Génesis 7
7
Diluviu kashqan
1Nirkurnami Noéta Tayta Dios nirqan: <<Lapan runakunapita qam japalaykimi noqa munashqäno kawaykanki. Sayno kawashqaykipitami qam, warmiki, surikikuna y lumsuynikikuna arcaman yaykuyanki. 2Püru kaq uywakunataqa#7.2 Püru kaq uywakunaqa Diosta adorar altarcho rupasinanpaq uywakunami kayarqan. Mayqan uywakuna püru kashqanta y impüru kashqantapis musyanaykipaq liyinki Lev. 11.1-47; Deut. 14.3-20. qanchis chinata qanchis orquta arcaman yaykasinki. Impüru kaqta isanqa chinan orqulata yaykasinki. 3Saynöpis lapan casta pajaqkunata#7.3 Wakin runakunaqa vuelaqkunata niyanmi. yaykasinki qanchiskama chinan orquta kay pasacho mana ushakäyänanpaq. 4Kananpita qanchis junaqtami chusku chunka (40) junaq chusku chunka paqas mana salpiypa tamyasimushaq. Say tamyawanmi kay pasacho lapan kawaq kaqta ushakäsishaq>>.
5Saymi Tayta Dios nishqannöla lapanta Noé rurarqan.
6Diluviu kanan wisan Noé kaykarqan soqta pachak (600) watayuqmi. 7Diluviupita salvakuyänanpaqmi arcaman Noé yaykurqan warminwan, surinkunawan y lumsuyninkunawan.#Mat. 24.38-39; Luc. 17.27. 8Saynömi arcaman yaykuyarqan püru kaq y impüru kaq lapan casta uywakuna, pajaqkuna y pachalanpa, lätaypa puriqkunapis. 9Tayta Dios nishqannölami say uywakunata chinan orquta Noé yaykasirqan.
10Tayta Dios nishqannölami qanchis junaqta diluviu qalaykurqan. 11Say karqan mushuq wata qalaykushqanpita juk killa ushaskir chunka qanchis junaqmi. Say wisan Noé kaykarqan soqta pachak (600) watayuqmi. Pasa rurinpitami yaku aska pashtamurqan. Saynölami ciëlucho yakuta saparaykaq punkupis kichakämurqan.#2Ped. 3.6. 12Saymi chusku chunka (40) paqas y chusku chunka junaq mana salpiypa tamyarqan.
13Tamya qalaykushqan junaqmi Noé kimsan surinkunawan arcaman yaykuyarqan. Surinkunapa jutinkunami karqan Sem, Cam y Jafet. Saynölami kimsan lumsuyninkunawan Noépa warminpis yaykurqan. 14Paykunawanmi yaykuyarqan lapan casta ashmana kaq y mana ashmana kaq uywakuna, pachalanpa, lätaypa puriqkuna y tukuy casta pajaqkunapis. 15Lapan casta uywakunatami ishkaypa ishkaypa arcaman Noé yaykasirqan. 16Tayta Dios nishqannölami cada casta uywakunata chinan orquta yaykasirqan. Yaykuskiptinnami arca punkuta Tayta Dios wichqarkurqan.
17Saypitanami chusku chunka (40) junaq y chusku chunka (40) paqas mana salpiypa tamyarqan. Sayno tamyarmi pasaman yaku juntashpan arcata aynasir qalaykurqan. 18Sayno tamyaptin waranlanta waranlanta yaku mas juntaptinmi arca aynar qalaykurqan. 19Altunnin jirkakunatapis sapashqanyaqmi yaku juntarqan. 20Say jirkakunata saparkurpis qanchis metru mastaraqmi päsarqan.
21Saychömi lapan runakunapis, pajaqkunapis, ashmana kaq y mana ashmana kaq uywakunapis y pachalanpa, lätaypa puriqkunapis shenqaypa wanuyarqan. 22Kay pasacho kawaqkuna lapanpis shenqaypa wanurmi ushakäyarqan. 23Arcaman Noéwan yaykuqkunalami wanuypita qeshpiyarqan. Mana yaykuq kaqmi isanqa runakunapis, uywakunapis, pajaqkunapis y pachalanpa, lätaypa puriqkunapis lapan wanur ushakäyarqan. 24Say yaku pachak pisqa chunka (150) junaqyaqmi kay pasata sapararqan.
ప్రస్తుతం ఎంపిక చేయబడింది:
Génesis 7: qvhB
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2003, Wycliffe Bible Translators, Inc. All rights reserved.
