Gn 6
6
A smaysch'olnilal eb' 'anma'
1A yic xq'uib' sb'isl eb' 'anma 'a sat lum lum tic, 'ay yisl eb' x'alji. 2Ax yic xyiln 'och ewin yunnal Dios#Gn 6.2 Man̈ wal cojcoc mach eb' tzcuch yunnal Dios. 'Ay eb' tznani to atn eb' ángel 'emnc 'a 'ajmulal. 'Ay eb' tznani to atn eb' yin̈tl win Set. 'Ay pax eb' tznani to atn eb' yunnal eb' 'aych yajlil. Toto yunnal Set eb' tzcuch yunnal Dios cha, ax eb' tzcuch yisl eb' 'anma', atn eb' yin̈tl win Caín. eb' 'ix yisl ewin 'anma cha, to caw wal wach' yilx eb' 'ix, 'ix syamn 'och ewin si'lan yistzil 'a scal eb' 'ix. 3Yuj cha, xyaln Jehová 'ixtic: Man̈x 'oj in tench wann̈ej eb' 'anma tic 'a smaysch'olnilal, yujto chamlb'a 'anman̈ej eb', cojxn̈ej 120 ab'il tz'ec' 'anma 'a yolyib'n̈q'uinl tic, ax satl eb', xchi.
4A 'a yic jun tiempoal cha, xyij sb'a eb' yunnal Dios yet' eb' 'ix yisl ewin 'anma cha, ax yunnal eb' x'alji, 'ix 'ajx sb'ic eb' Nefilim.#Gn 6.4 Man̈ cojcoc tas tzyal 'el'ch Nefilim. A 'a castilla, cha'ejm tzb'inaxi, "gigante" 'icha wal to "b'inab'il", mto " 'a'm owl wal si'mb'il". Atn wal ta 'ix checlj chan̈ eb' 'anma to caw wal 'ay yip, b'inab'il eb' 'a yic pecti cha.
5Ax xyiln Jehová, to yelc'ojlal tzb'o eb' 'anma maysch'olnil 'a sat lum lum tic, caw cojxn 'a maysch'olnil 'aych snab'en eb'. 6Yuj cha, xyaln 'ixtic: Octom wal ma'ix in b'o jun tzo'n̈ 'anma tic, caw wal ya tzwab' yuj eb'. 7Caw wal tztac in c'ojl yuj eb' 'anma xin b'o tic. Yuj cha, 'oj in satl eb' 'a sat lum lum tic, yet' no cajb'en noc', no calte'al noc', no tzjuc sb'a 'a sat lu'um, yet' pax no ch'ic, xchi.
8Cojxn wal Noé wach' snab'en 'a sat Jehová.
Sb'ojnac win Noé jun te barco
9Atn yab'xil win Noé tic:
A Noé, caw wal wach' xyutj sb'a 'a sat Dios, cojxn win wach' snab'en 'a scal eb' 'anma 'a yic jun tiempoal cha, 'ix sb'eylb'ej 'icha tznib'j Dios. 10'Oxwn̈ yunnal win x'alji, atn win Sem, win Cam yet' win Jafet.
11A 'a sat Dios, man̈x yalnb'ilc maysch'olnilal tzb'o eb' 'anma 'a yolyib'n̈q'uinl tic, comn xoj tzlaj meltzj 'och eb' 'a yit 'anma'il. 12'Ix yiln Dios to smasnil 'anma 'ix juw 'eli, cojxn maysch'olnil tzlaj sb'o eb'. 13Yuj cha, xyaln Dios 'ixtc 'a win Noé: Tox 'ix in na ticnec, to 'oj in satl smasnil eb' 'anma', yuj eb', tzlaj niwtj maysch'olnil 'a yolyib'n̈q'uinl tic. 14A ticnec b'o junc te barco niwquil tz'aji, a te te 'ay stzatjil tza'ch 'a 'a; cuartotac tz'aj yojol, caw wach' tzotej. Tza'ch tzatj 'a 'aj tzchaj sb'a te', tza'ch 'a spatquil, yet' 'a yojol, sec wach' matz 'och a a 'a yojol. 15'Ixtc 'oj otc a b'on te': 135 metro tzotj spac'b'il, nan̈l yoxlschawinc metro tzotj sat, nan̈l schan̈lajn̈il metro tzotj ste'il. 16'Oxc'aj tz'ajb't 'a cha'an̈, ax 'a yib'n̈ cha, ata tzcan junc swentnual, nan̈l metro tz'aji, yet' junc smac 'a jun pac'oc. 17Wal yel 'oj wa' cot jun niwquil owl yaxn̈ab' 'oj 'a'n b'ut'joc 'el sat lum lum tic, ax satl smasnil tas pitzn 'a sat lu'um. 18Palta tzin b'ocn jun in trato et'oc. A 'a yojl te barco cha, ata 'oj 'och eb' onnal yet' yistzil, yet' 'ix estzil ach tic. 19Ax yoch pax no noc' eyet' 'a yojl te barco cha, jun no smam jun no snun, a tzyal yin̈tl no 'ay 'a yolyib'n̈q'uinl tic, sec wach' pitzn yin̈tl junjn c'aj e no', 'icha eyaj ax tic. 20Chatcwan̈il tz'aj yoch yin̈tl junjn c'aj e no', tz'och no ch'ic, no cajb'en noc', no calte'al noc', yet' no tzjuc sb'a 'a sat lu'um, sec wach' matz satl e no'. 21Tza molb'tzan can 'och smasnil tas tzc'uxxi, yic wach' 'ay tas tza c'uxu, yet' tas tzc'ux e no noc' cha, xchi Dios.
22Yuj cha, syiclni Noé sb'on smasnil tas xyal Dios 'a 'a.
ప్రస్తుతం ఎంపిక చేయబడింది:
Gn 6: CSS
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Biblia Chuj San Sebastian © Sociedades Bíblicas Unidas, 1999.
