SAN LUCAS 2
2
Aptiyaycamlha Jesús
(Mt 1.18-25)
1Nalhit acnim alhta apcanama apvisqui César Augusto. Apcanayqui alhta colhic acnatalhesamco apquilvisay enlhit lhalhma anco. 2Eycaso macnatalhesaycaoc apquilvisay alhta amamyi anco. Aptomjac alhta yatapvisqui Cirenio yoclhilhma Siria. 3Apquilanyacpec alhta aplhamoclhojo enlhit. Apquilmiyaclhec alhta actomjaclha apquilaoclha apancaoc, yoyam colhic acnatalhesamco apquilvisay. 4Aplhinquic alhta najan José. Tingma Nazaret alhta apquimpac, yoclhilhma Galilea. Apmiyaclhec alhta tingma Belén, David apcaoclha nano, yoclhilhma Judea. David aptavin niptamin alhta maa José. 5Apquiltamjoc alhta colhic actalhesa lhama acvisay María. Apponcanma alhta José. Inlovsoc alhta intomjac apponcanma José. 6Naysicsa apnayclha alhta maa acvocmo acnim, yoyam cotimsic ayitca. 7Aptiyacmec alhta ayitca siclha acvitay apquinavo. Inpilhtitquic alhta apava. Acpicanvocmo alhta actoycamcolha mocnatoscama. Am alhta acnaclha ma congne apnaycamcaclha maycaa.
Angeles Dios apquilasinancama apnaclha quilancam nipquesic
8Apnaycmec alhta quilancam nipquesic nipyava tingma Belén. Apquilantiyapecmoc alhta apquiljalhneycam nipyava apnatoscama. 9Am alhta elpilapmacpoc apquiningvaa lhama ángel Dios apcasinancama. Incapongmatquic alhta nipyava gloria apanco Dios apcapongmatem. Apquilacac alhta quilancam nipquesic.
10—Nojela nasa quellhip —alhta aptomjac ángel Dios apcasinancama. Quip elanojo. Tasic amyaa acsantimcasac quellhip, yoyam colpayjiclha apquilvalhoc aplhamoclhojo enlhit. 11Aptiyacmec lhac apquilvomquiscama tap quellhip, CRISTO Visqui ingac, natingma David apcaoclha. 12Melquinatsejec sat quellhip. Elvitac sat sicaa apava macpilhtetem. Apyitna nac maa actoycamcolha mocnatoscama alhta aptomjac.
13Am alhta elpilapmacpoc apquilpasingvaa ángeles Dios apquilasinancama. Appintalhnama enlhit netin. Apquilacoc alhta Dios:
14Gloria apcapongmatem Dios apna netin.
Coltamilsojoc apquilvalhoc enlhit apquilasicjayo Dios Ingyapam
—alhta apquiltomjac.
15Yejemoc alhta apquiltajavoc netin ángeles Dios apquilasinancama. Apquilpamejitsacpec alhta quilancam nipquesic:
—Noc, ongilmiyaclhac Belén. Ongvitangvoclhac sat asoc aplhena lhac singiltimnasa Visqui ingac —alhta apquiltomjac.
16Apquilpecjasquic alhta elvita. Apquilvitangvoclhec alhta María najan José najan sicaa apyitna actoycamcolha mocnatoscama. 17Lhama alhta apquilvita sicaa, apquillhena alhta eyca amyaa actomjaclha aplhenamap sicaa. 18Pilapcasquic alhta aclingalhco amyaa actomja apquillhanma quilancam nipquesic. 19Intamilcasquic alhta mataa actomjaclha amyaa María. Inlhenam alhta mataa avalhoc. 20Yejemoc alhta apquilvonquepaclho quilancam nipquesic. Apquilacavoc alhta Dios. Inlhenquic alhta apquilvalhoc asoc actomja apquilvitay najan apquillingay. Innoc alhta actomjaclha amyaa apquilanyomacpo.
Jesús apquitcoc apcaynomap tingma apponquinomap
21Ocho acnim alhta invocmoc apquilyimyicja actemaclha asoc monquinatquiscama sicaa.#Lv 12.3. Apquiltimec alhta apvisay JESUS. Innoc alhta actomjaclha appayvam ángel Dios apcasinancama.#Lc 1.31. Actomja alhta ayanyomalhca María cotnamaclha mocjam inlovso.
22Lhama alhta acsovjalhco acnim actemaclha comasis ayimpejic María. Actemaclha ilhnic nat apcanama Moisés. Incaynamcaclhec alhta sicaa tingma Jerusalén, yoyam eponquinacpoc napato Dios Ingyapam. 23Innoc alhta actomja actalhesomalhca apcanamaclha Dios Ingyapam: “Moclhama actomja siclha acvitay ayitca apquinavo coponquinquis sat Dios Ingyapam” —nic nat intomjac vaycajac.#Ex 13.2,12. 24Inquililtamjoc alhta najan colmesic asoc ningmescama Dios. Actemaclha nic nat apcanama Dios Ingyapam. Elmesaoc sat apcanit sapop inlhoyqui laa apcanit valhaay apquitcoc —nic nat intomjac vaycajac apcanama Dios Ingyapam.#Lv 12.6-8.
25Apnec alhta tingma Jerusalén lhama enlhit apvisay Simeón. Appeyvomo alhta as enlhit apcayo Dios Ingyapam. Apquiljalhanmec alhta apquilvomquiscama tap enlhitaoc Israel. Espíritu Santo alhta apnac apvalhoc. 26Apyicpilcangvocmec alhta Simeón ayinyema Espíritu Santo, yoyam emoncajangvojo. Etamcojoc sat Cristo apquinyema Dios Ingyapam yicpintama ingyitsapoc. 27Appecjesam alhta apvalhoc Espíritu Santo aptalhningvactamo tingma apponquinomap. Yejemoc alhta apcaynacpo Jesús apquitcoc, yoyam elvajanamcoc actemaclha Dios apcanamaclha actalhesomalhca. 28Yejemoc alhta apcayna sicaa Simeón. Apcacoc alhta Dios appametamcaa:
29Dios Ingyapam, lhip silancam coo.
Evanquic sat ongvitsapoc actemaclha actamila evalhoc.
Innoc aptomjaclha nat seltimnasa lhip.
30Acvitac coo quilhvo Singvomquiscama tap.
31Apvitascasquic lhip napatavo enlhitaoc lhalhma anco.
32Aptomja malha ayitsayolhma, yoyam colsasquisalhma enlhit metnaja judíos.#Is 42.6; 49.6; 52.10.
Yoyam elacpojoc enlhitaoc Israel, lhip enlhit apancaoc
—alhta aptomjac Simeón.
33Pilapcasquic alhta anco José najan María aplinga aplhenacpo sicaa. 34Apquiltamjoc alhta Simeón, yoyam epasmoc Dios sicaa inquin:
—Ca incolanojo, etnimsacpoc sat ayitca nipyesicsa enlhitaoc co Israel. Elpilapongsic sat aplhamoclhojo. Elansiclhac sat netin poc aplhamoclhojo. Malha sat cotnejic ningilyotayaclha asoc acvanomalhca. 35Colngalhcac sat alquitamsama apquilvalhoc enlhitaoc. Cascoc sat avalhoc lhiya, malha ayajem sovo acvinatem sat cotnejic —alhta aptomjac Simeón.
Aptajayclha José najan María tingma Nazaret
36Innec alhta maa quilvana profeta Dios aclingascama acvisay Ana. Fanuel alhta apquitca. Aser nic nat aptovana niptamin. Innec alhta lhama atava siete años natamin alyimjapma. 37Tampeyi alhta intomjac acvocmo ochenta y cuatro años. Am alhta coyamasmac tingma apponquinomap. Inpayasoc alhta mataa Dios actemaclha almalhnancama acnim najan alhtaa. 38Actalhningvactamo alhta Ana. Inlhenquic alhta avalhoc Dios Ingyapam. Aplhenacpec alhta mataa sicaa. Altimnasamcaa alhta innaymacoc aptomja apquiljalhanma ningilvomsomalhca tap tingma Jerusalén.
39Lhama alhta acsovjalhco asoc actemaclha apcanama Dios Ingyapam. Aptajaclhec alhta José najan María actomjaclha apcaoclha tingma Nazaret yoclhilhma Galilea.#Mt 2.23. 40Apvanamyic alhta sicaa, apyimnaquic alhta. Apyasingvocmec alhta aclhamoclhojo asoc. Appasmec mataa Apquitca Dios Ingyapam.
Jesús apquitcoc congne tingma apponquinomap
41Aplhamoclhojo piyam alhta apmiyaclho mataa tingma Jerusalén José najan Jesús inquin. Apquiltamjamacpilha caya ningiltimem apquilyeycajaycaoc, moc acvisay pascua.#Ex 12.1-27; Dt 16.1-8. 42Apvocmec alhta Jesús doce años. Acmiyaclho alhta apquiltomjamacpilha caya inquin najan José. 43Lhama alhta apsovjacpo caya. Intajaclhec alhta inquin najan José. Innec alhta ayayacmo Jesús apquitcoc tingma Jerusalén. Am alhta coyasamcoc inquin najan José. 44Apcanyacpec alhta epalhcaycamcoclha apnaymacoc. Inquillhinquic alhta acvamlha lhama acnim. Alquitamseclho alhta Jesús apquitcoc apquilvaclhilha apnaymacoc najan apmolhama. 45Am alhta etacpoc. Yejemoc alhta actajavo inquin najan José tingma Jerusalén, yoyam colquitamsiclha Jesús apquitcoc.
46Natqui acnim alhta intomjac alvitaclho. Apnacmec alhta tingma apponquinomap nipyesicsa apquilyascamco apquiltemaclha. Apquiljalhnoc alhta amyaa. Apquilmalhnac najan mataa Jesús apquitcoc. 47Pilapcasquic alhta anco aclingalhco aplhanma asoc. Apmopvan alhta innac. 48Pilapcasquic alhta acvitaclho ayitca. Intomjac alhta ayanya inquin:
—Sictamongvoyam, ¿soctomja sintimesquisa nac aso? Quip ilanojo, intamjam nincoo ingilvalhoc lhip ninquitamac —alhta intomjac.
49Apcatingmavoc alhta Jesús apquitcoc:
—¿Soctomja selquitama nac qui? Lha incoyasamcoc lhiya najan lhip, movanqueje coo motingya Tata asoc apanco —alhta aptomjac.
50Am alhta coyicpilcac inquin najan José actomjaclha aplhanma.
51Apyiplaclhec alhta inquin najan José. Apvoclhec alhta tingma Nazaret. Apquilyajaclhoc alhta mataa. Intamilcasquic alhta mataa avalhoc ayitca appayvam. 52Apvanamyic alhta Jesús. Apyasingvocmec alhta aclhamoclhojo asoc. Inyispalhquic alhta aptemaclha. Apquilyispaquic alhta enlhit najan Dios Ingyapam.#1 S 2.26; Pr 3.4.
Айни замон обунашуда:
SAN LUCAS 2: ENHL
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in