پیدأیش ۲
۲
1 آسمأنأن و زیمینٚ خلقت و هر چی کی اوشأنٚ میأن نهأبو، اَطؤیی کأمیلَ بوسته. 2 هفتومی روجٚ فأرٚسِئنٚ اَمرأ، خودا خلقتٚ کأرَ تومأنَ کوده؛ پٚس هفتومی روجٚ میأن، تومأمٚ خو کأرٚ جَا دٚس فأکشِه و ایسترأحت بوکود. 3 خودا هفتومی روجَ برکت بٚدأ و بٚفرمأسته کی اون موقدس ایسٚه، چونکی او روج بو کی خودا خلقتٚ کأرٚ تومأنَ کوده پٚسی، آرأم بیگیفته.
4 اَن آسمأنأن و زیمینٚ تأریخچه بو.
آدم و حوا خلقت
او وخت کی یهوه خودا، آسمأنأن و زیمینَ چأکوده 5 زیمینٚ سٚر هیتأ بوته و گیأ بیرون نأمؤ بو، چونکی هنو یهوه خودا وأرٚش نوأرأنِه بو و هطؤیم زیمینٚ رو کشت و کأر کودنٚ وأسی آدم نئیسأ بو؛ 6 ولی زیمینٚ جَا آب بیرون اَمؤیی و تومأمٚ چؤرٚ زیمینأنَ سِئرأبَ کودی.
7 او وخت یهوه خودا، آدمَ زیمینٚ خأکٚ جَا چأکوده. بأزون آدمٚ دومأغٚ دورون حیأتٚ روحَ بٚدمسته، اونَ جأن بٚبخشه و آدم، ایتأ زٚنده موجود بوبوسته.
8 اونی پٚسی، یهوه خودا شرقٚ میأن عدنٚ سرزیمینٚ دورون، ایتأ بأغ چأکوده و او آدم کی خلق بوکوده بویَ او بأغٚ میأن بٚنأ. 9 یهوه خودا جوروأجورٚ خوشگیلٚ دأرأنَ او بأغٚ میأن سبزَ کوده کی خوشمزه مِیوه‌یأن فأدٚد. اون بأغٚ وسط، «حیأتٚ دأر» و هطؤیم «نیک و بدٚ شنأختنٚ دأرَ» بٚنأ. 10 بأغٚ آب فأدأنٚ وأسی ایتأ روخأن عدنٚ سرزیمینٚ جَا رأ دکفته اونی ور. بأزون اَ روخأن چأرتأ کوجه روخأنَ سأم بوبوسته. 11 اوّلی روخأن فیشون ایسٚه کی حَویله سرزیمینٚ اَسر تأ اوسر کی اویَه طلأ بیأفته بِه‌یَ، دؤر زٚنِه. 12 او سرزیمینٚ طلأ خٚیلی نأب ایسٚه و اویَه خوشبو صَمغ و جَزَعٚ سنگم بیأفته بِه. 13 دویُمی روخأن، جیحون ایسٚه کی کوشٚ سرزیمینٚ جَا دٚوأره. 14 سیومی روخأن، دِجلِه ایسٚه کی رأ دکفته آشورٚ شرقٚ ور و چأرومی روخأن فرأت ایسٚه.
15 یهوه خودا آدمَ بٚنأ عدنٚ بأغٚ میأن کی اویَه کأر بوکونه و اونَ بٚدأره. 16 ولی یهوه خودا اونَ بوگفته: «تو تأنی رأحت بأغٚ همٚتأ دأرأنٚ مِیوه‌یأنٚ جَا بوخوری، 17 جغرز او مِیوه کی نیک و بدٚ شنأختنٚ دأرٚ شین ایسٚه. چونکی اگه اونی مِیوه جَا بوخوری، حتم بٚدأر کی میری.»
18 یهوه خودا بٚفرمأسته: «خُب نییٚه کی آدم تنأ بِئیسه. وأستی ایتأ خورومٚ یأر اونی رِه خلق بوکونٚم.» 19 او وخت یهوه خودا تومأمٚ او حیوأنأن و پرنده‌یأنَ کی خأکٚ جَا چأکوده بو، بأوٚرده آدمٚ ورجأ کی بیدینه آدم اوشأنی رو چی نأم نِهه. اَطؤیی تومأمٚ حیوأنأن و پرنده‌یأن نأم بٚنأ بوبوستٚده. 20 پٚس آدم تومأمٚ چأرپأیأن، آسمأنٚ پرنده‌یأن و تومأمٚ وأشی جأنورأنٚ رِه نأم بٚنأ، ولی اونی رِه ایتأ خورومٚ یأر بیأفته نوبوسته.
21 او وخت یهوه خودا، آدمَ ایتأ جولفٚ خأبٚ میأن بٚبرده و ایتأ جٚه اونی دنده‌یأنَ اوسأده و اونی جیگأیَ گوشتٚ اَمرأ پورَ کوده. 22 او وخت یهوه خودا ایتأ زنأی او دنده جَا چأکوده و بأوٚرده آدمٚ ورجأ. 23 آدم بوگفته: «اَن ایتأ خأش می خأشأنٚ جَا ایسٚه و ایتأ گوشت می گوشتٚ جَا. اونی نأم "نسأ" بٚبه، چونکی اینسأنٚ جَا بیگیفته بوبوسته.»
24 هنٚ وأسی ایسٚه کی مردأی، خو پِئر و مأرَ نِهه شِه و خو زنأکَ دوچوکه و اونی پٚسی، او دوتأن ایتأ بٚده.
25 هرچن کی آدم و اونی زنأی برأنده بید، ولی خجألت نکشِیید.
ప్రస్తుతం ఎంపిక చేయబడింది:
پیدأیش ۲: GCB
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Gilaki Contemporary Bible is a Product of Transform Iran © 2024. All rights reserved. www.kelisayejame.org