhiya. Noc maa, cotamilsojo sat avalhoc lhiya —alhta aptomjac Jesús.
Айни замон обунашуда:
SAN LUCAS 7: ENHL
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in