Lukas 13

Magsise Para Awan Mepahamak

1Nadid, mentaras a magtoldu ti Jesus ay tehhod a sangan a dummemát a tolay. Imbaheta de ni Jesus a pinabuno ni Pilato u sangan a taga-Galilea mentaras a magalay hide tu Diyos. 2Kinagi na nide, “Dipo beman a konna hod u nangyare nide ay isipán moy dán a mas makasalanan hide nan tu agum hide a taga-Galilea? 3Pero tandaan moy i kagiyán kuwáy nikam, ni awan kam magsise tu kasalanan moy hide ay matay kam labe a konna nide. 4Tungkul be tu sapulo ay ti walo a natay nikuna natáppelan hide nu tore a malangkaw a bilay ti Siloe ay isipán moy dán beman be a makpal hide a nagimet a madukás nan tu agum a mágyan ti Jerusalem? 5Pero tandaan moy i kagiyán kuwáy nikam, ni awan kam magsise tu kasalanan moy hide, ay mepahamak kam labe a konna nide.”

U Talinhaga tungkul tu Kayo a Igus

6Káttapos ay inyistorya ni Jesus nide iye a talinhaga, “Tehhod a essa a tolay a te mula a kayo a igus tu ubasan na. Nikuna a sákbunga dán nu igus ay angay na inileng ni te bunga dán, pero awan siya ti nenetan. 7Kaya kinagi na tu mágbantay tu ubasan, ‘Tálluwák dán he a taon a makánsoli-soliyán tán ilingan ni te bunga dán kayuwan iye, pero awanák padi ti keketan. Maganda ben wád ni pukanán mu dálla iye ta makasiwal la ti agumáy a mula.’ 8Pero timmábbeg u mágbantay, ‘Dyan ta pala pukanán nadid a taon. Kotkotan ko i lebut naáy sakay dáttonan ko ti págpaoya, 9bakay ni magbunga la ti sumunuday a taon. Pero ni awan ay pukanán ku dán.’”

Pinagpiyya ni Jesus u Bábbey a Kábbung

10Nadid, essa Aldew nu Káimang ay nagtoldu ti Jesus tu sinagoga. 11Tehhod hod a bábbey a sapulo ay ti walo dán a taon a te bábbatiyán, dipo tu madukás a ispirito a summáddáp nikuna. Kábbung siya a tahod sakay awan na dán meoolnat u bággi na. 12Pákketa nikuna ni Jesus ay dinulawan na siya sakay kinagi na, “Nagpiyya ka dán ti bábbatiyán muwe.” 13Sakay intupo ni Jesus u kamát na tu bábbey, kaya neolnat na u bággi na ti itod be sakay nagpure tu Diyos.

14Pero nágngál u puno nu sinagoga dipo nagpapiyya ti Jesus tu Aldew nu Káimang, kaya kinagi na tu tolay hide, “Tehhod a ánnam a aldew a nelaan para tu págtarabaho. Umangay kam ti aldiwan ina para mapagpiya u bábbatiyan moy, bakán a tu Aldew nu Káimang.”

15Kanya tinábbeg siya nu Panginoon, “Hikam a magkukunware hide! Awan beman magtarabaho kam be tu Aldew nu Káimang? Agen moy ben okbisan tu nagulaan moy u baka oni asno moy sakay angay moy painumán tu áinuman de maske tu Aldew nu Káimang, awan beman? 16I bábbiyan iye a gábwat tu lahe ni Abraham ay sapulo ay ti walo dán a taon a pináppahirapan ni Satanas. Awan beman dapat siya a palayaán maskin tu Aldew nu Káimang?” 17Dipo ti tábbegan itod ni Jesus ay nepasanike u atanan a kumontara nikuna sakay nagsaya be u tolay hide tu makataka-taka a bagay a ginimet na.

U Talinhaga nu Bukál nu Mustasa

(Mateo 13:31-32; Markos 4:30-32)

18Káttapos ay kinagi ni Jesus, “Ánya kaparehuway nu pághare nu Diyos? Hádya ko iye a ipareho? 19Konna iye tu bukál nu mustasa a immula nu essa a tolay tu págmulaan na. Dimmakál iye hanggan nagin kayo sakay naglobunan nu kamanukan u pingi-pinget na.”

U Talinhaga nu Pagpaalsa

(Mateo 13:33)

20Sakay kinagi pa ni Jesus, “Hádya ko a ipareho u pághare nu Diyos? 21I kaparehuwan iye ay konna tu págpaalsa a inhalo nu essa a bábbey tu tállo a takal a arina, kaya immalsa ti husto u arina.”

U Mapiit a Pintuwan

(Mateo 7:13-14, 21-23)

22Nagtulos-tulos ti Jesus tu lakad na, nagtoldu siya tu kada banuwan sakay babaryo a tinaleban na a paangay ti Jerusalem. 23Tehhod a essa a nagtanung nikuna, “Panginoon, sabadit beman la u maligtas?” 24Kinagi na nide, “Pilitán moy a makasáddáp tu mapiit a pintuwan. Makpal u masoh a sumáddáp hod pero awan makasáddáp.

25Kapag insiradu dán nu makábbilay u pintuwan ay awan nakamon pasáddáppán maski ni mákkekakagbi kam pa a mágtatoktokán, maski pa ni kagiyán moy a, ‘Panginoon, kagbiyan mu kami pay a pasáddáppán.’ Pero tábbegan nakam ti konna he, ‘Awan takam matengge!’ 26Kaya kagiyán moy be a, ‘Kaguman mo kame a kimman sakay imminom sakay nagtoldu ka pa tu banuwan me.’ 27Pero kagiyán be nu Panginoon a, ‘Awan takam matengge! Umadeyo kam nikán, atanan moy a mággagimitán ti mágkadukás!’ 28Mágsasangitán kam sakay magngahitáb u ngipa-ngipán moy kapag ketan moy a katoy tu kahariyan nu Diyos di Abraham, Isaac sakay ti Jacob sakay u atanan nu prupeta hide sakay hikam ay palayasán tu luwas. 29Sakay dumemát u tolay hide a magipun-ipun a gábwat ti sikatan sakay ti sahámman, ti amiyanan sakay ti abagatan sakay angay hide mákpággatubang tu lamisaan tu kahariyan nu Diyos. 30Talaga a tehhod a dimodyan a medipalongo sakay tehhod be a nágdipalongo a medimodyan.”

U Págmahal ni Jesus ti Jerusalem

(Mateo 23:37-39)

31Ti odas biyan itod ay te sangan a Pariseo a ummadene ni Jesus sakay kinagi de, “Lumakad ka dán he, dipo gusto ka a ipabuno ni Herodes.” 32Pero timmábbeg siya nide, “Kagiyán moy ti mauták kan ina a magpalayasák nadid tu demonyo hide sakay magpapiyyaák palla tu tehhod hide a saket. Sakay konna la bi he u gimitán ko ni ilaw sakay tu katállo a aldew ay tapusán ko u tarabaho ko. 33Pero dapat ko a itulos u lakad ko nadid, ni ilaw hanggan puwera ni ilaw. Dipo awan dapat a matay tu agum a banuwan u essa a prupeta nan ti Jerusalem la!

34Hikam a taga-Jerusalem hide, binábbuno moy u prupeta hide sakay binábbatikal moy u pinaangay hide nu Diyos a magtoldu nikam! Pumensangan takamon a gusto a lákkáppan a konna tu páglákkáp nu manok tu sepsep na hide, pero umád kam. 35Kaya nadid ay pabayan kamon nu Diyos. Tandaan moy i kagiyán kuwáy, awanák moy dán memetan hanggan a awan dumemát u odas a kagiyán moy a, ‘Pagpalaán nakwan u mágdadedemát tu ngahan nu Panginoon!’”

ప్రస్తుతం ఎంపిక చేయబడింది:

Lukas 13: MBJC

హైలైట్

షేర్ చేయి

కాపీ