Luˉka‸ li‸ 23

Jawˇmawˇ Piˉla‸ Yeˍsuˆ hta‸ na nyi ve

1Oˇ htaˇ, hpawnˬ da‸ ve chaw hkʼa peu-eˬ tu la leh, Yeˍsuˆ hta‸ jawˇmawˇ Piˉla‸ geh sheh kʼai peuˬ hkʼaw‸ nawˉ, yawˇ awˬ hkʼoˆ venˇbaˆ taˍ leh kʼoˆ ve, 2Chaw chi hpaˇ lehˬ, ngaˬ hui ve chaw ceuˬ hta‸ ya‸kʼaw sheh ya‸ laˇ leh, jawˇmawˇ Kehˉsaˍ hta‸ a moˇ maˇ gʼa keu tuˬ tawˍ taˍ laˇ leh, yawˇ awˬ to Hkri‸ kʼoˆ ve hkunˉ hawˉ hkanˇ hpeh‸ ve yoˬ teh‸ kʼoˆ ve hta‸ ngaˬ hui gʼa mawˬ gʼa shiˍ ve yoˬ teh‸, yawˇ hui kʼoˆ ve yoˬ.

3Oˇ htaˇ jawˇmawˇ Piˉla‸ kʼoˆ ve, Nawˬ lehˬ Yuˇda‸ chaw hui ve Hkunˉ hawˉ hkanˇ yoˬ laˇ teh‸, Yeˍsuˆ hta‸ na nyi ve yoˬ.

Yoˬ, nawˬ kʼoˆ ve hkʼe yoˬ teh‸, Yeˍsuˆ yawˇ hta‸ kʼaw‸ kʼoˆ piˇ ve yoˬ.

4Hkʼe te leh jawˇmawˇ Piˉla‸ kʼoˆ ve, Chaw chi hpaˇ awˬ hkʼaw lo ya‸ kuiˬ jiˆ kuiˬ hta‸ ngaˬ maˇ mawˬ teh‸, paw hkuˇ lonˉ teˇ hpaˍ leh chaw awˬ moˍ lonˉ hui hta‸ kʼoˆ piˇ ve yoˬ.

5Ya‸ hkʼaˇ, yawˇ hui leuˉ leh gʼaˇ hte‸ kʼaw‸ kʼoˆ ve, Chaw chi hpaˇ lehˬ, Gaˍliˍlehˇ mvuhˇmiˬ te leh choˬ kaˬ hkʼa gaˬ Yuˇda‸ mvuhˇmiˬ teˇ kaˬ le le lo maˍ piˇ leh, mvuhˇmiˬ yaˇ teˇ hpaˍ tu la tuˬ ca juˆ piˇ ve yoˬ teh‸ kʼoˆ ve yoˬ.

Jawˇmawˇ Heˍroˆ Yeˍsuˆ hta‸ na nyi ve

6Tawˇ chi hta‸ jawˇmawˇ Piˉla‸ gʼa kaˇ htaˇ, Yawˇ Gaˍliˍlehˇ chaw yoˬ laˇ teh‸ na nyi ve yoˬ. 7Yeˍsuˆ lehˬ, jawˇmawˇ Heˍroˆ uˉ peunˍ ve mvuhˇmiˬ awˬ hkʼaw lo chehˇ ve chaw hpeh‸ ve hta‸ jawˇmawˇ Piˉla‸ gʼa shiˍ ve teˇ yanˇ, jawˇmawˇ Heˍroˆ geh yawˇ hta‸ shiˍ kʼai tcuh ve yoˬ. Awˬ yanˇ oˇ ve awˬ hkʼaw lo, jawˇmawˇ Heˍroˆ lehˬ, Yeˍruˆsaˍlehnˍ venˇ hkʼaw lo chehˇ taˍ ve yoˬ. 8Jawˇmawˇ Heˍroˆ lehˬ, Yeˍsuˆ hta‸ gʼa mawˬ ve teˇ yanˇ ha lehˬ jaˇ ve yoˬ. Awˬ lawn kʼo, yawˇ awˬ lawn gʼa kaˇ jaw leh, yawˇ te maˍ ve awˬ heˆ teˇ ceuˬ ceuˬ hta‸ gʼa mawˬ tuˬ yawˇ dawˇ law chehˇ ve pa taw, Yeˍsuˆ hta‸ mawˬ gaˇ ve maw jaˇ peuˬ. 9Oˇ htaˇ, yawˇ Yeˍsuˆ hta‸ laiˉ ceuˬ na nyi ve htawˇ, Yeˍsuˆ lehˬ tawˇ teˇ hkawˇ ka‸ maˇ kʼaw‸ yaw hkʼaw‸ piˇ. 10Paw hkuˇ lonˉ hui leh li‸ bvuh‸ paˍ teˇ hpaˍ oˇ kaˬ lo huˉ taˍ leh, yawˇ awˬ hkʼoˆ hta‸ venˇ baˆ gʼaˇ hte‸ taˍ ve yoˬ. 11Jawˇmawˇ Heˍroˆ lehˬ, yawˇ ve ma‸ yaˇ hui geh teˇ geh Yeˍsuˆ hta‸ maˇ shawˍ maˇ caˆ te leh, kʼoˆ guiˇ gʼuiˬ guiˇ ve yoˬ. Peuˬ leh, da‸ jaˇ ve veu‸ kʼaˇ yawˇ hta‸ feuˉ piˇ leh, jawˇmawˇ Piˉla‸ geh kʼaw‸ shiˍ kʼai tcuh ve yoˬ. 12Oˇ ve teˇ nyi awˬ hkʼaw lo jawˇmawˇ Heˍroˆ leh jawˇmawˇ Piˉla‸ awˬ chawˇ hpeh‸ la ve yoˬ. Awˬ lawn kʼo, ponˬ laˬ htaˇ yawˇ huiˉ maˬ canˇ da‸ taˍ ve yoˬ.

Yeˍsuˆ hta‸ maˇ heˆ kʼo, Baˍraˍbaˆ hta‸ gʼa hpehˇ ve awˬ lawn na nyi ve

13Oˇ htaˇ jawˇmawˇ Piˉla‸ lehˬ, paw hkuˇ lonˉ teˇ hpaˍ, awˬ hoˉ chaw mawˇ teˇ hpaˍ leh, chaw chi ma ve hta‸ kuˬ hpawnˬ leh kʼoˆ piˇ ve, 14Chaw chi hpaˇ lehˬ, mvuhˇmiˬ yaˇ hta‸ ya‸ kʼaw sheh ya‸ ve chaw hpeh‸ ve teh‸ nawˬ hui kʼoˆ leh, yawˇ hta‸ ngaˬ geh sheh veu laˇ ve yoˬ. Nawˬ hui mehˆ gʼuˇ suhˍ ngaˬ yawˇ hta‸ na nyi ve htawˇ, nawˬ hui yawˇ awˬ hkʼoˆ hta‸ venˇbaˆ taˍ ve hkʼe venˇbaˆ teˇ ceuˬ ka‸ ngaˬ maˇ mawˬ. 15Jawˇmawˇ Heˍroˆ htawˇ yawˇ awˬ hkʼaw lo venˇbaˆ maˇ mawˬ leh, yawˇ hta‸ ngaˬ hui geh kʼaw‸ hkʼaw‸ peu laˇ ve yoˬ. Nyi loˬ, yawˇ lehˬ suh keunˍ ve venˇbaˆ teˇ ceuˬ ka‸ maˇ te. 16Hkʼe te leh, ngaˬ yawˇ hta‸ jaw‸ sheˬ leh hpehˇ piˇ tuˬ yoˬ teh‸, yawˇ hui hta‸ kʼoˆ piˇ ve yoˬ.#23:16 Li‸ hpu teˇ hpaˍ hpaˍ awˬ hk’aw lo, ka nanˉ ehˉ chi teˇ maˬ cawˬ ve yoˬ.-17 Pawehˇ oˇ ve awˬ hk’aw lo, jawˇmawˇ Piˉla‸ yawˇ hui awˬ pon chaw teˇ g’aˇ hta‸ g’a hpeh piˇ ve yoˬ.

18Yawˇ hui hkʼa peu-eˬ kʼoˆ ve, Chaw chi hpaˇ hta‸ yuˬ baˬ-o‸. Ngaˬ hui awˬ pon Baˍraˍbaˆ hta‸ hpehˇ laˇ-oˆ teh‸ teˇ geh kuˬ ve yoˬ. 19Baˍraˍbaˆ lehˬ, venˇ oˇ ve awˬ hkʼaw lo chaw hpfuhˆ hpeh‸ leh, shu hta‸ tiˇ pehˍ ve pa taw, htawnˍ hkʼaw keu taˍ ve chaw hpeh‸ ve yoˬ.

20Jawˇmawˇ Piˉla‸ lehˬ, Yeˍsuˆ hta‸ hpehˇ piˇ gaˇ ve pa taw, yawˇ hui hta‸ teˇ pawˆ kʼaw‸ kʼoˆ piˇ ve yoˬ. 21Ya‸ hkʼaˇ, yawˇ hui kuˬ leh kʼoˆ ve, Yawˇ hta‸ la‸ ka hkʼoˆ lo hta‸ pehˍ loˬ, hta‸ pehˍ loˬ.

22Jawˇmawˇ Piˉla‸ lehˬ, shehˆ pawˆ teˇ pawˆ kʼaw‸ kʼoˆ piˇ ve, Aˬ hto‸ ma pa taw le. Yawˇ haiˬ ve aˬ hto‸ ma teˇ ceuˬ hta‸ te ve le. Yawˇ awˬ hkʼaw lo suh keunˍ ve venˇbaˆ teˇ ceuˬ hta‸ ka‸ ngaˬ maˇ mawˬ. Hkʼe te leh, ngaˬ yawˇ hta‸ jaw‸ sheˬ leh hpehˇ piˇ tuˬ yoˬ teh‸, yawˇ hui hta‸ kʼoˆ piˇ ve yoˬ.

23Yawˇ hui lehˬ, awˬ hkawˇ bvuhˬ chaweh kuˬ leh, yawˇ hta‸ la‸ ka hkʼoˆ lo hta‸ pehˍ tuˬ, gʼaˇ hte‸ kʼoˆ tcuhˉ taˍ leh, yawˇ hui ve hkawˇ gʼaˇ sheˬ ve yoˬ. 24Hkʼe te leh jawˇmawˇ Piˉla‸ lehˬ, yawˇ hui kʼoˆ ve hkʼe hpeh‸ la tuˬ suhˉ taˆ ve yoˬ. 25Mvuhˇmiˬ hta‸ hpfuhˆ leh shu hta‸ tiˇ pehˍ ve pa taw, htawnˍ hkʼaw lo keu taˍ ve chaw oˇ ve teˇ gʼaˇ hta‸, yawˇ hui lawˬ ve hkʼe hpehˇ piˇ leh, Yeˍsuˆ hta‸ yawˇ hui te gaˇ ve hkʼe te hpeh‸ tuˬ yawˇ hui ve la‸ hkʼaw lo chiˇ a‸ piˇ ve yoˬ.

Yeˍsuˆ hta‸ la‸ ka hkʼoˆ lo hta‸ pehˍ ve

26Yeˍsuˆ hta‸ yawˇ hui sheh tawˆ-e ve teˇ yanˇ, heh hkʼaw kʼai kʼaw‸ la ve Kuˇreˍneˍ venˇ yaˇ Siˉmonˍ meh ve teˇ gʼaˇ hta‸ yawˇ hui yuˬ tiˍ taˍ leh, la‸ ka hta‸ taˆ tcuh leh Yeˍsuˆ hkʼaˇ suh kʼai tcuh ve yoˬ.

27Chaw awˬ moˍ lonˉ maˇ kʼoˆ, yawˇ hta‸ pa taw hawˬ leh paˆ hawˬ ve yaˇ miˇ teˇ hpaˍ htawˇ maˇ kʼoˆ, yawˇ awˬ hkʼaˇ suh kʼai ve yoˬ. 28Yeˍsuˆ yawˇ hui hta‸ hpfuhˆ nyi leh kʼoˆ ve, Yeˍruˆsaˍlehnˍ venˇ yaˇ miˇ teˇ hpaˍ-oˬ, ngaˬ hta‸ pa taw taˇ hawˬ. Nawˬ hui a shu yawˇ awˬ to awˬ pon leh nawˬ hui ve awˬ yaˇ awˬ duˬ teˇ hpaˍ awˬ pon hawˬ-o‸. 29Awˬ lawn kʼo, Chaw meh ma teˇ hpaˍ lehˬ, awˬ bon uiˍ ve yoˬ. Yaˇ maˇ hu jaw ve gʼoˇ peˬ leh yaˇ ehˉ maˇ dawˬ jaw ve cuˉ lehˬ, awˬ bon uiˍ ve yoˬ teh‸ gʼa kʼoˆ tuˬ ve awˬ nyi awˬ haˉ gaˬ la tuˬ yoˬ. 30Oˇ htaˇ yawˇ hui lehˬ, hkʼaw teˇ hpaˍ hta‸ chi hkʼe kʼoˆ piˇ tuˬ yoˬ. Ngaˬ hui hta‸ paˆ teˍ laˇ-oˆ. Hkʼaw pui ehˉ teˇ hpaˍ hta‸ htawˇ, Ngaˬ hui hta‸ hoˆ tiˍ taˍ laˇ-oˆ teh‸ kʼoˆ piˇ tuˬ yoˬ. 31Yawˇ hui lehˬ, suhˆ awˬ tcuhˇ hta‸ chi hkʼe te ve kʼo, suhˆ awˬ vi hta‸ hkʼaˬ hkʼe taw te tuˬ ve le teh‸ kʼoˆ ve yoˬ.

32Oˇ htaˇ yawˇ geh teˇ geh tiˇ pehˍ tuˬ, chaw haiˬ nyiˇ gʼaˇ hta‸ htawˇ yawˇ hui sheh tawˆ-e ve yoˬ. 33Oˉkoˆ meh ve chehˇ kuiˬ lo gaˬ la htaˇ, yawˇ hui lehˬ yawˇ hta‸ la‸ ka hkʼoˆ lo hta‸ keu taˍ ve yoˬ. Chaw haiˬ oˇ ve nyiˇ gʼaˇ hta‸ ka‸, yawˇ ve la‸ sha paˉ teˇ gʼaˇ, la‸ mehˍ paˉ teˇ gʼaˇ la‸ ka hkʼoˆ lo hta‸ keu taˍ ve yoˬ. 34Oˇ htaˇ Yeˍsuˆ kʼoˆ ve, A pa-oˬ, yawˇ hui ve venˇbaˆ hta‸ hpehˇ hkʼa-o. Awˬ lawn kʼo, yawˇ hui hkʼaˬ hkʼe te ve hta‸ yawˇ hui maˇ shiˍ teh‸ kʼoˆ ve yoˬ.

Oˇ ve awˬ hkʼaw‸ nawˉ yawˇ hui kuˇ da‸ leh, yawˇ ve veu‸ kʼaˇ teˇ hpaˍ hta‸ pehˬ yuˬ ve yoˬ. #Chi 22:18 35Chaw chi ma ve huˉ leh nyi chehˇ ve yoˬ. Jawˇmawˇ teˇ hpaˍ lehˬ, yawˇ hta‸ kʼoˆ guiˇ gʼuiˬ guiˇ leh kʼoˆ ve, Shu hta‸ yawˇ htaiˍ hkʼaw‸ gʼa ve yoˬ. Yawˇ lehˬ Hkri‸ teh‸ kʼoˆ ve Gʼuiˬsha leuˆ yuˬ taˍ ve teˇ gʼaˇ hpeh‸ ve kʼo, yawˇ awˬ to hta‸ yawˇ htaiˍ hkʼaw‸ piˇ lawˬ-o‸ teh‸ kʼoˆ ve yoˬ.

36Ma‸ yaˇ teˇ hpaˍ htawˇ yawˇ awˬ paˇ lo laˬ leh, ci ve awˬ gʼuiˬ yawˇ hta‸ taw piˇ leh kʼoˆ ve, 37Nawˬ lehˬ, Yuˇda‸ chaw hui ve hkunˉ hawˉ hkanˇ hpeh‸ ve kʼo, nawˬ awˬ to hta‸ nawˬ htaiˍ hkʼaw‸-o‸ teh‸, yawˇ hta‸ kʼoˆ guiˇ gʼuiˬ guiˇ ve yoˬ.

38Yawˇ awˬ hkʼoˆ lo htawˇ, Chaw chi lehˬ, Yuˇda‸ chaw hui ve hkunˉ hawˉ hkanˇ yoˬ teh‸, li‸ bvuh‸ nehˉ taˍ ve yoˬ.

39Oˇ htaˇ, la‸ ka hkʼoˆ lo hta‸ keu taˍ ve chaw haiˬ teˇ gʼaˇ kʼoˆ ve, Nawˬ lehˬ Hkri‸ maˇ heˆ laˇ. Nawˬ awˬ to hta‸ ka‸, ngaˬ huiˉ maˬ hta‸ ka‸ htaiˍ hkʼaw‸ laˇ-oˆ teh‸, Yeˍsuˆ hta‸ maˇ shawˍ maˇ caˆ te leh kʼoˆ piˇ ve yoˬ.

40Awˬ nu ve teˇ gʼaˇ kʼaw‸ kʼoˆ ve, Yawˇ hkʼa shuˍ shuˍ suhˉ taˆ ve hta‸ nawˬ htawˇ hkanˍ chehˇ ve awˬ hkʼaw lo, Gʼuiˬsha hta‸ nawˬ maˇ kawˆ laˇ. 41Ngaˬ huiˉ maˬ chi hkʼe gʼa hkanˍ ve lehˬ cawˇ ve yoˬ. Awˬ lawn kʼo, ngaˬ huiˉ maˬ te ya‸ ve pa taw, hkanˍ keunˍ hkanˍ cawˇ ve hkʼe gʼa hkanˍ ve yoˬ. Ya‸ hkʼaˇ, chaw chi teˇ gʼaˇ lehˬ, te‸ chiˉ ka‸ maˇ te ya‸ teh‸ kʼoˆ leh yawˇ ve awˬ chawˇ hta‸ deˇ piˇ ve yoˬ. 42Peuˬ leh yawˇ kʼoˆ ve, Yeˍsuˆ-oˬ, nawˬ hkunˉ hawˉ hkanˇ te laˬ ve teˇ yanˇ, ngaˬ hta‸ dawˇ nawˇ laˇ-oˆ teh‸ kʼoˆ piˇ ve yoˬ.

43Yeˍsuˆ kʼoˆ ve, Ngaˬ nawˬ hta‸ awˬ tehˬ awˬ na kʼoˆ laˇ ve, ya‸ nyi nawˬ ngaˬ geh teˇ geh Paˍraˍdiˇsuˆ awˬ hkʼaw lo gʼa chehˇ tuˬ yoˬ teh‸ yawˇ hta‸ kʼoˆ piˇ ve yoˬ. #23:43 Paˍraˍdiˇsuˆ teh‸ k’oˆ ve lehˬ, co ha g’aˇ jehˇ kuiˬ teh‸ kʼoˆ gaˇ ve yoˬ.

Yeˍsuˆ suh ve

44Awˬ yanˇ oˇ ve lehˬ, aˬ laˬ hkʼe mvuhˇ law‸ kʼaw tcuhˆ teˇ yanˇ hpeh‸ ve yoˬ. Mvuhˇ hpeu‸ hpawˇ shehˆ naˍ riˍ hkʼa gaˬ, miˬguiˬ hkʼa peu-eˬ naˆ ho‸ hpeh‸ sheˬ leh, mvuhˇ nyi awˬ gʼeuˆ mehˉ kʼai ve yoˬ. 45Bon yehˬ lonˉ awˬ hkʼaw lo cawˬ ve hpaˬ kaˍ lonˉ lehˬ, nyiˇ hkoˇ tzuh‸ sheˬ ve yoˬ. 46Oˇ htaˇ Yeˍsuˆ awˬ hkawˇ bvuhˬ chaweh kuˬ leh, A pa-oˬ, ngaˬ ve co ha nawˬ ve la‸ hkʼaw lo ngaˬ chiˇ a‸ laˇ ve yoˬ teh‸ kʼoˆ ve yoˬ. Yawˇ chi hkʼe kʼoˆ peuˬ hkʼaw‸ nawˉ shaˉ cheˆ ve yoˬ. #Chi 31:5

47Chi hkʼe hpeh‸ la ve hta‸ ma‸ poˍ teˇ gʼaˇ gʼa mawˬ htaˇ, Chaw chi lehˬ, awˬ tehˬ awˬ na hteˇ ve cawˇ ve chaw teˇ gʼaˇ hpeh‸ ve yoˬ teh‸ kʼoˆ leh, Gʼuiˬsha hta‸ chiˇ uiˍ chiˇ mvuh piˇ ve yoˬ.

48Oˇ ve hta‸ hpawnˬ nyi chehˇ ve chaw hkʼa peu-eˬ lehˬ, chi hkʼe hpeh‸ la ve hta‸ gʼa mawˬ htaˇ, yawˇ hui dawˇ haˍ jaˇ ve awˬ hkʼaw lo a shu yawˇ ve nyi ma pui hta‸ hta leh kʼo‸-e ve yoˬ. 49Yawˇ hta‸ hkʼa shiˍ ve chaw hkʼa peu-eˬ maˇ kʼoˆ, Gaˍliˍlehˇ mvuhˇmiˬ lo te leh yawˇ awˬ hkʼaˇ suh kʼai ve yaˇ miˇ teˇ hpaˍ htawˇ maˇ kʼoˆ, a ciˉ vuiˇ kuiˬ lo huˉ taˍ leh chi teˇ hpaˍ hta‸ nyi chehˇ ve yoˬ.

Yeˍsuˆ hta‸ tuˍ piˇ ve

50Oˇ htaˇ, Yuˇda‸ mvuhˇmiˬ awˬ hkʼaw lo cawˬ ve Aˍriˆma‸htehˍ venˇ lo laˬ ve Yoˇseh‸ meh ve chaw teˇ gʼaˇ cawˬ ve yoˬ. Yawˇ lehˬ, da‸ ve chaw leh hteˇ ve cawˇ ve chaw hpeh‸ leh, Gʼuiˬsha ve mvuhˇmiˬ hta‸ dawˇ law chehˇ ve chaw teˆ gʼaˇ hpeh‸ ve yoˬ. 51Yawˇ lehˬ jehˬ da‸ shehˍ hpaˇ awˬ moˍ awˬ hkʼaw lo chehˇ ve htawˇ, yawˇ hui jehˬ cheˆ leh te ve hta‸ yawˇ nyi ma maˇ cawˇ ve yoˬ. 52Yawˇ jawˇmawˇ Piˉla‸ geh kʼai leh, Yeˍsuˆ ve awˬ to hta‸ lawˬ yuˬ ve yoˬ. 53Yeˍsuˆ ve awˬ to hta‸ yawˇ yuˬ ya‸ leh, hpa hpu yuˬ htiˆ sheˬ leh, teˇ gʼaˇ ka‸ maˇ tuˍ jaw sheˍ ve, haˉ pui htawˆ taˍ ve tuˍ hpfuh awˬ hkʼaw lo keu taˍ ve yoˬ. 54Awˬ nyi oˇ ve lehˬ, pawehˇ awˬ pon gu ve awˬ nyi hpeh‸ leh, shinˉ nyi gaˬ la paˇ neˇ ve yoˬ.

55Gaˍliˍlehˇ mvuhˇmiˬ lo te leh Yeˍsuˆ geh hkʼa geh laˬ ve yaˇ miˇ teˇ hpaˍ htawˇ awˬ hkʼaˇ suh kʼai leh, tuˍ hpfuh hta‸ maˇ kʼoˆ, yawˇ ve awˬ to hta‸ hkʼaˬ hkʼe te teh taˍ ve hta‸ maˇ kʼoˆ, yawˇ hui gʼa mawˬ ve yoˬ. 56Oˇ htaˇ yawˇ hui kʼo‸-e leh, sha hawnˉ teˇ hpaˍ leh naˍ manˇ hawnˉ teˇ hpaˍ hta‸ gu taˍ ve yoˬ.

Awˬliˇtawˇhkawˇ cawˬ taˍ ve hkʼe, shinˉ nyi teˇ nyi awˬ hkʼaw lo yawˇ hui gʼaˇ jehˇ ve yoˬ.

ప్రస్తుతం ఎంపిక చేయబడింది:

Luˉka‸ li‸ 23: LHBE

హైలైట్

షేర్ చేయి

కాపీ