Sen 2
2
1En sakien enek, Ahi mum vasi out nesa, out netan, ka tounah vasi keil koa amul ien en avong ahetai (6). 2Ka en avong koa oulu (7), kei museh en umen onen.#Eks 20:11; Hib 4:4,10 3Sakini, kei ling koe avong oulu (7) vi votut. Veni en avong enek, asa koa mumoni en out netan evus ka kei museh en umen onen.
Mukave Ahi mumon meatin en avong mulamu
Senesis 2:4-9,15-25
4Koanik vi tunien usil asa kur out en avong Iahova mumon out nesa ka out netan. En avong koa Iahova mumoni, 5vatiai keil tovuol veah ka utiai mun rovitehitehtei veah en out netan veni Iahova rosakintei ous vous. Ka meatin keil tovuol veah avoum revi atan. 6Ka en avong enek, tilep kistal ran atan ka kas vasi out netan.
7Evus, Iahova kur hati atan tai ka mumon meatin eni. Mumoni evus, museh en eang onen ten moulien va en vulingasin, ka meatin moul mea.#1Kor 15:45
8En out koa ist, Iahova mumon mari ah tai en out koa avise en ‘Iden.’ Ka en out enek, kei ling meatin koa mumoni mul ien. 9Ka en ah koanek, Iahova sakin mormore vatiai tateisav vasi keil amoul ason heite tahos imok. Ka luhu en ah enek, vatiai elu lumul ien: tai koa heite teni kilea vasan moulien ten lisenges,#Rev 2:7; 22:2,14 ka tamun koa heite teni kilea vasan ileilien ten asa koa tahos ka asa koa tisa.
15Evus, Iahova ling meatin en Ah Iden, voum en atan ka valosil kati. 16Ka viteni mini vit, “Keik kokilea kovaan heiai vasi keil koa amul en ah ekok. 17Ka vatiai tas koa kilea vasan ileilien ten asa koa tahos ka asa koa tisa navong kokan heite teni, vatiai enek konaantei varei heite. Veni en hati avong koa kiani, kimat.”
18Evus, Iahova viteni vit, “Rotahostei keke meatin vato sasen. Numon meatin tamun hekatauni, ka keilu luheto out hetas.” 19Sakini, tirendan vasi keil ka aman keil koa Iahova mumon keil tuai en atan, lah ruain keil umai ven meatin enek keke valesi ka valing ise. En sise enek, keil akur ise. 20Mukonek, meatin enek ling isen aman vasi keil ka en tirendan keil emun. Ka rovotin etai koa vavinvin vato vatal mini ka vakatauni.
21Sakini, Iahova mumon meatin meten mulong ka matil ravobong. Ka navong kei matil, kulat sin tai ten koun, ka mum revi aven eris. 22En sin enek, mumon ahin eni, ka kuri va min meahos. 23Ka navong meahos lesi vit,
“Anatin eli, koanek suval inau varei.
Sin amumoni ran sik; aven amumoni ran avek.
Sakini, niling isen hehi ‘ahin’ veni kei kistal ran meatin.”#2:23 En selusien onen Siu keil, avise meatin en ‘is.’ Ka ahin avise en ‘issa,’ koa aneite teni vi ‘kistal ran meatin.’
24Ven koanek, meahos hemea ran tata ka mama onen, ka heapil hetal min ahin onen, ka keilu luhetas.#Mat 19:5; Mak 10:7-8; 1Kor 6:16; Efes 5:31
25Ka meahos keilu ahin lukaka hon, ka lurmemoutei eni.
Айни замон обунашуда:
Sen 2: pma
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.