Génesis 8
8
Diluviu yaku sakishqan
1Tayta Dios manami qonqarqansu Noéta ni arcacho kaykaq uywakunatapis. Saymi yaku walkänanpaq wayräsimurqan. Say wayrawanmi yaku walkar qalaykurqan. 2Saymi pasa rurincho kaq lamarpita pashtamuq yaku chawarqanna. Ciëlupita yaku yarqamunanpaq kicharaykaq punkupis wichqakäkurqanna.
3Saymi yaku walkayar qalaykurqan. Pachak pisqa chunka (150) junaqtanami 4arca takyarqan Araratcho kaykaq juk jirkacho. Say karqan qanchis kaq killa chunka qanchis junaqmi. 5Saypita yaku waranlanta waranlanta walkaptinmi chunka kaq killa qalaykunan junaq jirka puntakuna rikakäyarqanna.
6Saypita chusku chunka (40) junaqtami Noé kicharqan arcapa ventänanta. 7Nirkurmi juk cuervuta#8.7 Cuervuqa alqay tamäñu yanami kaykan. kacharqan yaku sakishqanta o mana sakishqantapis rikapakamunanpaq. Sayno kaptinpis say cuervu manami kutimurqansu, sinöqa yaku jananpa wakpa kaypa pajarmi purirqan yaku sakishqanyaq.
8Saypitanami kacharqan juk palumatana pasa sakikashqanta o mana sakishqantapis musyamunanpaq. 9Pasa janancho yaku juntaraptinmi maychöpis ratananpaq mana kaptin palumaqa arcaman kutirqan. Saymi Noé makinta makyaraykashqanman rataykuptin arcaman yaykasirqan.
10Saypita qanchis junaqtami palumata yapay Noé kacharqan. 11Pasa sakaykaptinnami olïvu räman amush paluma kutirqan. Saynöpami Noé musyarqan yaku sakiykashqantana. 12Kutishqanpita qanchis junaqtami yapay palumata kacharqan. Say palumaqa mananami kutirqannasu.
13Soqta pachak y juk (601) watayuq Noé kaykaptinmi yaku sakirqanna. Say karqan mushuq wata qalaykunan junaqmi. Say junaqmi arca qataraykashqanta kichaskir Noé rikarqan pasa sakishtana. 14Ishkay kaq killacho ishkay chunka qanchis (27) junaq kaykaptinmi pasa sakishna kaykarqan. 15Saymi Noéta Tayta Dios nirqan: 16<<Kananqa warmikiwan, surikikunawan y lumsuynikikunawan arcapita yarquyayna. 17Saynöpis lapan casta uywakunata qarquyna ashmana kaqkunata, mana ashmana kaqkunata, pachalanpa, lätaypa puriqkunata y lapan casta pajaqkunatapis maysaypa aywar intëru pasacho mirayänanpaq>>.
18Sayno niptinmi Noé yarqurqan warminwan, surinkunawan y lumsuyninkunawan. 19Saynölami yarquyarqan ashmana kaq y mana ashmana kaq uywakuna, pachalanpa y lätaypa puriqkuna y lapan casta pajaqkunapis. 20Yarquskirnami Noé juk altarta perqarqan Tayta Diosta adorananpaq. Nirkurmi cada ayllu püru kaq uywakunapita y pajaqkunapita pishtarkur altarcho sacrificiuta rupasirqan.#Lev. 1.1-7. 21Say rupasishqanpa mushkuyninmi Tayta Diospa shonqunpaqno karqan. Saymi nirqan: <<Runakunaqa wamra kayashqanpita pasami shonqun munashqanno jusalikular kawayan. Sayno kawayaptinpis kay pasata yapayqa manami maldicionashaqnasu. Kanan ushakäsishqänöqa manami kay pasacho kawaqkunata ushakäsishaqnasu.
22<<Kay pasa manaraq ushakashqanyaqqa runakuna murupakuyanqami y cosechayanqami.
Saynöpis kanqami alaypis, shanaypis, usya tiempupis, tamya tiempupis, junaqpis y sakaypis>>.
ప్రస్తుతం ఎంపిక చేయబడింది:
Génesis 8: qvhB
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2003, Wycliffe Bible Translators, Inc. All rights reserved.
