Jn 11

Li xwaklijik chi yo'yo laj Lázaro

1Kiyajerk jun li winq, aj Lázaro xk'ab'a', aj Betania, xk'aleb'aaleb' lix María ut lix Marta li xchaq'na'.#11,1 Lk 10,38-42. 2Lix María a'an li kiyuluk re li Qaawa' rik'in sununkil b'an ut kixmes li roq rik'in rismal xjolom;#11,2 Jn 12,1-3 (cf. Mt 26,6-13). ut li ras a'an yaj, aj Lázaro xk'ab'a'. 3Eb' li ranab' ke'xtaqla xyeeb'al re li Jesus:

—Qaawa', li nakara laa'at a'an yaj.

4Naq kirab'i a'in, li Jesus kixye:

—Li yajel a'in moko re ta kamk, re b'an xnimal xloq'al li Yos, re naq taanimaaq xloq'al li Ralal li Yos xb'aan a'an.#11,4 Li Jesus taanimaaq xloq'al xb'aan li xwaklijik chi yo'yo laj Lázaro ut, chirix chik a'an, sa' li xkamik ut li xtaqik sa' choxa.

5Li Jesus naxra lix Marta, jo'wi' li riitz'in ut laj Lázaro; 6ab'an, naq kirab'i resil naq yaj laj Lázaro, toj kikanaak wiib' kutan chik sa' li na'ajej a'an. 7Chirix chik a'an kixye reheb' li xtzolom:

—Yo'qeb' wi' chik Judea.

8Kiyehe'k ut re xb'aaneb' li xtzolom:

—At Tzolonel, toje' xe'raj raj aakamsinkil chi pek eb' laj Judiiy. Ma tatxik wi' chik aran?

9Kichaq'ok li Jesus ut kixye reheb':

—Ma ink'a' tab'i' kab'laju honal wank re li kutan? Wi junaq winq nab'eek chi kutan, ink'a' taatichk'oq xb'aan naq naril li xsaqenk li ruuchich'och' a'in; 10ab'an wi nab'eek sa' q'oqyink, taatichk'oq xb'aan naq maak'a' xsaqenk rik'in.

11Chirix chik a'an kixye wi' chik:

—Laj Lázaro li qamiiw yo chi wark; ab'anan xik we chi rajsinkil.

12Kiyehe'k ut re xb'aaneb' li xtzolom:

—Qaawa', wi yo chi wark, taak'iraaq.

13Li Jesus a' li xkamik kixye reheb', a'ut eb' a'an ke'xk'oxla naq a' li hilank li naxk'e li wark kixye. 14Toja' naq li Jesus ki'aatinak chi ch'olch'o ru:

—Laj Lázaro kamenaq chik, 15ut nasaho'k inch'ool eeb'aan laa'ex rik'in naq maa'anihin chaq aran, re naq teepaab'. Ab'anan, yo'qeb' rik'in, chan.

16Toja' naq laj Tomás, a' li Lut nayeemank re, kixye reheb' li rech tzolonelil:

—Yo'qeb' ajwi' laa'o re naq tookamq qochb'een.

17Naq kiwulak li Jesus, ak kaahib'aq kutan chik xmuqb'al laj Lázaro naq koxtaw. 18Betania nach' wank rik'in Jerusalén, mero leew tana xnajtil, 19ut naab'aleb' laj Judiiy ke'wulak sa' rochoch lix Marta ut lix María re xk'ojob'ankileb' xch'ool chirix xkamik li raseb'. 20Naq kirab'i lix Marta naq li Jesus yo chi chalk, ki'elk chi xk'ulb'al, ut lix María kikanaak sa' kab'l. 21Kixye lix Marta re li Jesus:

—Qaawa', wi ta wankat arin, ink'a' raj xkamk li was. 22Ab'an, anaqwan ajwi', ninnaw naq chixjunil li taatz'aama chiru li Yos, tixk'e aawe li Yos.

23Kixye li Jesus re:

—Laawas taawakliiq wi' chik chi yo'yo.

24Kichaq'ok lix Marta:

—Ninnaw naq taawakliiq wi' chik sa' xwaklijikeb' chi yo'yo li kamenaq, sa' roso'jikeb' li kutan, chan.

25Kixye li Jesus re:

—Laa'in li wakliik wi' chik chi yo'yo ut li yu'am. Ani napaab'ank we, us ta taakamq, taawanq xyu'am, 26ut chixjunil li yo'yo ut nikinxpaab' maajaruj taakamq. Ma nakapaab' a'in?

27Kichaq'ok a'an ut kixye:

—Hehe', Qaawa'. Laa'in ninpaab' naq laa'at li Kriist, li Ralal li Yos, li tento taak'ulunq sa' ruuchich'och'.

28Naq ak xye a'in, koho chi xb'oqb'al lix María, li riitz'in, ut koxye sa' xxik:

—Laj Tzolonel wank le'; yo chab'oqb'al.

29Lix María, ka'ajwi' kirab'i, kixaqliik sa' junpaat ut koho rik'in. 30Toj maji' nawulak li Jesus sa' li k'aleb'aal ut toj wank sa' li na'ajej b'arwi' koxk'ule'q xb'aan lix Marta. 31Naq ke'ril naq lix María kixaqliik sa' junpaat ut ki'elk, eb' laj Judiiy li wankeb' chaq sa' kab'l chi xk'ojob'ankil xch'ool ke'xtaaqe: sa' xch'ooleb' naq koho chi yaab'ak wan wi' li muqleb'aal.

32Lix María kiwulak wan wi' li Jesus, ut naq kiril ru, kixkut rib' chi roq ut kixye re:

—Qaawa', wi ta wankat arin, ink'a' raj xkamk li was.

33Li Jesus kiril naq yo chi yaab'ak ut te'yaab'aq ajwi' eb' laj Judiiy li ke'chalk chirix; jo'kan naq kixjiq' xch'ool ut sachaamil xna'leb' kikanaak:

34—B'ar xek'e? chan.

Ke'xsume ut ke'xye:

—Qaawa', kim ut toxaawil.

35Li Jesus ki'ok chi yaab'ak. 36Ut eb' laj Judiiy ke'xye:

—Ilomaq k'ajo' naq naxra.

37Ab'anan wank ke'yehok:

—A'an li kitehok xsa' ru li mutz', ma ink'a' raj xru chi xkolb'al laj Lázaro chiru li kamk?

38Toja' naq li Jesus kixjiq'jiq'i wi' chik xch'ool ut koho wan wi' li muqleb'aal. A'an jun li ochoch pek ut wank jun pek chire.

39—Isihomaq li pek, chan li Jesus.

Kichaq'ok lix Marta, ranab' li kamenaq:

—Qaawa', xchuho': ak kaahib' kutan rokik arin, chan re.

40Kixye li Jesus re:

—Ma ink'a' xinye aawe: «Wi nakapaab', taawil li xnimal xloq'al li Yos»?

41Ke'risi li pek. Toja' naq li Jesus kixtaqsi li rilob'aal sa' choxa ut kixye:

—At inYuwa', ninyoxi chawu naq xinaawab'i. 42Ak ninnaw laa'in naq junelik nikinaawab'i, ab'anan xinye a'in xb'aaneb' li tenamit neke'sutuk we, re naq te'xpaab' naq laa'at kattaqlank chaq we.

43Naq kiraqe'k chi xyeeb'al a'in, kixjap re chi kaw xyaab' xkux:

—Lázaro, elen chaq, chan.

44Ut li kamenaq ki'elk chaq, b'ak'b'ookeb' li roq ruq' rik'in li t'ikr ut lanlo li xnaq' ru chi sut. Kixye li Jesus reheb':

—Hitomaq ut kanab'omaq chi b'eek.

Eb' laj Judiiy ke'xk'uub' xkamsinkil li Jesus

(Mt 26,1-5; Mk 14,1-2; Lk 22,1-2)

45Naab'aleb' laj Judiiy li ke'wulak sa' rochoch lix María, ke'xpaab' li Jesus naq ke'ril li kixb'aanu. 46Ab'anan wankeb' ajwi' koxe'xye reheb' laj Pariseey li kixb'aanu li Jesus. 47Toja' naq li Xb'eenileb' aj tij ut eb' laj Pariseey ke'xch'utub' rib' chi k'uub'ank ut ke'xye:

—K'aru tqab'aanu? Xb'aan naq li winq a'in naab'al xninqal ru eetalil naxb'aanu. 48Wi taaqakanab' chi jo'kan, chixjunileb' te'paab'anq re, ut te'chalq eb' laj Roma, tole'xjuk' li qaSantil Na'aj jo' ajwi' li qatenamit.

49Jun reheb' a'an, aj Kaifás xk'ab'a', xyuwa'il aj tij sa' li chihab' a'an, kixye reheb':

—Laa'ex tik maak'a' nekenaw, 50chi moko nekek'e reetal naq q'axal us cho'q eere naq taakamq jun chi winq sa' xk'ab'a'eb' li tenamit chiru naq taa'oso'q chixjunil li tenamit.

51Ut a'in moko yal ta xjunes rib' naq kixye, kixye b'an jo' propeet, naq wan chaq cho'q xyuwa'il aj tij; kixye chi junxilaj naq li Jesus taakamq chirix li tenamit, 52ut moko ka'aj ta wi' chirix li tenamit, re aj b'an wi' xch'utub'ankil sa' junajil eb' li ralal xk'ajol li Yos li neke'cha'chotk. 53Ut chalen sa' li kutan a'an ke'xk'uub' xkamsinkil.

54Jo'kan naq li Jesus ink'a' chik nab'eek chi kutankil sa' xyanqeb' laj Judiiy, ki'elk b'an aran ut koho sa' li na'ajej nach' rik'in li chaqich'och', sa' li tenamit Efraín xk'ab'a', ut aran kikanaak rochb'eeneb' li xtzolom.

Haye'k re li Paswa

55Taanach'oq chaq li Paswa, xninq'eheb' laj Judiiy, ut naab'aleb' li wankatqeb' sa' li na'ajej a'an ke'taqe'k Jerusalén rub'elaj li Paswa chi xch'ajob'resinkileb' rib'. 56Yookeb' chi xsik'b'al li Jesus ut naq wankeb' sa' rochoch li Yos, neke'xyehatq chirib'ileb' rib':

—K'aru nekeye? Ma ink'a' anchal taachalq sa' li ninq'e?

57Li Xb'eenileb' aj tij ut eb' laj Pariseey ak xk'ehomeb' jun li chaq'rab': “Wi ani taanawoq re b'ar wanq, chixyehaq resil re naq taachapmanq”.

ప్రస్తుతం ఎంపిక చేయబడింది:

Jn 11: QQC

హైలైట్

షేర్ చేయి

కాపీ