Matayo 11

Lakana Abatija ooro jo baŋ Yecu

(Nen daŋ Luka 7.18-35)

1Ame Yecu doŋ otyeko ciko jo mere apar wie aryo, en oya i kuno, owoto i pwony kede i rabo kop i paccigi.

2Ka Lakana owinyo pi tic a Kricito a kun en tye i ot kol, eka te ooro jo mere a lube me penyo ni, 3“Yin dano abino ca, onyo okur en ocele?” 4Yecu odokkigi iye ni, “Wot ikobbi wunu Lakana gin ame iwinyo wunu kede gin ame ineno wunu: 5#Ica. 35.5-6; 61.1otowaŋ waŋgi oyabere, jo oŋwalo owoto, kom odobo olony, jo a yitgi odiŋ owinyo, jo oto ocerogi oko, dok orabbi ocan amut aber. 6Dano a tammere mom oballe i koma nwoŋo tye kede winyo.”

7Ame gin adok oko, Yecu ocako kop kede lwak kop i kom Lakana, ni, “Yam iwoto wunu i tim ka neno ŋo ba? Ka neno ogada a yamo yeŋo bo? 8Kara iwoto wunu ka neno ŋo ba? Ka neno dano ame ruko boŋi abeco? Nenu ba, jo a ruko boŋi abeco bedo i pacci a rwode. 9Kara doŋ iwoto wunu piŋo? Ka neno adwarpiny? Ee ta, akobbiwu ni, ŋat ame kato adwarpiny. 10#Mal. 3.1Man en ŋat a rik ocoo pire ni,

‘Nen, acwao aorra i nyimi,

ame bino gero yo i nyimi.’

11Atittiwu ni, i akina jo ame mon onywalo, mom tye dano moro ame kato Lakana i dit; ento ŋat atidi meicel i loc me polo dit kato en. 12#Luk. 16.16Ya i kare a Lakana ituno atot onyoni, loc me polo olaro kede teko, jo atek mao gigi. 13Pien odwarpiny luŋ anaka buk me cik orabo kop ituno kede naka i kom Lakana; 14#Mal. 4.5; Mat. 17.10-13; Mar. 9.11-13cite ka itwero wunu ye, Elia a myero bin ennono, 15ŋat a tye kede yit me winyo, myero winy.

16“Kara abino poro jo me kare man kede ŋo? Gin orom kede itino ame bedo i cuk, ame lwoŋo otino wadgi kun okobo ni, 17‘Wan okuttiwu nyamulere, wun mom imyelo wunu; owerriwu wer lyel, wun mom ikok wunu’. 18Pien Lakana obino kun mom camo, mom mato daŋ, gin okobo ni, ‘En tye kede cen’. 19Wot a dano obino ame camo dok mato daŋ, gin dok okobo ni, ‘Nen dano owor kede amero, awot ora-ocoro kede obalo.’ Ento ryeko Obaŋa nen atir ni tye kakare pi ticcere.”

Can ame bino poto i kom boma mogo ape oŋut

(Nen daŋ Luka 10.13-15)

20Icennere Yecu te ero kop akemo i kom boma mogo kan ame etio iye ticcere atek adoŋo, pien okwero ŋut. 21#Ica. 23.1-18; Ejek. 26.1–28.26; Joel 3.4-8; Amoc 1.9-10; Jek. 9.2-4“Ibino neno can, yin Korajin! Ibino neno can, yin Betecaida! Pien kono tic atek adoŋo ame otio baŋwu, yam otio i Turo kede Cidon, kono gin oŋut con kun obedo i boŋo cola kede buru. 22Ento akobbiwu ni, can a Turo kede Cidon bino bedo itikatika i kare me ŋolo kop, katowu. 23#Ica. 14.13-15; Age. 19.24-28Kede yin Kapernaum, obino tiŋi malo anaka i polo bo? Pe gire; kom obino dwoki piny naka i Kadec. Pien kono tic atek adoŋo ame otio baŋwu yam otio i Codoma, kono ori naka tin. 24#Mat. 10.15; Luk. 10.12Ento akobbiwu ni, can me Codoma bino bedo itikatika i nino me ŋolo kop, kato meri.”

Biye wunu baŋa, abino weyo korwu

(Nen daŋ Luka 10.21-22)

25I kare-nono Yecu te kobo ni, “Apwoyi Pappa, Rwot me polo kede lobo, pien ikano kop magi baŋ jo aryek a ŋeo piny, iyabo baŋ itino atino. 26Eyo, Pappa, pien cunyi opwoo amannono. 27#Lak. 3.35; 1.18; 10.15Pappa otyeko jalla jami bec abeca; mom tye ŋattoro ame ŋeo Wod, kono ka Papa keken, onyo ame ŋeo Papo kono ka Wod keken, kede dano ame Wod mito nyuto Papo baŋe. 28Biye wunu baŋa jo ducu ool kede ame yee onuo, an abino weyo korwu. 29#Jer. 6.16Ryoŋ wunu lodina i ŋutwu, pwony wunu kitena; pien an awor, daŋ amwol i cunya, cunywu bino nwoŋo weo. 30Pien lodina yot, dok yecca mom pek.”

ప్రస్తుతం ఎంపిక చేయబడింది:

Matayo 11: La79

హైలైట్

షేర్ చేయి

కాపీ