Yoˇhanˬ li‸ 6

Chaw ngaˇ hinˉ gʼaˇ hta‸ caˍ piˇ ve

1Oˇ ve awˬ hkʼaw‸ nawˉ, Yeˍsuˆ lehˬ, Tiˍbeˍriˆ teh‸ kʼoˆ ve Gaˍliˍlehˇ gʼuiˬ po coˇ paˉ lo hkanˍ kʼai ve yoˬ. 2Naˬ ve gawˬ ve chaw teˇ hpaˍ awˬ hkʼaw lo yawˇ te ve awˬ heˆ teˇ hpaˍ hta‸ chaw awˬ moˍ lonˉ gʼa mawˬ ve pa taw, yawˇ hui yawˇ awˬ hkʼaˇ suh kʼai ve yoˬ. 3Oˇ htaˇ Yeˍsuˆ lehˬ, hkʼaw pui hkʼoˆ lo taˆ-e leh, oˇ kaˬ lo yawˇ ve awˬ la‸ gʼawˇ teˇ hpaˍ geh mui taˍ ve yoˬ. 4Oˇ htaˇ, Yuˇda‸ chaw hui ve Paˍsaˍhkaˍ pawehˇ te tuˬ awˬ yanˇ gaˬ la paˇ neˇ ve yoˬ. 5Yeˍsuˆ chiˇ nyi leh, chaw awˬ moˍ lonˉ yawˇ geh laˬ chehˇ ve hta‸ gʼa mawˬ ve teˇ yanˇ, yawˇ Hpiˇliˇpuˆ hta‸ kʼoˆ piˇ ve, Chaw chi ma ve gʼa caˇ tuˬ, ngaˬ hui hkaoˍmonˇ hkʼaˬ lo ca vuiˬ tuˬ le teh‸ na nyi ve yoˬ. 6Yawˇ chi hkʼe na nyi ve lehˬ, Hpiˇliˇpuˆ hta‸ lawˇ nyi ve ceh yoˬ. Awˬ lawn kʼo, hkʼaˬ hkʼe te tuˬ ve hta‸ Yeˍsuˆ yawˇ awˬ to shiˍ taˍ ve yoˬ.

7Hpiˇliˇpuˆ kʼaw‸ kʼoˆ ve, Chaw chi ma ve hkaoˍmonˇ teˇ gʼaˇ teˇ hkʼeh‸ gʼa caˇ tuˬ, hpu nyiˇ ha hteh‸ hpfuhˇ vuiˬ ve htawˇ maˇ law‸ taˬ teh‸, yawˇ hta‸ kʼoˆ piˇ ve yoˬ.

8Yawˇ ve awˬ la‸ gʼawˇ teˇ hpaˍ awˬ hkʼaw lo, Siˉmonˍ Peˍtruˆ ve awˬ nyi paˍ Anˍdrehˍ kʼoˆ ve, 9Cho‸ te taˍ ve hkaoˍmonˇ ngaˇ diˬ leh ngaˇ ehˉ nyiˇ hkeh cawˬ ve yaˇ paˍ ehˉ teˇ gʼaˇ choˬ kaˬ chehˇ taˍ ve yoˬ. Ya‸ hkʼaˇ, chaw chi ma ve awˬ pon chi teˇ hpaˍ ceh tiˉ aˬ hto‸ ma kʼoˆ tuˬ cawˬ le teh, Yeˍsuˆ hta‸ kʼoˆ piˇ ve yoˬ.

10Yeˍsuˆ lehˬ, Chaw chi teˇ hpaˍ hta‸ mui tcuh-o teh‸ kʼoˆ piˇ ve yoˬ. Oˇ kaˬ lo mvuh‸ de hpeh‸ ve yoˬ. Hkʼe te leh, oˇ kaˬ lo mui taˍ ve chaw, hawˉ hkʼaˆ ceh tiˉ ngaˇ hinˉ gʼaˇ hkʼe cawˬ ve yoˬ. 11Oˇ htaˇ Yeˍsuˆ lehˬ, hkaoˍmonˇ oˇ ve teˇ hpaˍ hta‸ yuˬ leh, bon hta‸ chiˇ mvuh peuˬ hkʼaw‸ nawˉ, mui chehˇ ve chaw teˇ hpaˍ hta‸ pehˬ piˇ ve yoˬ. Oˇ ve hkʼa shuˍ shuˍ, ngaˇ shaˍ hta‸ htawˇ yawˇ hui caˇ gaˇ ve hkʼe pehˬ piˇ ve yoˬ. 12Yawˇ hui hkʼa bvuhˆ gʼa caˇ peuˬ hkʼaw‸ nawˉ yawˇ kʼoˆ ve, Te‸ chiˉ maˇ gʼa mehˉ kʼai tuˬ, caˇ leuˉ taˍ ve teˇ hpaˍ hta‸ kʼaw‸ gʼawˆ-oˆ teh‸, yawˇ ve awˬ la‸ gʼawˇ teˇ hpaˍ hta‸ kʼoˆ piˇ ve yoˬ. 13Hkʼe te leh, yawˇ hui kʼaw‸ gʼawˆ ve teˇ yanˇ, cho‸ te taˍ ve hkaoˍmonˇ ngaˇ diˬ hta‸ caˇ leuˉ taˍ ve teˇ hpaˍ, teˇ chi nyiˇ hkʼawˍ lawˇ gʼa ve yoˬ.

14Hkʼe te leh, yawˇ te ve awˬ heˆ chi hta‸ chaw chi ma ve gʼa mawˬ ve teˇ yanˇ, Chaw chi lehˬ, miˬguiˬ hkʼoˆ lo laˬ tuˬ ve Gʼuiˬsha ve tcuh kaˍ paˍ awˬ tehˬ awˬ na hpeh‸ ve yoˬ teh‸, yawˇ hui kʼoˆ da‸ ve yoˬ.

Gʼuiˬ po hkʼoˆ Yeˍsuˆ juˇ kʼai ve

15Chaw oˇ ve teˇ hpaˍ lehˬ, yawˇ hta‸ hkunˉ hawˉ hkanˇ nyiˉ te tcuh-a teh‸ dawˇ ve hta‸ Yeˍsuˆ shiˍ ve pa taw, yawˇ teˇ gʼaˇ tiˉ hkʼaw pui hkʼoˆ lo kʼaw‸ taˆ-e ve yoˬ.

16Mvuhˇ hpeu‸ la htaˇ, yawˇ ve awˬ la‸ gʼawˇ teˇ hpaˍ gʼuiˬ po lo ya‸-e leh, 17haw lo‸ kʼoˍ hkʼaw lo‸-e peuˬ hkʼaw‸ nawˉ, gʼuiˬ po coˇ paˉ Kaˍpeˍneˍonˍ venˇ lo hkanˍ kʼai ve yoˬ. Oˇ teˇ hkui mehˆ muiˉ naˆ jaˇ peuˬ ve ka‸, Yeˍsuˆ yawˇ hui geh maˇ gaˬ la sheˍ. 18Mvuhˇ haw lonˉ meuˆ jaˇ leh, gʼuiˬ baˇ taˆ la ve yoˬ. 19Yawˇ hui haw lo‸ kʼoˍ hta‸ shehˆ laˆ awˇ laˆ hkʼe gʼawˆ kʼai peuˬ ve teˇ yanˇ, Yeˍsuˆ gʼuiˬ po awˬ hkʼoˆ lo ya‸ kʼaw juˇ leh, haw lo‸ kʼoˍ awˬ paˇ lo laˬ chehˇ ve hta‸ yawˇ hui gʼa mawˬ htaˇ kawˆ jaˇ ve yoˬ. 20Yeˍsuˆ lehˬ, Ngaˬ yoˬ, taˇ kawˆ teh‸ yawˇ hui hta‸ kʼoˆ piˇ ve yoˬ. 21Hkʼe te leh, yawˇ hui yawˇ hta‸ haw lo‸ kʼoˍ awˬ hkʼaw lo ha lehˬ ha kʼa ha‸ yuˬ leh, haw lo‸ kʼoˍ lehˬ yawˇ hui kʼai chehˇ ve teˇ kaˬ lo teˇ cawˬ haˉ gaˬ sheˬ ve yoˬ.

Chaw awˬ moˍ lonˉ Yeˍsuˆ hta‸ ca ve

22Awˬ hkʼaw‸ nawˉ teˇ nyi gʼuiˬ po coˇ paˉ lo chehˇ taˉ ve chaw awˬ moˍ lonˉ lehˬ, aˉ nyi htaˇ haw lo‸ kʼoˍ ehˉ teˇ maˬ ceh tiˉ cawˬ taˍ ve hta‸ maˇ kʼoˆ, Yeˍsuˆ lehˬ yawˇ ve awˬ la‸ gʼawˇ teˇ hpaˍ geh teˇ geh haw lo‸ kʼoˍ oˇ ve awˬ hkʼaw lo maˇ lo‸-e leh, yawˇ ve awˬ la‸ gʼawˇ teˇ hpaˍ ceh tiˉ kʼai ve hta‸ maˇ kʼoˆ, yawˇ hui gʼa mawˬ ve yoˬ. 23Ya‸ hkʼaˇ, Tiˍbeˍriˆ venˇ lo laˬ ve haw lo‸ kʼoˍ ehˉ teˇ hpaˍ lehˬ, Jawˇmawˇ Yeˍsuˆ bon hta‸ chiˇ mvuh peuˬ hkʼaw‸ nawˉ yawˇ hui hkaoˍmonˇ gʼa caˇ ve chehˇ kuiˬ awˬ paˇ lo gaˬ la ve yoˬ. 24Hkʼe te leh, Yeˍsuˆ leh yawˇ ve awˬ la‸ gʼawˇ teˇ hpaˍ oˇ kaˬ lo maˇ chehˇ ve hta‸ chaw awˬ moˍ lonˉ gʼa shiˍ ve teˇ yanˇ, haw lo‸ kʼoˍ oˇ ve teˇ hpaˍ hta‸ yawˇ hui ciˇ leh, Yeˍsuˆ hta‸ ca nyi tuˬ Kaˍpeˍneˍonˍ venˇ lo kʼai ve yoˬ.

Yeˍsuˆ lehˬ co ha te‸ piˇ lawˬ ve hkaoˍmonˇ hpeh‸ ve

25Gʼuiˬ po coˇ paˉ lo yawˇ hui Yeˍsuˆ hta‸ gʼa mawˬ ve teˇ yanˇ, Raˍbiˆ-oˬ, nawˬ choˬ kaˬ lo hkʼaˬ htaˆ laˬ ve le teh‸, yawˇ hui yawˇ hta‸ na nyi ve yoˬ.

26Yeˍsuˆ kʼaw‸ kʼoˆ ve, Ngaˬ nawˬ hui hta‸ awˬ tehˬ awˬ na kʼoˆ laˇ ve, awˬ heˆ teˇ hpaˍ hta‸ nawˬ hui gʼa mawˬ ve pa taw ngaˬ hta‸ ca ve maˇ heˆ. Hkaoˍ monˇ hkʼa bvuhˆ gʼa caˇ ve pa taw ceh nawˬ hui ngaˬ hta‸ ca ve yoˬ. 27Luˬ puiˉ sheˆ puiˉ ve caˇ tuˬ hta‸ gʼa tuˬ awˬ pon gʼaˇ hte‸ taˇ te. Chaw yaˇ ve Yaˇ hpu nawˬ hui hta‸ pe‸ laˇ tuˬ ve caˇ tuˬ hta‸ gʼa tuˬ awˬ pon gʼaˇ hte‸ te-o. Caˇ tuˬ oˇ ve lehˬ, co ti‸ ha ti‸ gʼa tuˬ awˬ pon yeˬ ve caˇ tuˬ dawˬ tuˬ hpeh‸ ve yoˬ. Awˬ lawn kʼo, Awˬ pa Gʼuiˬsha lehˬ chaw yaˇ ve Yaˇ hpu hta‸ yinˉ tcuhˉ taˍ peuˬ teh‸, yawˇ hui hta‸ kʼoˆ piˇ ve yoˬ.

28Hkʼe te leh, yawˇ hui kʼaw‸ kʼoˆ ve, Gʼuiˬsha ve kanˉ te tuˬ, ngaˬ hui hkʼaˬ hkʼe gʼa te tuˬ le teh‸ yawˇ hta‸ na nyi htaˇ,

29Yeˍsuˆ kʼaw‸ kʼoˆ ve, Gʼuiˬsha ve kanˉ te ve teˇ ceuˬ lehˬ, yawˇ peu laˇ ve teˇ gʼaˇ hta‸ yonˍ ve teˇ ceuˬ hpeh‸ ve yoˬ teh‸, yawˇ hui hta‸ kʼaw‸ kʼoˆ piˇ ve yoˬ.

30Hkʼe te leh yawˇ hui kʼaw‸ kʼoˆ ve, Ngaˬ hui gʼa mawˬ leh nawˬ hta‸ gʼa yonˍ tuˬ, nawˬ aˬ hto‸ ma awˬ heˆ te maˍ laˇ ve le. 31Nawˬ aˬ hto‸ ma kanˉ te maˍ laˇ ve le. Awˬ puˍ aw‸ pi teˇ hpaˍ gʼa caˇ tuˬ awˬ pon, mvuhˇ naw ma ve hkaoˍmonˇ yawˇ yawˇ hui hta‸ piˇ ve yoˬ teh‸ bvuh‸ taˍ ve hkʼe, ngaˬ hui ve awˬ puˍ awˬ pi teˇ hpaˍ lehˬ, heh puiˉ hkʼaw lo maˍnaˆ shi hta‸ gʼa caˇ ve yoˬ teh‸, yawˇ hta‸ kʼoˇ piˇ ve yoˬ.

32Oˇ htaˇ Yeˍsuˆ kʼaw‸ kʼoˆ ve, Ngaˬ nawˬ hui hta‸ awˬ teh‸ awˬ na kʼoˆ laˇ ve, mvuhˇ naw ma ve hkaoˍmonˇ nawˬ hui hta‸ pe‸ laˇ shehˍ hpaˇ lehˬ Moˉseˍ maˇ heˆ. Awˬ tehˬ awˬ na ve mvuhˇ naw ma ve hkaoˍmonˇ nawˬ hui hta‸ pe‸ laˇ shehˍ hpaˇ lehˬ ngaˬ Awˬ pa yoˬ. 33Awˬ lawn kʼo, Gʼuiˬsha ve hkaoˍmonˇlehˬ, mvuhˇ naw ma hkʼoˆ lo ya‸ la leh, miˬguiˬ yaˇ teˇ hpaˍ hta‸ co ha te‸ piˇ lawˬ ve hkaoˍ monˇ hpeh‸ ve yoˬ teh‸, yawˇ hui hta‸ kʼoˆ piˇ ve yoˬ.

34Yawˇ hui kʼaw‸ kʼoˆ ve, Jawˇmawˇ-oˬ, hkaoˍ monˇ oˇ ve ngaˬ hui hta‸ hkʼaˬ htaˆ ka‸ pe‸ laˇ-oˆ teh‸ yawˇ hta‸ kʼoˆ piˇ ve yoˬ.

35Yeˍsuˆ kʼaw‸ kʼoˆ ve, Ngaˬ lehˬ co ha te‸ piˇ lawˬ ve hkaoˍmonˇ hpeh‸ ve yoˬ. Ngaˬ geh laˬ ve chaw lehˬ, maˇ kʼaw‸ meu‸-o. Ngaˬ hta‸ yonˍ ve chaw lehˬ, iˉ kaˆ teˇ pawˆ ka‸ maˇ kʼaw‸ shiˉ-o. 36Ya‸ hkʼaˇ, nawˬ hui ngaˬ hta‸ mawˬ ve htawˇ maˇ yonˍ teh‸ ngaˬ nawˬ hui hta‸ kʼoˆ laˇ peuˬ. 37Awˬ pa ngaˬ hta‸ hkʼa pe‸ laˇ ve chaw hui lehˬ, ngaˬ geh laˬ tuˬ yoˬ. Ngaˬ geh laˬ ve chaw hta‸ ngaˬ maˇ chiˇ baˬ. 38Awˬ lawn kʼo, ngaˬ mvuhˇ naw ma hkʼoˆ lo ya‸ la ve lehˬ, ngaˬ ve a loˍ hta‸ te tuˬ ya‸ la ve maˇ heˆ. Ngaˬ hta‸ peu laˇ shehˍ hpaˇ ve a loˍ hta‸ te tuˬ awˬ pon ngaˬ ya‸ la ve yoˬ. 39Ngaˬ hta‸ peu laˇ shehˍ hpaˇ ve a loˍ lehˬ chi hkʼe yoˬ. Yawˇ ngaˬ hta‸ hkʼa pe‸ laˇ peuˬ ve chaw teˇ hpaˍ teˇ gʼaˇ ka‸ maˇ gʼa mehˉ kʼai leh, awˬ leh meuˇ ve awˬ nyi awˬ hkʼaw lo yawˇ hui hkʼa peu-eˬ hta‸ kʼaw‸ te‸ tu la piˇ tuˬ yoˬ. 40Yaˇ hpu hta‸ mawˬ leh yonˍ ve chaw teˇ gʼaˇ le le co ti‸ ha ti‸ gʼa tuˬ, ngaˬ Awˬ pa a loˍ cawˇ ve yoˬ. Awˬ leh meuˇ ve awˬ nyi awˬ hkʼaw lo chaw oˇ ve teˇ hpaˍ hta‸ ngaˬ kʼaw‸ te‸ tu la piˇ tuˬ yoˬ teh‸ yawˇ hui hta‸ kʼoˆ piˇ ve yoˬ.

41Ngaˬ lehˬ mvuhˇ naw ma hkʼoˆ lo ya‸ la ve hkaoˍ monˇ yoˬ teh‸ yawˇ kʼoˆ ve pa taw, Yuˇda‸ chaw teˇ hpaˍ yawˇ hta‸ ca beu ca hkʼaiˉ ve yoˬ. 42Chaw chi lehˬ, Yoˇseh‸ ve yaˇ paˍ Yeˍsuˆ maˇ heˆ laˇ. Yawˇ ve awˬ pa awˬ e hta‸ ngaˬ hui shiˍ taˍ ve maˇ heˆ laˇ. Ngaˬ mvuhˇ naw ma hkʼoˆ lo ya‸ la ve yoˬ teh‸, chi beu‸ yawˇ hkʼaˬ hkʼe te kʼoˆ hpeh‸ ve le teh‸, yawˇ hui kʼoˆ da‸ ve yoˬ.

43Oˇ htaˇ Yeˍsuˆ kʼoˆ ve, Nawˬ hui ngaˬ hta‸ taˇ beu taˇ hkʼaiˉ. 44Ngaˬ hta‸ peu laˇ shehˍ hpaˇ Awˬ pa lehˬ, shu hta‸ ngaˬ geh lo maˇ gʼawˬ veu laˇ ve kʼo, chaw teˇ gʼaˇ ka‸ ngaˬ geh laˬ maˇ hpeh‸. Ngaˬ geh gʼawˬ veu laˇ ve chaw hta‸ awˬ leh meuˇ ve awˬ nyi awˬ hkʼaw lo ngaˬ kʼaw‸ te‸ tu la piˇ tuˬ yoˬ. 45Gʼuiˬsha ve tcuh kaˍ paˍ teˇ hpaˍ ve li‸ awˬ hkʼaw lo, Gʼuiˬsha lehˬ yawˇ hui hkʼa peu-eˬ hta‸ maˍ piˇ tuˬ yoˬ teh‸ bvuh‸ taˍ ve yoˬ. #Isy 54:13 Awˬ pa geh hkʼa gʼa kaˇ leh hkʼa gʼa henˇ peuˬ ve chaw teˇ gʼaˇ le le lehˬ, ngaˬ geh laˬ ve yoˬ. 46Chaw teˇ gʼa ka‸ Awˬ pa hta‸ maˇ mawˬ jaw. Gʼuiˬsha lo laˬ ve teˇ gʼaˇ ceh tiˉ Awˬ pa hta‸ mawˬ jaw ve yoˬ. 47Ngaˬ nawˬ hui hta‸ awˬ tehˬ awˬ na kʼoˆ laˇ ve, yonˍ ve chaw lehˬ, co ti‸ ha ti‸ cawˬ taˍ ve yoˬ. 48Ngaˬ lehˬ, co ha te‸ piˇ lawˬ ve hkaoˍ monˇ hpeh‸ ve yoˬ. 49Nawˬ hui ve awˬ puˍ awˬ pi teˇ hpaˍ lehˬ, heh puiˉ hkʼaw lo maˍnaˆ shiˍ hta‸ gʼa caˇ ve htawˇ, yawˇ hui suh ve yoˬ. 50Hkaoˍmonˇ chi hta‸ gʼa caˇ ve chaw maˇ gʼa suh tuˬ, hkaoˍmonˇ chi lehˬ mvuhˇ naw ma hkʼoˆ lo ya‸ la ve yoˬ. 51Ngaˬ lehˬ, mvuhˇ naw ma hkʼoˆ lo ya‸ la ve co ha te‸ piˇ lawˬ ve hkaoˍmonˇ hpeh‸ ve yoˬ. Hkaoˍmonˇ chi hta‸ gʼa caˇ ve chaw lehˬ, co co taiˍ taiˍ co ha te‸ tuˬ yoˬ. Miˬguiˬ yaˇ co ha gʼa te‸ tuˬ ve awˬ pon, ngaˬ piˇ tuˬ ve hkaoˍmonˇ lehˬ, ngaˬ ve awˬ shaˍ yoˬ teh‸, yawˇ hui hta‸ kʼoˆ piˇ ve yoˬ.

52Hkʼe te leh, Yuˇda‸ chaw teˇ hpaˍ kʼoˆ ve, Chaw chi lehˬ, yawˇ ve awˬ shaˍ ngaˬ hui hta‸ hkʼaˬ hkʼe te caˍ laˇ hpeh‸ tuˬ le teh‸, teˇ gʼaˇ leh teˇ gʼaˇ tawˇ gʼawˬ da‸ ve yoˬ.

53Yeˍsuˆ kʼaw‸ kʼoˆ ve, Ngaˬ nawˬ hui hta‸ awˬ tehˬ awˬ na kʼoˆ laˇ ve, chaw yaˇ ve Yaˇ hpu ve awˬ shaˍ hta‸ maˇ caˇ leh yawˇ ve awˬ suhˍ hta‸ maˇ dawˬ ve kʼo, nawˬ hui awˬ hkʼaw lo co ha te‸ ve teˇ ceuˬ maˇ cawˬ. 54Ngaˬ ve awˬ shaˍ hta‸ caˇ leh ngaˬ ve awˬ suhˍ hta‸ dawˬ ve chaw lehˬ, co ti‸ ha ti‸ cawˬ taˍ ve yoˬ. Awˬ leh meuˇ teˇ nyi awˬ hkʼaw lo ngaˬ yawˇ hta‸ kʼaw‸ te‸ tu la piˇ tuˬ yoˬ. 55Awˬ lawn kʼo, ngaˬ ve awˬ shaˍ lehˬ, awˬ tehˬ awˬ na caˇ tuˬ hpeh‸ ve yoˬ. Ngaˬ ve awˬ suhˍ htawˇ awˬ tehˬ awˬ na dawˬ tuˬ hpeh‸ ve yoˬ. 56Ngaˬ ve awˬ shaˍ hta‸ caˇ leh ngaˬ ve awˬ suhˍ hta‸ dawˬ ve chaw lehˬ, ngaˬ awˬ hkʼaw lo chehˇ leh, ngaˬ htawˇ yawˇ awˬ hkʼaw lo chehˇ ve yoˬ. 57Te‸ chehˇ ve Awˬ pa ngaˬ hta‸ peu laˇ leh, yawˇ hta‸ pa taw ngaˬ te‸ chehˇ ve hkʼe, ngaˬ hta‸ caˇ ve chaw htawˇ, ngaˬ hta‸ pa taw co ha te‸ chehˇ tuˬ yoˬ. 58Hkaoˍmonˇ chi lehˬ, awˬ puˍ awˬ pi hui gʼa caˇ ve hkaoˍmonˇ hkʼa shuˍ shuˍ hpeh‸ ve maˇ heˆ. Hkaoˍmonˇ oˇ ve hta‸ yawˇ hui gʼa caˇ ve htawˇ suh ve yoˬ. Hkaoˍmonˇ chi lehˬ, mvuhˇ naw ma hkʼoˆ lo ya‸ la ve yoˬ. Hkaoˍmonˇ chi hta‸ caˇ ve chaw lehˬ, co co taiˍ taiˍ co ha gʼa te‸ tuˬ yoˬ teh‸ yawˇ hui hta‸ kʼoˆ piˇ ve yoˬ.

59Kaˍpeˍneˍonˍ venˇ lo cawˬ ve bon yehˬ awˬ hkʼaw lo yawˇ maˍ piˇ chehˇ htaˇ, awˬ lawn chi teˇ hpaˍ hta‸ yawˇ kʼoˆ ve yoˬ.

Co ti‸ ha ti‸ tawˇ hkawˇ awˬ lawn

60Yawˇ ve awˬ la‸ gʼawˇ hui tawˇ oˇ ve hta‸ gʼa kaˇ ve teˇ yanˇ, yawˇ hui laiˉ gʼaˇ kʼoˆ ve, Tawˇ chi lehˬ haˍ jaˇ ve yoˬ. A shu na hpeh‸ tuˬ le teh‸ kʼoˆ da‸ ve yoˬ.

61Awˬ lawn chi yawˇ ve awˬ la‸ gʼawˇ teˇ hpaˍ ca beu ca hkʼaiˉ chehˇ ve hta‸ Yeˍsuˆ yawˇ ve nyi ma awˬ hkʼaw lo shiˍ ve teˇ yanˇ yawˇ kʼoˆ ve, Tawˇ chi ve hta‸ pa taw nawˬ hui nyi ma luˬ ve leh laˇ. 62Chaw yaˇ ve Yaˇ hpu lehˬ, awˉ lawˉ chehˇ jaw kuiˬ lo kʼaw‸ taˆ kʼo‸-e chehˇ ve hta‸ nawˬ hui gʼa mawˬ ve kʼo, hkʼaˬ hkʼe dawˇ tuˬ ve le. 63Co ha te‸ piˇ lawˬ ve teˇ ceuˬ lehˬ, awˬ ha yoˬ. Awˬ shaˍ lehˬ, te‸ chiˉ te maˇ gʼa. Ngaˬ nawˬ hui hta‸ kʼoˆ laˇ ve tawˇ hkawˇ teˇ hpaˍ lehˬ, awˬ ha hpeh‸ ve yoˬ. Co ha te‸ ve teˇ ceuˬ ka‸ hpeh‸ ve yoˬ. 64Ya‸ hkʼaˇ, nawˬ hui awˬ hkʼaw lo chaw teˇ hpaˍ hpaˍ maˇ yonˍ teh‸, yawˇ hui hta‸ kʼoˆ piˇ ve yoˬ. Awˬ lawn kʼo, maˇ yonˍ ve chaw teˇ hpaˍ a shu hpeh‸ ve hta‸ maˇ kʼoˆ, yawˇ hta‸ chiˇ a‸ piˇ tuˬ ve chaw teˇ gʼaˇ a shu hpeh‸ ve hta‸ maˇ kʼoˆ, awˬ hkuiˉ puiˍ htaˇ ka‸ Yeˍsuˆ shiˍ taˍ ve yoˬ. 65Yawˇ kʼoˆ ve, Hkʼe te leh ngaˬ Awˬ pa a hkaw-anˬ maˇ piˇ ve kʼo, chaw teˇ gʼaˇ ka‸ ngaˬ geh laˬ maˇ hpeh‸ teh‸, ngaˬ nawˬ hui hta‸ kʼoˆ laˇ taˍ peuˬ teh‸ kʼoˆ ve yoˬ.

66Oˇ ve awˬ hkʼaw‸ nawˉ yawˇ ve awˬ la‸ gʼawˇ laiˉ gʼaˇ kʼaw‸ hpfuhˆ kʼo‸-e leh yawˇ geh maˇ kʼaw‸ te toˇ ve yoˬ. 67Nawˬ hui htawˇ kʼaw‸ kʼo‸-e tuˬ ve laˇ teh‸, tcuh yaˇ teˇ chi nyiˇ gʼaˇ hta‸ Yeˍsuˆ na nyi ve yoˬ.

68Siˉmonˍ Peˍtruˆ kʼaw‸ kʼoˆ ve, Jawˇmawˇ-oˬ, ngaˬ hui a shu geh kʼai tuˬ ve le. Nawˬ lehˬ co ti‸ ha ti‸ ve tawˇ hkawˇ cawˬ taˍ ve yoˬ. 69Nawˬ lehˬ Gʼuiˬsha ve da‸ kehˬ shehˍ hpaˇ teˇ gʼaˇ hpeh‸ ve hta‸ ngaˬ hui yonˍ taˍ leh shiˍ taˍ peuˬ teh‸ yawˇ hta‸ kʼoˆ piˇ ve yoˬ.

70Yeˍsuˆ kʼaw‸ kʼoˆ ve, Ngaˬ nawˬ hui teˇ chi nyiˇ gʼaˇ hta‸ leuˆ yuˬ taˍ ve maˇ heˆ laˇ. Ya‸ hkʼaˇ, nawˬ hui awˬ hkʼaw lo teˇ gʼaˇ lehˬ, neˇhaiˬ hpeh‸ ve yoˬ teh‸, yawˇ hui hta‸ kʼoˆ piˇ ve yoˬ. 71Yawˇ chi hkʼe kʼoˆ ve lehˬ, Siˉmonˍ Iˉsaˍkaˍriˍoˆ ve yaˇ Yuˇda‸ hta‸ kʼoˆ gaˇ ve yoˬ. Awˬ lawn kʼo, yawˇ lehˬ tcuh yaˇ teˇ chi nyiˇ gʼaˇ awˬ hkʼaw lo chehˇ leh, Yeˍsuˆ hta‸ chiˇ a‸ piˇ tuˬ ve teˇ gʼaˇ hpeh‸ ve yoˬ.

ప్రస్తుతం ఎంపిక చేయబడింది:

Yoˇhanˬ li‸ 6: LHBE

హైలైట్

షేర్ చేయి

కాపీ