Ñwaè' Matïìyoè 4
4
1Awɛ Yʉ' Nyʉ̀ yi lor Jisòs a du àgho à ntee rìŋ tɛ Satàn bo mòoshi ye. 2E ji mdip à mnòŋ mŋkyèe, njè à kɛ' a ce yaŋ ye. 3Satàn à vʉ̂, a laa nè ye enɛ̂, “Wɛ̀ ka' ba Muu Nyʉ̀, à laa tɛ blùr ca vi beeŋger à brɛ̂d.” 4E beesì enɛ̂, “A saŋ mbe Ŋwǎ' Nyʉ̀ enɛ̂, ‘Ŋwɛ̀ e ke cu ntèe ba njo' brɛ̌d cà'cà' ka'. E ke cu ba njo' blàa ce vi ke fʉʉ ekù cǔu Nyʉ̀.’ ” 5Satàn à lor ye a du àgho à rla' Jɛ̀rusalɛ̀m ce yu rla' rrara, a ko' nè ye a tɛr mbe tu Nyʉ̀ ce yi m sàp mbekì sê, a laa nè ye enɛ̂, 6“Wɛ̀ ka' ba Muu Nyʉ̀, à nyɛɛ ka embe na cɛɛ à nshè, njobè' a saŋ mbe Ŋwǎ' Nyʉ̀ enɛ̂,
‘Nyʉ̀ be làa tɛ vi bcìndap a ke'ni wɛ̀,
yà wɛ̀ mbe mmbò fà dì' à lɛɛ yo kùu à lùr ka'.’ ”
7Jisòs à laa nè ye enɛ̂, “A ker saŋ enɛ̂, ‘Fa mòoshi Tata ce e yu yò Nyʉ̀ ka'.’ ” 8Satàn à ker lor ye a du àgho mbe rtùu ce li m sàp sê, a duŋshi ye bto' wɛɛwɛ enjep ŋgòŋ na, ker ba ku' buu bbòŋboŋ enjo, 9a laa enɛ̂, “Wɛ̀ ka' gʉ'shi nè mɛ̀ banɛ m be fa buu ca wɛɛwɛ nè wɛ̀.” 10Jisòs à laa nè ye enɛ̂, “Lò efa mɛ̌ geŋ, Satàn, njobè' a saŋ mbe Ŋwǎ' Nyʉ̀ enɛ̂, ‘Gʉ'shi nè Tata ce e yu yò Nyʉ̀, fa' ba nè ye cà'cà'.’ ” 11Awɛ Satàn à ma'shì ye a dû, bcìndap Nyʉ̀ a vʉ̂, a ke' à ye.
12Jisòs à ka' yu' enɛ a fa Jǒn à shaŋ, a kʉti à ŋgǒŋ Galèlê. 13E m lǒ à rla' Nasarɛ̀t, a du a cu à rla' Kàpanùm ce li m ba àwǎa rò à ŋgǒŋ Sɛbulòn ba Naptalè, 14tɛ yuu ce Àsayà ŋwɛ̀ ncep ntuu Nyʉ̀ à m làa yi bo ghɛɛte njo. 15E m làa enɛ̂,
“Ntɛ̀' Sɛbulòn, ba ntɛ̀' Naptalè ce vi yu à mbèp rdip rgòr,
nèŋguu rdip Jodàn,
ce vi yu à ŋgǒŋ Galèle yì bèe enje jɛɛ.
16Bèe ce a m cu à tʉ̀'nji a yɛ ma rraa.
Rraa li raa mbendù bèe ce a ce cu à ŋgǒŋ tʉ̀'nji ce e càa ŋger.”
17Kɛ' embe nfè' anà, Jisòs à kɛ' a ce fè'shi, a ce làa enɛ̂, “Kupse-nè, ma' yè buu bbebep njobè' nfè' ce kʉʉ Nyʉ̀ yi be kɛ̀', ce ghɛɛ.”
18Jisòs à ka' ce jɛ̀r àwǎa tʉ̀ ce à ŋgǒŋ Galèlê, a yɛ bèe mo' a baa, Saimʉ̀n ce li rlii mo' li m ba enɛ Pità, ba Andrù ce e m ba nfʉr yì. Wowèe a m ba ŋgǎa ŋkoo nca, a ce mà' rraa njep rò, tɛ a bo koo nca njo. 19Jisòs à laa nè wowèe enɛ̂, “Vʉ̀ nè fa mɛ̌ mbùu tɛ m gee tɛ wèe ba ŋgǎa ŋkoo nca ce be ba bèe.” 20Wowèe a ku lɛ map mraa, a du a yě mbùu. 21E ka' lò embo ce dù, a ker yɛ bèe mo' a baa ce à m ba Jɛ̂ms, ce e m ba muu yì Sɛbɛ̀dî, ba nfʉr yì ce Jǒn. Wowèe a m ba mbe keŋ a yàp ta wèe a ce cʉʉshi map mraa. Jisòs à kɛ' wowèe. 22Wowèe a ku ma'shi yàp keŋ ba yàp tâ, a du a yě mbùu.
23Jisòs à m jɛ̀r à mʉ bbu' mla' wɛɛwɛ à ŋgǒŋ Galèlê, a ce yɛ'ni bèe à mndap mloo, a ce fè'shi Nsuŋ Mbòŋmboŋ àmbò kʉʉ Nyʉ̀, a ce gèe bèe ce a m ce yaŋ byaŋ jɛɛ jɛ̀ɛ jɛɛ a ce kè'se. 24Yì nsuŋ à du à bbu' mla' wɛɛwɛ à ŋgǒŋ Sirìyà, bèe a vʉ nè bèe wɛɛwɛ ce a m ce yaŋ byaŋ jɛɛ jɛ̀ɛ jɛɛ, ba bèe ce mnyor vi m ce yaŋ wowèe, ba bèe ce byʉ' mnyʉ̌mkà' vi m ba njep wowèe, ba bèe ce a m ce gwè kà', ker ba bèe ce mŋgʉ̀' nyor mo' vi m kweŋger. Jisòs à gee wowèe a ke'sè. 25Bkʉr bèe a m lǒ à ŋgǒŋ Galèlê, ba à Mla' Rʉ̂ʉ, ba à rla' Jɛ̀rusalɛ̀m, ba à ŋgǒŋ Jùdiyà, ba nèŋguu Jodàn, a du a yě mbùu.
Айни замон обунашуда:
Ñwaè' Matïìyoè 4: LNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.