Matayo 13

Carokop i kom acoc

(Nen daŋ Marako 4.1-9; Luka 8.4-8)

1I nino acel-lu rik Yecu te ya oko i ot, te wot bedo piny i ŋet nam. 2#Luk. 5.1-3Lwak ecipan te cokere baŋe; pi mannono en te yito iyi yee, te bedo iye, lwak luŋ te bedo oko i dog nam i wi tela. 3En te kobbigi kop apol i carokop kun kobo ni, “Lo moro rik owoto ka coyo koti. 4Ame en doŋ tye ka coc, koti mogo te kir i dye yo, winy te bino-depo oko. 5Mogo te kir kan obedo lela lela, ame lobo tye iye warawara. Cucuttono ote tu, pien lobo mom tut; 6ento ka cen oryeny ote two oko, pien lwitgi mom. 7Mogo te kir i akina oku to, okuto te lot diyogi oko. 8Mogo te kir gigi i lobo aber, nyiggi te cek; mogo tyene acel acel ocek iye nyige mia acel, mogo pyerabicel, mogo pyeradek. 9Ŋat a tye kede yit myero winy.”

Gin omio opwonyo jo i carokop

(Nen daŋ Marako 4.10-12; Luka 8.9-10)

10Jo mere a lu be obino baŋe, ote penye ni, “Piŋo ikobo kedgi i carokop?” 11En te gamo doggi ni, “Wun omiowu ŋeyo muŋ me loc Obaŋa, ento jo ca mom omiogi. 12#Mat. 25.29; Mar. 4.25; Luk. 8.18; 19.26Pien ŋat a mere tye obino medde te durre baŋe; ento ŋat a mere mom obino gamo oko anaka gin a tye baŋe. 13Man en gin omio akobo kedgi i carokop, pien ka gin oneno rom a mom oneno; dok ka gin owinyo rom a mom owinyo kadi niaŋ tere. 14#Ica. 6.9-10 Cite kop Obaŋa a rik adwarpiny Icaya okobo ocobere kakare i komgi ni,

‘Me winyo, ibino winyo wunu,

ento mom ibino niaŋ wunu tere;

me neno, ibino neno wunu,

ento mom ibino ŋeyo wunu.

15Pien rok-ki cunygi odoko nwaŋ,

yitgi odiŋ oko, mom owinyo aber,

waŋgi daŋ omio gigi oko;

me kur onen kede waŋgi,

kadi winyo kede yitgi,

kadi niaŋ i cunygi,

kadi dwogo baŋa me acaŋgi.’

16 # Luk. 10.23-24 Ento wun waŋwu tye kede winyo, pien oneno, yitwu daŋ tye kede winyo, pien owinyo. 17Ateni, akobbiwu ni, odwarpiny apol kede jo a kitegi atira rik obedo kede keo me neno gin ame wun ineno wunu, ento naka mom oneno, kede winyo gin ame wun iwinyo wunu, ento naka daŋ mom owinyo.

Yecu ogonyo te kop me carokop i kom acoc

(Nen daŋ Marako 4.13-20; Luka 8.11-15)

18“Koŋ doŋ iwiny wunu carokop i kom acoc. 19Ka dano moro owinyo kop i kom loc Obaŋa eka mom te niaŋ iye, Arac ca bino te kwanyo koti ame ocoo i cunye oko; man en ame i dye yo. 20En ame ocoo kan obedo lela lela, en dano ame ka owinyo kop, daŋ te gamo cuto kede lelo, 21ento mom tye kede lwite i yie, te ri ka anokkoro; tekki cannoro adwoŋ obino, onyo awuna, pi koppono, en poto oko cucuttono. 22En ame ocoo i okuto, en dano ame winyo kop, ento par apol me lobo man kede mito lonyo te diyo kop oko, mom nyak. 23En ame ocoo i lobo aber, en dano a winyo kop kun niaŋ tere daŋ en nyige nyak atika, moro mia, moro pyerabicel, moro pyeradek.”

Ekitu ame ocoo i akina kal

24Te dok kelligi carokop ocele kun kobo ni, “Loc me polo rom aroma kede dano ame ocoo koti abeco i poto mere. 25Kajo doŋ obuto oko, akworrere te bino, te coyo ekitu i akina kal, eka en te wot gire oko. 26Ka otu, daŋ te keto nyige, cite te nen iye ekitu. 27Omiro a won ot te wot baŋe, ote penye ni, ‘Adwoŋ, rik mom icoo koti abeco i potoni? Kara ekitu dok onen iye niŋo?’ 28En te gamo ni, ‘Mano akwor en otimo.’ Omiro te dok penye ni, ‘Imito owot odoo oko?’ 29En te kobbigi ni, ‘Pe gire; ka idoo wunu ekitu, mio ibino doyo wunu anaka kal daŋ. 30Koŋ iwek wunu gin aryo ducu doŋ karacel, ituno ka oromo me akaa. Eka i kare me kac abino kobbi jo a kayo ni. Koŋ ige coko wunu ekitu, itwe wunu me awaŋa, ento kal iony wunu i derona.’ ”

Carokop i kom nyig karadali

(Nen daŋ Marako 4.30-32; Luka 13.18-19)

31Okelligi dok carokop ocele kun kobo ni, “Loc me polo rom aroma kede nyig dek karadali ame dano moro okwanyo te poto i poto mere. 32En titino akato koti luŋ, ento ka odoŋo bedo adwoŋ a loo dek ducu. Doko twon yattoro a winyi a twarre malo bino gero udigi iye.”

Carokop i kom tobi

(Nen daŋ Luka 13.20-21)

33Okobbigi carokop ocele ni, “Loc me polo rom aroma kede tobi ame dako ojuko, te rubo i moko a romo dita adek, ituno ka oyenyo ducu.”

Kit a Yecu rik maro tic kede carokop

(Nen daŋ Marako 4.33-34)

34Kop magi ducu Yecu okobo kede lwak i carokop. Mom okobo kedgi aboŋo carokop, 35#Jab. 78.2me kop a yam adwarpiny okobo cobere kakare, ni,

“Abino yabo doga i carokop,

abino rabo kop okano geye acakki piny.”

Yecu ogonyo te kop me carokop i kom ekitu ame ocoo i akina kal

36Eka en te weko lwak, te donyo i ot, jo mere a lube te bino baŋe kun okobo ni, “Nyuttiwa carokop me ekitu ame i peto.” 37En te dok iye ni, “Ŋat ame ocoo koti abeco en Wot a dano; 38poto en lobo ducu, koti abeco gin itino me loc me polo, ekitu gin itino Arac. 39Akwor ame ocoogi en Catan; kac en agikki piny, okac gin omalaika. 40Acalo ogwaro ekitu, obolo owaŋo i mac, bino bedo kittono i agikki piny. 41Wot a dano bino oro omalaika mere, gin bino coko i te loccere jami ducu a mio jo poto i bal, kede jo ducu ame otim tim areco, 42te bologi i keno me mac, kan ame bino bedo iye koko kede kayo lak. 43I karenono jo ame kitegi atira bino ryeny bala cen i te loc a Papagi. Ŋat ame tye kede yit, myero winy.

Lim ame okano i poto

44“Loc me polo rom aroma kede lim ame okano i poto, ame dano onwoŋo, te dok wumo oko; eka pi yomcunye, en te wot cato jami mere luŋ, te wilo poto-nu oko.

Tigo ame wellere malo

45“Dok loc me polo rom aroma kede acat-wil a con obedo ka yenyo tiggi abeco me wel, 46eka te nwoŋo tigo acel ame wellere tye malo meicel, te wot cato jami mere ducu, te wilo tigo-nu oko.

Bwo ame oryeo i nam

47“Dok loc me polo rom aroma kede bwo ame oryeo i dye nam, ame ocoko rece ame kwongi papat. 48Ka doŋ opoŋ, jo wao, te kelo i wi tela, ote bedo piny me yero en abeco mege coko i dwoŋ, ento en areco mege ote bolo oko. 49Bino bedo kite-nono i agikki piny. Omalaika bino bino, ote poko jo areco oko i akina jo a kitegi atira, 50eka te bologi i keno me mac, kan ame bino bedo iye koko kede kayo lak.”

Jami anyen kede acon ame okano

51Yecu te penyogi ni, “Doŋ ityeko niaŋ wunu i kopi luŋ?” Gin te gamo ni, “Ee ta.” 52En te kobbigi ni, “Pi mannono, apwony-cikkoro ame nwoŋo doŋ opwonyo pi loc me polo, rom aroma kede won ot ame okelo jami anyen kede acon i akina jami mere a yam ekano.”

Jo Najaret okwero Yecu

(Nen daŋ Marako 6.1-6; Luka 4.16-30)

53Ka Yecu doŋ otyeko carokop magi, te ya oko i kuno, 54odwogo i lobo turgi, opwonyogi I kacokeregi, omio gin owuro kun okobo ni, “Dano man onwoŋo ryeko man i kwene? Ticcere magi atek adoŋo oya i kwene? 55Man mom wot apac? Tottere mom nyiŋe Maliam? Kede omego mere mom Yakobo kede Yucepu kede Cimon kede Juda? 56Dok anaka amego mere ducu mom tye baŋwa kan? Kara dano man dok onwoŋo gin man ducu i kwene?” 57#Lak. 4.44Cunygi te ya oko i kome. Ento Yecu te kobbigi ni, “Mom tye adwarpinnyoro ame mom oworo, kono ka i lobo me turgi, kede i paco mere.” 58Daŋ en mom te tiyo ticcoro atek adoŋo kuno, pien onwoŋo iyeegi mom.

ప్రస్తుతం ఎంపిక చేయబడింది:

Matayo 13: La79

హైలైట్

షేర్ చేయి

కాపీ