San Mateo 24
24
Cataj Jesús se vaa cane̱e̱ nu̱ꞌ nuvií noco̱o ya̱nj chumanꞌ Jerusalén a
1Ga̱a ne̱ curiha̱nj Jesús rej ya̱nj nuvií noco̱o, caꞌanj soꞌ, ne̱ cuchiꞌ nij síí tucuꞌyón snana̱ soꞌ rihaan soꞌ a. Guun rá nij soꞌ queneꞌe̱n Jesús da̱j vaa nij veꞌ ma̱n rej ya̱nj nuvií noco̱o yoꞌ a. 2Ga̱a ne̱ cataj Jesús rihaan nij soꞌ a:
―Dan me se neꞌen soj nu̱ꞌ veꞌ ma̱n rej ya̱nj nuvií noco̱o nihánj naꞌ. Ya̱ ya̱ cata̱j xnaꞌanj ꞌu̱nj rihaan soj cuano̱ se vaa vaa güii, ne̱ cane̱e̱ nu̱ꞌ yoꞌ, ne̱ a̱ ꞌó yuvej se̱ quitáá xráá tuviꞌ yuvej nihánj a̱ maꞌ ―taj Jesús a.
Caꞌmii Jesús cheꞌé sayuun gu̱un rihaan chumii̱ vaa güii a
3Dan me se caꞌanj ca̱yáán Jesús raa̱ tacaan cuꞌna̱j Tacaan ma̱n Chruun Olivó, ne̱ cuchiꞌ o̱rúnꞌ nij síí tucuꞌyón snana̱ soꞌ rihaan soꞌ, ne̱ cataj nij soꞌ a:
―Cata̱j xnaꞌanj so̱ꞌ rihaan núj aman cane̱e̱ nu̱ꞌ nuvií noco̱o yoꞌ do̱ꞌ, a̱ me suun noco̱o caꞌna̱ꞌ qui̱ꞌyáá so̱ꞌ asa̱ꞌ quisíj caꞌna̱ꞌ so̱ꞌ queneꞌe̱n núj ne̱ navi̱j nu̱ꞌ chumii̱ nihánj do̱ꞌ, ga̱a maestro̱ꞌ ―taj nij soꞌ, xnáꞌanj nij soꞌ man Jesús a.
4Ga̱a ne̱ cataj Jesús a:
―Tu̱mé ndoꞌo soj man soj se̱ gaa na̱nj tiha̱ꞌ yuꞌunj yuvii̱ man soj á. 5ꞌO̱ se caꞌna̱ꞌ uxrá yuvii̱ cata̱j a: “ꞌU̱nj me Síí Caꞌnéé Yaꞌanj Ti̱nanii man Yuvii̱ rihaan Sayuun”, cata̱j nij soꞌ, ne̱ dan me se tiha̱ꞌ yuꞌunj uxrá nij soꞌ man tuviꞌ nij soꞌ na̱nj á.
6’Dan me se vaa güii, ne̱ queneꞌe̱n soj se vaa cunu̱ꞌ uxrá chumanꞌ ga̱ tuviꞌ chumanꞌ a. Ne̱ cuno̱ uxrá soj nana̱ se vaa unuꞌ chumanꞌ ma̱n ga̱nꞌ ga̱ tuviꞌ chumanꞌ yoꞌ a. Tu̱mé soj man soj se̱ cuchuꞌviꞌ nimán soj maꞌ. Ma̱an se vaa cheꞌé gu̱un sayuun yoꞌ rihaan chumii̱ nihánj ado̱nj. Tza̱j ne̱ asa̱ꞌ quisíj guun da̱nj, ga̱a ne̱ se̱ caꞌanj niꞌya̱ chumii̱ nihánj nu̱ꞌ orá maꞌ. ꞌO̱ se quina̱j chumii̱ nihánj doj ado̱nj. 7Dan me se cunu̱ꞌ uxrá ꞌo̱ chumanꞌ noco̱o ga̱ ꞌó chumanꞌ noco̱o, ne̱ cunu̱ꞌ ꞌo̱ gobiernó ga̱ ꞌó gobiernó a. Ne̱ cache̱n xꞌnaa cache̱n yuún noco̱o cache̱n queꞌe̱e̱ chumanꞌ a. 8Nu̱ꞌ sayuun nihánj roꞌ, ase vaa guun cheꞌe̱ ꞌo̱ chana̱ veꞌee̱ rque noꞌ cuchru̱j noꞌ neꞌej roꞌ, da̱nj ga̱a̱ nu̱ꞌ sayuun nihánj na̱nj ado̱nj.
9’Ga̱a ne̱ caꞌa̱nj ni̱caj yuvii̱ man taꞌa̱j soj rihaan nij síí nica̱j suun, ne̱ quira̱nꞌ taꞌa̱j soj sayuun ne̱ cavi̱ꞌ taꞌa̱j soj na̱nj á. Ne̱ nachri̱ꞌ cunuda̱nj nij xꞌneꞌ nij yuvii̱ aꞌmii ꞌo̱ ꞌo̱ xnaꞌánj ni̱ꞌyaj nij soꞌ man soj, cheꞌé se me soj síí noco̱ꞌ manj ado̱nj. 10Ga̱a ne̱ ta̱náj queꞌe̱e̱ tinúú soj chrej sa̱ꞌ, ne̱ ta̱cuachén tinúú soj síí tanáj chrej sa̱ꞌ man ꞌó tinúú soj rihaan síí nica̱j suun, ne̱ nachri̱ꞌ uún tinúú soj síí tanáj chrej sa̱ꞌ man taꞌa̱j soj si̱j noco̱ꞌ manj na̱nj á. 11Ga̱a ne̱ caꞌna̱ꞌ uxrá síí nata̱ꞌ rihaan yuvii̱ se vaa si̱j nataꞌ snana̱ Yaꞌanj me nij soꞌ, cata̱j nij soꞌ, tza̱j ne̱ caꞌmi̱i̱ ne̱ u̱u̱n nij soꞌ, ne̱ tiha̱ꞌ yuꞌunj uxrá nij soꞌ man yuvii̱ ado̱nj. 12Ga̱a ne̱ xnaꞌa̱nj ndoꞌo se chiꞌi̱i̱ quiꞌya̱j yuvii̱, ne̱ caꞌne̱ꞌ rá nij yuvii̱ ga̱ suun noco̱ꞌ snana̱ Yaꞌanj, ne̱ cheꞌé dan ta̱náj uxrá nij síí noco̱ꞌ manj chrej sa̱ꞌ chrej ꞌe̱e̱ rá man tuviꞌ a. 13Tza̱j ne̱ síí noco̱ꞌ xraan manj nda̱a se cavi̱ꞌ soꞌ roꞌ, soꞌ me síí nani̱i̱ rihaan sayuun nu̱ꞌ cavii nu̱ꞌ caꞌanj ado̱nj. 14Ne̱ caꞌmi̱i̱ natáj yuvii̱ nana̱ sa̱ꞌ nihánj nana̱ cheꞌé da̱j vaa uun chij Yaꞌanj cuno̱ yuvii̱ ma̱n nu̱ꞌ chumii̱, ne̱ xca̱j cunuda̱nj nij xꞌneꞌ nij yuvii̱ ino̱ vaa stucua̱nj cuentá cheꞌé nana̱ sa̱ꞌ a. Síj ga̱a ne̱ caꞌve̱e navi̱j chumii̱ nihánj na̱nj ado̱nj ―taj Jesús rihaan nij síí tucuꞌyón snana̱ soꞌ a.
15Ne̱ soj si̱j naya̱a̱ nana̱ nihánj nana̱ cachro̱nj rihaan yanj nihánj roꞌ, xca̱j uxrá soj cuentá me taj nana̱ nihánj nana̱ caꞌmii Jesús cheꞌé se chiꞌi̱i̱ á.
Dan me se cataj uún Jesús a:
―A̱j neꞌen soj se vaa cataj xnaꞌanj síí cuꞌna̱j Daniel síí nataꞌ snana̱ Yaꞌanj ga̱a naá cheꞌé ꞌo̱ se chiꞌi̱i̱ quiꞌya̱j ndoꞌo sayuun man yuvii̱, ne̱ dan me se güii queneꞌe̱n soj se chiꞌi̱i̱ yoꞌ rej gue̱e̱ vaa rque nuvií noco̱o, 16ne̱ ꞌo̱ cuna̱nj nij síí ma̱n estadó Judea caꞌa̱nj nij soꞌ raa̱ quij á. 17Ne̱ síí ta̱j xráá veꞌ tucuá roꞌ, se̱ catúj soꞌ rá veꞌ tucuá soꞌ quiri̱i̱ soꞌ siꞌyaj soꞌ maꞌ. 18Ne̱ síí ꞌyaj suun tacaan roꞌ, se̱ canica̱j soꞌ ta̱ꞌaa soꞌ saga̱nꞌ soꞌ maꞌ. Ma̱an se cuaj cuna̱nj nij soꞌ na̱nj á. 19Nique̱ chana̱ nu̱u̱ rque do̱ꞌ, chana̱ vaa taꞌníí neꞌej utzii do̱ꞌ, güii caꞌna̱ꞌ sayuun yoꞌ a. ꞌO̱ se sayu̱u̱n ga̱a̱ cuna̱nj chana̱ yoꞌ ado̱nj. 20Cachi̱nj niꞌya̱j soj rihaan Yaꞌanj se vaa se̱ caꞌnaꞌ sayuun yoꞌ tiempó acoj ndoꞌo do̱ꞌ, güii no̱ xcúún yuvii̱ nara̱a̱n rá yuvii̱ do̱ꞌ maꞌ. 21ꞌO̱ se güii caꞌna̱ꞌ sayuun roꞌ, qui̱j ndoꞌo gu̱un na̱nj á. Qui̱j doj ga̱a̱ sayuun yoꞌ rihaan nu̱ꞌ nij sayuun quiranꞌ yuvii̱ nu̱ꞌ caꞌnaꞌ, ne̱ daj chiha̱a̱ míj se̱ quiranꞌ uún yuvii̱ sayuun vaa da̱nj maꞌ. 22Sese queꞌe̱e̱ uxrá güii gu̱un sayuun, ne̱ se̱ nanii yuvii̱ rihaan sayuun yoꞌ maꞌ. Tza̱j ne̱ vaa güii quisi̱j sayuun, quiꞌya̱j Yaꞌanj, cheꞌé rej nani̱i̱ nij síí narii soꞌ canoco̱ꞌ man soꞌ ado̱nj.
23’Ne̱ güii yoꞌ me se sese cata̱j yuvii̱ rihaan soj a: “Ni̱ꞌyaj so̱ꞌ á. Nihánj nicunꞌ Síí Caꞌnéé Yaꞌanj Ti̱nanii man Yuvii̱ rihaan Sayuun ado̱nj”, ase cata̱j yuvii̱ a: “Rej yoꞌ nicunꞌ soꞌ ado̱nj”, ne̱ se̱ cuchumán rá soj maꞌ. 24ꞌO̱ se caꞌna̱ꞌ uxrá síí ne̱ síí cata̱j se vaa Síí Caꞌnéé Yaꞌanj Ti̱nanii man Yuvii̱ rihaan Sayuun me nij soꞌ, ne̱ caꞌna̱ꞌ uxrá síí ne̱ síí cata̱j se vaa nataꞌ nij soꞌ snana̱ Yaꞌanj, ne̱ quiꞌya̱j nij soꞌ da̱j a̱ suun noco̱o, ne̱ tiha̱ꞌ yuꞌunj nij soꞌ man cunuda̱nj nij yuvii̱ ma̱n rihaan chumii̱ na̱nj ado̱nj. Nda̱a nij síí narii Yaꞌanj man roꞌ, sese taj va̱j Yaꞌanj tu̱mé man nij soꞌ, ne̱ cuchuma̱n rá nij soꞌ ni̱ꞌyaj nij soꞌ man nij síí tihaꞌ yuꞌunj yoꞌ na̱nj ado̱nj. 25Nihánj me se cataj xnaꞌanj ꞌu̱nj rihaan soj da̱j gu̱un rihaan chumii̱ nihánj na̱nj á. 26Cheꞌé dan me sese cata̱j yuvii̱ rihaan soj se vaa va̱j ꞌu̱nj rej tacaan naco̱o̱, ne̱ se̱ caꞌanj soj rej tacaan naco̱o̱ nano̱ꞌ soj manj maꞌ. Ne̱ sese cata̱j yuvii̱ rihaan soj se vaa yáán ꞌu̱nj rá ꞌo̱ veꞌ, ne̱ se̱ cuchumán rá soj maꞌ. 27Dan me se nda̱a rá se uun ga̱a raa̱n rej síj güii ne̱ ꞌo̱ chuguu̱n nu̱ꞌ xta̱ꞌ nda̱a rej ataꞌ güii roꞌ, ne̱ neꞌen cunuda̱nj yuvii̱ se vaa raa̱n rihaan chumii̱ a. Ne̱ ase uun rá soj neꞌen soj ga̱a raa̱n roꞌ, da̱nj gu̱un rá soj asa̱ꞌ caꞌnáꞌ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ ado̱nj. 28A̱j neꞌen soj da̱j ꞌyaj yachrúú va̱j rej xta̱ꞌ, ne̱ neꞌen maꞌa̱n xoꞌ me rej na̱j nee̱ cha̱ xoꞌ a. Ne̱ ase uun rá yachrúú roꞌ, da̱nj gu̱un rá maꞌa̱n soj asa̱ꞌ caꞌnaꞌ uún ꞌu̱nj rihaan chumii̱ nihánj ado̱nj. Queneꞌe̱n maꞌa̱n soj si̱j ma̱n rihaan chumii̱ nihánj me rej caꞌna̱ꞌ ꞌu̱nj ado̱nj.
Da̱j ga̱a̱ caꞌna̱ꞌ uún Jesús rihaan chumii̱ nihánj a
29’Síj quiranꞌ yuvii̱ sayuun yoꞌ, ga̱a ne̱ gu̱un rmi̱ꞌ güii gu̱un rmi̱ꞌ yavii gu̱un rmi̱ꞌ, ne̱ cayu̱u nij yatiꞌ xta̱ꞌ ne̱ quina̱a̱n ta̱ranꞌ nij rasu̱u̱n nucua̱j ma̱n rej xta̱ꞌ do̱ꞌ a. 30Ga̱a ne̱ vaa se curuvi̱ꞌ rej xta̱ꞌ queneꞌe̱n soj, ne̱ xca̱j soj cuentá se vaa da̱j doj caꞌna̱ꞌ uún ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ a. Ga̱a ne̱ cunuda̱nj nij xꞌneꞌ yuvii̱ ino̱ vaa stucua̱nj ma̱n rihaan chumii̱ nihánj roꞌ, nano̱ ndoꞌo rá maꞌa̱n nij soꞌ, ga̱a ne̱ queneꞌe̱n nij soꞌ mán ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ na̱nj ado̱nj. Dan me se xráá ngaa quita̱j ꞌu̱nj caꞌna̱ꞌ ꞌu̱nj, ne̱ gu̱un nucua̱j ndoꞌoj quiri̱i̱ taꞌngaj, ne̱ niꞌndaj ya̱ sa̱ꞌ veꞌé curuvi̱ꞌ ꞌu̱nj caꞌna̱j ado̱nj. 31Ga̱a ne̱ caꞌya̱nj nii chruun aꞌyánj, qui̱ꞌyáj, ne̱ caꞌne̱j ꞌu̱nj man nij se‑mo̱zó ꞌu̱nj caꞌna̱ꞌ nij soꞌ rihaan chumii̱ nihánj, ne̱ naquiꞌya̱j chre̱ꞌ nij se‑mo̱zó ꞌu̱nj man nij síí narii Yaꞌanj man canoco̱ꞌ manj a. Dan me se caꞌa̱nj nij se‑mo̱zó ꞌu̱nj rihaan nu̱ꞌ chumii̱ nihánj, nano̱ꞌ nij soꞌ ta̱ranꞌ nij síí cunu̱u chre̱ꞌ ga̱ ꞌu̱nj na̱nj ado̱nj.
Cataj Jesús da̱j queneꞌe̱n níꞌ se vaa nichrunꞌ caꞌna̱ꞌ uún soꞌ a
32’Tu̱cuꞌyón soj nana̱ nihánj nana̱ cheꞌé chruun higó á: Ga̱a nahuun yaꞌni̱j tahúj chruun, ne̱ naca coj yaꞌni̱j raa̱ chruun, ne̱ neꞌen soj se vaa nichrunꞌ ꞌnaꞌ tiempó maan a. 33Dan me se xca̱j uún soj cuentá se vaa asa̱ꞌ queneꞌen soj nu̱ꞌ se vaa cataj xnaꞌanj ꞌu̱nj rihaan soj cuano̱, ne̱ nichrunꞌ caꞌna̱ꞌ uún ꞌu̱nj na̱nj ado̱nj. Dan me se ase vaa síí nicu̱nꞌ taꞌyaa roꞌ, ga̱a̱ ꞌu̱nj ado̱nj. 34Ya̱ ya̱ cata̱j xnaꞌanj ꞌu̱nj rihaan soj cuano̱ quisi̱j nu̱ꞌ rasu̱u̱n nihánj nu̱ꞌ se vaa cataj xnaꞌanj ꞌu̱nj rihaan soj cuano̱ na̱nj á. Ne̱ ya̱ queneꞌe̱n taꞌa̱j nij síí vaa iꞌna̱ꞌ cuano̱ nu̱ꞌ rasu̱u̱n nihánj ga̱a ataa cavi̱ꞌ nij soꞌ na̱nj ado̱nj. 35Vaa güii caꞌa̱nj niꞌya̱ chumii̱ ga̱ xta̱ꞌ, tza̱j ne̱ snana̱j me se daj chiha̱a̱ míj se̱ caꞌanj niꞌya̱ yoꞌ maꞌ.
Cataj xnaꞌanj Jesús se vaa ne neꞌen níꞌ me güii caꞌna̱ꞌ uún soꞌ maꞌ
36’Nihánj me cata̱j xnaꞌanj ꞌu̱nj rihaan soj se vaa a̱ ꞌó síí ne neꞌen me güii caꞌna̱ꞌ uún ꞌu̱nj rihaan chumii̱ nihánj maꞌ. Caꞌve̱e se nda̱a se‑mo̱zó Yaꞌanj ma̱n rej xta̱ꞌ, caꞌve̱e se nda̱a ma̱ꞌanj Taꞌni̱j Yaꞌanj, tza̱j ne̱ ne neꞌen núj me güii me yoꞌ maꞌ. O̱rúnꞌ Réj me síí neꞌen na̱nj ado̱nj.
37’Ase vaa quiꞌyaj yuvii̱ ga̱a cayáán síí cuꞌna̱j Noé rihaan chumii̱ roꞌ, da̱nj ga̱a̱ quiꞌya̱j uún yuvii̱ asa̱ꞌ caꞌna̱ꞌ uún ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ rihaan chumii̱ nihánj ado̱nj. 38Dan me se ga̱a cayáán Noé, ne̱ da̱j doj ca̱ráán na yaꞌa̱nj rihaan chumii̱, tza̱j ne̱ chá yuvii̱ do̱ꞌ, coꞌo yuvii̱ do̱ꞌ, ne̱ xcaj tuviꞌ nij yuvii̱ do̱ꞌ; ina̱nj da̱nj quiꞌyaj nij yuvii̱ nda̱a quisíj güii catúj nij tuvi̱ꞌ Noé rque rihoo xi̱j chéé rihaan na a. 39Ne̱ ne xca̱j nij yuvii̱ cuentá nda̱a se ca̱ráán na yaꞌa̱nj xráá nij soꞌ maꞌ. Ma̱an se nda̱a quisíj caráán na yaꞌa̱nj xráá cunuda̱nj nij soꞌ, ne̱ da̱nj gaa xcaj nij soꞌ cuentá na̱nj á. Ne̱ ase vaa ne xca̱j nij yuvii̱ ma̱n ga̱a naá cuentá se vaa quira̱nꞌ nij soꞌ sayuun roꞌ, da̱nj ga̱a̱ uún yuvii̱ asa̱ꞌ quisíj caꞌna̱ꞌ uún ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ rihaan chumii̱ nihánj ado̱nj. ꞌO̱ se nda̱a síj güii queneꞌe̱n nij soꞌ manj, ga̱a ne̱ xca̱j nij soꞌ cuentá na̱nj á.
40’Ne̱ asa̱ꞌ quisíj güii yoꞌ, ne̱ cu̱nuû vi̱j ro̱j snóꞌo quiꞌya̱j suun ro̱j soꞌ yoꞌóó, ne̱ naca̱j se‑mo̱zó Yaꞌanj man ꞌo̱ soꞌ, ne̱ quina̱j ꞌó soꞌ a. 41Ne̱ cu̱nuû vi̱j ro̱j chana̱ ga̱j ro̱j noꞌ ꞌnúú trigó, ne̱ naca̱j se‑mo̱zó Yaꞌanj man ꞌo̱ noꞌ, ne̱ quina̱j ꞌó noꞌ na̱nj ado̱nj. 42Cheꞌé dan tu̱mé uxrá soj man soj á. ꞌO̱ se ne neꞌen soj me güii caꞌna̱ꞌ Síí ꞌNi̱j Raꞌa man soj a̱ maꞌ. 43Dan me se sese ꞌo̱ síí tucua̱ veꞌ roꞌ, a̱j neꞌen soꞌ me orá caꞌna̱ꞌ síí itu̱u̱ ne̱ quiꞌya̱j itu̱u̱ síí itu̱u̱ rasu̱u̱n ma̱n tucuá soꞌ, ne̱ uxrá tumé soꞌ tucuá soꞌ, ne̱ se̱ quiꞌyaj itu̱u̱ síí itu̱u̱ tucuá soꞌ tza̱j maꞌ. 44Dan me se taꞌngaꞌ da̱nj vaa gue̱e̱ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱, ne̱ ne neꞌen soj me orá caꞌna̱ꞌ uún ꞌu̱nj maan ado̱nj. Cheꞌé dan ꞌo̱ cuma̱n naꞌvi̱j soj á.
Da̱j quira̱nꞌ síí veꞌé ꞌyaj suun rihaan Yaꞌanj do̱ꞌ, síí ne sa̱ꞌ ꞌyaj suun rihaan Yaꞌanj do̱ꞌ a
45’Cheꞌé dan me sese cuneꞌ síí tucua̱ ꞌo̱ veꞌ man ꞌo̱ se‑mo̱zó soꞌ se vaa tu̱mé mozó yoꞌ man tuviꞌ mozó rque̱ soꞌ se chá rihaan nij soꞌ orá chá nij soꞌ, ne̱ da̱j quiꞌya̱j mozó yoꞌ, rá soj ga̱. Sese ya̱ ya̱ si̱j veꞌé ꞌyaj suun me soꞌ do̱ꞌ, sese ya̱ ya̱ si̱j avii raa̱ me soꞌ do̱ꞌ, ne̱ da̱j quiꞌya̱j soꞌ, rá soj ga̱. 46Ga̱a ne̱ güii nama̱n se‑ruꞌve̱e̱ mozó roꞌ, sese queneꞌe̱n se‑ruꞌve̱e̱ mozó se vaa veꞌé ꞌyaj suun mozó se‑su̱u̱n ruꞌvee, ne̱ cavi̱i̱ sa̱ꞌ uxrá mozó yoꞌ, quiꞌya̱j se‑ruꞌve̱e̱ mozó yoꞌ ado̱nj. 47Ya̱ ya̱ cata̱j xnaꞌanj ꞌu̱nj rihaan soj cuano̱ se vaa cune̱ꞌ ruꞌvee yoꞌ man mozó yoꞌ gu̱un soꞌ síí tumé man cunuda̱nj siꞌyaj ruꞌvee yoꞌ a. 48Tza̱j ne̱ sese vaa chiꞌi̱i̱ nimán mozó yoꞌ, ne̱ gu̱un rá mozó se vaa uun ra̱a̱n ndoꞌo se‑ruꞌve̱e̱ soꞌ, 49ga̱a ne̱ gu̱un cheꞌe̱ soꞌ go̱ꞌ soꞌ man tuviꞌ soꞌ mozó, ne̱ cha̱ soꞌ coꞌo̱ soꞌ ga̱ tuviꞌ soꞌ síí xno̱ a. 50Dan me se ne neꞌen soꞌ aman nama̱n se‑ruꞌve̱e̱ soꞌ a. Ne naꞌvi̱j soꞌ caꞌna̱ꞌ ruꞌvee a. Tza̱j ne̱ síj güii síj orá síj, ne̱ caꞌna̱ꞌ maꞌa̱n se‑ruꞌve̱e̱ mozó yoꞌ, 51ga̱a ne quiꞌya̱j uxrá soꞌ sayuun man mozó yoꞌ ne̱ cata̱j soꞌ se vaa caꞌa̱nj mozó yoꞌ rihaan yaꞌan ga̱ ꞌó nij síí nucuiꞌ rá a. Ne̱ yuvii̱ ma̱n rihaan yaꞌan yoꞌ roꞌ, taꞌvee uxrá, ne̱ nda̱a chá ru̱j maꞌa̱n nij yuvii̱ cúú yanꞌ nij yuvii̱ chugua̱nj.
ప్రస్తుతం ఎంపిక చేయబడింది:
San Mateo 24: trc
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© Wycliffe Bible Translators, Inc. 2024 segunda versión electrónica
