Luk 22
22
Ana bo jo lam kak Jisos
(Mat 26:1-5; Mak 14:1-2; Jon 11:45-53)
1Eji elkak ni bo jo li abred nya bo kil jo kak ayist ma kabbe, ni bo kpo lung re Pasova, 2owo atubesi abalimajom, a atꞌtibi ba atahm jo seb mbang ana nyi bo bahke wulu Jisos. Fvfo, bo jo fꞌfahl ane.
Ana Judas taame re á bahke gungu Jisos
(Mat 26:14-16; Mak 14:10-11)
3Ngare nyio nnehm kehm yele Judas ji bo jo lung-e re Iskariot, ji woomo go ellong abatꞌtoono Jisos, ewubu ane abal.#22:3 Jon 13:2,27. 4Owo Judas kehm tahme song kpiri atubesi abalimajom, a atubesi ane ba jo baabe etahk Esowo, fere toobo a bo ana á bahke jabbe Jisos ka bo. 5Atahng yebe bo sehng, owo bo kehm taame re, bo bahk-e kake akpohko.#22:5 1 Tim 6:9. 6Judas kehm taame, kehm kehme mbang seb nyi á bahke jabbe Jisos ka bo, eji ane bako ki li.
Ana Jisos toobo ebjing bi elkak nio
(Mat 16:17-25; Mak 14:12-21; Jon 13:21-30)
7Owo efung kehm ba rehng bi elkak ni abred nya ki kpi ayist, bi bo jo wul abon ejoro ba Pasova. 8Jisos kehm tongo Pita abola Jon re bo song toobo edi bum bo, ji bo bahke lehke elkak Pasova. Owo á kehm tumu bo tv.
9Re bo kehm tahme, bo tohk-e bahb re, “Gan wo a kpꞌsebe re wahr song toobo bum?”
10Owo á kehm faange bo re, “Wuungen atung! Ń lꞌyel go nla ejahbe, ḿ bahke wane nne no solo etulahb.#22:10 Luk 19:30; Mat 17:27. Toonen ye, song go etahk ji á bahke yange, 11wahn tong nfontahk re, ‘Ntꞌtibi kp-a bahbe re, Gan wo ekpꞌkpa li no, ji m bahke jehke, li elkak Pasova, a abatꞌtoono ebame?’ 12Á bahk-n tibi egburu ekpꞌkpa ajehng ji li go ero enyong ji bo ma jehke nti. Owo ḿ bahke toobo nsol kpee bum.”
13Bo kehm lohko tahm, lohko song nyehn ejum ajehng ajehng ana Jisos tongo bo, kehm toobo nsol elkak Pasova bum.
Nsol alehke nyi elbuumu Jisos
(Mat 26:26-30; Mak 14:22-26; 1 Kor 11:23-25)
14Eji ngare biingi no, á kehm song ji go ekpꞌkuru, a abatiingetib ebe. 15Owo á kehm tongo bo re, “Jo kor-m sehng re me n li elkak Pasova nia a nahne, kehm nyehne erem. 16Tibre n kp-n tongo re, N nehm kpe tiki li elkak nia, tete n li etingitingi elkak a nahne go ejahbetul Esowo.”#22:16 Luk 13:29.
17Owo á kehm rodo nkob, kak Esowo saam, kehm bungu re, “Koon, wahn wo, wahn ane kpee. 18Tibre n kp-n tongo re, Bomo anv asongo n nehm kpe tiki wo alahb avain tete etul bi Esowo ba.”
19Owo á kehm rodo ebred, kak Esowo saam, fere bakke, ka bo, kehm bungu re, “A wo li ngubjing enyame, nyi bo kp-n kake. Jo limen ana, eji ń lꞌjo buum-m.”
20Eji bo ma li nsol mal, go mbang nyꞌnehm nyi á tob ka bo nkob, fere bung re, “Nkob nyia nyi li egbanngalung ji nfenfe tib go alung emame ma kpꞌfabe ka-n.
21“Nyehnen, nne no kp-m gungu, á jehk a name ana go ekpꞌkuru.#22:21 Jon 13:21-30. 22Tibre Mmon no nne bahke kpoko ana Esowo toobo no. Eyuu a nne no kp-e gungu.”#22:22 Mat 18:7.
23Owo bo kehm kehme elbahbe atemtem re, “Nne awo go egahre ellong no bahke limi elkohn ejum ana jia?”
Nne awo ga gbal?
(Mat 20:25-28; Mak 10:42-45)
24Owo nfaabe kehm gboko abatꞌtoono Jisos bada nne no bo bahk-e bumu ana nne no ga gbal go bo ellong.#22:24 Luk 9:46-48.
25Jisos kehm tongo bo re, “Atul ba njini nyia kpꞌkpi nsahm nyi bo kpo fili ane ebo. Atubesi ane, bo kpo lung bo re, ‘Akubi!’ 26Ano sang bahke jolo go egahne. Ga nob re nne no ga gbal go egahne ellong jol ana mmonse. Ntubesi bahke jolo ana nlokeltum. 27Anv, nne awo ga gbal, nne no jehk go ekpꞌkuru, afi nne no kp-e loko wo? No jehk go ekpꞌkuru sang ga gbal? Eji n li a nahne, n li ana nlꞌloko.#22:27 Rom 15:8.
28“Wahn ba li ane ba ma jol a name kpee go egame elgaare.#22:28 Jon 11:16. 29Ana nsoo ma-m ka ejahbe re me n fili, ano wo fvfo m ma-n tob ka, 30eji ń lꞌjo li nsol ekpꞌkuru ajehng a name go egame ejahbetul, fere ji go nti etul, jo lam ewubu etꞌtohngo ebbal bi Israel.”
Ana Jisos nyehne amahr bade ana Pita bahk-e tene
(Mat 26:31-35; Mak 14:27-31; Jon 13:36-38)
31Ntul a Jisos kehm bungu re, “Saimon, nnehm sebe re á ko nsahm nyi á bahk-n febe ana bo kpo febe arasi.#22:31 2 Kor 2:11; 1 Pit 5:8; Ell 2:10. 32Me n kak ero ka-a, eji a lꞌkꞌgbo go egama mbang.#22:32 Jon 17:9,15. Ngare nyi a ma fere gbo ndon, jo kak abonane eko!”#22:32 Jon 21:15-17.
33Owo Pita kehm-e faange re, “Ntul, me n toobo ebjing re me n je ngbekobo a na, jol afi elkv ni, m bahke kpoko a na.”
34Jisos kehm bungu re, “Pita, n kp-a tongo re, Lela a bahke gbaame nkpel era re, me a nehme kahn, nkok kehm kuku.”
Gungu mbomo ema, wo gunu ekahngkahng!
35Jisos kehm bahbe bo re, “Ngare nyi n tum-n no, eji ń ki fili abon abam akpohko, fere fili abam efilibo, a akpaketa, ejum jia ji rin-n noa?”
Bo kehm faange re, “Ejumjum wahr rinem.”#22:35 Luk 9:1-6.
36Jisos kehm tongo bo re, “Anv, nne no lꞌbel mmombam akpohko, afi á bele ebam efilibo, nong, á fili. Nong, nne no ki kpi ekahngkahng gungu mbomo eme, song gunu.#22:36 Ell 13:10; Ef 6:17. 37Tibre n kp-n tongo re, Edi nwer Esowo ji bungu re, ‘Bo m-e fange kak go ellong abi ane’, bahke lohko jol go etingitingi. Tibre ji bo nyono bada name bahke lohko jol go etingitingi.”
38Owo abatꞌtoono ebe kehm bungu re, “Ntul, nyehn akahngkahng na abal a!”#22:38 Mak 9:32.
Á kehm faange bo re, “Ebgbal.”#22:38 Mak 14:41.
Ana Jisos kake ero
(Mat 26:36-46; Mak 14:32-42)
39Jisos kehm lohngo tahm go ewong ji bo kpo lung re Oliv, ana á jo kono ellimi.#22:39 Luk 21:37. Abatꞌtoono ebe tahm toon-e. 40Eji á song rehng edi jio, á kehm tongo bo re, “Jo kaken ero, eji ń lꞌkꞌyel go elgaare.”
41Á kehm jeere song rehng go esꞌsong ekidi labe ana nne bahke roko eltal song rehng. Owo á kehm jamme alahng, kehm kehme ero kak re, 42“Nsoo, lꞌkor-a, fak-m nkob erem nyia! Ana koro me sang, ana koro wo wo.”
43Owo enjel kehm soro lohng go ejahbetul Esowo ba kak-e eko.#22:43 Mak 1:13; Hib 1:14. 44Eji ala jo sahb teel-e teele, á kehm nyennge, jo kak ero. Nwuuru nyi á wuuru no, nyi jo toongo wohngo ndi jolo ana agburu atoongo alung.
45Eji á mehle go edi ji á jo kak ero, á kehm feere goji abatꞌtoono ebe, song kpiri bo, bo kpꞌlale, tib ndon nyi jo fili bo.
46Owo á kehm bahbe bo re, “Jen ji wahnge ń kpꞌlale? Tahmen, wahn kak ero, eji ń lꞌkꞌyel go elgaare.”
Ana bo bobo Jisos
(Mat 26:47-56; Mak 14:43-50; Jon 18:3-11)
47Eji á kpi mbungu mbungu, ellong ane kehm soro lohng abake. Nne no bo jo lung-e re Judas ji woomo go ellong abatꞌtoono Jisos, ewubu ane abal, ye wo jo tib bo mbang. Eji bo ma rehng goji Jisos, Judas kehm jeere kohlo Jisos re á sod-e nnyo.
48Owo Jisos kehm-e bahbe re, “Judas, anv, a bahke jabbe Mmon no nne ka go nnyo asoda?”
49Eji abatꞌtoono Jisos nyehne ji yahke lim, owo bo kehm bahbe re, “Ntul, wahr ko akahngkahng enyahre, song nok a boa?” 50Nne awohng go bo ellong kehm fohko ekahngkahng ebe, kpale nju nyi ntubesi abalimajom etung eboblum.
51Owo Jisos kehm-e tongo re, “Ka kpe lim ano!” Á kehm rodo etung nne noo, feere a bi lak-e, á nob.
52Jisos kehm bahbe atubesi abalimajom, a atubesi ane ba jo baabe etahk Esowo, a anebkul nfam ba ba re bo ba bob-e re, “Ń lohngo a akahngkahng, a atahmtahm atahmtahm ana ń kpꞌbake a nwajv boba? 53N jo jolo a nahne go etahk Esowo efung abehng abehng, me ń lakem abo.#22:53 Luk 21:37; Jon 7:30. A wo li ngare enyahne, a nyi atubesi ba ejannge.”#22:53 Jon 8:20; 14:30-31; Ef 6:12; Kol 1:13.
Ana Pita tene Jisos
(Mat 26:57-58,69-75; Mak 14:53-54,66-72; Jon 18:12-18,25-27)
54Owo bo kehm bobo Jisos tahm a ne go etahk ntubesi abalimajom. Jisos jo jene ekv, Pita jen ekv. 55Bo kono agun go nlaaga nyio, ji sennge kak. Pita kehm tob song ji o a bo.
56Eji nlokeltum no jolo nnenkal nyehne Pita jehk go agun, owo á kehm-e seenge too, kehm bungu re, “Nne noa fvfo tob jolo a ne!”
57Owo Pita kehm gbaame re, “Nnenkal, me we n nehme kahn.”
58Eji ma kpe ji mmongare ntiil, nne noko kehm-e tob nyehn, kehm bungu re, “A tob wob go bo ellong.”
Owo Pita kehm tene re, “Eꞌee mbi, me sang.”#22:58 Gal 2:11-12.
59Eji ma kpe ji ejum awa anyehng, nne noko kehm kpe bung tꞌtahne re, “Etingitingi, nne noa tob jolo a ne fvfo, tibre ye nne a Galili wo.”
60Owo Pita kehm faange re, “Mbi, n nehme kahn ji a kpꞌbꞌbung.”
Tvtv ona eji á kpi mbungu mbungu, nkok kehm soro kuk.
61Ntul a Jisos kehm soro keebe, seenge Pita.#22:61 2 Tim 2:13. Owo Pita kehm buumu ellum ni Ntul a Jisos bungu no tong-e re, “Re nkok kehm kuku lela, a bahk-m tene nkpel era.”#22:61 Luk 22:34.
62Pita kehm soro lohng ona, song kehme ellingi ndon ndon.#22:62 2 Kor 7:10.
Ana bo jo nyok Jisos
(Mat 26:67-68; Mak 14:65)
63Ane ba jabbe Jisos kehm-e kehme elnyoko, fere jo dv-e. 64Bo tob gba-e mbomo go esamahr, kehm-e bahbe re, “Nyehn amahr me! Anv, nne awo ma-a rum?” 65Bo kpe bung alum nyako gbalee, nya bo jo su-e.
Ana Jisos yiimi go esamahr elam
(Mat 26:59-66; Mak 14:55-64; Jon 18:19-24)
66Eji efungfu ma se, anebkul Jus, atubesi abalimajom, a atꞌtibi ba atahm kehm ba kono edi ajehng, kehm koko Jisos ba a ne go bo elam, kehm-e tongo re, 67“Tong-r, joare wo wo li Mesaya!”#22:67 Jon 10:24-25.
Owo Jisos kehm faange bo re, “N lꞌtong-n anv, ń nehm taame. 68N lꞌfere bahb-n na, ń nehm faange.#22:68 Mak 11:29-33. 69Bomo anv asongo, Mmon no nne bahke jehke go eboblum Esowo bi gbale sehng.”
70Bo ane kpee kehm bahbe re, “Anv, wo wo li Mmon no Esowoa?”
Jisos kehm faange bo re, “Me wo, ḿ bungu nseenge.”
71Owo bo kehm bungu re, “Anv, e bahke kpe seb ntiansea? Wahrfono antahng ebwuk go ege a nnyo.”
Айни замон обунашуда:
Luk 22: ekaNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.