Awˬ hkuiˉ puiˍ ve li‸ 8
8
Iˉ kaˆ fiˍ kʼai ve
1Gʼuiˬsha lehˬ, Noˉa‸ leh yawˇ geh teˇ geh haw lo‸ kʼoˍ hkʼaw chehˇ taˍ ve to nuˇ to shaˆ hkʼa peu-eˬ hta‸ dawˇ nawˇ chehˇ ve yoˬ. Chi hta‸ pa taw, Gʼuiˬsha lehˬ miˬguiˬ hkʼoˆ lo mvuhˇ haw meuˆ laˬ tcuh leh, iˉ kaˆ teˇ hpaˍ yaw kʼai sheˬ ve yoˬ. 2Naˉ jaˇ kuiˬ lo tawˆ la chehˇ ve iˉ kaˆ teˇ hpaˍ fiˍ kʼai ve yoˬ. Mvuhˇ naw ma ve yehˬ miˉ hoˆ sheˬ leh mvuhˇ yeˬ maˇ kʼaw‸ laˬ-o. 3Iˉ kaˆ teˇ hpaˍ 150 nyi hkʼa gaˬ yaw kʼai sheˬ ve yoˬ. 4Ha pa suhˍ maˬ teˇ maˬ, teˇ chi suhˍ nyi gaˬ ve teˇ yanˇ, haw lo‸ kʼoˍ lonˉ lehˬ Aˍraˍraˆ hkʼaw pui awˬ hkʼoˆ lo teh sheˬ ve yoˬ. 5Iˉ kaˆ shaˬ te shaˬ yaw kʼai leh ha pa teˇ chi maˬ teˇ maˬ awˉ lawˉ teˇ nyi htaˇ, hkʼaw uˉ tzuh teˇ hpaˍ tawˆ la ve yoˬ.
6Awˬ hkʼaw‸ nawˉ 40 nyi gaˬ htaˇ, Noˉa‸ lehˬ yehˬ miˉ ehˉ hta‸ hpaw leh, aˉ naˆ kʼaˍ teˇ hkeh hta‸ hpehˇ peu ve yoˬ. 7Ya‸ hkʼaˇ, aˉ naˆ kʼaˍ oˇ ve lehˬ miˬguiˬ hkʼoˆ iˉ kaˆ fiˍ kʼai peuˬ htaˇ hkʼa gaˬ poˬ toˇ chehˇ ve yoˬ. 8Oˇ htaˇ, Noˉa‸ lehˬ iˉ kaˆ hkʼaˬ ma kʼaw‸ yaw kʼai peuˬ ve hta‸ gʼa shiˍ tuˬ, aˉ pui kʼaˍ teˇ hkeh hta‸ kʼaw‸ hpehˇ peu nyi ve yoˬ. 9Ya‸ hkʼaˇ, miˬguiˬ hkʼoˆ lo iˉ kaˆ hoˆ beh taˍ sheˬ leh jehˇ kuiˬ ca maˇ mawˬ ve pa taw, aˉ pui kʼaˍ chi Noˉa‸ geh kʼaw‸ poˬ kʼaw‸ la ve yoˬ. Hkʼe te leh Noˉa‸ la‸ sheh che leh aˉ pui kʼaˍ oˇ ve hta‸ kʼaw‸ yuˬ keu piˇ ve yoˬ. 10Awˬ hkʼaw‸ nawˉ suhˍ nyi hkʼa gaˬ yawˇ kʼaw‸ law nyi peuˬ leh, aˉ pui kʼaˍ hta‸ teˇ pawˆ kʼaw‸ hpehˇ peu nyi ve yoˬ. 11Mvuhˇ hpeu‸ la hpawˇ gaˬ leh aˉ pui kʼaˍ chi yawˇ ve meuˇ cu hkʼaw shaˍ lonˍ hpa‸ teˇ hpa‸ htawˆ chiˇ veu laˇ leh yawˇ geh lo kʼaw‸ poˬ kʼaw‸ la ve yoˬ. Chi teˇ pawˆ Noˉa‸ lehˬ iˉ kaˆ hkʼa cawˇ cawˇ yaw kʼai peuˬ ve hta‸ gʼa shiˍ ve yoˬ. 12Awˬ hkʼaw‸ nawˉ suhˍ nyi hkʼa gaˬ teˇ pawˆ kʼaw‸ law nyi peuˬ leh, aˉ pui kʼaˍ hta‸ teˇ pawˆ kʼaw‸ hpehˇ peu nyi ve yoˬ. Chi teˇ pawˆ aˉ pui kʼaˍ lehˬ yawˇ geh maˇ kʼaw‸ la-o.
13Noˉa‸ yawˇ ve a sha‸ 601 hkʼaw‸ biˇ ve awˉ lawˉ peuˇ ve teˇ ha pa, awˬ hkuiˉ puiˍ teˇ nyi htaˇ, miˬguiˬ chi lehˬ goˇ lehˍ kʼaw‸ hpeh‸ la ve yoˬ. Oˇ htaˇ Noˉa‸ lehˬ, haw lo‸ kʼoˍ beh taˍ ve hta‸ hpaˆ baˬ leh nyi peu ve teˇ yanˇ, miˬguiˬ chi lehˬ goˇ lehˍ hpeh‸ chehˇ taˍ ve hta‸ gʼa mawˬ ve yoˬ. 14Ha pa nyiˇ maˬ teˇ maˬ, 27 nyi gaˬ ve teˇ yanˇ, miˬguiˬ chi hkʼa peu-eˬ goˇ lehˍ hpeh‸ sheˬ ve yoˬ.
15Oˇ htaˇ, Gʼuiˬsha Noˉa‸ hta‸ chi hkʼe kʼoˆ piˇ ve yoˬ. 16Nawˬ leh nawˬ ve awˬ miˇ ma, nawˬ yaˇ paˍ leh nawˬ hkuiˇ ma teˇ hpaˍ haw lo‸ kʼoˍ hkʼaw tawˆ la-o. 17Nawˬ geh hkʼa chehˇ taˍ ve to nuˇ to shaˆ leh ngaˆ teˇ hpaˍ miˬguiˬ hkʼoˆ lo kʼaw‸ maˇ la biˇ la piˇ tuˬ yuˬ tawˆ piˇ-oˆ, teh‸ Noˉa‸ hta‸ kʼoˆ piˇ ve yoˬ. 18Hkʼe te leh Noˉa‸ awˬ to, yawˇ ve awˬ yaˇ teˇ hpaˍ, yawˇ ve awˬ miˇ ma leh yawˇ ve awˬ hkuiˇ ma teˇ hpaˍ haw lo‸ kʼoˍ hkʼaw tawˆ la ve yoˬ. 19To nuˇ to shaˆ hkʼa peu-eˬ leh ngaˆ hkʼa peu-eˬ haw lo‸ kʼoˍ hkʼaw tawˆ la ve yoˬ.
Noˉa‸ tuˉ tanˇ piˇ ve
20Oˇ htaˇ Noˉa‸ lehˬ, Gʼuiˬsha hta‸ tuˉ tanˇ kuiˬ teˇ maˬ te leh, da‸ kehˬ ve to nuˇ to shaˆ teˇ hpaˍ leh ngaˆ teˇ hpaˍ hta‸ yuˬ leh Gʼuiˬsha hta‸ tuˉ tanˇ piˇ ve yoˬ. 21Gʼuiˬsha lehˬ tuˉ tanˇ tuˬ oˇ ve hta‸ nyi ma cawˇ leh chi hkʼe kʼoˆ ve yoˬ. Chaw yaˇ teˇ hpaˍ te ve haiˬ ve kanˉ hta‸ pa taw, miˬguiˬ hta‸ ngaˬ teˇ pawˆ ka‸ maˇ kʼaw‸ hkeu piˇ-o. Chaw yaˇ teˇ hpaˍ lehˬ, yaˇ nehˬ htaˇ ka‸ tanˬ leh yawˇ hui ve dawˇ hkʼaˇ teˇ hpaˍ cha‸ chiˆ jaˇ ve hta‸ ngaˬ shiˍ taˍ ve yoˬ. Chi beu‸ ngaˬ te peuˬ ve hkʼe, a sha‸ te‸ chehˇ ve awˬ ceuˬ chi teˇ hpaˍ hta‸ ngaˬ teˇ pawˆ ka‸ kʼaw‸ te luˬ piˇ tuˬ ve maˇ heˆ. 22Miˬguiˬ chi ve cawˬ taˍ sheˬ ve ceh ceh, caˬ ti ve awˬ yanˇ leh caˬ gʼeu‸ ve awˬ yanˇ, kaˆ ve awˬ yanˇ leh haw ve awˬ yanˇ, mvuhˇ goˇ ve awˬ yanˇ leh mvuhˇ yeˬ ve awˬ yanˇ, mvuhˇ law‸ kʼaw ve awˬ yanˇ leh mvuhˇ hpeu‸ ve awˬ yanˇ chi teˇ hpaˍ cawˬ taˍ tuˬ sheˬ ve yoˬ, teh‸ kʼoˆ ve yoˬ.
ప్రస్తుతం ఎంపిక చేయబడింది:
Awˬ hkuiˉ puiˍ ve li‸ 8: LHBE
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Lahu Bible Edited © Thailand Bible Society and Bible Society of Myanmar, 2010, 2020.
