O Kandɔɔ 1
1
CEENDO KANDƆNNDO
(1—11)
Mɛɛ Hala cɔw halataalaa a lɛŋnden yɛ
1O kandɔɔ tasoo#1.1 O kandɔɔ tasoo Lende bungɛi hivin taw-taw o sɔɔn mangala bɔɔ-bɔɔ nin ni. Sɛbɛ paandoo o krɛkiei nin vannda taw a del kɔɔli ni le bungɛi he hivio aa: «O kandɔɔ tasoo». Kɛ vana tofa pɛ o hebrei nin, ndóò fisa mì vanáà hivi bungɛi he aa: «Tuma Hala kandu halataalaa a lɛŋnden cɔvɔɔ-o …», mí Hala cɔaw halataalaa a lɛŋnden.
2Lɛŋnden le va tulumasaa#1.2 tulumasaa Ɲɛ nɔ a hɔl kpeekpei loo, ndu co tulumasaa ni. Ɲɛ vaa lende nɔ lebol te o nɔ tum te., ɲɛ-ɲɛ ve lecoo le. Ɲumma bɛndu-bɛnduan ma va matoalaa kpingbi o mɛnndan coo. Kɔl Hala-o va o pɛɛngaa o mɛmma man coo. 3Mí Hala dimi aa: «Ɲɔ́ɔ́ téngá!» Mí ɲɔɔ tèngà. 4Mí Hala ca maa ɲɛ-tengaa naŋ. O kon, mó sɛi ɲɛ-tengaa a ɲumndan. 5Mó ke ɲɛ-tengaa diolan aa ipala, ɲumndan aa icɔl. Mí ɲɔɔ yɔŋnun icɔllo a ipalaa. Paale taselen le yɔŋnun nden ni.
6Mí Hala dimi vɛlɛ aa: «Ɲɛ pandonndo fulá tɛ́ngɛ̀-tɛ́ngɛ̀ le mɛnndan sɛiyo tɛɛn kundala bɛndulan tan tiɔn.» 7Mí Hala soli ɲɛ pandonndo, mó handu ndu pɛɛngulan mɛmma co lebɛngu-an a mɛmma co lecoo-an tɛɛn. Mí ɲɔɔ tosan lende. 8Mí Hala ke fonda sɛi kon mɛnndan-ndo diolan aa halataalaa. Mí ɲɔɔ yɔŋnun icɔllo a ipalaa. Paale diinndɔlen le yɔŋnun nden ni.
9Mí Hala dimi aa: «Mɛmma co o lɛŋnden coo-an mà diinún nɛɛ pilɛ mì kɔngɔ vesɛiyo lo baa pilɔɔ.» Mí ɲɔɔ tosan lende. 10Mí Hala ke kɔngɔ vesɛi fula-o diolan aa lɛŋnden, mó ke mɛmma diinun man nɛɛ pilɛ-an diolan aa mɛmma ihɛllan. Mí Hala ca maa ɲɔɔ naŋ. 11Mó dimi aa: «Yondoo fulá mò kumbu kɔngɔ vesɛiyo. Billo fulá a cuulu ndɔɔ mɛɛ súúla ndɔlan la co yɛ, yɔmnde bɛɛ fulá a kɔmnde ndalen mɛɛ súúla ndalan la co yɛ o lɛŋnden kpow coo.» Mí ɲɔɔ tosan lende. 12Mí yondo kiyɛiyo fula o lɛŋnden coo, mí billo vul súúla yɛ́-yɛ́lan a cuulu ndɔɔ, mí yɔmnde bɛɛ vul súúla yɛ́-yɛ́lan a kɔmnde ndalen. Mí ɲɛ-ɲɛ vul a kɔmnde ndɔlen. Mí Hala ca maa o naŋ. 13Mí ɲɔɔ yɔŋnun icɔllo a ipalaa. Paale yàándɔlen le yɔŋnun nden ni.
14Mí Hala dimi aa: «Ɲɛm pangelon fulá o halataala le paalen sɛiyo a ɲumndan, mì ɲɛm pangelen mun cɔm telennda vɔsio, palɛi a vɔsilan. 15Mì ɲɛm pangelen mun va biyɔɔ o halataala le ɲɛ-tengaa yɔngoo o lɛŋnden coo.» Mí ɲɔɔ tosan lende. 16Mí Hala toosiaa ɲɛm pangelen bɛndon mún miun: mí pangele hiow vaa o bɔɔ-o, o co paalen-ndo va ɲɔɔ teengiaa ipala o ceendo coo, mí pangele pɔmbɔɔ, o co paangei-yo va diondɔɔ icɔl. Mó toosiaa vɛlɛ loeon. 17Mó holi mun o halataalaa nin le lɛŋnden teengiaa, 18le vaa ɲɔɔ teengiaa o lɛŋnden coo ipala a icɔl, a le ɲɛ-tengaa a ɲumndan sɛiyo. Mí Hala ca maa pangele kon naŋ. 19Mí ɲɔɔ yɔŋnun icɔllo a ipalaa. Paale hiɔɔlundɔlen le yɔŋnun nden ni.
20Mí Hala dimi aa: «Ɲaa yoomaa fulá taw-taw o mɛnndan nin, yowva fulá coocoo taw mà va kelaa.» 21O kon, mí Hala cɔaw visia kɔndɔfilaa tɔɔmaa bɛndua co o mɛmma ihɛllan nin-nda, a ɲaa yoomaa súúla yɛ́-yɛ́a co o mɛnndan nin-nda, a yowva súúlan kpow. Mí Hala ca maa a naŋ. 22Mí Hala dɔaw nda duaa, mó dimi aa: «La naŋ ipúlú, la kuí taw, mì la pɛ cá o mɛmma ihɛllan nin a o peelan nin. Yowva bɛɛ kuí taw o lɛŋnden coo.» 23Mí ɲɔɔ siŋnun icɔllo a ipalaa. Paale ŋuɛɛnundɔlen le yɔŋnun nden ni.
24Mí Hala dimi aa: «Ɲaa yoomaa súúlan kpow a fulá o lɛŋnden coo: cɔlua cieeninnda, visia pɔmbɔa kela lɛŋ-nda a visia yondoa súúlan kpow.» Mí ɲɔɔ tosan lende. 25Mí Hala toosiaa visia yondoa mɛɛ nda co a súúlan yɛ, mó toosiaa cɔlua cieeninnda mɛɛ nda co a súúlan yɛ, mó toosiaa visia pɔmbɔa kela lɛŋ-nda mɛɛ nda co a súúlan yɛ. Mó ca maa a naŋ. 26Mí Hala dimi aa: «N cɔwnun vanacieo a velan naa, mò vel naa, mì vanaciee kon va vana bɛndoo suvaa co o mɛnndan nin-nda, yovaa co coocoo-a, visia cieeninnda, visia co o lɛŋnden coo-a kpow a visia pɔmbɔa kela lɛŋ-nda coo.»
27Mí Hala cɔaw vanndacieea a velan ndɔɔ,
a velan ndɔ ndu pilaa o cɔw nda ni,
vanapɔnɔɔ a vanalanɔɔ o cɔw ni.
28Mó dɔaw nda duaa, mó dimul nda aa: «La náŋ ipúlú, la kuí, la pei lɛŋnden ca mì la va vanaa bɛndua lecoo. La tosá masalen suvaa co o mɛnndan nin-nda, yovaa co coocoo-a a visia pɔmbɔa kela lɛŋ-nda kpow coo.» 29Mí Hala dimul nda vɛlɛ aa: «I yɔngu niaa bil oo bil koam kullon o lɛŋnden coo kpow a yɔm oo yɔm koamaa, haliko mi la va baloo dɔwnɔnndo a kon. 30I yɔngu vɛlɛ niaa visia co o lɛŋnden coo-a, yowva coocoo, visia pɔmbɔa kela lɛŋ-nda a ɲaa yoomaa kpow, bil kiyɛiyo a yɔmii kiyɛiye, haliko mi la dɔwnun balo a kon.» Mí ɲɔɔ tosan lende. 31Mí Hala mɛɛndan ɲɛm o cɔw-von kpow, mó ca maa n naŋ taw. Mí ɲɔɔ yɔŋnun icɔllo a ipalaa. Paale ŋɔmpumndɔlen le yɔŋnun nden ni.
Айни замон обунашуда:
O Kandɔɔ 1: BKG
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Alliance Biblique en Guinée