Luke 19
19
1ဟောည်ႇဒီန် စဝ်ဖြားယေရှု စွခ္လေါႈဟာဝ်း ကီုင်းဂျေရိခေါ။ 2မိူဝ်ႈတိုအီးအူအီး အ်ုန်အီဇီုဝ်ဇက္ခဲ အီဂေါည်ခေဲင်ကီုင်းဒီန်။ အ်ုန်မိုႈအီအွံရ် ဌာနကဲပ်ကောက်အူအီး တိုအီးခြုမ် မိူဝ်ႈရိူန်းခြီရ်ဘ္လံမ်းအူအီးမာ် မိုႈ။ 3အ်ုန်ဘိူည်ရီန်းဒေ ယိူဝ်းအဆေစဝ်ဖြားယေရှုမိုႈမာ် ဂေါႇမိုႈတိုအ်ုန်ဒျဲမ် အာဝ်ဘိူန်းတိူရ်ႈခ္လေါႈ ကူန်ရဝ်မာဂါင်။ 4ဂေါႇဘည်ဒီန် ကနာည်နံင်ယိူဝ်းအ်ုန် တစဝ်ဖြား အ်ုန်တဘုဟာဝ်းပွံတ်ရအာည်ႇ ဟိုက်ဂေါည်ပွံတ်တေဲင်တံင်ပ္လေကဒိုတ်။ 5ဂေါႇဘည်ဒီန် ခိင်ရောတ်စဝ်ဖြားအ်ုန်ဒီဒီန် အ်ုန်ဆကိူဝ်ႈတိူရ်ႈ “ဇက္ခဲ လေႈဒေဲႈချာ်န်းချာ်န်း။ အဒိူဝ်နီန် အောနံင်အီတ်ပဂါင်မည်း။” 6ဇက္ခဲမာ် လေႈဒေဲႈပွံတ်ဒါႇ တံင်ဟေဒီန် ခိုည်းခိုည်းရျံန်ရျံန် ရံပ်ရိုႈပွံတ် စဝ်ဖြားဒီန်။ 7ကဲအီယိူဝ်းတိူရ်ႈ ဘည်မိုႈဘည်ဘာည်းလှေဒီန် ကဲဆဲ့တာင်အီုင်ဂ္လံတ် “စဝ်ဖြားနီန် အ်ုန်ဟည်ဟာဝ်းဂါင် အီရေဲန်အီုင်ဂ္လံတ်ဒါင်းနီန် နံင်ဟာဝ်းဟောမ်တျံင်ရူမ်တောပ်အ်ုန်ယာ့်။” 8ဟောည်ႇဒီန် ဇက္ခဲစီဇံင်းလာ်ဒါ က္လာင်းဟြာင်းတစဝ်ဖြား “စဝ်ဖြား၊ စဝ်ဖြား အောနံင်ကဆာင်းဒဲႈ ပစေးအုက်စာထာန်မိူဝ်ႈအော အူကဒည်တကောန်အီဖ္လါန်းကဲ။ ရိူန်းပ်ုန်အူန်းတတိုအီးကဲမာ် နံင်ႎီရ်ဒဲႈႎီရ်လှိူဝ်းဘိုး ဖိုန်ပူန်။” 9စဝ်ဖြားစီဒါႈတဇက္ခဲ “မည်းမာ် ဂေါႇမိုႈမည်းမိုႈ ခြိူဝ်းအာဗြဟံ ဇူႈဟာဝ်းကဇေန်နီန် စဝ်ဖြားနံင်ကဇောည်ဒဲႈ မည်းကာည်း ဘဝ်ရမာမည်း။ 10ကောန်စဝ်ဖြားမာ် စွရောတ်ကနာည်နံင်ဟြီုက်၊ ကဇောည်ဒဲႈတကဲ အီဟြာည်ကမာ်ႈ။” 11ဂေါႇမိုႈဟည်ရောတ်ကဒံတ် ကီုင်းဂျေရုဆလင် ကဲထာင်ဆာဆနာတော်စဝ်ဖြား ဟည်မိုႈနံင်ရောတ်ဒေဲႈ ကူန်ရဝ်မာဂါင်ကဲ ဟည်ဆီုပ်တငါဝ်း ပ်ုန်ဟောစဝ်ဖြား စဝ်ဖြားစီဒဲႈဘိုး ပုင်တဲႇအူလှေ 12“မိူဝ်ႈမံင်ဆာအူပါး အ်ုန်ဟာဝ်းကုင်ဒိုင်း အီမိူဝ်ႈဧကရာဇ် ကနာည်နံင်ဘိူန်းအ်ုန်တပဲန် ဟောခံမ်းကုင်အ်ုန်ဒီန်။ 13အာည်ႇဟာဝ်းအ်ုန် အ်ုန်စီတောႇဒဲႈရိူန်း တကဲအီရေဲန်ဇီုင်းကိူရ်အီးဒီန် အူအီးတမိနာ့a ‘ဒါရိူန်းနီန် ဟြီုက်ဘြောင်ရိူန်းခြီရ် ဂါအာဝ်ႎီရ်ဒေဲႈ။’ ဟောည်ႇဒီန် ႎါည်းဟောည်ႇခါမ်လာည်းအ်ုန် တပဲန်ဟောခံမ်းဒီန် အ်ုန်စီဟာဝ်းပကပီုန်ဒိုင်း ဒီဂေါည်ဧကရာဇ် ကနာည်နံင်ႎီရ်။ 14ဂေါႇမိုႈတိုအီး ခေဲင်ကုင်နီန်မံင်ခ္လ အာဝ်ဆိင်ဒဲႈမံင်ဆာနီန် ပဲန်ဟောခံမ်း ကဲစီပ္လေႈတိုအီးဟာဝ်းက္လာင်းတဧကရာဇ် ‘ယဲအာဝ်မိူဝ်ႈမအလို ဒဲႈတိုအီးအူအီးနီန် ပဲန်ဟောခံမ်း။’ 15မိုႈလိူည် မံင်ဆာနီန် ဟည်ကတူႈကဲယိူဝ်ႈအ်ုန်ပဲန်ဟောခံမ်း၊ အ်ုန်ဟည်ႎီရ်ရောတ်ဒေဲႈ ဘည်ဟောခံမ်းကမာည်း ခေဲင်ကုင်အ်ုန်။ ဟောည်ႇဒီန် ဂေါႇမိုႈအ်ုန်ဆိင်နံပ် ရိူန်းပ်ုန်ဒဲႈအူန်းတကဲအီရေဲန်ဇီုင်းဒိူန် ထာင်မှောကဲဟည်ဟြီုက်ဘိူန်း အမျြံ တ် စီပဲန်အ်ုန်ဆူည်ႇကဲတောႇ 16အီရေဲန်ဇီုင်း ကဝ်အူ ‘အောဟည်ပ်ုန်ကတာရ်ရိူန်းအူမိနာ့ပ်ုန်ဒဲႈအူန်း တားဟောခံမ်းဒိူန် အူကိူရ်ပူန်ယာ့်။’ 17ဟောခံမ်းမာ် ‘ဟည်ပဲန်ဟည်မိုႈ။ ရိူန်းစရီတ်နီန်လိူည် မည်းကံပ်အူန်းဒါဆေတ်စာ ဂေါႇမိုႈမည်းမိုႈ တိုအီးရေဲန်ဇီုင်းဘိူန်းညှူမ် တိူဝ်ႈမည်းဟောမ်ဟောည်ႇ ကုင်ကိူရ်ကုင်။’ 18ခိင်က္လာင်းအီရေဲန်ဇီုင်း ကဝ်အာရ်မာ် ‘ရိူန်းပ်ုန်ဒဲႈ တာဟောခံမ်း အူမိနာ့ဒိူန် အောပ်ုန်ကတာရ်ႈအ်ုန်ပဲန် ကပံတ်ဖံန်ကိူရ်’ 19‘ဟောခံမ်းစီဒါႈ တိူဝ်ႈမည်းဟောမ်ဟောည်ႇ ကုင်ဖံန်ကုင်။’ 20အီရေဲန်ဇီုင်း ကဝ်ဘံန်းဒီန် စီဒါႈ ‘ရိူန်းအူမိနာ့ပ်ုန်ဒဲႈအူန်း တာဟောခံမ်း အောတီပ်ခေဲင်ပဇဲတ် ဆီမ်းအူန်းလိူည်ဘည်ဒီန်။ တိူရ်ႈပနီန်။ 21ဂေါႇ ဟောခံမ်း မိုႈတိုအီးဆမာဆီမ်းအူန်း ဂြိုပ်ုန်အာဝ်ဆဲင်အယ်၊ ဆမာဆိုက်အူန်း ပ်ုန်အာဝ်တီႇဆ်ုမ် ဂေါႇမိုႈအောယော စီပဲန်အောရေဲန်ဘည်နီန်။’ 22ခိင်ဒီန် ဟောခံမ်းစီဒါႈ ‘အီရေဲန်ဇီုင်းဇေဝ်၊ အောနံင်ႎီရ်ဒဲႈလိူည်အီုင်ဂ္လံတ် တောပ်ဘည်ကြောႈပ်ုန်ဒါႈမည်။ မည်းကံပ်နံပ်အောမိုႈတိုအီး ဆမာဆိုက်အူန်း ပ်ုန်အာဝ်တီႇဆ်ုမ် ကာည်း ဆမာဆီမ်းအူန်း ဂြိုပ်ုန်အာဝ်ဆဲင် 23ဆေဘာည်းမည်းစီအာဝ်အာပ်အူန်းရိူန်းအော ပဘာန်? ဆာ်မည်းအာပ်အူန်းပဘာန် ခိင်ႎီရ်ရောတ်အော နံင်ဘိူန်းရိူန်းလှိူဝ်းအ်ုန်ယာ့်။’ 24ဟောည်ႇဒီန် တားဟောခံမ်းစီတောႇ အီရေဲန်ဇီုင်းကဲ ‘တိူဝ်ႈရိူန်းတအ်ုန် ဒဲႈတအီရေဲန်ဇီုင်း ကဲအီဘယ်ဒေ ပ်ုန်ကတာရ်ႈဒေဲႈ ကိူရ်ပူန်ဒိူန်’ 25ကဲမာ် ဟြာင်းတဟောခံမ်း ‘တာဟောခံမ်း၊ တအ်ုန်မာ် ဟောည်ႇမိူဝ်ႈရိူန်းအူမိနာ့’ 26ဟောခံမ်းစီဒါႈ ‘အောနံင်က္လာင်းတပဲ။ အောနံင်ဒဲႈလှိူဝ်း တကဲအီမိူဝ်ႈဒါအူနဲအူနဲ ဘယ်ဒေရေဲန် ပ်ုန်ကတာရ်ႈလှေကဲဒီန်။ မိုႈလိူည် တကဲအီအာဝ်ဆမာ ရေဲန်ပ်ုန်ကတာရ်ႈဒိူန် နံင်ကတူႈအီးႎီရ်ဆီမ်းလာည်းဘိုး ခံင်ပ်ုန်မိူဝ်ႈတအ်ုန်။ 27အ်ုန်ဒဲႈပွံတ်အမိင် တောႇဒေဲႈ ရာန်ဆူကဲအီအာဝ်လိုအောပဲန် ဟောခံမ်းအူပ်ဘြောင်နီန်။ ပျံမ်းယံမ်းပွံတ်ကဲ ရအာည်ႇအော။’” 28ခိင်ဟောည်ႇဟောစဝ်ဖြား ဘည်ဒီန် အ်ုန်ဆီုပ်စွဟာဝ်းဘိုး ပကီုင်းဂျေရုဆလင်။ 29ခိင်ဟောည်ႇရောတ်ကဲ ပရဝ်ဗေသနိ ကာည်း ရဝ်ဗက်ဖာဂေ အီဂေါည်ရီမ်းပြော ဂေါင်တာန်လူန် အ်ုန်ပ္လေႈဟာဝ်းတပဲ့အ်ုန်အာရ်အီး ပဲန်အီဟာဝ်းရအာည်ႇ 30စဝ်ဖြားစီဒါႈ “ဟာဝ်းပရဝ် အီဂေါည်ရအာည်ႇတွည်း။ ဆာ်ပဲလီပ်ခေဲင်ရဝ် ပဲနံင်ယိူဝ်းပွံတ် ကဲတုအူန်းဘြံင်လီဒဲႇ ပ်ုန်ညှံမ်တိူမ်ဘအီး ခဝ်အူလိူဝ်ႈ။ ပဲစီကာႈႎံ ရ်အ်ုန် တောႇဒေဲႈအ်ုန်တအော။ 31ဆာ်အူအီးအူအီး ဆမွံတ်ပဲ ‘ဆေဘာည်းပဲစီကာႈႎံ ရ်ဘြံင်လီဒီန်?’ ပဲစီဒါႈ အရှင်သခင် လို။” 32ခိင်ရောတ်တပဲ့တော်ဂါရ်အာရ်အီးဒီန်မာ် ဂါရ်ယိူဝ်းဒေဲႈ ဘြံင်လီဒဲႇ တောပ်ဘည်က္လာင်းစဝ်ဖြား။ 33ဇိုချီုင်ကာႈကဲႎံ ရ်ဘြံင်လီဒီန် ကညာဘြံင်လီဒီန်စီဒါႈ “ဆေဘာည်းပဲစီကာႈ ႎံ ရ်ဘြံင်လီဒီန်?” 34ကဲမာ်ႎီရ်ပ္လါန်ဒါႈ “ဂေါႇမိုႈအဆျှီန်သခီန်ယဲလို။” 35ဟောည်ႇဒီန် ကဲတိူဝ်ႈဟာဝ်းဘြံင်လီဒီန် တစဝ်ဖြား ကဲပ္လါရ်ႈပေရ်တေဲင်ကဒုႇအ်ုန် စီဒဲႈစဝ်ဖြားဟိုက်ဘတေဲင်အ်ုန်။ 36အ်ုန်ဘလီဒီန် ဟာဝ်းဒေင်ဂျေရုဆလင် ကူန်ရဝ်မာဂါင်ကဲမာ် ပ္လါရ်ဂြူကဲ ရအာည်ႇစဝ်ဖြား။ 37ကူန်ရဝ်မာဂါင်တပဲ့ကဲအီဂေါည် လေႈပဂေါင်တာန်လူန်ဒီန် ကဲတိူဝ်ႈကနေဲႈဂုင်တော်စဝ်ဖြား ခိုည်းရျံန်တောပ် ပ်ုန်မှိူမ်အာမ်းပ်ုန်ရေဲန် စဝ်ဖြားပည်ဒိုႇဒိုည်ႇ 38“ဟောခံမ်း အ်ုန်အီစွရောတ် တောပ်နာမတော် စဝ်ဖြားနီန် မိူဝ်ႈခည်းမံင်ဂလာ။ ကဲဟည်ပြိုႈဒါႈ ဖုင်တဂိုးတော်စဝ်ဖြား ဒဲႈအ်ုန်ဂူႈပ္လါင် ဒဲႈအ်ုန်ယေန်ငံင် ပဆျှိုည်မျို့တော်။” 39ခိင်ဒီန် ဖာရိရှဲ မံင်ခ္လ ကဲအီဂေါည်ခေဲင်ဖုင်တိုအီးဒီန် ဒါႈတစဝ်ဖြား “ဆြာ၊ တပဲ့ဆြာဂဲ ပြိုႈရျံင်ဘည်နီန်နီန် ပနံဝ်းဒဲႈဆဲ့။” 40စဝ်ဖြားမာ် ဒါႈတကဲ “အောနံင်က္လာင်းတပဲ ဆာ်အယ်က္လာင်းကနာည်နှာင်းကဲအာဝ်ရျံင် မာဝ်းကဲ နံင်ယိူဝ်ႇရျံင်ဒိုည်ႇယာ့်။” 41ဟောည်ႇဒီန် စဝ်ဖြားရောတ်အရာပ်ကီုင်းဂျေရုဆလင် ခိင်ယိူဝ်းအ်ုန်တတိူရ်ႈကီုင်း အိုမ်ငါည်အ်ုန်ဇောႈ 42“အို ကောန်ကီုင်းမည်းအာဝ်နံပ် မိုႈတအဆေတိူဝ်ႈရောတ်ဒေဲႈ လံပ်ယေန်ငံင်နီန်ယာ့် အ်ုန်ဇေဝ်လေဲဝ်အခည်း။ မိုႈလိူည် ကဇေန်နီန် ပဲဟည်ကတူႈချြံ င်အူန်း လှေကဲနီန် ရအာည်ႇငါည်ပဲ။ 43ရာန်ဆူပဲ ဟည်ကပါ်ႇအူန်း ကပါ်ႇကပံန်ကီုင်း ကနာည်နံင်တီုက်ပဲ 44နံင်ရောတ်အခိင် ကဲနံင်ယာႈပ်ုန်လေဲဝ်ႎီုန်ဒိုႇကီုင်း နံင်ပျံမ်ယံမ်းႎီုန်ဒိုႇ ကောန်ကီုင်းပည်ဒိုႇဒိုည်ႇယာ့်။ ဂေါႇမိုႈပဲအာဝ်နံပ် မိုႈတစဝ်ဖြားစွရောတ် ကနာည်နံင်ကဇောည်ဒဲႈတပဲ။” 45ဟောည်ႇဒီန် စဝ်ဖြားဟည်လီပ်ဒေဲႈခေဲင် ဗိမာန်တော် ခ္လေါႈလေႈဒိုႇ ကဲအီယံင်းဆဴင် ခေဲင်ဗိမာန်တော် 46ခေဲင်ကျာမ်းဘိူည်ကိက်အူန်းဒါႈc “‘ဂါင်အောနီန် ဘ်ုပ်မိုႈလိူည် ဒီမှာန်းတဆု’ မာ် ပဲစီရေဲန်ဒဲႈပဲတ်အ်ုန်ပဲန် ဒီဂေါည်ထံင်တိုအီးဘြားတိုအီးစိုန်ကဲ။” 47ဟောည်ႇဒီန် စဝ်ဖြားဟည်ဟော တောန်ဆိူမ်တောန်ဆငည်း ခေဲင်ကျောင်ဗိမာန်တော်။ တိုအီးဒါင်းဇူးပုရောဟိတ်ဂဲ၊ ဆြာဆမားကျာမ်းဂဲ ကာည်း တိုအီးဒါင်းခြိူဝ်းမျိုးဇူးဂဲ ဘိူည်ရီန်းဒေ ပျံမ်းစဝ်ဖြားမာ် 48ဂေါႇမိုႈ နောႈဖိူမ် ကူန်ရဝ်မာဂါင်ကဲဂီုည်ရဲင် ဂေါည်ဒံတ်ပွံတ် ကနာည်နံင်ယိူဝ်းဒေတငါဝ်း ပ်ုန်ဟောစဝ်ဖြား စီပဲန်ကဲအာဝ်ဘိူန်းမဒေ လှံမ်ကနာည်နံင်ပျံမ်ယံမ်းစဝ်ဖြားဒီန်။
ప్రస్తుతం ఎంపిక చేయబడింది:
Luke 19: stpv-rv
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
This translation of the Shwe Palaung Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
