Luke 7
7
Yeesu singi vana baala simlacinɔ vanaa cɔwva
(Matie 8.5-13)
1Lɔ́ɔ́ Yeesu cii vannda sɔɔn mun kpow dimul-lo, mó muungu Kapɛrnaim. 2Vana baala simlacinɔ vanaa cɔvaa kɛmɛa pum va lon a nàà piɔ́mndo, o simlacinɔ kon ndóò handu kɔllo coo taw-vo. 3Mɛɛ o tuei Yeesu tɔ́ɔ́, mó viam kaasoŋaa kɔlkalua Yuifia le ndu tɛɛlɔnndo haliko mo kɔ singi vana baala ndɔɔ. 4Mɛɛ nda tiiya o Yeesu lo, má baŋnun ndu tɛɛlɔnndo aa: «Yandi, tosal ndu kon, 5kani o kaola lɛŋnde naalen, ndu baŋ vɛlɛ cɛi lekaan naa ni.» 6O kon, mí Yeesu bii nɛiyo le kɔlan nda kɔɔli. Kɛ mɛɛ nda sɔɔnguu o cɛi ndɔɔ ikɛi, mí simlacinɔ kon viam caaŋaa ndɔa le kɔlan Yeesu dimullo aa: «Maalii, sanga tiiya nanu le, kani i co o sɔvɛ ma luɛi o ya lo cɛinin te. 7Lelan bɛɛ ya pila kɛɛ nɔm komal ni. Kɛ diomnden bɛɛ n dimi ni, vana ni baalaa co siongɔɔ. 8Kani ya co hoo-o bɛɛ, masalen le nɔ ya baa coo. Vanaa cɔwva co ya o ba. O ya dimul pɛ aa: ‹Kɔ›, o kɔɛ. I dimul pɛ o pilɔɔ aa: ‹Hun›, o hin. I vem pɛ buɛi nuu le ikɛ́-kɛ̀ tosaa, o tosa.» 9Yeesu tueyɔɔ sɔɔn mun, mí ɲɔɔ hɛnan ndu taw a langbanɔ kon, mó mulin, mó dimul sɛ́lɛ́ va ndu kɔɔli-o aa: «Mì dimul niaa, hali Israɛl, i komal vana nɔ laalan bɛndu vaa nuaa le.» 10Vanaa o vem kan-nda muungoo cɛinin, má komal buɛi va kon a naa-o kɛndia.
Yeesu mingi po vuɛɛn pɔnɔ ndɔ vi-o yoomu
11O kon kɔɔli, mí Yeesu kɔa o cieo pum diolan Nain. Mí kaandeŋaa ndɔa a vannda sɛ́lɔ́ɔ́ a kɔa ndu kɔɔli. 12Telen o tiiya o dio luɛyaa kobi kon ikɛi-yo, mí vannda a va kɔlan vana vilɔɔ kumbɔɔ. Pole pilɛle vuɛɛn pɔnɔ ndɔ vi-o va kon ni. Vanaa va o kobi kon nin-nda a va vuɛɛn kalaa ikɛi sɛ́lɛ́ bɛndoo. 13Yeesu cɔu ndu, mí ɲííye bii ndu a ndu, mó dimul ndu aa: «Caŋ te.» 14O kon, mó sɔɔnguu, mó pilan kesu vana vílɛ́i kon va nin-ndo. Mí vanaa va kɔlan a ndu-a sim. Mó dimi aa: «Poo sei, tiondu!» 15O kon, mí vana vílɛ́i kon cal, mó kandu sɔɛi. Mí Yeesu mingi ndu kala ndɔ o ba. 16Mí siòònde bii vannda kpow, má mel Hala balika, má dimi aa: «Vana-tɛɛngaa-diom Hala kaamaa hin o naa lo», má dimi vɛlɛ aa: «Hala hin vanaa ndɔa mala!» 17Mí vannda sɛŋi dɛnɛ Yeesu tosa kon-ndo o tàndá Yuda-o nin a o sɔndɔkɔltaa balu lon-ndan nin kpow.
Nsaŋ Vana-yinaa vem kiilaa o Yeesu lo
(Matie 11.2-19)
18Mí kaandeŋaa Nsaŋ-nda kɔ hivul ndu Nsaŋ sɔɔn mun kpow. Mó veelu vanaa ŋiɔn o nda tɛɛn, 19mó viam nda o Maalii lo le ndu ɲunaa aa: «Vɛ̀ɛ̀ nɔm co vana naa n tuei tɔ́ɔ́ le hunɔɔ-o ni baa o bɛnda mì n cum o celen?» 20Vanaa kan tiiya o Yeesu lo, má dimul ndu aa: «O nɔmndo Nsaŋ vem naa ni, aa naa ɲuna nɔm aa: ‹Nɔm co Vana co hunɔɔ-o ni baa o bɛnda mì n cum o celen?›» 21Yeesu va vanaa lanàà bɔɔ-bɔɔ singio o telen kon, namtaa a vanaa ɲina vɔɔndo va kɔɔli-a, mí vanaa ve cɔ le-a taw a ca. 22O kon kɔɔli, mó mulul kiilaa Nsaŋ vem kan-nda aa: «La kɔ dimul Nsaŋ ɲɛ niaa ce mì la tuɛi-yo: vanaa sumɛiya co cɔu, namtaa co kɔlan, vanaa nàà siaŋaa co siongɔɔ, vanaa nila baŋulɛiya co tueyɔɔ, vanvílɛ́iya co tendullo, Yoongu Kɛndɔɔ co vanaa bala fondoa tiiyalanndo. 23Dɛnɛ kɛndɔɔ co le vana melnin laalan ndɔɔ le ya loo.»
24Telen kiilaa Nsaŋ vem-nda faŋan-ndo, mí Yeesu soaa o vannda lo a Nsaŋ o kɔɔ aa: «Yɛɛ niaa kɔɛ yɛ tofa o lɛŋnde veselɛilen nin? Kpɛ̀ndɛ̀le hoeiye biiŋuu len te niaa kɔɛ tofa le? 25Kɛ yɛɛ kpeekpei niaa kɔɛ yɛ tofaa? Mò va maa langbanɔ vownun volɔɔla cuɛinannda sɔvɛlan-ndo ni? O cɛila masaa nin vanaa vownun volɔɔla sɔvɛlan, ma va o dɛnɛ kɛndɔɔ nin-nda co ni. 26Yɛɛ nɛ niaa kɔɛ yɛ niko tofaa? Mò va maa vana-tɛɛngaa-diom Hala-o ni? Mì dimul niaa, o hiow bɛɛ vana-tɛɛngaa-diom Hala. 27A ndu o kɔɔ o co o sɛvaa nuaa ni aa:
‹I viamnin kiila nuu,
mò toosiaa nɔm nɛiyo laci.›
28Mì dimul niaa, o vanaa vanlaandua velu-a tɛɛn, vana-vana tiiya maa Nsaŋ te. Nduyɛ vana hiow dɔɔnanndo o Masale Hala len nin-ndo hiow ndu. 29Mí vannda kpow a tuɛi Nsaŋ diom, hali vanaa biyaa mulua bɛɛ, má ca maa nɛi Hala-o sandu, má sɔla yinɔɔ Nsaŋ o ba. 30Kɛ mí Faliisia a vanaa pɛɛkaa latɔŋnda a kɛɛ ɲɛ Hala ndóò tuu le nda-o, kani a cɛl mà sɔla yinɔɔ Nsaŋ o ba le.»
31Mí Yeesu ɲuna vɛlɛ aa: «A vanaa kuɛɛ kpeekpeei ya tuu yɛnin vanndacieea vaalio ho? Ɔ́ɔ̀ velan ndaa? 32A co macoaa maa cuaambɔa cal o bɛ́ɛ̀ fal, ma va veelanndo vellaa-velle-a aa: ‹N hɔŋ sɛ̀ŋden, kɛ la yi le! Mí n soli condun biision, kɛ la ceŋ te!› 33Nduyɛ Nsaŋ Vana-yinaa hunɔɔ, o ve bulu dio le, o ve mamɔi kolɔɔ le, mí la va dimio aa: ‹Ɲina vɔɔndo co ndu nin ni.› 34Mí Po vanacieo hun, o va dioo a kolɔɔ. Mí la muungu dimio aa: ‹Hoo ndu dia bɔɔ, o tufu mɔiyan te, caaŋoo vanaa biyaa mulua a vanaa lahakia o co ni.› 35Kɛ dɛnɛ sandaa kɔlkalu Hala-o ni le vanaa co ndu cɛlɔɔ-a kpow.»
Yeesu luɛi o Simɔn Faliisinɔ lo cɛinin
36Mí Faliisinɔ pilɛ veelu Yeesu le dioo nda ndu. Mó luɛi o Faliisinɔ kon-ndo cɛinin, mó cal le dioo. 37Vanalanɔ suundɛiyo pum va o kobi kon nin. Ndóò sinaa maa Yeesu co dioo o Faliisinɔɔ lo cɛinin, mó kɔa a sianio pum o ba a cuɛima cun kɛndɛan mapiaa lenin ca. 38Mó kɔ sim Yeesu a makɔɔ o pelon ikɛi, mó va caŋndo, mó va Yeesu pelon liwviaa a mɛmɛan. O kon kɔɔli, mó va ndu pelun mun vɔɔsuuo a yiiŋii ndɔɛi, mó va mun vɔɛiyo, mó va cuɛima cun kɛndɛan taaliaa lecoo. 39Faliisinɔ óò veelu ndu-o cɔu dɛnɛ kon, mó yiyan o kɔl ndɔɔ nin aa: «Te vana-tɛɛngaa-diom Hala-o langbanɔɔ ho ndóò va ni, o va sina vana súú cua co ndu piilianndo-o co-o, o va sina maa vana lahakio o co ni.» 40O kon mí Yeesu cua sɔɛi, mó dimul Faliisinɔ kon aa: «Simɔn, i yeema mì dimul nɔm isɔɔ.» Mí Simɔn muli aa: «Soo, Kɔɔfa!» 41Mí Yeesu dimi aa: «Vanndo pum yɔngu vannda nda ŋiɔn volion kueo ni. N va vana pilɛ kuee volin latámán kɛmɛ leŋuɛɛnu, o pilɔɔ ndu n va ndu kuee beleŋuɛɛnu. 42Mɛɛ nda ŋiɔn kpow vana-vana nɔla mun sala le yɛ, mó mal nda le kueela lan nda ŋiɔn kpow. O nda ŋiɔŋaa kan tɛɛn, o kuɛɛ hiaw yɛnin ndu kaolaa?» 43Mí Simɔn muli aa: «I ce maa vana kuee ndɔɔ ndóò hiow-vo.» Mí Yeesu dimul ndu aa: «A caa muli.»
44O kon, mó muli hɔlla a kpengii cuaa va-e, mó dimul Simɔn aa: «A ce cuaa ho? I hin o nɔm ndo, a ke ya mamɛn mì pulu n'pelu le. Kɛ ndu ndu, o pilu ya pelon a mɛmɛma ndɔan, mó vɔɔsu mun a yiiŋii ndɔɛi. 45A demul-la ma kɔman ya le. Kɛ ndu ndu, kabi o luɛi nihau, o pɛngi pelun nun vɔɛiyo le. 46A dow cuɛima cun kɛndɛ a o lebol te. Kɛ ndu ndu, mó dɔaw ya cuɛima cun kɛndɛan o lebol. 47Mì dimul nɔm, kaola bɛndu o cɔm-ndo cɔm maa hakila ndɔla sɛ́lɛ́ bɛndulan la malnun haki. Kɛ vana nda mal pɛ haki ɲɛ-pɔmbɔ, ndu cɔm kaolaa ɲɛ-pɔmbɔ.» 48O kon, mí Yeesu dimul cua kon aa: «Hakila nɔmndan la malnun haki.»
49Mí vanaa va dioo nda ndu latulu-a va ɲuunianndo o kɔlnin aa: «Ɛ̀ɛ̀ vana súú yɛɛ langbanɔɔ ho ndu co yɛ, o co hoo vannda hakilan malɔɔ-o?» 50Kɛ mí Yeesu dimul cuaa aa: «Laalan nɔmndo cii nɔm ciindiaa, kɔnnun a kɔlɲuloo.»
Айни замон обунашуда:
Luke 7: BKG
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Alliance Biblique en Guinée