Tharu, Dangaura: Dangaura Tharu (New Testament)

Dangaura Tharu

तबदोस्र येशू लाऊम चिहुर्ल ओ घुम्‍क समुद्रक उपार आपन बैठल सहरम गैल। मनै प्‍यारालाइस रोग लागल एकठो मनैयह बिस्‍तारासैँट बोक्‍क उहाँकठे अन्‍ल। हुँकन्‍हक विश्‍वास देख्‍क येशू उ रोग्यह कल, “भैया, साहस करो, टुँहार पाप क्षमा होगैल्।”
येशूक कहल यी बात सुन्‍क शास्‍त्रीमध्‍ये कत्रा जन मनमन विचार करलग्‍ल, “यी त परमेश्‍वरक बदनाम करटा।”
तर येशू हुँकन्‍हक मनक बात बुझडर्ल ओ कल, “टुह्र मनम काकर दुष्‍ट विचार करटो? यी मनैयह ‘टुँहार पाप क्षमा होगैल्’ कना ओ ‘उठ्‍क नेङ्‌गो’ कना कौन सजिलो हो, कहो त? हेरो, मै मनैयक छावह यी पृथ्‍वीम मनैन्‍हक पाप क्षमा कर्ना अधिकार रहल बात मै टुँहन देखैम।” तब ऊ बेरम्‍हेह कल, “उठो, आपन बिस्‍तारा बोक्‍क घर जाओ।” तबदोस्र उ मनैया जुरुक्‍कसे उठल, ओ आपन घर गैल्। यी अचम्‍मक काम देख्‍क भीडक मनै डरैल, ओ मनैन असिन शक्ति देना परमेश्‍वरक प्रशंसा कर्ल।


येशू उहँरसे जाइबेर एक जन मत्ती नाउँक मनैयह कर उठैना अड्‍डम बैठल देख्‍ल। तब येशू उ मनैयह कल, “म्‍वार पाछ लागो।” मत्ती उठ्‌ल ओ उहाँक पाछ लग्‍ल।
येशू ओ उहाँक चेलन मत्तीक घर खाए बैठल ब्‍याला कर उठुइयन ओ और पापीहुँक्र फे अइल, ओ उहाँहुँकन्‍हकसँग खाए बैठ्‍ल। यी देख्‍क फरिसी समूहक मनै उहाँक चेलन कल, “काजे टुन्‍हक गुरु कर उठुइया ओ पापीन्‍हकसँग खानपिन कर्ठ?”
हुँकन्‍हक बात सुन्‍क येशू कल, “निरोगी मनैन डाक्‍टर नैचहटन, तर रोगी मनैन चहठन। टुह्र धर्मशास्‍त्रम लिखल बातक अर्थ बुझपर्ठा: ‘मै पशुक बलि नाही, दया करल चहठुँ।’ मै धर्मीन नाही, तर पापीन बलाए पो आरनु।”


तबदोस्र यूहन्‍नक चेलन येशूकठे आक उहाँह पुछ्‌ल, “हम्र ओ फरिसीहुँक्र ब्रत रठी, तर अप्‍नक चेलन काजे ब्रत नैरट?”
येशू हुँकन आहानम जवाफ देल, “दुल्‍हा भोजरेन्‍हकसँग रहट्‍सम हुँक्र शोक कर नैपर्टन, तर उ दिन आई जब दुल्‍हा हुँकन्‍हकठेसे लैजाजहीँ, तब हुँक्र ब्रत रह्‍हीँ।
“पुरान लुगम कुई फे लौव लुगक पिउँडा नैलगाइट्। यदि लगैना हो कलसे, लौव पिउँडा मारी पैँस्‍क पुरान लुगह खिँच्‍ठा त झन् कर्रसे फटादेठा। ओसहेँक, पुरान छालक थैलीम कुई फे लौव अङ्‌गूरिक मद नैढरट्‍। यदि ढर्ना हो कलसे, थैलीह फुटादेठा ओ अङ्‌गूरिक मद अँराजैठा। लौव अङ्‌गूरिक मद त लौव छालक थैलीम ढरपर्ठा, तब थैली ओ मद दुनु सुरक्षित रठा।”


येशू हुँकन यी बात कटीकटी एक जन यहूदी शासक उहाँ आपुग्‍ल। ओ येशूक पाउ पर्टी बिन्‍ती कर्ल, “हजुर, म्‍वार छाई आब भक्‍खर बितल, हजुर आक वाकरम आपन हाँठ ढैदेबी कलसे, ऊ जिजैनेबा।” येशू उठ्‌ल ओ आपन चेलन्‍हकसँग हुँकहार पाछ लग्‍ल।
उहब्‍याला एक जन बाह्र वर्षसे रगत बहना रोग लागल महिला पाछओरसे आक येशूक लुगक किनार छुली। काकरकि “येशूक लुगऽ केल हुइलसे फे छुवम कलसे चोखाजैम” कना हुँकहीन लागलरहन।
येशू पाछओर घुम्‍क हेर्ल त महिलह देख्‍ल, ओ कल, “बाबु, साहस करो। टुँहार विश्‍वासले टुँहीन चोखाराखल।” तबहेँ उ महिला चोखागैली।
तबदोस्र जब येशू यहूदी शासकक् घर पुग्‍ल, उहाँ त शोकक् बाजा बजुइयन ओ भीडक मनैन रुवाबासी करँट्‍ देख्‍ल। उहाँ हुँकन कल, “टुह्र सबजन बाहर जाओ। यी बाबु मुवल नैहुइटी, निदाइल केल बाटी।” यी बात सुन्‍क हुँक्र उहाँह हँस्‍ल। उहाँ भीडक सब मनैन बाहर निकार्क अप्‍न भित्तर गैल, ओ लौँर्‍यक हाँठ पकर्क उठैल त लौँर्‍या उठगैल्। तबदोस्र यी बातक बयान साराओर फैल्‍गैल्।

येशू उहाँसे जाइबेर दुइ जन आन्‍धर मनै “हे दाऊदक सन्‍तान, हमन दया करी” कटी उहाँक पाछपाछ लग्‍ल।
येशू घरम पैँठ्‍ल त, उ दुइ जन आन्‍धर मनै फे उहँ आपुग्‍ल। येशू हुँकन कल, “का मै टुँहन चोखाइ सेकम कना टुन्‍हक विश्‍वास बा?” हुँक्र कल, “बा, प्रभु।”
तब येशू हुँकन्‍हक आँख छुक कल, “टुन्‍हक विश्‍वास अनुसार टुँहन ह्‍वाए।” तबदोस्र हुँक्र देख्‍ना होगैल। येशू हुँकन कर्रा आज्ञा देल, “हेरो, यी बात कौनोजहन जिन बट्‌वैहो।” तर हुँक्र उहाँसे गैल त सारा इलाकम उहाँक करल कामक बात फैलादेल।
जब उहाँहुँक्र निकर्क जाइटलह, तब मनै भूत्‍वा लाग्‍क लाट हुइल् एकठो मनैयह उहाँकठे अन्‍ल। येशू भूत्‍वह वाकरमसे निक्रादेल त, ऊ लाट मनैया ब्‍वाल लागल। यी देख्‍क भीडक मनै अचम्‍म मन्‍टी कहलग्‍ल, “इस्राएलम असिन बात कबु फे नैदेख्‍गैलरह।”
तर फरिसी समूहक मनैजुन असिक कहलग्‍ल, “यी त भूतन्‍हक रज्‍वक शक्तिले भूतन निक्रैठा।”

येशू सहर-सहर ओ गाउँ-गाउँक सभाघरम शिक्षा देटी, स्‍वर्गक राज्‍यक खुशीक खबर प्रचार कर्टी ओ सब किसिमक रोगमसे मनैन चोखैटि नेङ्‌ग्‍ल। मनैन्‍हक भीड देख्‍क उहाँ दयाले भरगैल। काकरकि हुँक्र त चह्रुइया नैरहल भेँरीअस हैरान ओ बेसहारा रलह। तब उहाँ आपन चेलन कल, “सह्‍यार पर्ना बाली धेर बा, तर काम करुइयन डान्चे केल बाट। उहओर्से बालीक मालिकसे बाली सहेर्ना काम करुइयन पठादेहीँ कैक बिन्‍ती करो।”

Listen to मत्ती 9