Tharu, Dangaura: Dangaura Tharu (New Testament)

Dangaura Tharu

येशू पर्वत्‍वमसे टर ओल्‍हाइबेर मनैन्‍हक भारी भीड उहाँक पाछ लागल। उ ब्‍याला एकठो कोररोग लागल मनैया आक उहाँक पाउ पर्टी कहल, “प्रभु, अप्‍न चहबी कलसे महीह चोखाइ सेक्‍नेबाटी।”
येशू वाकरम हाँठ ढैक कल, “मै चाहटुँ, टुँ चोखाजाओ।” तबहेँ कोररोग लागल मनैया चोखागैल्। येशू ओहीह कल, “हेरो, यी बात किहुह जिन कहहो। बेनसे पूजारीकठे जाक अपन्‍हेह देखाओ ओ अप्‍न चोखैलक बात मनैन्‍हक आघ साबित कराइक लाग मोशक व्‍यवस्‍था अनुसार बलि चह्राओ।”


येशू कफर्नहुम सहरम पैँठबेर एक जन रोमी कप्‍तान आक उहाँसे बिन्‍ती कर्ल, “प्रभु, म्‍वार नोकर प्‍यारालाइस रोगले घरम थलापरल बा।”
येशू ओहीह कल, “मै जाक ओहीह चोखुइयाबाटुँ।”
कप्‍तान कल, “मै हजुरह आपन घर लैजिना योग्यक मनैया नैहुइटुँ। हजुर यिहँसे आज्ञा केल कैदी, त म्‍वार नोकर चोखाजाई। मै फे आपनसे बरा हाकिमक अधीनम रठुँ। म्‍वार अधीनम फे सिपाहीहुँक्र बाट। मै एकठो मनैयह ‘जा’ कठुँ, त ऊ जैठा, ओ और मनैयह ‘आ’ कठुँ, त ऊ अइठा। आपन नोकरह ‘यी कर’ कठुँ, त ऊ कर्ठा।”
हुँकहार बात सुन्‍क येशू अचम्‍म मन्‍ल, ओ आपन पाछ लागल मनैन कल, “जाट्‌टीसे मै टुँहन कहटुँ, असिन भारी विश्‍वास त मै इस्राएलीन्‍हक बीचम फे नैदेख्‍लहुँ। मै टुँहन कहटुँ, पूरुब ओ पश्‍छिउँसे गैरयहूदी मनै धेर अइहीँ ओ स्‍वर्गक राज्‍यम अब्राहाम, इसहाक ओ याकूबकसँग सँग खाए बैठहीँ। तर स्‍वर्गक राज्‍यम रहपर्ना इस्राएलीहुँक्रजुन बाहर अन्‍धकारम फाँकजैहीँ, ओ उहाँ मनै दुःखले दाँत पिस्‍टी रुवाबासी करहीँ।”
तबदोस्र येशू कप्‍तानह कल, “आब अप्‍न घर जाई, अप्‍नक विश्‍वास करलअस हुइनेबा।” उ नोकर तबहेँ चोखागैल्।


येशू पत्रुसक घर गैल। उहाँ हुँकहार सासू जरकमार सुत्‍लकसुत्‍ल रलही। येशू हुँकहार हाँत छुल त हुँकहीन जर छोर्लिन। तब ऊ उठ्‌ली ओ उहाँक मानमर्जाट्‍ कर्ली।
सन्‍झ्‍या हुइल् त, मनै भूत लागल धेर जहन येशूकठे अन्‍ल। येशू आपन बोलीले मनैन्‍हकमसे भूत निक्रैल ओ सक्‍कु बेरम्‍हेन चोखादेल। असिक अगमवक्तन्‍हक कहल बात पूरा हुइल्,

“उहाँ जो हमार कमजोरी बोकदेल,
ओ हमार रोग हटादेल।”


येशू आपन आञ्‍जरपाञ्‍जर मनैन्‍हक भारी भीड देख्‍ल त आपन चेलन “ले आब हम्र समुद्रक उपार जाई” कैक कल। उहब्‍याला एकठो शास्‍त्री उहाँकठे आक कल, “गुरु, अप्‍न जहाँ गैलसे फे मै अप्‍नकसँग जैम।”
तब येशू हुँकहीन कल, “फेहोरेन्हक ड्वान्डर रठन, चिरैँचुरुङ्‌गन्हक ठाँट रठन, तर मै मनैयक छावक आराम कर्ना ठाउँ फे नैहो।”
तब उहाँक चेलन्‍हक बीचमसे और एकठो चेला कल, “प्रभु, पैल्‍ह मै घर जाक आपन बाबह माटी देलिउँ, त अप्‍नक पाछ लगम।”
येशू हुँकहीन कल, “मुवलअस मनै मुवल मनैन माटी देह्‍हीँ, टुँ म्‍वार पाछ लागो।”


येशू लाऊम चिहुर्ल ओ उहाँक चेलावँ फे उहाँकसँग गैल। एकचोट्‌टे समुद्रम भारी आँधीबौखा चल लागल, ओ पानीक छल्‍कले लाऊ भर लागल। तर येशूजुन मस्‍तसे निदाइल रलह। तब चेलाहुँक्र उहाँह असिक कटी जगैल, “प्रभु, हमन बचाई, हम्र मुवलग्‍ली।”
येशू हुँकन कल, “काजे असिक डराइटो? खै टुन्‍हक विश्‍वास?” तब उहाँ उठ्‌क आँधीबौखा ओ छल्‍कह हप्‍कैल, त आँधीबौखा ओ छल्‍का जाट्‍से शान्‍त होगैल्।
असिन हुइल् देख्‍क सबजन छक्‍क पर्ल ओ कल, “यी कसिन मनैया हुइट? हिँकहार कहल त आँधीबौखा ओ छल्‍का समेत मन्‍ठ!”


जब येशू समुद्रक उपार गदरिनीहुँकन्‍हक मुलुकम पुग्‍ल, तब भूत लागल दुइ जन मनै उहाँकठे अइल। हुँक्र दुनु जन मुवल मनै गर्ना ठाउँओर बैठट्। हुँक्र महाडरलग्‍टिक रलह, ओ उ डगर कुई फे नेङ्‌गघुम कर नैस्‍याकट्‍। हुँक्र दुनु जन असिक चिच्‍याइ लग्‍ल, “हे परमेश्‍वरक छावा, अप्‍न हमन का करक लाग अइलही? का हमार समय बिना पुग्‍ल हमन दुःख देहक लाग अइलही?”
हुँकनसे टनिक दूर एक बगाल सुवर चह्रटलह। भूत उहाँह असिक कैक बिन्‍ती कर्ल, “हमन निक्राइ जो चहठी कलसे हमन उह सुरिन्‍हकम जाइदी।”
तबदोस्र येशू हुँकन कल, “जाओ।” तब हुँक्र निकर्क सुरिन्‍हकम गैल, त सक्‍कु सुवर भीरमसे ढनमनैटी समुद्रम गिर्क मुगैल। सुवर चह्रुइयन भाग्‍क सहरम गैल। सहरम जाक सक्‍कु घटना ओ भूत लागल मनै कसिक चोखैल कना बात समेत सुनादेल। यी बात सुन्‍ल त येशूह भ्‍याँट कर सारा सहरक मनै उलट्‌क अइल। उहाँह देख्‍ल त, मनै आपन क्षेत्रसे जाइक लाग बिन्‍ती कर्ल।

Listen to मत्ती 8