Génesis 2
2
Yuus siete tsawan tumainnum ayamrauwaiti
1Nayaimpin, nugkan tura nui iruna nujai ashi umikuiti. 2-3Tura siete tsawanta jui ayamrauwaiti. Tuma asa ni ayamramu tsawannaka pegkermamtikawaiti.
Aja Edén tutainam shuar apujsamu
4Apu Yuus nayaimpin tura nugkan najanawa nuka tu uminkauwaiti. Nayaimpin tura nugkancha najanawa nu tsawantinka, 5Apu Yuus yumin eke yutumtikchau asamtai, chikichik numiksha tura nupagsha pegke atsujakuiti. Tura shuar nuna takamaincha atsujakuiti. 6Antsu yumi atsamunam nugkanmaya yuragkim nugkan ashi ukateak inijajakuiti. 7Apu Yuus nugkan juki shuaran najanawaiti. Nutika nujinam umpua mayain egketak, iwáku amajsauwaiti. 8Apu Yuus etsa watainmani Edén tutainam ajan umirak apujsauwaiti. 9Apu Yuus númi nere yutai pegker ainancha tsapakti tama tsapakuiti. Tura nuna nakarin númi nere yuarka iwáku pujutai, antsu númi chikichka nere yuarka pegker tura pegkerchausha nekatai tutai wajajakuiti. 10Ajan ukatkatin nugka Edén tutainmaya chikichik entsa jinnaiti. Nunik cuatro entsa tsegkeruiti.
11Entsa yama nagkamchak tsegkeakmaurigka Pisón naartinaiti. Nu entsaka nugka Havila tutainam oro amaunmani tenkauwaiti. 12Nu nugkanmaya oro ima pegkeraiti. Tura númi bedelio tutai puari pegker, tura kaya ónice tutaisha irunui. 13Entsa tsegkeakmauri jimara nuka Gihón naartinaiti. Nuka nugka Cus tutainam tenkauwaiti. 14Tura entsa tsegkeakmauri tresa nuka Tigris naartinaiti. Nuka etsa watainmani nugka Asiria tutainam awai. Tura entsa tsegkeakmauri cuatrowa nuka Éufrates naartinaiti. 15Apu Yuus jui pujusam takákum aja Edén tutai kuitamata tusa shuaran ajanam apujsauwaiti. 16Tura chicharuk: “Ju númi iruna juna neregka ashi yuata. 17Turasha númi pegker, tura pegkerchausha nekatai timaj nuna neregka yuawaipa. Ame nu yuakmeka tunau jastatme”, tusa tinaiti.
18Tusa apu Yuus chichaak: “Aishmag nigki pujakka wake mesemar pujumainaiti. Tuma asamtai nijai tsaniasa pujusa yainaiktinan najatatjai”, tusa tinaiti. 19-20Kuntin ainan, tura nanamtin ainancha anairati, tusa shuar pujamunam kuntin ainan apu Yuus ashi ikaankauwaiti. Turamtai ni anairauwaiti. Imanai anairamuk yamaiya juisha kuntin ainaka anaitaiyaiti. Turasha shuaran yaimain atsujakuiti. 21Tuma asamtai apu Yuus shuaran senchi ikantrauwaiti. Tura nina paen jurus, ataksha ichimtuawaiti. 22Nu aishmagkun pae jukimujai, apu Yuus ina apuriya nu nuwan najana aishmagkun susauwaiti. 23Turam Adán chichaak: Wina iyashur jukir, tura wina ukunchur jukir najanamu asa, nuwa tutai atinaiti, tusa tinaiti. 24Tuma asamtai shuar nuwenkugka chikichik iyashia numamtin jasu asa aparin, tura nukurin ikuak nuwejai pujustinaiti, tusa tinaiti. 25Aishmag, tura nuwasha mai misuk pujujakaruiti, tumainaksha natsaama jakcharuiti.
ప్రస్తుతం ఎంపిక చేయబడింది:
Génesis 2: hubDBL
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2010, Wycliffe Bible Translators, Inc. All rights reserved.
