Lukas 14

Pinagpiyya ni Jesus u Lállake a Limmábbeg

1Nadid, essa Aldew nu Káimang, inakit nu essa a puno nu Pariseo hide ti Jesus a kuman tu bilay na. Sakay áelingan nu komontara hide nikuna u ahikad na hide. 2Nadid tehhod a essa a lállake a limmábbeg a immadene ni Jesus. 3Kaya tinanung ni Jesus u Pariseo hide sakay u maisto hide nu Kautusan, “Kontara beman tu Kautusan u magpapiyya tu Aldew nu Káimang oni awan?”

4Pero awan hide ti dikákkagiyan, kanya tinawidan ni Jesus u te saket sakay pinagpiyya na sakay pinagsole na. 5Sakay kinagi na nide, “Ni te anak kam oni baka a natákneg tu bal-ung, awan moy beman alapán maski Aldew nu Káimang?”

6Awan hide nakatábbeg ti tanungan itod ni Jesus.

U Págpakababa sakay tu Págpalalo

7Nahalata ni Jesus a páppiliyán nu naimbitaan hide u pággetnudan a nelaan tu marangal a tolay. Kaya kinagi na i talinhagaan iye, 8“Ni inakit di ka tu kasalan ay dyan mo piliyán u pággetnudan nu mágkarangal hide a tolay, bakay ni te inakit pa hide a mas marangal nan hiko. 9Dipo mepasanike kam la ni adeniyan kam nu nagakit nikam sakay kagiyán na nikam a, ‘Pággetnudán muped i tolayáy ti paggetnudan muwe!’ Kaya meangay ka pa tu pinakamababa a pággetnudan. 10Pero ni tehhod niko a nangakit ay piliyán mo u pággetnudan a awan marangal tánni ni umadene u nangakit niko ay kagiyán na a, ‘Barkada, he kahe a mággetnod ti marangal lay a pággetnudan.’ Tánni ketan nu atanan a tolay a marangal ka. 11Dipo u palalo a tolay ay mebaba sakay u tolay a magpakababa ay melangkaw.”

12Kinagi nabe tu nangakit nikuna, “Ni mara maghanda ka ay dyan ka magakit tu barkada mo hide, u wáwwadi mo hide, u kákkapátkákka oni u magkayaman hide a kadatig mo a bilay, dipo akitán di kala be tánni magantiyan di ka. 13Pero ni maghanda ka ti dakál a handaan, u akitán mo ay u magkahirap hide a tolay, u lumpo hide, u pilay hide, sakay u buhák hide. 14Ni konna he u gimitán mo ay pagpalaan ka, dipo maski ni awan hide makagante niko, u Diyos u mangatád niko ti piremyo tu kákkabiyag a huway nu tolay hide a sumunud nikuna.”

U Talinhaga nu Dakál a Handaan

(Mateo 22:1-10)

15Nikuna masaneg itod nu essa a katubang di Jesus ay kinagi na, “Mapalad u makatubang tu lamisaan tu kahariyan nu Diyos!”

16Pero timmabbeg ti Jesus nikuna, “Essa a lállake u naghanda ti grabi't kakpal a handa, sakay nagakit ti tuna't kakpal a tolay. 17Nikuna dumemát dán u odas nu handaan ay inutusan na u utusan na hide. Iye u impekagi na tu inakit na hide a, ‘Kamon dán, nakahanda dán u atanan!’ 18Pero nagdahilan hide a atanan. Kinagi nu dipalongo, ‘Nakabaliyák ti araduwan, kailangan a angay ko itod ilingan. Pagpasensiyaanák moy dálla.’ 19Sakay kinagi be nu kaduwwa, ‘Nakabaliyák ti limma a paris a dáppog, kailangan ko a purbaan tánni matukuyan ko ni maganda hide a pagaradu. Pagpasensiyaanák moy dalla.’ 20Sakay kinagi be nu essa, ‘Awanák makaangay dipo biguwák a kasal.’

21Nagsole u utusan sakay imbaheta na iye tu amo na. Nágngál u amo sakay kinagi na tu utusan na, ‘Sigi alistuwan mo angay ka tu kakarsada sakay tu mágkapiit hide a dilan tu banuwan sakay ikuyog muhe u mágkahirap hide a tolay, u lopog hide, u buhák hide, sakay u pilay hide.’ 22Sakay kinagi nu alipin, ‘Ginimet kudán u kinagi mo, pero makpal palla a paggetnudan u awan ti maggetnod.’ 23Kaya kinagi nu amo tu alipin, ‘Angay ka tu kakarsada sakay tu dila-dilan hide sakay pilitán mo a umangay he u deya man a ketan mo tánni maputát i bilay kuwáy. 24Kagiyán ko nikam, maski essa tu dipalongo ko hide a inakit ay awan makaeennam tu inhanda ko hide!’”

U Pagin Disepulus

(Mateo 10:37-38)

25Nadid, nákkuyog ni Jesus u tuna't kakpal a tolay; immatubang siya nide sakay kinagi na, 26“Ni deya man u masoh a sumunud nikán. Pero mas mahal na tama na sakay tena na, kabanga, anak, wáwwadi sakay u sadile na a biyag ti mas higit nikán ay awan maare a magin disepulus ko. 27Ni deya man u umád a magkarga tu sadili na a kudus sakay summunud nikán ay awan maare a magin disepulus ko.

28Dipo ni te essa nikam a magbalak a magpabilay ti dakál, awan beman umetnod pa siya sakay kuwentaán na ni sa kodya u magastus na? Tánni matukuyan na ni tehhod siya a pilak a pangpatapos tu bilay na. 29Makay hanggan pundasyon la u medatton ay pagtawaan la siya nu atanan a maketa nikuna. 30Kagiyán de, ‘Sinapulan ni tolayan iye a magpabilay ti dakál pero awan labe netapos.’

31Oni deya a hare u máklaban tu essa a hare u awan pa mággetnod para pagadalan ti husto ni u sapulo a libo na a sundalo ay melaban tu kalaban na a duwwa a pulo a libo a sundalo? 32Sakay ni awan na kaya ay pagdaka a mangutus tu opisyal na hide a angay mákpagkasundu. 33Konna bi hod, awan maare a magin disepulus ko u maskin deya ni awan na adággen u atanan a katoy tu biyag na.”

U Matablal a Asen

(Mateo 5:13; Markos 9:50)

34“Mahalaga u asen, pero ni tummablal dán ay awan dán iye mapaasen a huway. 35Awan dán iye mapakinabangan maskin ihalo pa tu págsapwagan para pataba. Kaya ibut dálla iye nu tolay hide. Magsaneg u tehhod a talinga!”

ప్రస్తుతం ఎంపిక చేయబడింది:

Lukas 14: MBJC

హైలైట్

షేర్ చేయి

కాపీ