Mateo 9

Te Kapangyariyan ti Jesus a Mangatád ti Kapatawaden tu Kasalanan

(Markos 2:1-12; Lukas 5:17-26)

1Kanya sinumakay ti Jesus tu abang de sakay inumahabes hide a tulos tu banuwan a Capernaum. 2Káddemát di hod ay intugán nu sasangan a tolay u essa a tolay a awan makaahikad ni Jesus. U tolay ay nágkatdug tu essa a ayod. Nikuna netan ni Jesus a te pánnampalataya hide nikuna ay kinagi na tu tolay a awan makaahikad “Anak, magsaya ka dipo pinatawad ta ka dán tu kasalanan mo.” 3Nikuna nasaneg iye nu Maisto hide nu Kautusan ni Moises ay inisip de a “Awan ti galang tu Diyos iye a tolay, kumán siya a Diyos.” 4Pero natukuyan ni Jesus u inisip de kanya tinanung na hide “Bakin a magisip kam ti madukás tungkul nikán? 5Anya beman u alisto a gimitán ti tolayáy, kagiyán ku nikuna a ‘Pinatawad taka dán tu kasalanan mo,’ oni ‘Tumaknág ka sakay lumakad ka dán.’? 6Patunayan ku nikam a hikán a Anak nu Tolay ay te kapangyariyan a magpatawad ti kasalanan he ti munduwáy.” Kaya kinagi na tu tolay a awan makaahikad “Umágkat ka dán anak, báklayán mudán i ayude sakay soli ka tu bilay moy dipo nagpiyya ka dán.” 7Pagdaka a inumágkat u tolay sakay nagsole tu bilay de. 8Nikuna netan iye nu tolay hide ay nagtaka hide sakay pinuri de u Diyos a nangatád ti konna hina a kapangyariyan tu tolay hide.

Dinulawan ni Jesus u Makasalanan hide a Sumunud Nikuna

(Markos 2:13-17; Lukas 5:27-32)

9Nadid nikuna linumakad ti Jesus hod ay tinaleban na u essa a tolay a mággetnod tu lugar a págkulektaan ti buwes. Ti Mateo u ngahan nu tolay a tagakulekta ti buwes. Kinagi ni Jesus nikuna “Mákkuyog ka nikán para magin disepulus ko.” Kanya tinumaknág ti Mateo, linakaden na u tarabaho na. Sakay nákkuyog siya ni Jesus.

10Nadid nikuna kimman di Jesus tu essa a handaan tu bilay ni Mateo ay hod be hod u makpal a tagakolekta ti buwes sakay u iba hide a makasalanan a tolay. Nákkan hide ni Jesus sakay tu disepulus na hide. 11Nikuna netan iye nu Pariseo hide ay tinanung de u disepulus ni Jesus, “Bakin a pumisan a kuman u tagapagtoldu moy tu tagakolekta tu buwes sakay tu makasalanan hide?” 12Pero nasaneg ni Jesus u tanung de kanya tinábbeg na hide “U awan ti saket ay awan mangangailangan ti doktor, u te saket la. 13Angay moy intendiyán u kinagi nu Panginoon tu kasulatan na ‘Gusto ko a kagbiyan moy u tolay hide, bakán a u alay moy#9:13 Basaan tu Hoseas 6:6.’ Dipo awanák ummangay ti munduwáy para kagiyan u malinis hide a tolay a magsisi nan u makasalanan hide.”

Awan Maari a Ipisan U Bigu a Toldu ni Jesus tu Dati a Toldu nu Tolay Hide

(Markos 2:18-22; Lukas 5:33-39)

14Nadid immangay u disepulus ni Juan a Mágbautismo ni Jesus sakay nagtanung, “Bakin hikame sakay u Pariseo hide ay magkulasyon pero u disepulus mo hide ay awan?” 15Timmábbeg ti Jesus “Maari beman a magdalamhate u nákpagkasal hide ni kaguman di palla u lállake a ikasal? Siyempre awan. Pero dumemát u aldew a alapán de u lállake a ikasal, hod dán hide a magkulasyon. 16Sakay awan ti mangdihop ti bigu a tela para áppolan u ábbut tu dati a badu. Dipo ni labaan de u badu ay bumadit u bigu a tela a inyáppol de. Batakán nu bigu a tela u dati a badu sakay pisadán na. Mas dumakál dán nadid u sida nu badu. 17Pareho labi tu pággasákkan ti alak a gimet tu koblet nu hayup. Awan ti tolay a mangasák ti bigu a alak tu dati a pággasákkan dipo mapisad u pággasákkan sakay mebulak u alak. U bigu a alak ay dapat iyasák tu bigu a pággasákkan para pareho hide a awan masayang.”

Biniyag ni Jesus u Anak a Bábbey nu Essa a Puno nu Judio Hide Sakay Pinagpiyya Na U Essa a Mágdadigiyán a Babbey

(Markos 5:21-43; Lukas 8:40-56)

18Alay a nákpágguhon ti Jesus nide ay te dummemát a essa a puno nu Judio hide. Limmuhud tu atubang na sakay kinagi na, “Kákkatay la nu anak ko a bábbey, pero kaya mu siya a biyagán a huway ni angay mo itupo u kamát mo nikuna.” 19Kanya tinumaknág ti Jesus sakay u disepulus na hide sakay nákkuyog tu puno. 20Tu páglakad de ay te essa a bábbey a umunonod nide. Iye a bábbey ay duwwa pulo dán a taon a te saket a mágdadigiyan. Sakay kinahap nu bábbey u garayan nu badu ni Jesus. 21Dipo naisipan na a “Ni makahap ku la u badu na ay magpiyyaák.” 22Kanya linumingat ti Jesus sakay pákketa na tu babbey ay kinagi na “Magsaya ka, dipo tu pánnampalataya mo ay nagpiyya ka.” Ti itona be a odas ay nagpiyya u bábbey. 23Káttapos ay timmulos di Jesus a naglakad tu bilay nu puno nu Judio. Kássáddáp de tu bilay na ay netan ni Jesus u magtogtog hide ti pangpatay sakay u mahehaw a katolayan. 24Kinagiyan na hide, “Lumuwas kam a atanan, awan natay u anak, nátdug la.” Pero awan naniwala u tolay hide nikuna, pinagtawaan di pa siya. 25Nikuna a napaluwas di dán u tolay hide ay sinumáddáp ti Jesus tu kuwarto nu anak a bábbey. Inalap na u kamát nu patay a anak sakay inumikat u anak. 26U baheta tungkul ti iye a pangyayari ay kinumalat tu buo a Galilea.

Pinagpiyya ni Jesus u Duwwa a Buhák

27Kállakad ni Jesus tu bilay nu puno ay inunonod siya nu duwwa a lállake a buhák. Sakay dinulaw di siya “Anak ni David#9:27 Anak ni David: U essa a lahi ni David a magin Cristo o Tagapagligtas. Basaan tu Awit 89:3-37, Isaias 29:18-19, 35:5-6; Jeremias 23:5-6, Ezekiel 34:23-24 kagbiyan mo kami.” 28Nikuna sinumáddáp dán ti Jesus tu bilay ay inumadene nikuna u buhák hide. Sakay tinanung na hide “Maniwala kam beman a mapagpiyya takam?” Tinumábbeg hide “On Panginoon, maniwala kame.” 29Sakay kinahap ni Jesus u mata de sakay kinagi na “Dipo tu pániwala moy ay magpiyya kam.” 30Tapos ay bigla hide a naketa. Sakay mahigpit hide a pinagbilinan ni Jesus a “Dyan moy ikákkagi iye maski ni ti deya man.” 31Pero imbábbaheta de tu atanan a taga Galilea u tungkul ni Jesus.

Pinagpiyya ni Jesus U Bulol

32Nadid tu káhhektat nu duwwa ay te inyangay hide ni Jesus a hinayup a bulol. 33Kanya pinalayas ni Jesus u demonyo sakay pagdaka a nakaupos u tolay. Minagtaka u tolay hide sakay kinagi de “Sapul tu itod ay awan padla iye nangyare ti Israel.” 34Pero kinagi nu Pariseo hide “Makapalayas siya ti demonyo dipo inatádden siya ti kapangyariyan ni Satanas u hare nu demonyo hide.”

Makpal U Aniyán

35Immangay ni Jesus tu atanan a banuwan sakay babaryo. Nagtoldu siya tu sinagoga di hide. Nagtoldu siya tungkul tu Maganda a Baheta tungkul tu pághare nu Diyos. Sakay maski hádya siya a umangay ay pinagpiyya na u tolay hide tu sakisaket de. 36Nikuna a netan na u tolay hide ay kinagbiyan na hide. Dipo mabalisa hide sakay awan de tukoy ni hádya hide magaged ti tulung. Kumán hide a tupa a awan ti pastol. 37Kanya kinagi na tu disepulus na hide, “Makpal u aniyán pero sasangan la u maggapas. 38Ipagdasal moy tu Panginoon a makákkao tu ani a magpatawed ti maggapas hide tu ani.”

ప్రస్తుతం ఎంపిక చేయబడింది:

Mateo 9: MBJC

హైలైట్

షేర్ చేయి

కాపీ