Gɔwɔ tɔɔi 14
14
Abramə da Mɛlkisedɛkə
1Mąą kwɛlan tii hu, Sinearə tɔɔmun Amrafɛlə, da Ɛlasarə tɔɔmun Ariɔkə ə mą kɛ, Elamə tɔɔmun Kedɔrlaomɛrə da Goimə tɔɔmun Tidealə, 2di kɔ́ pɛlɛ Sodomə tɔɔmun Bera ɓa, da Gomorə tɔɔmun Birsa, ə mą kɛ, Adma tɔɔmun Sineavə, da Sevoimə tɔɔmun Sɛmevɛrə, ɛlɛɛ, Bera yai da kɛ mą Soarə nwɔ tɔɔmun. 3Di di ŋąąkpɔn Sidimə nɛ̨ŋɛ̨ lɔi hu, gboloyá kwɛlɛ. 4Kwɛlan bow kɔ́w hveelɛ kuu mu, di kɛ Kedɔrlaomɛrə yee mu. Kɛlaa, gwɛlan bow kɔ́w haaɓa lɔwai, di di kwɛli tee. 5Gwɛlan bow kɔ́w nąąn nɔwai, Kedɔrlaomɛrə da dɔɔɓɛlaai ŋɛ̨i kɛ di tɔɔ, di di ŋąąkpɔn, di kɔ́ pɛlɛ Refaitə ɓa, di yee ə tɛɛ mą Astarotə-Karnaimə, di yee ə tɛɛ Ɉuzə nuą diɛ Hamə, di yee ə tɛɛ Emi nuą diɛ Kiriataimə nɛ̨ŋɛ̨ lɔi hu. 6Yii ɓaa Hori nuą di wɛi, di yee ə tɛɛ diɛ di pɔ taai, Seirə ɲeeɠaa ɓa, di lɛɛ di pulu də li Eilə-Paran ɲɛ̨ą lɔi kwɛlɛ. 7Yili pulu, di pənə di pa Ein-Mispatə, naa takpɛli ɓaa: Kadɛsə. Di Amalɛkə nuą pɔɔli kala, di Amɔrə nuą kɛlɛ, diɛi di kaa heeni kɛ Hasasɔn-Tamarə lɔi hu. 8Dɔɔɓɛlaai ŋɛ̨i kɛ Sodomə daai, Gomorə daai, Adma daai da Sevoimə daai, da Bera daai, naa takpɛli ɓaa: Soarə. Di di wɔ kɔlaɠaɠaai ŋąąkpɔn, di pɛlɛ di kee ɓa Sidimə nɛ̨ŋɛ̨ lɔi hu, 9da dɔɔɓɛlaaɠaai ŋɛ̨i kɛ Kedɔrlaomɛrə pului: Daɠaa di həɠə, Goimə, Sinearə, Ɛlasarə. Tɔɔɓɛlaa lɔɔli di kɔ́ pɛlɛ tɔɔɓɛlaa nąąn ma. 10Ləɠi-pɔlɔ kulɔ lɔwa kpɛa kpɛa tamąą di kɛ Sidimə nɛ̨ŋɛ̨ lɔi hu. Sodomə da Gomorə tɔɔɓɛlaa di pu, di daɠaa paa, yiiɠaai lɛɛ də li, di di mąąkilɛ ɲeeɠaa ɓa. 11Nuąi tii di yee tɛɛ mąą laa kɛ, di Gomorə taa da Sodomə taa di wɔ hɛn gɔwɠaai kəlee həɠə, ə mą kɛ kɔ̨nɔ̨n kɛ laa di yəi, di li la. 12Abramə mąnįn Lɔtə ə kɛ Sodomə daai, di kəlee di lɛɛ a kɔ-hon, da ɲəi hɛnŋąą kəlee.
13Nu ta ə kɛi pu gɔi tii ɓa, ə pa ə nwoo hukulɔ Abramə ɓa, Abramə ŋɛ̨i a Hebreu, yai kɛ heeni Mamre nwɛla koo ɓa Amɔrə lɔi hu. Mamre ə kɛ a Ɛskɔlə da Anɛrə di kaayɔwɔ, nu haaɓai tii da Abramə ni di tɔɔi kɛ. 14Yii kɛa Abramə ə mɛ̨n diɛ mą daa mąnįn ɉon a kɔluwɔ, Abramə ə ɲee pɔ nuą ŋąąkpɔn, hinąą nwun-ɉaaɓa nu pow kɔ́w mɛ̨ihaaɓa, diɛi kɛ ɲəi bɛlɛ́n, di hvilɛn di yowoɠaa pulu, di li kpɔ di həli Dan daai. 15Abramə ə nwɔ nuą ŋąą kwɛlɛ a kpulu heei tamąą, di pɛlɛ di yowoɠaa diɛ a kpinį. Di dɔɔɓɛlaa paa, di hvilɛn nu kpəliɠaa pulu, di lɛɛ di pulu, ə lɛɛla ɉu di li Hova daai yii gaa Damasə taa ɲánwuɔ̨ pələ. 16Ɉɛnŋąąi kpɔ ti di yowoɠaa di ɉəɠə, di gəlee həɠə, ə mą kɛ Lɔtə yai kɛ a Abramə mąnįn, da ɲəi hɛnŋąą kəlee, ɉinąą da nɛ̨ąąi kpɔ di di hon a kɔluwɔɠaa, di pa a gəlee.
17Ɓɛlɔwai Abramə ə yeetɛɛmąą kɛ la Kedɔrlaomɛrə da nwɔ tɔɔ ɓɛlaai di mɛ̨i, Sodomə tɔɔmun ə pa ə Abramə laakwiɛn Save nɛ̨ŋɛ̨ lɔi hu, yii jukulaa ɓaa: Tɔɔmun nwɔ nɛ̨ŋɛ̨ lɔi.
18Mɛlkisedɛkə ŋɛ̨i kɛ a Salɛmə tɔɔmun, yaai kɛ a Huwalawala Kəlee Nąmu Yálá nwɔ haláá laa həli mun gɛnɛ̨, ə pa a lopɛ̨i da lɔɔ. 19Ə lúwɔ́ too Abramə ɓa, yɛ mą:
«Huwalawala Kəlee Nąmu Yálá,
yai yələkɔlɔn da lɔi di pɛli, ə lúwɔ́ too yɛ́.
20Mąąwiɛ ə kɛ Huwalawala Kəlee Nąmu Yálá ɓa,
yai ə́ yowo nwɔ huwalawala too ə́ kɔ́wɔ mu!»
Abramə ə nɛɛ mą, ɉɛn ə ɉɔlɔɓo laa, ə bow nąą tɛɛ Mɛlkisedɛkə pɔ.
21Sodomə tɔɔmun yɛ Abramə ɓa: «Nuąi ŋɛ̨i ə́ di nwun mąąɓo, di tɛɛ bɔ́, ɉɛn gɔwi tii ə ɉɔlɔɓo, di lɛɛ ə́ yəi.»
22Abramə ə nwoo ŋąąpənə yɛ mą: «Ŋą́ą́ ɲee tɛ Huwalawala Kəlee Nąmu Yálá ɓa, yai yələkɔlɔn da lɔi di pɛli, 23ŋį́ gwɛla gɛ́ yɛ́, hɛn kpɔ gaa a ə́ wɔɔ, və dɔ̨nɔ̨ kpɛli həɠəi, ə mą kpɛli kɛ a yee kali, ə mą kɛ kpɛli kɛ kɔ́lɔ yɛli tɔ̨nɔ̨, ə gɛ, hvo pa kɛ diɛ: ‹Ŋą́ą́ ɓə Abramə kɛ a hɛn gɔw nąmu.› 24Və́ hɛn dɔ̨nɔ̨ kpɛli lɛɛ ɲə́i, hvo kɛ li nwɔ kulaaɠaai ŋɛ̨i kɔ̨nɔ̨n, yii ɓaa nuąi ŋɛ̨i kwa diɛni kwə li, diɛ ɓaa: Anɛrə, Ɛskɔlə da Mamre, di wɛi yii da kɛ bɔ da pɛli di ɉəɠə.»
Айни замон обунашуда:
Gɔwɔ tɔɔi 14: BKPG
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in