Matayo 10

Yecu oyero jo apar wie aryo

(Nen daŋ Marako 3.13-19; Luka 6.12-16)

1Olwoŋo jo mere a lube apar wie aryo baŋe, te miyogi twer me ryemo cen areco, kede me caŋo kwon too ducu anaka goro-gu. 2Nyiŋ okwena apar wie aryo-nono gin ene: me agege Cimon, ame alwoŋo ni Petero, kede Anderiya ominnere; Yakobo wot a Jebedayo gin kede ominnere Lakana; 3Pilipo kede Bartolomayo; Tomaci kede Matayo ara-ocoro; Yakobo wot a Alipayo, kede Tadayo; 4Cimon me eryoŋet apyem i abumente, kede Juda me Keriot, ame cen oketo erupe i kom Yecu.

Yecu ooro jo mere apar wie aryo

(Nen daŋ Marako 6.7-13; Luka 9.1-6)

5Jo apar wie aryo-nu Yecu oorogi kun cikogi atek ni, “Kur iwot wunu iyo Orok, kur idony wunu i boma Ocamaria daŋ; 6ento wot wunu ka baŋ rommi a yam orwenyo me doggola Icrael. 7#Luk. 10.4-12Ka iwot wunu, rabu kop kun ikobo wunu ni, ‘Loc me polo doŋ onoko ceggi.’ 8Caŋ wunu otwo, cer wunu jo oto, lony wunu odobo, ryem wunu cen; omiowu nono, wun daŋ mi wunu nono. 9Kur iter wunu jabu, onyo ryal onyo mola me arwaka i del pyerwu, 10#1 Kor. 9.14; 1 Tem. 5.18kadi icao me wot, kadi boŋŋi aryo, kadi war tyen, kadi abiro; pien atic myero mi cammere. 11I boma onyo i paco ducu ame ibino donyo wunu iye, peny wunu dano a tye iye, a kite mere ber, bed wunu baŋe ituno ka ibino ya wunu i kuno. 12Ka idonyo i ot, mote wunu. 13Ka ot-tu myero, kwaye wunu kuc; ento ka mom myero, wek kucwu dwog baŋwu. 14#Tic 13.51Dano a mom bino jolowu, onyo a mom winyo kopwu, a doŋ iya wunu i ot-tu onyo i boma-nu, teŋ wunu apua i tyenwu oko. 15#Mat. 11.24; Age. 19.24-28Ateni akobbiwu ni, i nino me ŋolo kop can me Codoma kede Gomora bino bedo itikatika, kato me boma-nono.

Libo ame bino bedo i kare me anyim

(Nen daŋ Marako 13.9-13; Luka 21.12-17)

16 # Luk. 10.3 “Nen ba, an acwaowu bala rommi i kin epet; doŋ bed wunu i ryeko bala twol, dok aboŋo bal bala amam. 17#Mar. 13.9-11; Luk. 12.11-12; 21.12-15Ento gwok wunu jo: pien obino terowu i okiko, obino pwodowu i del i kacokeregi, 18obino terowu i nyim oloc kede i nyim obakki-gu pira, me kobo kop me caden baŋgi kede baŋ Orok. 19Ka ce oterowu i okiko, kur ibed wunu i par apol, ni, ibino wunu dok iye i yo aŋo, onyo ibino wunu kobo niŋo? Pien caa-nono obino miyowu kop ame ibino kobo wunu; 20pien pe wun en ibino kop wunu, ento Cuny a Papawu en ame bino kop i dogwu. 21#Mar. 13.12; Luk. 21.16Omego bino miyo omego me aneka, apap bino miyo atinnere, otino bino twarre i kom onywalgi kun miogi me aneka. 22#Mat. 24.9, 13; Mar. 13.13; Luk. 21.17Jo me rok luŋ bino dagowu pi nyiŋa. Ento ŋat ame kanyakino ituno i agikki, en bino larre. 23Ka olibowu i boma man, riŋ wunu i boma ocele; pien ateni akobbiwu ni, pe ibino tyeko wunu boma ducu me i Icarel ame nwoŋo Wot a dano mom ru odwogo.

24 # Luk. 6.40; Lak. 13.16; 15.20 “Ŋat a pwod pwonyere apwonya mom bedo adwoŋ akato ŋat a pwonye, anaka kadi opii mom bedo adwoŋ akato adwoŋŋere; 25#Mat. 9.34; 12.24; Mar. 3.22; Luk. 11.15daŋ rom kede ŋat ame opwonyo ka odoko acalo ŋat a pwonye, dok daŋ rom opii ka odoko acalo adwoŋŋere. Ka gin olwoŋo won ot ni Beeljebul, jo paco mere obino lwoŋogi kede nyiŋ arac a rom mene?

Ŋat a myero alwora

(Nen daŋ Luka 12.2-9)

26 # Mar. 4.22; Luk. 8.17 “Pi mannono, kur ilworgi wunu; pien mom tye ginnoro ame owumo a mom obino yabo kannaler, kadi gin ame okano a mom bino ŋeye. 27Kop ame an akobbiwu i piny acol, kob wunu i ceŋ; dok gin ame amuŋŋiwu i yitwu, rab wunu koppere i wi biye. 28Kur ilwor wunu jo ame neko kom ento mom otwero neko tipo; ento twora ilwor wunu Obaŋa ame tye kede twer me neko tipo kede kom i Geena.

29“Acur aryo mom ocato cente apar? Ento mom tye moro i akinagi ame poto piny a kun Papawu mom ŋeo. 30Ento wun anaka yer wiwu okwanogi iweŋ. 31Doŋ kur ilwor wunu; pirwu tek meicel akato acur apol.

Tuco nyiŋ Kricito i nyim jo

(Nen daŋ Luka 12.8-9)

32“Pi mannono, dano acel acel ame bino tuco nyiŋa i nyim jo, an daŋ abino tuco nyiŋe i nyim Pappa ame tye i polo; 33#2 Tem. 2.12ento dano acel acel ame bino kwera i nyim jo, an daŋ abino kwere i nyim Pappa ame tye i polo.

Yecu okelo popoka i kin jo

(Nen daŋ Luka 12.51-53; 14.26-27)

34“Kur itam wunu ni abino me kelo kuc i lobo; mom abino me kela kuc, ento pala me romo. 35#Mik. 7.6Pien an abino poko akina dano kede pappere, dok nyako kede tottere, kede ci-wod gin kede tattere. 36Dok okwor a dano bino bedo jo me paco mere. 37Dano ame maro pappere onyo tottere kata mom romo bedo danona; kede dano ame maro wode onyo nyare kata, mom daŋ romo bedo danona. 38#Mat. 16.24; Mar. 8.34; Luk. 9.23Dano a mom yeo yataria mere, te lubo kede ŋea mom romo bedo danona. 39#Mat. 16.25; Mar. 8.35; Luk. 9.24; 17.33; Lak. 12.25Dano ame onwoŋo kwo mere, bino rwenyo kwo mere arwenya; ento ŋat ame rwenyo kwo mere pira, bino nwoŋo.

Mot ame obino nwoŋo

(Nen daŋ Marako 9.41)

40 # Mar. 9.37; Luk. 9.48; 10.16; Lak. 13.20 “Ŋat ame jolowu, nwoŋo ojolo an; ŋat a jolo an, ojolo ŋat ame oora. 41Ŋat ame jolo adwarpiny pi nyiŋ adwarpiny, bino gamo mot acalo adwarpiny; ŋat ame jolo dano a kite atira pi nyiŋ dano a ki te atira, bino gamo mot acalo dano a kite atira. 42Dok ŋattoro ame bino miyo ikopo me pii amata aŋic baŋ ŋat acel i akina jo-ni, pien en obedo dano a luba, atittiwu ateni ni, mot mom bino rwenyo i baŋe kadi acelloro.”

ప్రస్తుతం ఎంపిక చేయబడింది:

Matayo 10: La79

హైలైట్

షేర్ చేయి

కాపీ