Jâŋ 7

Mwin yàáb Yésùù bɨ ŋgə́ ə́ə̀mwá

1Cùr kɨ́ no, Yésù ɨ́ yà yə̀ŋhánɨ ɗɔ̀ɔ́b Gàlìléè. Ŋgə́ yi nɨ́ ɗúwa gìnɨ ɗɔ̀ɔ́b Jùdéè, ɓetí kɨ̀jííb Jwîf bɨ yaá mánɨ ŋgə́ kwíìnɨ. 2Jùrúb Jwîf ɓoò kùb ɓé jùrúb Tàbèèrnâkɨ̀lə̀ rɨ yi ŋgóobtɨ́. 3Á mwin yàáb Yésùù tana ŋgə́ ɨnè: «Gɨɓwéecéem ɗɔ̀ɔ́b Jùdéè, ɓwâ kɨ́ nɨ̀fuùb woò a pə́ɓwêcê nɨ́ɨ́b wu du ndɨ̀ŋnɨ rè. 4Nò du ɗúnɨ kùb ɗə̀ŋhɨ̀ níì nɨ yòònɨ nɨ́ɨ́b ŋgə́ du ndɨ̀ŋniì yohîn ɗàà. Nɨ́ɨ́b wu du ndɨ̀ŋtèènɨ rè, ndɨŋɓam laŋtɨ̧ɨ̧́ àm nùb lâs a pêé.» 5Dugɨ nɨ́ mwin yàáb noò nɨ̀miib yi bɨ́ ŋgə́ ə́ə̀mnɨ ɗàà. 6Yésù ɨ́ tànà ŋgáb: «Kɨ́ moò, ɓwâ mɨ gɨré nɨ ɗóòyèwá, kɨ́ nyínè ɓwâ lâs nɨ ɓwâ gùrí á. 7Sàmàìn nùb ɗɔ̀bɨ́nné ɓəndɨ nyínè nɨ ɗàà, ɨ́dù kɨ́ moò ŋgáb á mɨ ɓə̀ndɨ̀nɨ ɓetí mɨ á mɨ wáàsénɨ nɨ́ɨ́b ɓáŋhɨ́b ŋgáb du ndɨ̀ŋniì ɗàá. 8Gɨ̀náɓà nɨ! Kɨ́ moò, mɨ mɨ gìnɨ gwɨ̀ì jùrúb kíì ɗàà, ɓetí ɓwâ mo mɨ gɨ kwe nɨ ɗóòyèwá.» 9Ŋgə́ nyìnnànɨ ŋgáb u̧, ŋgə́ ɨ́ mè nɨ́ nɨ́m nóò Gàlìlê ku.

Yésù gɨgií gwɨ̀ì jùrúb tàbèèrnâkɨ̀lə̀

10Cùr mwin yàáb Yésùù yi gɨ gwɨ̀ì jùrúbí, ŋgə́ ɨ́ gɨ̀tèsògì cùrì yoó yoó. 11Kùb á cè jùrúbí á kɨ̀jííb Jwîf bɨ yaré mánɨ Yésù ŋgáb a fɔ́teece ɨnè: «Ŋgə́ á nɨ́ ŋga?» 12Yɨ́ nɨ̀vɨ́tɨ̀b ɓáaré, kùb a yà nyìnnɨ àm noò. Nùb kù yaá tànɨ: «Ŋgə́ nò nyɔ̧ɔ̧́ á», nùb kù a tace: «Ŋgə́ nò ɓáŋhîn á, ŋgə́ á nɨ kùb mbáàŋnɨ.» 13Ɨ́dù nò yi fɨ́tɨ wáàhó̧ɓànɨ àm kɨ́ mɨ̀kùnɨ́nné yi nɨ́ ɗàà, ɓetí kùb yaá lùnɨ vùù kɨ̀jííb Jwîf bɨ.

14Jùrúb yi féínndécií tə̧ə̧́, Yésù ɨ́ gì Dúú Jíri Mèèín no, ŋgə́ ɨ́ yàrê tɔ̀ɔ́. 15Jwîf bɨ yaá gbɨ̀ɨ̀ŋɓànɨ tɔ̀ɔ́ nó kɨ́ cei ŋgáb a tace ɨnè: «I̧ á ŋgə́ ɗəəŋɓa nɨ́ nɨ́ɨ́b du káàtà Mèèín noò ɨnè? Ŋgə́ ma yi nɨ́ tá tɔ̀hí kù ɓusiín dùréwa ye!»

16Á Yésù tana ŋgáb ɨnè: «Tɔ̀ɔ́ mɨ du nàniì nɨ kɨ̀cáb mɨ nɨ̀mɨrí sé, du nɨ nɨ́m Mèín, nò yi tómwo mé yi ta mɨ gò ndɨ̀ŋniì á. 17Nò du kə́sə́k ndɨ̀ŋnɨ nɨ́m Mèín ɗúré rɨ, tɔ̀ɔ́ mɨ du nànɨ rè, Mèín yè ɨ́ ta mɨ gò nànɨ ru kè, yè kɨ̀cáàb mɨ nɨ̀mɨrí á kè, nò kɨ́ ɓa ɗə̀ə̀ŋnɨ á. 18Nò du nyìnnɨ ɓe nyòm ŋgə́ nɨ̀mɨrí máɓanɨ dɨmɨɨr ŋgə́ nɨ̀mɨrí á. Ɨ́dù nò du mánɨ dɨmɨɨr nò ya tómwo ŋgéé á nɨ tànɨ àmɨɨr, àm kàŋnì cè nɨ́ no ɓɔ̧ɔ̧ ɗàà. 19Mòyîs ya nahaá nyí ɓíhɨ̀b ye! Ɨ́dù, mvókín nyínè no, nò jəŋ ɓíhɨ̀b kíì nɨ ɗàà. Nyí máce nɨ́ mɨ kwíìnɨ àm níì?» 20Nɨ̀vɨ́tɨ̀b ɨ́ tànà ŋgə́ ɨnè: «Ɨna nɨ̀wàtɨ̀b kù ɨ́ du nɨ́ wu jábɨ̀nɨ à! Na ɨ́ ɗú nɨ́ wu kwíìnɨ?»

21Yésù ɨ́ tànà ŋgáb: «Mɨ ndɨŋɗóotɨ́ nɨ́m mwi̧, nyí ɨ́ gbɨ̀ɨ̀ŋɓà. 22Àm Mòyîs yi ta nyí lə́nà munɨ́b nyínè ndɨ̀ɨ́, nyí á lə́nànɨ nɨ̀vɨ́tè ndɨ̀ dùgɨ̀ ye Sàbáà. (Ɓàcéyè ɓíì kɨ́ ya nɨ́ Mòyîs ya yàwá, yi ya nɨ tákɨ̀rɨ́bí á). 23Nyí lə́na nɨ̀vɨ́tè ndɨ̀ ye Sàbáà àm vúm tɨ̀ ɓei ɓíì Mòyíìs á, nyí ma óknace nɨ́ mɨ njù̧ àm mɨ tɨ ɓáte nɨ̀vɨ́tè mwi̧ bɨ̂ŋ ye Sàbáà àm níì? 24Nyí nɨ ŋgwìn íhé téin, ténnáɓàhá àm ɗɨ́ɗɨ̧́ ɓe àmɨɨr cúk.»

Nɨ̀vɨ́tɨ̀b bɨ ɗə̀ə̀ŋwá ɓè Yésù du Mèsíì

25Nùb Yèrúsàlèèm kù yaá tànɨ ɨnè: «Nɨ̀ŋgwá kùb du mánɨ kwíìnɨ rè nɨ rè sé à? 26Ŋgə́ á nɨ nyìnnɨ mɨ̀kùnín, kùb cè bɨ́ ŋgə́ nɨ́m kù ndɨ̀ŋwá. Kèè mvènnɨ́b nɨ́mè ɗəəŋmeɓatɨ́ bɨ́ ɨnayâna ŋgə́ nɨ Mèsî á? 27Kɨ́ nɨ̀ŋgwá rèè, nɨ́m ɗəəŋtɨ́ nɨ́ yɨ́ ŋgə́ éíworé, ɨ́dù Mèsî, ɓwâ ŋgə́ kwá féínndé, yɨ́ ŋgə́ éíworé nò kù kwá nɨ ɗə̀ŋhɨ̀r.»

28Yésù yaá tɔ̀hí Dúú Jíri Mèèín no, á ŋgə́ taɓa kúu còóm ɨnè: «Nyí taá vúm ɗəəŋtɨ́ mɨ, vúm ɗəəŋceé yɨ́ mɨ éíworé na á à? Nɨ mɨ nɨ̀mɨr sé ɨ́ goɓa, nò tómwo mé á ku, á sàmàìn kùb səŋ gíí ɓe ŋgéé. Nyí cè nɨ́ ŋgə́ ɗə̀ə̀ŋwá. 29Kɨ́ moò mɨ ɗəəŋ mɨ ŋgə́ àm mɨ éíwo mɨ́ yɨ́ ŋgéé rè á, ŋgə́ ɨ́ tómwoce mɨ ru.» 30Nùb kù mɨ̀kwìn kɨ́ no ɨ́ mâ ŋgə́ bìnɨ, ɨ́dù nò kù ɨ́ dù nɨ́ ŋgə́ ŋgáár ya hèìwúwa, ɓetí ɓwâ ŋgéé yi nɨ́ ɗóòyèwá. 31Mɨ̀kwìn kɨ́ no, nùb kù ví̧i̧ ɨ́ ə́mnè bɨ́ ŋgə́, ŋgáb ɨ́ yà tànɨ ɨnè: «Kɨ́ rè ɓwâ Mèsî kwá goré, ŋgə́ kwá túmnɨ lìím a ndôŋ nɨ̀ŋgwá rè à?»

Fàrísààb tómtɨ́ sójààb gɨ̀ bìnɨ Yésù

32Nɨ́ɨ́b kùb yi nyi̧i̧teekom mɨ̀kùnɨ́nné ɨ́ gì lénɨ Fàrísàbì tó̧ó̧. Mvènnɨ́b nùb na satɨgàà ɓe Fàrísààb ɨ́ tôm sójààb gɨ̀ bìnɨ Yésù. 33Yésù ɨ́ tànà ŋgáb ɨnè: «Mɨ á dùkwàyènɨ ɓe nyí mvókín ti ŋgób, mɨ a gɨ̀cù mɨ́ yɨ́ nò yi tómwo mé. 34Nyí ɓa mɨ mánɨ á, nyí a dù nɨ́ mɨ kwà, ɓetí yɨ́ mɨ ɓa gìnɨ kɨ́ sàmàìn nyí féín kwe ɗàà.» 35Á Jwîf bɨ ta: «Yɨ́ ŋgə́ ɓa gìnɨ nɨ́m a dù nɨ́ ŋgə́ kwà kɨ́ mayè nɨ ŋga? Ŋgə́ ɓa nɨ éíkɨ́nɨ nɨ́mè ti̧í̧, gìnɨ tɔ̀ɔ̀nɨ nùb du bɨ́ Jwîf séé du bɨ́ ti̧í̧ hò̧ ɗàwáá kèè! 36Ŋgə́ taá hò̧ ɨnayâna nɨ́m ɓa ní mánɨ á, nɨ́m a dù nɨ́ ní kwà, yɨ́ ní du gìniì sàmàìn nɨ́m féín kwe ɗàà na, kí ma tace i̧ á?»

Mvúm du nànɨ mè mɨ̀cɨ̧̀ɨ̧́

37Ye cáŋhɨ̀rí jùrúb Tàbèèrnâkɨ̀lə̀ yi ɨ́ duɓagɨ ye jíri ru. Ye kɨ́ á Yésù yi éíwú mɨ̀kùnín ŋgə́ ɨ́ tà kúu còóm ɨnè: «Nò síì mvúmí du ndɨ̀ŋniì, nò kɨ́ gàìnwò mɨ, ŋgə́ a mèì mvúm. 38Káàtà Mèèín á tànɨ ɨnè: ‹Nò ə́mne mé, ŋgóndúm mvúm du nànɨ mèè ɓa kə̀nnɨ no sumí á.› » 39Yésù yi nyin nyindí rè ɓe ɨ́r Nyéhè Sarîn nùb ə́mne ŋgéé yi ɓa gàmniì á. Mvókín kɨ́ no, nùb kɨ́ yi bɨ́ nyéhè kɨ́ gàmyèwá ɓetí Mèín ya nɨ́ Yésù mgbíí nàyèwá.

Gɔ̀ léé mvókín nɨ̀vɨ́tɨ̀bì ɓe ɨ́r Yésùù

40Mɨ̀kwìn kɨ́ no, nùb yi ók nɨ́m Yésù yi nyinndé ɨ́ tà: «Nɨ̀ŋgwá rè dumeɓa tɨ́kìn Mèèín kùb yi móŋkom ndè á!» 41Nùb kù ɨ́ tà: «Mèsî á nɨ ru!» Ɨ́dù nùb kù ɨ́ tà ɨnè: «Á sàmàìn Mèsî duɓacéye nò Gàlìléè yá? 42Káàtà Mèèín wáaɓatɨ́ nɨ́ ɨnayâna Mèsî kwá du nɨ nyȩ Dàvíìt, ŋgə́ kwá duce nɨ́ nò Bétɨ̀lèhéèm kwɨ́í Dàvît ya dukom nóò.» 43Á gɔ̀ lə́ mvókín nɨ̀vɨ́tɨ̀bì ɓe ɨ́r Yésùù. 44Nùb kù ɨ́ ɗû ŋgə́ bìnɨ ɨ́dù nò kù ɨ́ dù nɨ́ ŋgə́ ŋgáár só hèìwúwa.

Kɨ̀jííb Jwîf bɨ mvúú ə́ə̀mnɨ Yésù

45Sójààb ɨ́ cùwò yɨ́ mvènnɨ́b nùb na satɨgàà ɓe Fàrísàbì, nùb kɨ́ ɨ́ fɔ̂ ŋgáb ɨnè: «Àm níì á nyí du Yésù bɨ̀wòwá?» 46Sójààb ɨ́ pìhè, ŋgáb ɨ́ tà: «Nɨ́m nɨ̀ŋgwá kɨ́ nyin kwe, nò kù nɨ u̧ nyìnkɨ́yèwá!» 47Á Fàrísààb fɔ́ sójààb ɨnè: «Nyí mbɨ́ktɨ́ nɨ́ ŋgə́ mbáàŋɓwê nyí hàye? 48Mvókín mvènnɨ́b nɨ́mè, dùgɨ̀ Fàrísààb, nɨ̀mwi̧ ɓà lɨ ə́əmcéyeé ŋgə́ ye mwi̧ à? 49Sé nùb du bɨ́ ɓíì Mòyíìs ɗə̀ə̀ŋwá ɗàrɨ́, ŋgáb á bɨ káá só!»

50Nìkòdêm yi gɨ yɨ́ Yésùù rɨ yaá ɓè, ŋgə́ yɨɨ́mɓwê Fàrísà á. Ŋgə́ ɨ́ tànà nùb noò ɨnè: 51«Ɓíì nɨ́mè á tànɨ nɨ ɗúwa kùb téín nò kù àm ŋgwéé u̧ kùb àm no ɓɔ̧ne ókwa, kùb cè nɨ́m ŋgə́ ndɨŋndé ɗə̀ə̀ŋwá.» 52Á ŋgáb tana ŋgə́ ɨnè: «Wu ɓa wu dùɓwênɨ nò Gàlìléè kèè! Mányaaŋɓaye mîn káàtà Mèèín no, wu ɓa ɗə̀ə̀ŋnɨ ɓè tɨ́kìn Mèèín du sàmàìn du nò Gàlìléè ɗàà á.»

Nɨ̀gwi ya səm màŋnì

[ 53Nyindí kɨ́ ya á ŋgáb sihe, nò lâs ɨ́ gɨ̀tèècù no yó.

ప్రస్తుతం ఎంపిక చేయబడింది:

Jâŋ 7: NTV

హైలైట్

షేర్ చేయి

కాపీ